Proverbios 18 - Li Santil hu

¹ Li ani naxsicꞌ li us chokꞌ re xjunes rib, incꞌaꞌ naxcꞌu̱luban li cha̱bil naꞌleb naqꞌueheꞌ re.

² Li ma̱cꞌaꞌ xnaꞌleb incꞌaꞌ naraj xtzolbal rib. Li cꞌaꞌru nacuulac chiru, aꞌan xserakꞌinquil li cꞌaꞌru naxcꞌoxla xjunes.

³ Li ani naxba̱nu ma̱usilal naxcꞌut xxuta̱n. Ut li ani naxnimobresi rib narisi xlokꞌal xjunes rib.

⁴ Li cha̱bil a̱tin li naxye li cui̱nk li cuan xnaꞌleb, aꞌan chanchan li yuꞌam haꞌ li nabe̱c rok ut incꞌaꞌ nachakic.

⁵ Incꞌaꞌ us xyebal nak ma̱cꞌaꞌeb xma̱c li incꞌaꞌ useb xnaꞌleb. Incꞌaꞌ us xqꞌuebal li ma̱c saꞌ xbe̱neb li ma̱cꞌaꞌ xma̱c.

⁶ Li ma̱cꞌaꞌ xnaꞌleb naxchꞌic rib saꞌ raylal riqꞌuin li cꞌaꞌru naxye. Ut riqꞌuin li a̱tin li naxye naxtzꞌa̱ma xlob.

⁷ Li a̱tin li naxye li ma̱cꞌaꞌ xnaꞌleb, aꞌan li nasachoc re. Li a̱tin li naxye, aꞌan chanchan jun raꞌal chokꞌ re.

⁸ Li ticꞌtiꞌ, aꞌan chanchan li cocꞌ cab chiruheb li nequeꞌcuulac chiru ticꞌtiꞌic chirix li ras ri̱tzꞌin. Abanan ra nanak cuiꞌ li cꞌaꞌru nequeꞌxye.

⁹ Li incꞌaꞌ naraj trabajic, aꞌan juntakꞌe̱t riqꞌuin li nasachoc.

¹⁰ Kꞌaxal lokꞌ xcꞌabaꞌ li Ka̱cuaꞌ ut kꞌaxal nim xcuanquil. Caꞌaj cuiꞌ riqꞌuin aꞌan nequeꞌxic chixsicꞌbal lix colbaleb li ti̱queb xchꞌo̱l.

¹¹ Eb li biom nequeꞌxcꞌoxla nak lix biomaleb naru nacoloc reheb. Nequeꞌxcꞌoxla nak lix biomaleb, aꞌan chanchan jun li tzꞌac li najt xteram re teꞌxcol cuiꞌ ribeb.

¹² Li ani naxnimobresi rib xjunes naxsach rib. Ut li ani naxcubsi rib naqꞌueheꞌ xlokꞌal.

¹³ Xuta̱nal na-el li ma̱cꞌaꞌ xnaꞌleb nak naxsume li a̱tin chi toj ma̱jiꞌ narabi li cꞌaꞌru ta̱yehekꞌ re.

¹⁴ Li ani yaj tixcacuubresi xchꞌo̱l. Aꞌan ta̱tenkꞌa̱nk re chi cacuu̱c. Abanan junak li yaj incꞌaꞌ cau xchꞌo̱l, ¿ani ta̱ru̱k ta̱tenkꞌa̱nk re chi cacuu̱c?

¹⁵ Li cuanqueb xnaꞌleb ut li se̱beb xchꞌo̱l nequeꞌxsicꞌ xtzꞌakob lix naꞌleb ut nequeꞌxtau.

¹⁶ Riqꞌuin junak li ma̱tan li ta̱si, naru naqꞌueheꞌ a̱cue li cꞌaꞌru ta̱tzꞌa̱ma. Ut naru nacat-oc chi a̱tinac riqꞌuineb li cuanqueb saꞌ xcuanquil.

¹⁷ Li ani nacuulac xbe̱n cua chixyebal nak ma̱cꞌaꞌ xma̱c, nacꞌutun nak ma̱cꞌaꞌ xma̱c toj nak nacuulac li jun chic li yo̱ chi jitoc re. Aꞌan nayehoc re nak cuan xma̱c.

¹⁸ Riqꞌuin bu̱lic naru teꞌxyi̱b ru lix chꞌaꞌajquilal li yo̱queb chi pletic. Aꞌan naru tixrak li ple̱t usta cuanqueb xcuanquil li yo̱queb chi pletic.

¹⁹ Junak asbej ta̱hobekꞌ, aꞌan li kꞌaxal cuiꞌchic ta̱joskꞌokꞌ. Ta̱cacuu̱k xchꞌo̱l joꞌ junak li tenamit cau rib. Ma̱ ani ta̱ru̱k ta̱tenkꞌa̱nk re xban nak kꞌaxal cau lix chꞌo̱l joꞌ li chꞌi̱chꞌ li natzꞌapoc re li puerta.

²⁰ Li ani ta̱a̱tinak cha̱bil, cha̱bil ajcuiꞌ tixcꞌul. Li ani incꞌaꞌ us ta̱a̱tinak, incꞌaꞌ ajcuiꞌ us li cꞌaꞌru tixcꞌul.

²¹ Li ani cha̱bil naa̱tinac, cua̱nk xyuꞌam. Ut li ani incꞌaꞌ us ta̱a̱tinak tixbok li ca̱mc saꞌ xbe̱n. Li ani nequeꞌcuulac chiru a̱tinac chi nabal, teꞌxcꞌul lix tojbal rix.

²² Li ani naxtau rixakil naxtau li us. Ut naxtau ajcuiꞌ rusilal li Dios.

²³ Li nebaꞌ naa̱tinac riqꞌuin kꞌunil a̱tin re nak ta̱ilekꞌ xtokꞌoba̱l ru. Abanan li biom saꞌ kꞌetkꞌetil nachakꞌoc.

²⁴ Cuan amigo incꞌaꞌ chꞌaꞌaj nak nequeꞌxyoꞌob junak chꞌaꞌajquilal. Abanan cuan li tzꞌakal amigo kꞌaxal cuiꞌchic cha̱bil chiru junak asbej.