Proverbios 16 - Li Santil hu

¹ Eb li cristian nequeꞌxcꞌu̱b ru cꞌaꞌru nequeꞌxba̱nu, abanan li Ka̱cuaꞌ, aꞌan yal re ma teꞌxba̱nu li cꞌaꞌru nequeꞌxcꞌu̱b ru malaj ut incꞌaꞌ.

² Eb li cristian nequeꞌxcꞌoxla nak us chixjunil li nequeꞌxba̱nu. Abanan, li Ka̱cuaꞌ naxnau ma us malaj ut incꞌaꞌ us li cuan saꞌ lix cꞌaꞌuxeb.

³ Canab saꞌ rukꞌ li Dios chixjunil li cꞌaꞌru nacacꞌoxla xba̱nunquil. Ut aꞌan ta̱tenkꞌa̱nk a̱cue re nak us tat-e̱lk riqꞌuin li cꞌaꞌru ta̱ba̱nu.

⁴ Cuan xya̱lal nak quixyi̱b li cꞌaꞌak re ru li Dios. Ut quixyi̱beb ajcuiꞌ li incꞌaꞌ useb xnaꞌleb re nak teꞌroybeni lix tojbal lix ma̱queb.

⁵ Li Ka̱cuaꞌ xicꞌ narileb li nequeꞌxkꞌetkꞌeti ribeb. Relic chi ya̱l nak incꞌaꞌ teꞌcana̱k chi incꞌaꞌ teꞌxtoj rix lix ma̱queb.

⁶ Riqꞌuin xba̱nunquil li ya̱l ut li cha̱bilal naru nacuyeꞌ li ma̱c. Ut riqꞌuin xqꞌuebal xlokꞌal li Ka̱cuaꞌ naru xcanabanquil li ma̱usilal.

⁷ Nak li Ka̱cuaꞌ nacuulac chiru li cꞌaꞌru nequeꞌxba̱nu li cristian, aꞌan ajcuiꞌ naqꞌuehoc reheb chixcꞌambaleb rib saꞌ usilal riqꞌuineb li xicꞌ nequeꞌiloc reheb.

⁸ Kꞌaxal us nak cua̱nk cꞌaꞌru a̱cue saꞌ ti̱quilal, usta caꞌchꞌin ajcuiꞌ, chiru nak cua̱nk nabal cꞌaꞌru a̱cue riqꞌuin balakꞌic.

⁹ Eb li cristian nequeꞌxcꞌoxla li cꞌaꞌru nequeꞌxba̱nu. Abanan li Ka̱cuaꞌ yal re ma teꞌxba̱nu malaj ut incꞌaꞌ.

¹⁰ Li rey moco xjunes ta naa̱tinac. Li Dios ban nayehoc re cꞌaꞌru naxba̱nu. Ut aꞌan narakoc a̱tin saꞌ xya̱lal.

¹¹ Li ani nabisoc chi tzꞌakal re ru, aꞌan naxba̱nu joꞌ naraj li Ka̱cuaꞌ. Ut li Ka̱cuaꞌ naraj nak li cristian teꞌbisok chi tzꞌakal re ru.

¹² Incꞌaꞌ us chokꞌ reheb li rey xba̱nunquil li incꞌaꞌ us xban nak riqꞌuin xba̱nunquil li ti̱quilal xakxo̱queb lix cuanquileb.

¹³ Eb li rey nequeꞌxra li ani nequeꞌxye li ya̱l ut nequeꞌsahoꞌ saꞌ xchꞌo̱leb riqꞌuineb li cuanqueb saꞌ xya̱lal.

¹⁴ Li ani cuan xnaꞌleb incꞌaꞌ tixchikꞌ xjoskꞌil li rey xban nak cui teꞌxchikꞌ xjoskꞌil, li rey naru naxtakla xcamsinquileb.

¹⁵ Li rey naxba̱nu usilal reheb li nequeꞌxba̱nu li cꞌaꞌru naraj aꞌan. Chanchan li hab li naqꞌuehoc re li acui̱mk chi kꞌanocꞌ.

