Proverbios 15 - Li Santil hu

¹ Li ani nasumen riqꞌuin kꞌunil a̱tin naxcubsi xjoskꞌil li ani yo̱ chi a̱tinac saꞌ joskꞌil. Aꞌut li ani nasumen saꞌ joskꞌil, kꞌaxal cuiꞌchic naxnimobresi ru li chꞌaꞌajquilal.

² Li a̱tin li naxye li cuan xnaꞌleb naxqꞌue xnaꞌleb li ani na-abin re. Abanan li a̱tin li nequeꞌxye li ma̱cꞌaꞌeb xnaꞌleb, aꞌan yal to̱ntil a̱tin nequeꞌxye.

³ Li Ka̱cuaꞌ cuan yalak bar ut yo̱ chixqꞌuebal retal li cꞌaꞌru yo̱queb li cha̱bileb xnaꞌleb joꞌ ajcuiꞌ li incꞌaꞌ useb xnaꞌleb.

⁴ Li ani naa̱tinac saꞌ tu̱lanil chanchan li cheꞌ re junelic yuꞌam xban nak naxtenkꞌa saꞌ lix yuꞌam li ani na-abin re. Abanan li incꞌaꞌ us naa̱tinac naxqꞌue chi rahocꞌ xchꞌo̱l li na-abin re li cꞌaꞌru naxye.

⁵ Li ani ma̱cꞌaꞌ xnaꞌleb naxtzꞌekta̱na lix kꞌusbal naqꞌueheꞌ xban lix yucuaꞌ. Abanan li se̱b xchꞌo̱l naxqꞌue saꞌ xchꞌo̱l lix kꞌusbal.

⁶ Li ani ti̱c xchꞌo̱l cuan nabal cꞌaꞌru re saꞌ rochoch. Abanan eb li incꞌaꞌ useb xnaꞌleb incꞌaꞌ nequeꞌxyal xsahil li cꞌaꞌruheb re.

⁷ Eb li cuanqueb xnaꞌleb nequeꞌxqꞌue xnaꞌlebeb nabal. Ut eb li ma̱cꞌaꞌeb xnaꞌleb moco joꞌcan ta nequeꞌxba̱nu.

⁸ Li Ka̱cuaꞌ xicꞌ naril lix mayejeb li incꞌaꞌ useb xnaꞌleb. Abanan lix tijeb li ti̱queb xchꞌo̱l li Ka̱cuaꞌ naxcꞌul chi sa saꞌ xchꞌo̱l.

⁹ Li Ka̱cuaꞌ xicꞌ naril li cꞌaꞌru nequeꞌxba̱nu li incꞌaꞌ useb xnaꞌleb. Abanan naxraheb li nequeꞌxba̱nu li ti̱quilal.

¹⁰ Li nequeꞌxcanab xba̱nunquil li us tento xkꞌusbaleb chi cau. Li ani xicꞌ naril lix kꞌusbal ta̱ca̱mk.

¹¹ Li Ka̱cuaꞌ naxnau chixjunil li cꞌaꞌru cuan saꞌ lix naꞌajeb li camenak ut li xbalba. ¿Ma tojaꞌ ta chic incꞌaꞌ tixnau li cꞌaꞌru cuan saꞌ xchꞌo̱l li junju̱nk?

¹² Li incꞌaꞌ naxtau xya̱lal incꞌaꞌ naxra li ani naqꞌuehoc naꞌleb, chi moco nacuulac chiru cua̱nc saꞌ xya̱nkeb li cuanqueb xnaꞌleb.

¹³ Li sa saꞌ xchꞌo̱l seꞌse na-iloc. Li ani ra saꞌ xchꞌo̱l saꞌ xnakꞌ ru nacꞌutun nak ra saꞌ xchꞌo̱l.

¹⁴ Li ani naxtau xya̱lal naxsicꞌ li cha̱bil naꞌleb. Abanan li ma̱cꞌaꞌeb xnaꞌleb junes li to̱ntil naꞌleb nequeꞌxsicꞌ.

¹⁵ Li rahobtesinbileb, chixjunil incꞌaꞌ na-el chi us chiruheb. Abanan eb li saheb saꞌ xchꞌo̱l chixjunil us na-el chiruheb.

¹⁶ Kꞌaxal us xxucuanquil ru li Dios, usta nebaꞌo, chiru nak cua̱nk kabiomal ut cua̱nk karaylal.

¹⁷ Kꞌaxal us nak takatzaca li tzacae̱mk li cubenak xtzꞌak ut takara kib chiru nak takatzaca li cha̱bil tzacae̱mk terto xtzