Proverbios 26 - Li Santil hu

¹ Joꞌ nak li ratzꞌam que incꞌaꞌ natꞌaneꞌ saꞌ sakꞌehil, chi moco li hab naxqꞌue saꞌ xkꞌehil li kꞌoloc, joꞌcan ajcuiꞌ nak li ma̱cꞌaꞌ xnaꞌleb moco xcꞌulub ta nak ta̱qꞌuehekꞌ xlokꞌal.

² Eb li tzꞌunun incꞌaꞌ nequeꞌcuan saꞌ jun chi naꞌajej. Ut eb li cuilix yal numecꞌ nequeꞌxba̱nu. Joꞌcan ajcuiꞌ nak li majecua̱c incꞌaꞌ nachal saꞌ xbe̱n junak yal chi joꞌcan chi ma̱cꞌaꞌ xma̱c.

³ Li cacua̱y naqꞌueman xtzꞌu̱m re nak tixtau xya̱lal. Ut li bu̱r naqꞌueman li chꞌi̱chꞌ saꞌ re, re xberesinquil. Joꞌcan ajcuiꞌ li incꞌaꞌ naxtau xya̱lal. Tento xqꞌuebal xtzꞌu̱m re nak tixtau xnaꞌleb.

⁴ Ma̱sume ru li cꞌaꞌru tixye li incꞌaꞌ naxtau xya̱lal, re nak incꞌaꞌ ta̱juntakꞌe̱ta a̱cuib riqꞌuin.

⁵ Tento nak ta̱nau xsumenquil li ma̱cꞌaꞌ xnaꞌleb re nak incꞌaꞌ yo̱k xcꞌoxlanquil nak cuan xnaꞌleb.

⁶ Li ani tixtakla junak ma̱cꞌaꞌ xnaꞌleb chixba̱nunquil lix taklanquil, aꞌan yo̱ chixqꞌuebal rib saꞌ chꞌaꞌajquilal.

⁷ Li ye̱k rok ma̱cꞌaꞌ aj e nak cuan li rok xban nak incꞌaꞌ nacꞌanjelac chiru. Joꞌcan ajcuiꞌ li incꞌaꞌ naxtau xnaꞌleb. Ma̱cꞌaꞌ aj e nak tixye li cha̱bil naꞌleb.

⁸ Ma̱cꞌaꞌ aj e xqꞌuebal xlokꞌal li ma̱cꞌaꞌ xnaꞌleb. Chanchan xbacꞌbal junak pec saꞌ li rantꞌin.

⁹ Junak li calajenak incꞌaꞌ narecꞌa xrahil li qꞌuix nak na-oc chi rukꞌ. Joꞌcan ajcuiꞌ li ma̱cꞌaꞌ xnaꞌleb. Ma̱cꞌaꞌ aj e xyebal li cha̱bil naꞌleb re.

¹⁰ Li ani naxbok yalak ani chi trabajic chi incꞌaꞌ naxnau ma us xnaꞌleb malaj ut incꞌaꞌ, li jun aꞌan chanchan li ani yo̱k chixti̱canquil yalak ani riqꞌuin lix tzimaj.

¹¹ Eb li ma̱cꞌaꞌeb xnaꞌleb junelic yo̱queb chixba̱nunquil li incꞌaꞌ us. Chanchaneb li tzꞌiꞌ li nequeꞌxlou xcaꞌ sut lix xaꞌau.

¹² Toj naru xqꞌuebal xnaꞌlebeb li incꞌaꞌ nequeꞌxtau xya̱lal chiruheb li nequeꞌxye nak cuanqueb xnaꞌleb. ¿Ma incꞌaꞌ ta biꞌ nequeqꞌue retal aꞌan?

¹³ Li ani incꞌaꞌ naraj trabajic naxsicꞌ xya̱lal chanru nak incꞌaꞌ nacꞌanjelac. Naxye nak incꞌaꞌ naru naxic chi trabajic xban nak cuan jun li cakcoj saꞌ be naru nacamsi̱c xban.

