Proverbios 2 - Li Santil hu

Cuan xlokꞌal li naꞌleb li nayechiꞌi̱c ke

¹ Ex cualal incꞌajol, cheqꞌuehak e̱chꞌo̱l chixcꞌulbal li cua̱tin ut checꞌu̱lahak saꞌ le̱ chꞌo̱l lin chakꞌrab.

² Qꞌuehomak e̱chꞌo̱l chirabinquil li cha̱bil naꞌleb. Ut qꞌuehomak e̱chꞌo̱l chixtaubal ru li se̱bal chꞌo̱lej.

³ Qꞌuehomak e̱chꞌo̱l chixsicꞌbal li cha̱bil naꞌleb ut se̱bak e̱chꞌo̱l chixtaubal ru lix ya̱lal.

⁴ Qꞌuehomak e̱chꞌo̱l chixtaubal li cha̱bil naꞌleb. Chesicꞌak toj retal te̱tau joꞌ nak nasiqꞌueꞌ li plata, malaj ut joꞌ nak nasiqꞌueꞌ li cꞌaꞌru terto xtzꞌak.

⁵ Cui te̱tau li naꞌleb aꞌin, te̱nau chic xxucuanquil ru li Ka̱cuaꞌ. Ut te̱nau chic chanru xnaꞌleb li Dios.

⁶ Li Ka̱cuaꞌ naqꞌuehoc kanaꞌleb ut li ra̱tin naxcutanobresi li kacꞌaꞌux ut nocoxtenkꞌa chixtaubal ru lix ya̱lal.

⁷ Li Ka̱cuaꞌ naxqꞌue cha̱bil naꞌleb reheb li ti̱queb xchꞌo̱l ut naxcoleb li nequeꞌcuan saꞌ ti̱quilal chiru.

⁸ Aꞌan na-iloc reheb li ralal xcꞌajol li nequeꞌcuan saꞌ ti̱quilal ut naxcoleb.

⁹ Cui ta̱cuabi li cua̱tin la̱at, ta̱nau chic bar cuan li us ut bar cuan li ti̱quilal. Ut cua̱nk chic a̱naꞌleb chixtaubal ru chanru li cua̱nc saꞌ cha̱bilal.

¹⁰ Se̱bak chic a̱chꞌo̱l xban nak cua̱nk chic a̱naꞌleb ut sahak chic a̱chꞌo̱l.

¹¹ Xban nak se̱b chic a̱chꞌo̱l ta̱nau chic cꞌoxlac ut naru ta̱col a̱cuib chiru li cꞌaꞌak re ru ta̱cha̱lk saꞌ a̱be̱n.

¹² Ut ta̱nau chic xcolbal a̱cuib chiruheb li incꞌaꞌ useb xnaꞌleb, li junes ma̱usilal nequeꞌxcꞌoxla.

¹³ Eb li cui̱nk aꞌan nequeꞌxcanab xba̱nunquil li us xban nak nequeꞌcuulac chiru cua̱nc saꞌ xkꞌojyi̱nal ru li ma̱c.

¹⁴ Nequeꞌsahoꞌ xchꞌo̱l chixba̱nunquil li incꞌaꞌ us. Nequeꞌxkꞌaxtesi rib chixba̱nunquil li ma̱usilal.

¹⁵ Eb aꞌan incꞌaꞌ us lix naꞌlebeb xban nak nequeꞌxkꞌaxtesi rib chixba̱nunquil li incꞌaꞌ us.

¹⁶ Cui la̱at cuan a̱naꞌleb, ta̱nau xcolbal a̱cuib chiruheb li ixk li incꞌaꞌ useb xnaꞌleb li nequeꞌkꞌunbesin riqꞌuin cha̱bil a̱tin.

¹⁷ Li ixk aꞌan naxcanab lix be̱lom li sumsu cuiꞌ saꞌ xsa̱jilal ut naxkꞌet li ra̱tin li quixye nak quisumla chiru li Dios.

¹⁸ Li ani naxic saꞌ li rochoch li ixk aꞌan, ac chꞌolchꞌo nak yo̱ chi xic saꞌ xbehil li ca̱mc.

¹⁹ Li ani nacuulac riqꞌuin li ixk aꞌan incꞌaꞌ chic nequeꞌraj xba̱nunquil li us ut incꞌaꞌ chic nequeꞌxtau li cha̱bil yuꞌam.

²⁰ Joꞌcan nak la̱ex cheba̱nuhak li us joꞌ nequeꞌxba̱nu li cuanqueb saꞌ ti̱quilal.

²¹ Eb li ti̱queb xchꞌo̱l teꞌcua̱nk saꞌ li naꞌajej qꞌuebil reheb xban li Dios. Aran teꞌcua̱nk chi junelic.

²² Abanan eb li nequeꞌxba̱nu li ma̱usilal teꞌsachekꞌ ruheb ut teꞌisi̱k saꞌ lix naꞌajeb.