Proverbios 22 - Li Santil hu

¹ Kꞌaxal us nak ta̱abi̱k resil nak cha̱bil xnaꞌleb junak chiru nak cua̱nk nabal lix biomal. Kꞌaxal us nak ta̱qꞌuehekꞌ xlokꞌal chiru nak cua̱nk nabal lix oro ut lix plata.

² Li biom ut li nebaꞌ juntakꞌe̱teb xban nak li Dios quiyi̱ban reheb.

³ Eb li cuanqueb xnaꞌleb nequeꞌxqꞌue retal li ma̱usilal ut nequeꞌxcol ribeb chiru. Abanan eb li ma̱cꞌaꞌeb xnaꞌleb nequeꞌxcꞌul li raylal nachal saꞌ xbe̱neb xban nak incꞌaꞌ nequeꞌxnau xqꞌuebal retal.

⁴ Li ani naxcubsi rib ut naxxucua ru li Ka̱cuaꞌ, aꞌan tixcꞌul chokꞌ xkꞌajca̱munquil lix yuꞌam, lix biomal ut lix lokꞌal.

⁵ Junes raylal nequeꞌxcꞌul li incꞌaꞌ useb xnaꞌleb. Abanan li nequeꞌxba̱nu cue̱nt riqꞌuin lix yuꞌameb incꞌaꞌ nequeꞌxcꞌul chi joꞌcan.

⁶ Nak toj coqꞌueb li cocꞌal, us xcꞌutbal chiruheb chanru li cua̱nc saꞌ ti̱quilal ut nak ac xeꞌni̱nkan incꞌaꞌ teꞌxcanab xba̱nunquil.

⁷ Eb li biom nequeꞌnumta saꞌ xbe̱neb li nebaꞌ. Ut li ani natoꞌonin riqꞌuin li cuan xtumin, chanchan chic xmo̱s nacana cuiꞌ.

⁸ Li ani naxba̱nu ma̱usilal, ma̱usilal ajcuiꞌ tixcꞌul. Ut ta̱cuulak xkꞌehil nak incꞌaꞌ chic ta̱ru̱k tixcꞌutbesi lix joskꞌil.

⁹ Li ani natokꞌoban u ta̱osobtesi̱k xban nak tixqꞌueheb xtzacae̱mk li ma̱cꞌaꞌ cuan reheb.

¹⁰ Isihomakeb saꞌ e̱ya̱nk li nequeꞌhoboc. Chi joꞌcan ma̱cꞌaꞌak chic pletic ut hoboc saꞌ e̱ya̱nk.

¹¹ Li ani nacuan saꞌ ti̱quilal ut cha̱bil naa̱tinac, li rey tixcꞌam rib saꞌ amiguil riqꞌuin.

¹² Li Ka̱cuaꞌ junelic na-iloc reheb li cuanqueb xnaꞌleb. Ut naxcꞌut nak moco ya̱l ta li nequeꞌxye li nequeꞌticꞌtiꞌic.

¹³ Li ani incꞌaꞌ naraj trabajic naxsicꞌ xya̱lal chanru nak incꞌaꞌ nacꞌanjelac. Naxye nak incꞌaꞌ naru naxic chi trabajic xban nak cuan jun li cakcoj saꞌ be naru nacamsi̱c xban.

¹⁴ Li cꞌaꞌru naxye li ixk incꞌaꞌ us xnaꞌleb, aꞌan chanchan jun li jul cham ut aran nequeꞌtꞌaneꞌ li nequeꞌtzꞌekta̱na̱c xban li Ka̱cuaꞌ.

¹⁵ Eb li cocꞌal nequeꞌxba̱nu li incꞌaꞌ us xban nak ma̱cꞌaꞌeb xnaꞌleb. Abanan cui teꞌqꞌuehekꞌ chi tzꞌu̱m teꞌxtau xnaꞌleb.

¹⁶ Ta̱cuulak xkꞌehil nak ta̱nebaꞌokꞌ li ani nabiomoꞌ xban xrahobtesinquil li nebaꞌ. Ut li ani naxqꞌue xtumin re li biom ta̱cana̱k saꞌ nebaꞌil.

¹⁷ Cheqꞌuehak retal li nequeꞌxye li cuanqueb xnaꞌleb. Ut cheqꞌuehak retal chi us li cꞌaꞌru nincꞌut che̱ru.

¹⁸ Kꞌaxal us nak ta̱cana̱k saꞌ le̱ chꞌo̱l li cꞌaꞌru te̱tzol. Chi joꞌcan naru te̱ye re jalan li cꞌaꞌru xetzol.

¹⁹ Nacuaj xqꞌuebal e̱naꞌleb anakcuan re nak te̱nau ut re ajcuiꞌ nak te̱cacuubresi e̱chꞌo̱l riqꞌuin li Ka̱cuaꞌ.

²⁰ La̱in xintzꞌi̱ba laje̱b xcaꞌcꞌa̱l chi naꞌleb re nak te̱tzol e̱rib ut te̱tau e̱naꞌleb.

²¹ Aꞌin yo̱quin chixyebal e̱re re nak te̱nau xya̱lal ut re ajcuiꞌ nak te̱nau xsumenquil li cꞌaꞌru ta̱patzꞌekꞌ e̱re.

²² Li xbe̱n naꞌleb, aꞌan aꞌin: Me̱relkꞌa li cꞌaꞌru reheb li nebaꞌ yal xban nak nebaꞌeb. Chi moco te̱rahobtesiheb nak yo̱k chi rakecꞌ a̱tin saꞌ xbe̱neb yal xban nak incꞌaꞌ naru teꞌxcol ribeb.

²³ Li Ka̱cuaꞌ, aꞌan ta̱colok reheb li nebaꞌ ut tixrahobtesiheb li nequeꞌrahobtesin reheb li nebaꞌ.

²⁴ Li xcab li naꞌleb, aꞌan aꞌin: Incꞌaꞌ te̱cꞌam e̱rib saꞌ amiguil riqꞌuineb laj ple̱t, chi moco te̱cꞌam e̱rib riqꞌuineb li chꞌinpoꞌeb.

²⁵ Ma̱re te̱tzol e̱re lix naꞌlebeb aꞌan ut incꞌaꞌ chic usak le̱ naꞌleb.

²⁶ Li rox li naꞌleb, aꞌan aꞌin: Me̱cꞌu̱luban saꞌ e̱be̱n xtojbal xcꞌas jalan cristian.

²⁷ Cui la̱ex incꞌaꞌ naru te̱toj li cꞌas, naru nequeꞌxcꞌam le̱ cuarib re xtojbal li cꞌas.

²⁸ Li xca̱ li naꞌleb, aꞌan aꞌin: Me̱jal xnaꞌaj li nuba̱l li ac qꞌuebil xbaneb le̱ xeꞌto̱nil yucuaꞌ.

²⁹ Li roꞌ li naꞌleb, aꞌan aꞌin: Li ani naxnau cꞌanjelac chi cha̱bil, aꞌan ta̱cꞌanjelak riqꞌuineb li rey. Moco riqꞌuin ta yalak ani ta̱trabajik.