¹⁴ Junak puerta na-ecꞌan saꞌ lix bisagras, abanan incꞌaꞌ naxjal xnaꞌaj. Joꞌcan ajcuiꞌ naxba̱nu li incꞌaꞌ naraj trabajic. Naxqꞌue vue̱lt saꞌ lix cuarib, abanan incꞌaꞌ nacuacli.

¹⁵ Li incꞌaꞌ nacuulac chiru cꞌanjelac naxchꞌic li rukꞌ saꞌ li plato. Abanan chi moco li tzacae̱mk naraj xqꞌuebal saꞌ re.

¹⁶ Li incꞌaꞌ naraj trabajic naxye nak aꞌan cuan xnaꞌleb chi us chiru cuukub chi cristian li nequeꞌxnau qꞌuehoc xnaꞌleb.

¹⁷ Li ani naxchꞌic rib chi pletic saꞌ xya̱nkeb li yo̱queb chi pletic, aꞌan chanchan yo̱ chixchapbal lix xic junak tzꞌiꞌ.

¹⁸ Junak lo̱c na-oc chi cutuc riqꞌuin li tzimaj cuan xxamlel re camsi̱nc.

¹⁹ Joꞌcan ajcuiꞌ li naxba̱nu raylal re li rami̱g ut naxye nak yal batzꞌu̱nc re nak xba̱nu chi joꞌcan.

²⁰ Chi ma̱cꞌaꞌ xsiꞌil li xam nachup. Ut nak ma̱cꞌaꞌeb aj molol a̱tin, ma̱cꞌaꞌ chic ple̱t.

²¹ Ma̱cꞌaꞌ ru xam cui ma̱cꞌaꞌ li xam. Ut ma̱cꞌaꞌ li xam cui ma̱cꞌaꞌ li siꞌ. Joꞌcan ajcuiꞌ nak ma̱cꞌaꞌ li ple̱t cui ma̱ ani nayoꞌoban re li ple̱t.

²² Li ticꞌtiꞌ, aꞌan chanchan li cocꞌ cab chiruheb li nequeꞌcuulac chiru ticꞌtiꞌic chirix li ras ri̱tzꞌin. Abanan ra nanak cuiꞌ li cꞌaꞌru li nequeꞌxye.

²³ Ma̱cꞌaꞌ na-oc cuiꞌ xqꞌuebal li plata chirix junak chꞌochꞌ ucꞌal. Chanchan aꞌan li kꞌunil a̱tin li nequeꞌxye li incꞌaꞌ useb xnaꞌleb. Ma̱cꞌaꞌ na-oc cuiꞌ.

²⁴ Li ani xicꞌ na-iloc incꞌaꞌ nacꞌutun chiru lix joskꞌil nak yo̱ chi a̱tinac. Abanan saꞌ lix cꞌaꞌux yo̱ chixcꞌoxlanquil chanru tixba̱nu li incꞌaꞌ us.

²⁵ Nak tatra̱tina riqꞌuin kꞌunil a̱tin ma̱pa̱b re, xban nak lix cꞌaꞌux nujenak chi ma̱usilal.

²⁶ Usta tixmuk cha̱cuu lix joskꞌil, abanan ta̱cuulak xkꞌehil nak chixjunileb teꞌxnau li ma̱usilal naxba̱nu.

²⁷ Li ani naxbec junak li jul re xtꞌanbal li ras ri̱tzꞌin, chi saꞌ ajcuiꞌ ta̱tꞌanekꞌ. Ut li ani naxtolcꞌosi junak pec re xtꞌanbal ras ri̱tzꞌin, saꞌ xbe̱n ajcuiꞌ ta̱tꞌanekꞌ.

²⁸ Li ani naticꞌtiꞌic xicꞌ naril li nacꞌuluc raylal xban lix ticꞌtiꞌ. Ut li a̱tinac riqꞌuin cha̱bil a̱tin chi yal xcab rix xchꞌo̱l, aꞌan ma̱cꞌaꞌ na-oc cuiꞌ. Caꞌaj cuiꞌ nasachoc.