Proverbios 21 - Li Santil hu

¹ Joꞌ nak li Ka̱cuaꞌ naxberesi li nimaꞌ, joꞌcan ajcuiꞌ nak naxberesi lix cꞌaꞌuxeb li rey.

² Eb li cristian nequeꞌxcꞌoxla nak us chixjunil li nequeꞌxba̱nu. Abanan li Ka̱cuaꞌ naxnau ma us malaj ut incꞌaꞌ us li cuan saꞌ lix cꞌaꞌuxeb.

³ Chexcua̱nk saꞌ cha̱bilal ut saꞌ ti̱quilal xban nak aꞌan li kꞌaxal lokꞌ chiru li Dios chiru li cꞌatbil mayej.

⁴ Li kꞌetkꞌetil ut li nimobresi̱nc ib, aꞌan ma̱c. Joꞌcan ajcuiꞌ lix cꞌaꞌuxeb li incꞌaꞌ useb xnaꞌleb.

⁵ Li ani nequeꞌxcꞌoxla chi us li cꞌaꞌru nequeꞌxba̱nu, us nequeꞌel riqꞌuin li cꞌaꞌru nequeꞌxba̱nu. Abanan li ani incꞌaꞌ nequeꞌxcꞌoxla chi us li cꞌaꞌru nequeꞌxba̱nu, eb aꞌan incꞌaꞌ us nequeꞌel riqꞌuin li cꞌaꞌru nequeꞌxba̱nu.

⁶ Ma̱cꞌaꞌ na-oc cuiꞌ li biomal sicꞌbil riqꞌuin balakꞌic. Yal nanumeꞌ. Xban li balakꞌic nequeꞌxba̱nu yo̱queb chixbokbal li ca̱mc saꞌ xbe̱neb.

⁷ Li ma̱usilal nequeꞌxba̱nu li incꞌaꞌ useb xnaꞌleb, aꞌan ajcuiꞌ ta̱sachok reheb xban nak incꞌaꞌ nequeꞌraj cua̱nc saꞌ ti̱quilal.

⁸ Li incꞌaꞌ useb xnaꞌleb junes ma̱usilal nequeꞌxba̱nu. Abanan li cha̱bileb xnaꞌleb nequeꞌxba̱nu li ti̱quilal.

⁹ Kꞌaxal us li cua̱nc saꞌ junak cab nebaꞌ chiru li cua̱nc saꞌ junak xnimal ru cab riqꞌuin junak ixakilbej junes pletic naxba̱nu.

¹⁰ Li incꞌaꞌ useb xnaꞌleb junes ma̱usilal nequeꞌxcꞌoxla xba̱nunquil. Ut incꞌaꞌ nequeꞌril xtokꞌoba̱l ruheb li ras ri̱tzꞌin.

¹¹ Riqꞌuin lix kꞌusbal li incꞌaꞌ useb xnaꞌleb nequeꞌxtzol ribeb li cubenak xcuanquil, usta ma̱cuaꞌ aꞌan li yo̱ xkꞌusbal. Joꞌcan ajcuiꞌ li cuan xnaꞌleb. Naxqꞌue saꞌ xchꞌo̱l lix kꞌusbal.

¹² Li Dios, aꞌan ti̱c xchꞌo̱l ut naxnau cꞌaꞌru yo̱ chi cꞌulma̱nc saꞌ rochocheb li incꞌaꞌ useb xnaꞌleb. Joꞌcan nak naxcanabeb chi osocꞌ.

¹³ Li ani incꞌaꞌ narabi nak yo̱ chixtzꞌa̱manquil xtenkꞌanquil li nebaꞌ, joꞌcan ajcuiꞌ tixcꞌul aꞌan. Incꞌaꞌ ta̱sume̱k nak tixtzꞌa̱ma xtenkꞌanquil.

¹⁴ Li ani nasihin chi mukmu, aꞌan narisi xjoskꞌil li yo̱ xjoskꞌil.

