Proverbios 19 - Li Santil hu

¹ Kꞌaxal us li cua̱nc saꞌ ti̱quilal usta nebaꞌako chiru nak incꞌaꞌ takatau kanaꞌleb ut ta̱cuulak chiku ticꞌtiꞌic.

² Junak cristian ma̱cꞌaꞌ xnaꞌleb incꞌaꞌ naxcꞌoxla chi us li cꞌaꞌru naxba̱nu. Xban nak naxba̱nu saꞌ junpa̱t aꞌan naqꞌuehoc re chi ma̱cobc.

³ Eb li cristian nequeꞌxtzꞌek rib xjuneseb rib xban li ma̱usilal nequeꞌxba̱nu. Abanan eb aꞌan nequeꞌxye nak aꞌ li Ka̱cuaꞌ cuan re nak joꞌcan nequeꞌxcꞌul.

⁴ Li ani cuan xbiomal cuan nabal li rami̱g. Abanan li nebaꞌ incꞌaꞌ nacuan rami̱g xban nak ma̱cꞌaꞌ cuan re.

⁵ Li ani naxic chi yehoc ticꞌtiꞌ chiru laj rakol a̱tin tixcꞌul xtojbal xma̱c. Ut ma̱cꞌaꞌ naru tixcol cuiꞌ rib.

⁶ Nabaleb nequeꞌraj nak teꞌuxk usilal reheb xbaneb li cuanqueb xcuanquil xban nak nasihin. Nabaleb nequeꞌxcꞌam rib saꞌ amiguil riqꞌuin li ani nasihin.

⁷ Eb li nebaꞌ nequeꞌtzꞌekta̱na̱c xbaneb li rechꞌalal. ¿Ma tojaꞌ ta chic li rami̱g incꞌaꞌ teꞌtzꞌekta̱na̱nk reheb? Usta nequeꞌxtzꞌa̱ma usilal chiruheb, abanan eb aꞌan ma̱cꞌaꞌ nequeꞌraj re.

⁸ Li ani naxtau xnaꞌleb naxba̱nu li us xban nak naxra rib. Li ani naxqꞌue xlokꞌal li naꞌleb li naxtzol, us na-el riqꞌuin li naxba̱nu.

⁹ Li ani naxic chi yehoc ticꞌtiꞌ chiru laj rakol a̱tin tixcꞌul xtojbal xma̱c. Li ani naticꞌtiꞌic, aꞌ li ca̱mc naroybeni.

¹⁰ Eb li ma̱cꞌaꞌeb xnaꞌleb moco xcꞌulubeb ta nak ta̱cua̱nk xbiomaleb. Joꞌcan ajcuiꞌ eb li mo̱s. Moco xcꞌulubeb ta nak teꞌtakla̱nk saꞌ xbe̱neb li cuanqueb xcuanquil.

¹¹ Li ani naxnau cꞌoxlac, naxnau xcuybal rib ut incꞌaꞌ najoskꞌoꞌ saꞌ junpa̱t. Ut lix lokꞌal, aꞌan nak incꞌaꞌ naxqꞌue saꞌ xchꞌo̱l nak naba̱nu̱c ma̱usilal re.

¹² Nak najoskꞌoꞌ li rey, chanchan nak najoskꞌoꞌ li cakcoj. Abanan nak naxba̱nu junak usil aꞌan chanchan li hab li naxtꞌakresi li acui̱mk.

¹³ Junak li alalbej incꞌaꞌ naxtau xya̱lal, aꞌan jun rahil chꞌo̱lej chokꞌ re lix yucuaꞌ. Ut junak li ixakilbej junes chꞌila̱nc naxba̱nu, aꞌan chanchan li oques li na-oc saꞌ cab rajlal.

¹⁴ Riqꞌuineb li naꞌbej yucuaꞌbej naru nakacꞌul kajun cablal ut kabiomal. Abanan junak li cha̱bil ixakilbej, caꞌaj cuiꞌ li Dios naru naqꞌuehoc re.

