Proverbios 17 - Li Santil hu

¹ Kꞌaxal us li tzaca̱nc saꞌ nebaꞌil chi sa saꞌ kachꞌo̱l chiru nak yo̱ko chi ninkꞌei̱c rajlal ut yo̱ko chi pletic.

² Junak mo̱s cuan xnaꞌleb, aꞌan ta̱cua̱nk xcuanquil saꞌ xbe̱n li alalbej ma̱cꞌaꞌ xnaꞌleb ut aꞌan ta̱tzꞌako̱nk riqꞌuin li cꞌaꞌru cuan re lix patrón saꞌ xya̱nkeb li ralal xcꞌajol lix patrón.

³ Li oro ut li plata isinbil lix tzꞌajnil riqꞌuin xam. Abanan li Ka̱cuaꞌ narisi li ma̱usilal saꞌ xchꞌo̱leb li cristian.

⁴ Eb li incꞌaꞌ useb xnaꞌleb nequeꞌxpa̱b chixjunil li incꞌaꞌ us nequeꞌrabi. Ut eb laj ticꞌtiꞌ nequeꞌxpa̱b li moco ya̱l ta li nayeheꞌ reheb.

⁵ Li ani nequeꞌhoboc reheb li nebaꞌ, aꞌ li Dios li quiyi̱ban reheb nequeꞌxhob. Ut li ani nasahoꞌ saꞌ xchꞌo̱l chirilbal li raylal nequeꞌxcꞌul, aꞌan incꞌaꞌ ta̱cana̱k chi incꞌaꞌ teꞌxtoj xma̱c.

⁶ Lix lokꞌaleb li ac ti̱xeb, aꞌaneb li ri. Ut lix lokꞌaleb li alalbej cꞌajolbej, aꞌaneb lix naꞌ xyucuaꞌeb.

⁷ Incꞌaꞌ us chokꞌ reheb li ma̱cꞌaꞌ xnaꞌleb nak teꞌxnimobresi ribeb chi a̱tinac. Joꞌcan ajcuiꞌ li cui̱nk li cuan xcuanquil, incꞌaꞌ us cui naticꞌtiꞌic.

⁸ Li tumina̱nc u kꞌaxal terto xtzꞌak chiruheb li cꞌaynakeb chi tuminac u xban nak riqꞌuin aꞌan us nequeꞌel riqꞌuin chixjunil li nequeꞌxba̱nu.

⁹ Li ani incꞌaꞌ naa̱tinac chirix lix paltil li rami̱g nacꞌutun nak naxra li rami̱g. Ut li ani naa̱tinac chirix lix paltil naxqꞌue chꞌaꞌajquilal saꞌ xya̱nkeb li rami̱g.

¹⁰ Li ani cuan xnaꞌleb naxqꞌue retal lix kꞌusbal. Aꞌut li ma̱cꞌaꞌ xnaꞌleb usta ta̱qꞌue jun cientak lix lo̱b incꞌaꞌ naxtau xya̱lal.

¹¹ Li incꞌaꞌ useb xnaꞌleb junes sicꞌoc ple̱t nequeꞌxba̱nu. Kꞌaxal ra li tojba ma̱c ta̱cha̱lk saꞌ xbe̱neb.

¹² Kꞌaxal us nak ta̱cꞌul jun li oso yo̱ xjoskꞌil li qui-elkꞌa̱c li ral, chiru nak ta̱chꞌic a̱cuib riqꞌuin jun li incꞌaꞌ naxnau xya̱lal xban nak kꞌaxal ra cuiꞌchic ta̱cꞌul.

¹³ Junelic cua̱nk li ma̱usilal saꞌ lix jun cablal li ani naxba̱nu ma̱usilal re li naba̱nun usilal re.

¹⁴ Li xtiquibanquil jun li ple̱t chanchan xtebal jun rok li haꞌ xban nak junpa̱t naniman ru. Joꞌcan nak kꞌaxal us chokꞌ e̱re nak incꞌaꞌ te̱chꞌic e̱rib saꞌ li ple̱t.