¹⁵ Li ti̱quilal naxqꞌue xsahil xchꞌo̱l li ti̱c xchꞌo̱l. Abanan eb li nequeꞌxba̱nu ma̱usilal, nachal li sachecꞌ saꞌ xbe̱neb.

¹⁶ Li ani naxcanab xba̱nunquil li cha̱bil naꞌleb, ta̱cha̱lk li ca̱mc saꞌ xbe̱n.

¹⁷ Li ani nequeꞌxcꞌoxla chirix junes li naxqꞌue xsahil xchꞌo̱leb teꞌnebaꞌokꞌ. Joꞌcan ajcuiꞌ eb li nequeꞌcuulac chiru rucꞌbal li vino ut xqꞌuebal li sununquil ban incꞌaꞌ teꞌbiomokꞌ.

¹⁸ Li ti̱queb xchꞌo̱l incꞌaꞌ teꞌqꞌuehekꞌ chi cꞌuluc raylal. Eb li incꞌaꞌ useb xnaꞌleb teꞌqꞌuehekꞌ chi cꞌuluc raylal.

¹⁹ Kꞌaxal us li cua̱nc saꞌ chaki chꞌochꞌ bar ma̱cꞌaꞌ cuan chiru li cua̱nc riqꞌuin junak ixakilbej junes pletic naxba̱nu.

²⁰ Li ani cuan xnaꞌleb cuan xbiomal saꞌ li rochoch ut cuan ajcuiꞌ li sununquil ban. Abanan, li ma̱cꞌaꞌ xnaꞌleb yal naxsach lix tumin chi ma̱cꞌaꞌ rajbal.

²¹ Li ani naraj cua̱nc saꞌ ti̱quilal ut saꞌ cha̱bilal naxtau lix yuꞌam ut lix lokꞌal.

²² Li ani cuan xnaꞌleb nare̱chani jun li tenamit cau rib ut naxpoꞌi li tzꞌac li sutsu cuiꞌ, li cꞌojcꞌo̱queb cuiꞌ raj xchꞌo̱leb li tenamit.

²³ Li ani incꞌaꞌ naa̱tinac nabal, aꞌan yo̱ chixcolbal rib chiru li raylal.

²⁴ Kꞌetkꞌet ut aj hobonel nayeheꞌ reheb li ani nequeꞌxnimobresi rib, li incꞌaꞌ nequeꞌra̱tina ras ri̱tzꞌin saꞌ xya̱lal.

²⁵ Li ani incꞌaꞌ nequeꞌcꞌanjelac nequeꞌcam. Xban nak incꞌaꞌ nequeꞌcꞌanjelac, incꞌaꞌ nequeꞌxtzaca li cꞌaꞌru nequeꞌxrahi ru.

²⁶ Nequeꞌxnumsi li cutan chixra̱bal ru li cꞌaꞌak re ru. Abanan li ti̱queb xchꞌo̱l nequeꞌsihin. Moco pixeb ta.

²⁷ Li Ka̱cuaꞌ xicꞌ naril lix mayejeb li incꞌaꞌ useb xnaꞌleb. ¿Ma tojaꞌ ta chic tixcꞌul nak teꞌxqꞌue chi incꞌaꞌ useb lix cꞌaꞌuxeb?

²⁸ Li ani naticꞌtiꞌic chiru laj rakol a̱tin ta̱sachekꞌ ru. Abanan li ani naxye li ya̱l, xakxo saꞌ xnaꞌaj li ra̱tin.

²⁹ Eb li incꞌaꞌ useb xnaꞌleb nequeꞌxye nak cauheb rib. Abanan li ti̱queb xchꞌo̱l nequeꞌxnau cua̱nc saꞌ ti̱quilal.

³⁰ Chiru li Ka̱cuaꞌ ma̱cꞌaꞌ na-oc cuiꞌ li naꞌleb re li ruchichꞌochꞌ.

³¹ Eb li cui̱nk nequeꞌxcauresiheb lix cacua̱y re nak teꞌxic chi pletic. Abanan, aꞌ li Ka̱cuaꞌ, aꞌan li naqꞌuehoc reheb chi numta̱c saꞌ xbe̱neb li tenamit.