Proverbios 20 - Li Santil hu

¹ Li na-ucꞌac vino nayiboꞌ ru lix naꞌleb. Ut li na-ucꞌac re li haꞌ li nacaltesin nasach xnaꞌleb. Li ani naba̱nun re chi joꞌcan, aꞌan ma̱cꞌaꞌ xnaꞌleb.

² Nak najoskꞌoꞌ li rey, aꞌan chanchan nak najoskꞌoꞌ li cakcoj. Li ani naxchikꞌ xjoskꞌil li rey naxqꞌue xyuꞌam saꞌ xiu.

³ Li ani incꞌaꞌ napletic, aꞌan jun lokꞌal chokꞌ re. Abanan li ani ma̱cꞌaꞌ xnaꞌleb, junes ticoc ple̱t naxba̱nu.

⁴ Li ani incꞌaꞌ nacuulac chiru cꞌanjelac incꞌaꞌ na-au saꞌ xkꞌehil li a̱uc. Abanan nak nacuulac xkꞌehil li kꞌoloc naxic chi kꞌoloc. Ma̱cꞌaꞌ naxtau xban nak incꞌaꞌ nacꞌanjelac.

⁵ Li cha̱bil naꞌleb li cuan riqꞌuin junak cui̱nk incꞌaꞌ nacꞌutun. Chanchan li haꞌ cham cuan chꞌaꞌaj risinquil. Abanan li ani se̱b xchꞌo̱l tixnau xqꞌuebal retal li cha̱bil naꞌleb cuan riqꞌuin.

⁶ Nabaleb li cristian nequeꞌxye nak cha̱bileb. Abanan junak li cha̱bil cristian, chꞌaꞌaj xtaubal.

⁷ Us xak reheb li alal cꞌajolbej li xeꞌcuan xnaꞌ xyucuaꞌ saꞌ ti̱quilal ut saꞌ cha̱bilal.

⁸ Nak junak li rey nachunla saꞌ li rakleba̱l a̱tin, yal riqꞌuin rilbal li junju̱nk naxqꞌue retal ani cuan xma̱c.

⁹ Ma̱ ani naru nayehoc re nak tzꞌakal re ru li ra̱m. Incꞌaꞌ naru naxye nak ma̱cꞌaꞌ chic li ma̱c riqꞌuin.

¹⁰ Li Dios xicꞌ naril li ani nabisoc chi incꞌaꞌ tzꞌakal re ru.

¹¹ Usta toj sa̱j junak, abanan nacꞌutun chanru lix naꞌleb riqꞌuin lix yehom xba̱nuhom.

¹² Li Ka̱cuaꞌ quixqꞌue li kaxic re nak to-abi̱nk ut quixqꞌue ajcuiꞌ li xnakꞌ ku re nak to-ilok.

¹³ Me̱numsi li cutan chi cua̱rc xban nak naru texcana̱k saꞌ nebaꞌil. Aj-ajak ban e̱ru chi cꞌanjelac re nak cua̱nk nabal le̱ tzacae̱mk.

¹⁴ Laj lokꞌonel naxye: “Incꞌaꞌ us la̱ cꞌay.” Abanan nak ac x-el riqꞌuin laj cꞌay naxye nak us li xlokꞌ.

¹⁵ Li ani naxnau xqꞌuebal cha̱bil naꞌleb kꞌaxal cuiꞌchic lokꞌ chiru li oro ut li terto̱quil pec.

¹⁶ Li ani tixsume xtojbal xcꞌas junak incꞌaꞌ naxnau ru, isihomak li rakꞌ ut te̱qꞌue chokꞌ prenda.

¹⁷ Li ani natzacan riqꞌuin balakꞌic, sa nak naxtzaca. Abanan mokon raylal ta̱cha̱lk saꞌ xbe̱n. Chanchan yo̱ chi tzaca̱nc chꞌochꞌ.

¹⁸ Li cꞌaꞌru naxcꞌu̱b ru junak, us na-el xban nak naxqꞌue saꞌ xchꞌo̱l li cha̱bil naꞌleb qꞌuebil re. Joꞌcan nak te̱cꞌoxla chi us nak te̱tiquib junak ple̱t.

¹⁹ Li ani nacuulac chiru moloc a̱tin naxye resil li cꞌaꞌru cuan chi mukmu. Joꞌcan nak me̱junaji e̱rib riqꞌuineb li nequeꞌcuulac chiru jaloc a̱tin.

²⁰ Li ani naxtzꞌekta̱na lix naꞌ xyucuaꞌ kꞌaxal ra tixcꞌul nak ta̱ca̱mk. Chanchan nak nachup li xam saꞌ kꞌojyi̱n.

²¹ Li ani naxtau lix biomal saꞌ junpa̱t chi incꞌaꞌ xraylal, mokon incꞌaꞌ ta̱osobtesi̱k.

²² Ma̱ jun sut te̱cꞌoxla xqꞌuebal re̱kaj li raylal na-ux e̱re. Canabomak ban saꞌ rukꞌ li Ka̱cuaꞌ ut aꞌan ta̱tenkꞌa̱nk e̱re.

²³ Li bisleb incꞌaꞌ tzꞌakal moco us ta. Li Ka̱cuaꞌ xicꞌ naril nak junak incꞌaꞌ tzꞌakal nabisoc.

²⁴ Li Ka̱cuaꞌ, aꞌan naberesin re li junju̱nk. Ut ma̱ ani nanaꞌoc re cꞌaꞌru nachal saꞌ xbe̱n.

²⁵ Xiu xiu chokꞌ re junak cristian xyechiꞌinquil li cꞌaꞌak re ru re li Dios cui incꞌaꞌ tixcꞌoxla chi us xbe̱n cua. Ma̱re mokon tixqꞌue retal nak incꞌaꞌ ta̱ru̱k chixba̱nunquil.

²⁶ Li rey li cuan xnaꞌleb narakoc a̱tin saꞌ xbe̱neb li incꞌaꞌ useb xnaꞌleb ut naxqꞌueheb chixtojbal lix ma̱queb.

²⁷ Li musikꞌ li quiqꞌueheꞌ reheb li cristian xban li Dios, aꞌan nacutanobresin re lix cꞌaꞌux li junju̱nk. Chanchan jun li lámpara.

²⁸ Junak li rey xakxo̱k saꞌ xnaꞌaj lix cuanquil cui narahoc ut cui nataklan saꞌ xya̱lal.

²⁹ Eb li toj sa̱jeb cuanqueb xlokꞌal xban nak cuan xmetzꞌe̱uheb. Abanan li ac che̱queb cuanqueb xlokꞌal xban nak cuanqueb xnaꞌleb.

³⁰ Li ma̱usilal naru xbanbal riqꞌuin xcꞌulbal li raylal. Ut riqꞌuin xcꞌulbal li tzꞌu̱m naru xjalbal li cꞌaꞌux.