¹⁵ Incꞌaꞌ us xyebal nak ma̱cꞌaꞌeb xma̱c li nequeꞌxba̱nu li incꞌaꞌ us. Ut incꞌaꞌ ajcuiꞌ us nak teꞌxye nak cuanqueb xma̱c li ma̱cꞌaꞌeb xma̱c. Li cuib chi naꞌleb aꞌin xicꞌ naril li Ka̱cuaꞌ.

¹⁶ ¿Cꞌaꞌru aj e nak cua̱nk xtumin li ma̱cꞌaꞌ xnaꞌleb? Ma̱cꞌaꞌ aj e xban nak moco naru ta tixlokꞌ xnaꞌleb riqꞌuin lix tumin.

¹⁷ Li cha̱bil amigo junelic narahoc, ut tixcꞌojob a̱chꞌo̱l nak yo̱kat chi cꞌuluc raylal joꞌ junak tzꞌakal asbej.

¹⁸ Li ani ma̱cꞌaꞌ xnaꞌleb saꞌ junpa̱t naxcꞌu̱luban saꞌ xbe̱n xtojbal xcꞌas li rami̱g chi incꞌaꞌ naxcꞌoxla chi us.

¹⁹ Li ani nacuulac chiru pletic naxra li ma̱c. Li ani naxnimobresi rib yo̱ chixbokbal raylal saꞌ xbe̱n.

²⁰ Li incꞌaꞌ useb xnaꞌleb ma̱ jokꞌe teꞌxtau li us. Ut li ani nacuulac chiru balakꞌic riqꞌuin li cꞌaꞌru naxye naxbok chꞌaꞌajquilal saꞌ xbe̱n.

²¹ Junak cui̱nk cuan ralal ma̱cꞌaꞌ xnaꞌleb junelic ra saꞌ xchꞌo̱l. Ma̱cꞌaꞌ sahil chꞌo̱lej chokꞌ re junak li yucuaꞌbej cuan junak ralal incꞌaꞌ naxtau xya̱lal.

²² Junak cristian sa saꞌ xchꞌo̱l, aꞌan naxqꞌue sahil chꞌo̱lej joꞌ li cha̱bil ban. Abanan junak cristian ra saꞌ xchꞌo̱l, aꞌan naxqꞌue xrahil xchꞌo̱l li ras ri̱tzꞌin joꞌ junak yajel.

²³ Eb li incꞌaꞌ useb xnaꞌleb nequeꞌtumina̱c ru chi mukmu re xsachbal xcuanquil li ti̱quilal.

²⁴ Li cuan xnaꞌleb junelic yo̱ chixcꞌoxlanquil chanru nak tixtau xtzꞌakob lix naꞌleb. Abanan li incꞌaꞌ naxtau xnaꞌleb moco chꞌolchꞌo ta ru li cꞌaꞌru naxba̱nu.

²⁵ Li alalbej li incꞌaꞌ naxtau xnaꞌleb, aꞌan naxqꞌue xjoskꞌileb ut xrahil xchꞌo̱leb lix naꞌ xyucuaꞌ.

²⁶ Relic chi ya̱l nak incꞌaꞌ us nak teꞌxye nak cuan xma̱c li ma̱cꞌaꞌ xma̱c. Ut incꞌaꞌ ajcuiꞌ us nak teꞌxqꞌue saꞌ raylal li nequeꞌtaklan saꞌ xya̱lal.

²⁷ Eb li cuan xnaꞌlebeb incꞌaꞌ nequeꞌcuulac chiruheb a̱tinac. Ut li ani naxnau cꞌoxlac incꞌaꞌ najoskꞌoꞌ saꞌ junpa̱t.

²⁸ Nequeꞌxye nak li incꞌaꞌ naxtau xya̱lal cuan xnaꞌleb cui incꞌaꞌ naa̱tinac. Nequeꞌxye nak naxnau cꞌoxlac cui ma̱cꞌaꞌ naxye.