Proverbios 23 - Li Santil hu

¹ Li xcuak li naꞌleb, aꞌan aꞌin: Nak tatbokekꞌ chi cuaꞌac riqꞌuin junak cui̱nk nim xcuanquil, ta̱cꞌoxla chi us ani aj iqꞌuin yo̱cat chi cuaꞌac.

² Matcuaꞌac chi nabal usta kꞌaxal tattzꞌoca̱k.

³ Ma̱ra ru li cha̱bil tzacae̱mk cuan saꞌ lix me̱x, xban nak ma̱re re a̱balakꞌinquil nak xqꞌue.

⁴ Li xcuuk li naꞌleb, aꞌan aꞌin: Me̱tacuasi e̱rib chixsicꞌbal le̱ biomal chi moco chi xic e̱chꞌo̱l chirix li cꞌaꞌru cuan e̱re.

⁵ La̱ex te̱qꞌue retal nak li biomal ma̱cꞌaꞌ na-oc cuiꞌ. Saꞌ junpa̱t na-osoꞌ. Chanchan nak narupupic li cꞌuch.

⁶ Li xcuakxak li naꞌleb, aꞌan aꞌin: Incꞌaꞌ texxic chi cuaꞌac riqꞌuineb li pixeb, chi moco te̱ra ru lix cha̱bil tzacae̱mk.

⁷ Eb aꞌan nequeꞌxbok chi cuaꞌac ut nequeꞌxye e̱re “Ocankex, cuaꞌinkex”. Abanan moco ya̱l ta li nequeꞌxye. Incꞌaꞌ nequenau cꞌaꞌru cuan saꞌ xchꞌo̱leb.

⁸ Te̱xaꞌcua li cꞌaꞌru xetzaca ut ma̱cꞌaꞌ aj e nak xeye cha̱bil a̱tin reheb.

⁹ Li xbele li naꞌleb, aꞌan aꞌin: Incꞌaꞌ te̱qꞌue xnaꞌleb li incꞌaꞌ nequeꞌxtau xya̱lal, xban nak teꞌxseꞌe li cha̱bil naꞌleb li ta̱qꞌuehekꞌ reheb.

¹⁰ Li xlaje li naꞌleb, aꞌan aꞌin: Incꞌaꞌ te̱jal xnaꞌaj li nuba̱l li ac qꞌuebil najter, chi moco te̱chap xchꞌochꞌeb li ma̱cꞌaꞌeb xnaꞌ xyucuaꞌ,

¹¹ xban nak eb aꞌan cuan Jun cau rib nacoloc reheb. Ut Aꞌan ta̱rakok a̱tin saꞌ e̱be̱n.

¹² Li xjunlaju li naꞌleb, aꞌan aꞌin: Qꞌuehomak e̱chꞌo̱l chixqꞌuebal retal le̱ tijbal ut te̱rabi li naꞌleb li ta̱qꞌuehekꞌ e̱re.

¹³ Li xcablaju li naꞌleb, aꞌan aꞌin: Junelic te̱kꞌus li sa̱j al. Cui te̱qꞌue cuib oxibak lix tzꞌu̱m, aꞌan incꞌaꞌ ta̱ca̱mk xban.

¹⁴ Te̱qꞌue chi tzꞌu̱m. Chi joꞌcan yo̱kex chixcolbal chiru li sachc.

¹⁵ Ex cualal incꞌajol, nak te̱tau le̱ naꞌleb, kꞌaxal cuiꞌchic ta̱sahokꞌ inchꞌo̱l la̱in.

¹⁶ Cꞌajoꞌ nak ta̱sahokꞌ saꞌ inchꞌo̱l nak tincuabi nak yo̱kex chi a̱tinac saꞌ ti̱quilal.

¹⁷ Me̱ra ru li ma̱usilal li nequeꞌxba̱nu eb laj ma̱c. Junelic ban chexucua ru li Dios.

¹⁸ Cui te̱ba̱nu aꞌan, us tex-e̱lk riqꞌuin li cꞌaꞌru te̱ba̱nu ut te̱cꞌul li cꞌaꞌru yo̱quex chiroybeninquil.

¹⁹ Abihomak, ex cualal incꞌajol. Chicua̱nk e̱naꞌleb ut qꞌuehomak e̱chꞌo̱l chi cua̱nc saꞌ ti̱quilal.

²⁰ Incꞌaꞌ te̱cꞌam e̱rib riqꞌuineb li nequeꞌcala. Ut me̱ba̱nu e̱re joꞌ nequeꞌxba̱nu li nequeꞌnum-ucꞌac ut nequeꞌnumcuaꞌac.

