Proverbios 24 - Li Santil hu

¹ Me̱ra ru li ma̱usilal li nequeꞌxba̱nu li incꞌaꞌ useb xnaꞌleb. Ut me̱rahi ru cua̱nc saꞌ xya̱nkeb.

² Xban nak eb aꞌan junes elkꞌac nequeꞌxcꞌoxla. Ut junes yibru aj a̱tin nequeꞌa̱tinac.

³ Li ani cuan xnaꞌleb naxcꞌoxla chi us chanru nak tixyi̱b li rochoch. Xban nak se̱b xchꞌo̱l naxxakab lix cimiento saꞌ xnaꞌaj.

⁴ Xban nak cuan xnaꞌleb naxqꞌue nabal li cꞌaꞌak re ru chꞌinaꞌuseb ut li terto xtzꞌak saꞌ li rochoch.

⁵ Kꞌaxal us nak cua̱nk xnaꞌleb chiru nak cua̱nk xcuanquil.

⁶ Li ani naxic chi pletic toj naxcꞌu̱b ru chanru tixba̱nu. Cui cuan li cꞌaꞌru ta̱re̱chani, aꞌan xban nak quixcꞌu̱luban li naꞌleb li quiqꞌueheꞌ re xbaneb nabal laj qꞌuehol naꞌleb.

⁷ Li incꞌaꞌ naxtau xya̱lal incꞌaꞌ naxnau cꞌaꞌru tixsume cuiꞌ nak cuan chiru laj rakol a̱tin xban nak ma̱cꞌaꞌ xnaꞌleb.

⁸ Li ani junes li incꞌaꞌ us naxcꞌoxla xba̱nunquil, “aꞌan incꞌaꞌ us xnaꞌleb” ta̱yehekꞌ re.

⁹ Lix cꞌaꞌux li ma̱cꞌaꞌ xnaꞌleb, aꞌan ma̱c. Xicꞌ na-ileꞌ xbaneb li cristian li nahoboc.

¹⁰ Cui nachꞌinan a̱chꞌo̱l nak cuancat saꞌ chꞌaꞌajquilal, aꞌan naraj naxye nak ma̱cꞌaꞌ xcacuilal a̱chꞌo̱l.

¹¹ Chetenkꞌaheb li ma̱cꞌaꞌeb xma̱c re nak naru teꞌxcol rib li ac tenebanbil ca̱mc saꞌ xbe̱neb. Checoleb rix li ac oc re xcamsinquileb.

¹² Usta ta̱ye nak ma̱cꞌaꞌ nacanau, abanan li Dios naxnau cꞌaꞌru cuan saꞌ a̱chꞌo̱l. Li Dios na-iloc a̱cue ut naxnau cꞌaꞌru yo̱cat. Aꞌan ta̱kꞌajca̱mu̱nk a̱cue aꞌ yal chanru la̱ yehom a̱ba̱nuhom.

¹³ Ex cualal incꞌajol, chetzaca li xyaꞌal cab xban nak cha̱bil ut sa xtzacanquil.

¹⁴ Joꞌ xquiꞌal li xyaꞌal cab, joꞌcan ajcuiꞌ li cha̱bil naꞌleb nak te̱cꞌul. Cui te̱tau e̱naꞌleb us tex-e̱lk riqꞌuin li nequecꞌoxla xba̱nunquil ut te̱cꞌul li cꞌaꞌru yo̱quex chiroybeninquil.

¹⁵ Me̱cꞌu̱b junak naꞌleb incꞌaꞌ us xba̱nunquil re te̱ba̱nu raylal reheb li cha̱bileb. Chi moco tex-oc saꞌ li rochocheb chixpoꞌbal ru li cꞌaꞌruheb re.

¹⁶ Usta ta̱ba̱nu cuukub sut raylal reheb li ti̱queb xchꞌo̱l, abanan eb aꞌan teꞌxcuy ut incꞌaꞌ ta̱chꞌina̱nk xchꞌo̱leb. Abanan eb li incꞌaꞌ useb xnaꞌleb ra teꞌxcꞌul nak teꞌosokꞌ.

¹⁷ Incꞌaꞌ chisahokꞌ e̱chꞌo̱l nak yo̱queb chi cꞌuluc raylal li xicꞌ nequeꞌiloc e̱re,

¹⁸ xban nak li Ka̱cuaꞌ incꞌaꞌ nacuulac chiru nak te̱ba̱nu chi joꞌcan. Ma̱re anchal tixjal lix cꞌaꞌux li Dios ut ta̱risi li raylal saꞌ xbe̱neb.

¹⁹ Mexjoskꞌoꞌ xbaneb li incꞌaꞌ useb xnaꞌleb ut me̱rahi ru li ma̱usilal li nequeꞌxba̱nu.

²⁰ Li incꞌaꞌ useb xnaꞌleb moco us ta nak teꞌosokꞌ. Eb li incꞌaꞌ useb xnaꞌleb teꞌosokꞌ joꞌ nak nachup li xam.

²¹ Ex cualal incꞌajol, chexucua ru li Ka̱cuaꞌ ut chexucua ajcuiꞌ ru li rey. Me̱cꞌam e̱rib riqꞌuineb li xicꞌ nequeꞌiloc reheb.

²² Eb aꞌan teꞌosokꞌ saꞌ junpa̱t. Ma̱ ani nanaꞌoc re chanru li raylal li ta̱qꞌuehekꞌ saꞌ xbe̱neb xban li Ka̱cuaꞌ ut xban li rey.

²³ Joꞌcan ajcuiꞌ eb li a̱tin aꞌin yebil xbaneb li cuanqueb xnaꞌleb. Incꞌaꞌ us nak laj rakol a̱tin tixsicꞌ ru ani tixcol rix saꞌ li rakleb a̱tin.

²⁴ Li ani tixye re li cuan xma̱c, “La̱at ti̱c a̱chꞌo̱l,” aꞌan ta̱tzꞌekta̱na̱k xbaneb li tenamit ut incꞌaꞌ chic ta̱ajekꞌ ru.

²⁵ Abanan osobtesinbilakeb chi nabal li nequeꞌrakoc a̱tin saꞌ ti̱quilal saꞌ xbe̱neb li cuanqueb xma̱c.

²⁶ Kꞌaxal lokꞌ li ani naxye chi tzꞌakal li ya̱l.

²⁷ Xbe̱n cua te̱cꞌanjela ru le̱ chꞌochꞌ li cuan saꞌ cꞌaleba̱l. Chirix aꞌan te̱yi̱b le̱ rochoch.

²⁸ Me̱ye nak cuan xma̱c le̱ ras e̱ri̱tzꞌin cui ma̱cꞌaꞌ xma̱c, chi moco te̱yoꞌob a̱tin chirix.

²⁹ Me̱cꞌoxla xqꞌuebal re̱kaj li raylal xba̱nu e̱re. Me̱ba̱nu reheb le̱ ras e̱ri̱tzꞌin joꞌ xeꞌxba̱nu e̱re la̱ex.

³⁰ Xinnumeꞌ chak cuan cuiꞌ xnaꞌaj li racui̱mk li cui̱nk li incꞌaꞌ naraj trabajic. Ut xinnumeꞌ ajcuiꞌ saꞌ li naꞌajej li aubil cuiꞌ lix uvas li ma̱cꞌaꞌ xnaꞌleb.

³¹ Ut li naꞌajej li quicuil chak nujenak chi pim ut chi qꞌuix. Ut li tzꞌac li sutsu cuiꞌ ac poꞌbileb.

³² Li cꞌaꞌru quicuil chak saꞌ li naꞌajej aꞌan quicana saꞌ inchꞌo̱l ut riqꞌuin aꞌan quintau innaꞌleb.

³³ Li ani junes cua̱rc naraj ut nacana saꞌ rochoch chi kꞌalkꞌo li rukꞌ chire xchꞌo̱l,

³⁴ aꞌan ta̱cha̱lk nebaꞌil saꞌ xbe̱n. Chanchan nak nachal chi elkꞌac laj e̱lkꞌ, li cuan xpu̱b saꞌ rukꞌ.