Proverbios 25 - Li Santil hu

¹ Joꞌcan ajcuiꞌ li a̱tin aꞌin. Yebil xban li rey Salomón. Queꞌtzi̱ba̱c retalil xbaneb li cui̱nk li queꞌcꞌanjelac chiru laj Ezequías lix reyeb laj Judá.

² Naqꞌueheꞌ xlokꞌal li Dios nak cuan li cꞌaꞌak re ru tixcanab chi mukmu. Ut naqꞌueheꞌ ajcuiꞌ xlokꞌal li rey nak tixtau ru li cꞌaꞌru mukmu.

³ Ma̱ ani nataꞌoc ru joꞌ najtil cuan li choxa ut chanru lix chamal li chꞌochꞌ. Joꞌcan ajcuiꞌ lix cꞌaꞌuxeb li rey. Ma̱ ani nataꞌoc ru.

⁴ Cui na-isi̱c lix tzꞌajnil li plata, laj tenol chꞌi̱chꞌ naru naxyi̱b li cha̱bil kꞌol chiru.

⁵ Joꞌcan ajcuiꞌ nak te̱risiheb chi cꞌanjelac chiru li rey li incꞌaꞌ useb xnaꞌleb re nak lix cuanquilal li rey ta̱cana̱k chi xakxo saꞌ xnaꞌaj xban li ti̱quilal naxba̱nu.

⁶ Me̱nimobresi e̱rib chiru li rey ut incꞌaꞌ te̱qꞌue e̱rib saꞌ xnaꞌajeb li ni̱nkeb xcuanquil.

⁷ Kꞌaxal us nak toj teꞌxye a̱cue, “Numen chak arin chi ubej,” chiru nak teꞌxcꞌut a̱xuta̱n chiruheb li xni̱nkaleb ru.

⁸ Li cꞌaꞌru ta̱cuil riqꞌuin xnakꞌ a̱cuu incꞌaꞌ tatxic saꞌ junpa̱t chixyebal chiruheb laj rakol a̱tin xban nak ma̱re cuan junak chic ta̱xic chixyebal nak incꞌaꞌ ya̱l li yo̱cat chixyebal ut ma̱re incꞌaꞌ chic ta̱tau cꞌaꞌru tatsume̱nk cuiꞌ.

⁹ Us nak ta̱nau xcolbal a̱cuib chiruheb li ani teꞌjitok a̱cue. Abanan ma̱serakꞌi chiru jalan li cꞌaꞌru cuan chi mukmu.

¹⁰ Ma̱re ani ta̱abi̱nk a̱cue ut li cꞌaꞌru xaba̱nu ta̱naꞌekꞌ ut ma̱cꞌaꞌ chic cꞌaꞌru ta̱ba̱nu re xyi̱banquil ru.

¹¹ Junak cha̱bil a̱tin saꞌ xkꞌehil, aꞌan chanchan jun li cha̱bil manzana yi̱banbil riqꞌuin oro ut qꞌuebil lix sahob ru riqꞌuin plata.

¹² Kꞌaxal lokꞌ li ani narabi lix kꞌusbal. Chanchan li matkꞌab ut li kꞌol yi̱banbil riqꞌuin cha̱bil oro.

¹³ Kꞌaxal lokꞌ li cha̱bil takl chokꞌ re li ani nataklan re. Naxqꞌue xsahil xchꞌo̱l lix patrón. Chanchan xquehal li sakbach chiru li cutan tik ru.

¹⁴ Li ani naxnimobresi rib chixyebal nak nabal naxqꞌue ut ma̱cꞌaꞌ naxqꞌue, li jun aꞌan chanchan li ikꞌ ut li chok li ma̱cꞌaꞌ hab chi saꞌ.

¹⁵ Li ani nim xcuyum naxcubsi xjoskꞌil li cuan xcuanquil. Li kꞌunil a̱tin naxtenkꞌa xjalbal xcꞌaꞌux junak li kꞌaxal cau xchꞌo̱l.

¹⁶ Cui ta̱tau li xyaꞌal cab ma̱tzaca nabal. Caꞌaj cuiꞌ tzꞌakal ta̱tzaca. Cui ta̱tzaca chi nabal, ma̱re tatxqꞌue chi xaꞌcuac.

¹⁷ Joꞌcan ut nak ta̱cuulaꞌani junak la̱ cuami̱g, ma̱ba̱nu chi cocꞌ aj xsaꞌ xban nak cui yo̱cat chi xic rajlal riqꞌuin naru natitzꞌ cha̱cuilbal ut xicꞌ chic tatril.

¹⁸ Li ani naxyoꞌob ticꞌtiꞌ chirix li rami̱g, aꞌan naxba̱nu raylal re. Chanchan junak li martillo, malaj junak li chꞌi̱chꞌ caꞌ pacꞌal xkꞌesnal, malaj ut chanchan li tzimaj kꞌes ruꞌuj.

¹⁹ Chanchan nak ra li ruch ke, malaj ut chanchan tokol junak li kok cui takacꞌojob kachꞌo̱l saꞌ xbe̱n junak incꞌaꞌ us xnaꞌleb saꞌ xkꞌehil li rahil chꞌo̱lej.

²⁰ Li ani naxic chi bicha̱nc riqꞌuin junak ra saꞌ xchꞌo̱l, aꞌan naxqꞌue xtzꞌakob xrahil xchꞌo̱l. Chanchan nak naxqꞌue vinagre saꞌ lix yocꞌolal malaj ut narisi li rakꞌ nak yo̱ li que.

²¹ Cui li xicꞌ na-iloc a̱cue ta̱tzꞌoca̱k, qꞌue chi cuaꞌac. Ut cui ta̱chakik re, qꞌue chi ucꞌac.

²² Cui ta̱ba̱nu re chi joꞌcan kꞌaxal cuiꞌchic xuta̱nal ta̱e̱lk. Chanchan nak yo̱cat chixqꞌuebal li ru xam saꞌ xjolom. Ut li Dios tixqꞌue a̱kꞌajca̱munquil.

²³ Li ikꞌ li nachal saꞌ li norte naxcꞌam chak li hab. Joꞌcan ajcuiꞌ nak li ani naa̱tinac saꞌ joskꞌil naxchikꞌ xjoskꞌil li yo̱ chi abi̱nc re.

²⁴ Kꞌaxal us li cua̱nc saꞌ junak cab nebaꞌ chiru li cua̱nc saꞌ junak xnimal ru cab riqꞌuin junak ixakilbej junes pletic naxba̱nu.

²⁵ Li cha̱bil esilal li nachal chak saꞌ najtil naꞌajej naxqꞌue xsahil chꞌo̱lej joꞌ li cha̱bil haꞌ li narucꞌ li ta̱chakik re.

²⁶ Li ti̱c xchꞌo̱l li naxqꞌue rib saꞌ rukꞌeb li incꞌaꞌ useb xnaꞌleb, aꞌan chanchan jun li haꞌ li naxrepuelti rib ru ut naxcuaclesi li tzꞌaj li cuan chi rubel.

²⁷ Incꞌaꞌ us xtzacanquil li xyaꞌal cab chi nabal. Joꞌcan ajcuiꞌ xsicꞌbal li lokꞌal incꞌaꞌ us.

²⁸ Li ani incꞌaꞌ naxnau xcuybal rib, aꞌan chanchan jun li tenamit xiu xiu cuan xban nak incꞌaꞌ sutsu saꞌ tzꞌac.