¹⁶ Kꞌaxal us nak cua̱nk a̱naꞌleb chiru nak cua̱nk nabal la̱ biomal. Kꞌaxal us nak ta̱tau xya̱lal chiru nak cua̱nk nabal la̱ tumin.

¹⁷ Li cꞌaꞌru nequeꞌxba̱nu li ti̱queb xchꞌo̱l, aꞌan xcanabanquil li ma̱usilal. Ut nequeꞌxqꞌue retal chi us li cꞌaꞌru nequeꞌxba̱nu re nak teꞌxcol rix lix yuꞌameb.

¹⁸ Li ani naxkꞌetkꞌeti rib ta̱osokꞌ. Ut li ani naxnimobresi rib ta̱cubsi̱k xcuanquil.

¹⁹ Kꞌaxal us nak takacubsi kib saꞌ xya̱nkeb li nebaꞌ chiru nak takanimobresi kib saꞌ xya̱nkeb li cuanqueb xbiomal.

²⁰ Li ani naxqꞌue saꞌ xchꞌo̱l li naꞌleb li naqꞌueheꞌ re, us ta̱e̱lk riqꞌuin li cꞌaꞌru naxba̱nu. Us xak re li ani naxcꞌojob xchꞌo̱l riqꞌuin li Ka̱cuaꞌ.

²¹ Li ani naxnau cꞌoxlac, “cuan xnaꞌleb” chanqueb re. Ut nequeꞌabin chiru xban nak naxnau a̱tinac chi cha̱bil.

²² Li ani cuan xnaꞌleb naxtau xyuꞌam chi junelic. Ut xqꞌuebal xnaꞌlebeb li incꞌaꞌ nequeꞌxtau xya̱lal, aꞌan ma̱cꞌaꞌ aj e.

²³ Li ani cuan xnaꞌleb naxcꞌoxla chi us li cꞌaꞌru naxye. Ut li a̱tin li naxye na-abi̱c.

²⁴ Li cha̱bil a̱tin, aꞌan chanchan li xyaꞌal cab. Sa xtzacanquil ut naxqꞌue xcacuilal li katibel.

²⁵ Cuanqueb li cui̱nk nequeꞌxcꞌoxla nak us li nequeꞌxba̱nu xjuneseb. Abanan li cꞌaꞌru nequeꞌxba̱nu, aꞌan ajcuiꞌ li nacꞌamoc chak re li ca̱mc saꞌ xbe̱neb.

²⁶ Li ani natrabajic, natrabajic xban nak tzaca̱nc naraj. Xban nak cuaꞌac naraj, cau nacꞌanjelac.

²⁷ Eb li incꞌaꞌ useb xnaꞌleb junes ma̱usilal nequeꞌxcꞌoxla xba̱nunquil. Ra nanak cuiꞌ li ra̱tineb. Chanchan li xam.

²⁸ Li incꞌaꞌ useb xnaꞌleb nequeꞌyoꞌoban ple̱t. Ut li ani namoloc a̱tin nequeꞌxqꞌueheb saꞌ chꞌaꞌajquilal li rami̱gueb rib.

²⁹ Li ani najoskꞌoꞌ saꞌ junpa̱t naxbalakꞌiheb li ras ri̱tzꞌin, ut naxcꞌameb chixba̱nunquil li incꞌaꞌ us.

³⁰ Eb li incꞌaꞌ useb xnaꞌleb nequeꞌxmutzꞌ li ru nak nequeꞌoc chixcꞌoxlanquil chanru nak teꞌxba̱nu li ma̱usilal. Ut nequeꞌxcꞌux li reheb nak nequeꞌxba̱nu li ma̱usilal.

³¹ Li ani nati̱x chi us, kꞌaxal lokꞌ chokꞌ re. Nati̱x chi us xban nak cuan saꞌ ti̱quilal.

³² Kꞌaxal us nak cua̱nk a̱cuyum chiru nak cauhak a̱cuib. Ut kꞌaxal us nak ta̱nau xcuybal a̱cuib chiru nak ta̱cue̱chani junak tenamit.

³³ Eb li cui̱nk nequeꞌxsicꞌ cꞌaꞌru teꞌxba̱nu riqꞌuin bu̱lic. Abanan li Dios, aꞌan yal re saꞌ xbe̱n chixjunil.