²¹ Eb li nequeꞌcala ut eb li nequeꞌnum-ucꞌac nequeꞌnumcuaꞌac teꞌcana̱k chi ma̱cꞌaꞌ cuanqueb re. Ut eb li incꞌaꞌ nequeꞌraj cꞌanjelac, teꞌcana̱k chi ma̱cꞌaꞌ rakꞌeb.

²² Chex-abi̱nk chiru le̱ yucuaꞌ xban nak cui ta ma̱cꞌaꞌ aꞌan, ma̱cꞌaꞌex ajcuiꞌ raj la̱ex. Me̱tzꞌekta̱na le̱ naꞌ nak ac xchecoꞌ. Cheqꞌue ban xlokꞌal.

²³ Li naꞌleb ut lix ya̱lal ut li kꞌusecꞌ kꞌaxal terto xtzꞌak. Me̱canab chi numecꞌ yal chi joꞌcan.

²⁴ Cꞌajoꞌ nak ta̱sahokꞌ saꞌ xchꞌo̱l junak yucuaꞌbej nak cua̱nk junak ralal cha̱bil ut cua̱nk xnaꞌleb. Cuan cꞌaꞌut nak sahak saꞌ xchꞌo̱l riqꞌuin.

²⁵ Cheqꞌuehak biꞌ chi sahocꞌ saꞌ xchꞌo̱leb le̱ naꞌ e̱yucuaꞌ. Junelic cheꞌsahokꞌ saꞌ xchꞌo̱leb e̱riqꞌuin.

²⁶ Ex cualal incꞌajol, cheqꞌuehak e̱chꞌo̱l chirabinquil li cꞌaꞌru tinye e̱re. Ut cheba̱nuhak li us joꞌ ninba̱nu la̱in.

²⁷ Me̱qꞌue e̱rib chixbalakꞌi li ixk li incꞌaꞌ us xnaꞌleb. Ut me̱qꞌue e̱rib chixbalakꞌi li ixk li naxcꞌayi rib xban nak eb li ixk aꞌan chanchaneb li chamal jul li naru textꞌanekꞌ cuiꞌ.

²⁸ Eb li ixk aꞌan chanchaneb laj e̱lkꞌ yo̱queb chixqꞌuebal retal jokꞌe naru teꞌxqꞌue chi tꞌanecꞌ li cui̱nk. Ut nabaleb li cui̱nk nequeꞌxqꞌue chi sachc.

²⁹ ¿Aniheb li teꞌcꞌuluk re li raylal? ¿Aniheb li teꞌcꞌuluk re li chꞌaꞌajquilal? ¿Aniheb li nequeꞌpletic? Ut, ¿aniheb li nequeꞌya̱bac? ¿Aniheb li nequeꞌtochꞌeꞌ chi ma̱cꞌaꞌ rajbal? Ut, ¿aniheb li cak cak nequeꞌiloc?

³⁰ Aꞌan eb li junelic yo̱queb chi cala̱c, li incꞌaꞌ nequeꞌxcanab ucꞌac vino. Junelic yo̱queb chixsicꞌbal jalan chic haꞌ re teꞌcala̱k.

³¹ Abanan la̱ex, ex cualal incꞌajol, me̱qꞌue e̱rib chi a̱le̱c xban li vino, usta cak cak ru nak na-oc saꞌ li secꞌ. Usta sa rucꞌbal, me̱ra ru.

³² Cui te̱rucꞌ li vino, aꞌan naqꞌuehoc raylal. Chanchan natiꞌoc li cꞌantiꞌ.

³³ Nak ac xerucꞌ li vino, texqꞌue chi rilbal cꞌaꞌak re ru incꞌaꞌ us ut tex-oc chi a̱tinac yibru aj a̱tin xban nak incꞌaꞌ chic jultic e̱re.

³⁴ Te̱recꞌa nak chanchan nak yocyo̱quex saꞌ junak jucub saꞌ xbe̱n li palau. Malaj ut te̱recꞌa nak chanchan nak cuanquex chak saꞌ ruꞌuj junak li cheꞌ najt xteram.

³⁵ Ut te̱ye: —Xineꞌxsacꞌ ut incꞌaꞌ xcuecꞌa. Xineꞌxsacꞌ ut incꞌaꞌ xinqꞌue retal jokꞌe xineꞌxsacꞌ. Nak ta̱aj cuu, tinxic cuiꞌchic chi ucꞌac, chaꞌkex.