¹⁵ Li ani incꞌaꞌ nacuulac chiru trabajic, junes cua̱rc naraj. Ut li ani incꞌaꞌ nacꞌanjelac, naxcuy xtzꞌocajic xban nak ma̱cꞌaꞌ xcua.

¹⁶ Li ani naxba̱nu li naxye saꞌ lix chakꞌrab li Dios, aꞌan naxcol rix lix yuꞌam. Ut li ani naxtzꞌekta̱na lix chakꞌrab li Dios, aꞌan ta̱ca̱mk.

¹⁷ Li ani naxba̱nu usilal reheb li nebaꞌ, chanchan ajcuiꞌ re li Ka̱cuaꞌ yo̱ chixba̱nunquil. Ut li Ka̱cuaꞌ ta̱qꞌuehok re̱kaj re.

¹⁸ Nak toj naru xkꞌusbaleb li cocꞌal, us xkꞌusbaleb xban nak cui incꞌaꞌ nacakꞌuseb naru nequeꞌxic saꞌ xbehil li ca̱mc.

¹⁹ Li ani kꞌaxal cuiꞌchic najoskꞌoꞌ, tento tixcꞌul li raylal naxbok saꞌ xbe̱n. Incꞌaꞌ us xcolbal rix xban nak cui ta̱col rix, ta̱cꞌa̱yk xba̱nunquil.

²⁰ Kꞌaxal us nak te̱cꞌu̱luban le̱ naꞌleb li ta̱qꞌuehekꞌ e̱re ut te̱qꞌue saꞌ e̱chꞌo̱l le̱ kꞌusbal. Chi joꞌcan cua̱nk e̱naꞌleb toj saꞌ e̱ti̱xilal.

²¹ Eb li cristian nabal li cꞌaꞌak re ru nequeꞌxcꞌu̱b ru. Abanan caꞌaj cuiꞌ li Dios yal re ma ta̱uxma̱nk chixjunil li nequeꞌxcꞌu̱b ru.

²² Cuan xsahil xchꞌo̱leb li nequeꞌuxta̱nan u. Joꞌcan nak kꞌaxal us li nebaꞌil chiru li balakꞌic.

²³ Li ani naxxucua ru li Ka̱cuaꞌ cuan xyuꞌam. Junelic sa saꞌ xchꞌo̱l ut incꞌaꞌ nachal li chꞌaꞌajquilal saꞌ xbe̱n.

²⁴ Li incꞌaꞌ nacuulac chiru cꞌanjelac naxchꞌic li rukꞌ saꞌ li plato. Abanan chi moco li tzacae̱mk naraj xqꞌuebal saꞌ re.

²⁵ Riqꞌuin lix kꞌusbal li incꞌaꞌ us xnaꞌleb, nequeꞌxtzol ribeb li cubenakeb xcuanquil, usta ma̱cuaꞌ aꞌan li yo̱ xkꞌusbal. Joꞌcan ajcuiꞌ li cuan xnaꞌleb. Naxqꞌue saꞌ xchꞌo̱l lix kꞌusbal.

²⁶ Junak li alalbej narelkꞌa cꞌaꞌru re lix yucuaꞌ ut nara̱lina lix naꞌ, aꞌan kꞌaxal yibru ut xuta̱nal ta̱e̱lk.

²⁷ Ex cualal incꞌajol, canabomak rabinquil li naꞌleb incꞌaꞌ us, li na-isin e̱re riqꞌuin li cha̱bil naꞌleb.

²⁸ Li naxic chi yehoc ticꞌtiꞌ chiru laj rakol a̱tin, aꞌan incꞌaꞌ naxqꞌue xcuanquil li ti̱quilal. Ut li incꞌaꞌ useb xnaꞌleb junes ma̱usilal nequeꞌcuulac chiru xba̱nunquil.

²⁹ Ac cauresinbil chak li rakba a̱tin chokꞌ reheb li nequeꞌhoboc. Ut ac cauresinbil ajcuiꞌ li tzꞌu̱m chokꞌ reheb li incꞌaꞌ nequeꞌraj xtaubal xnaꞌleb.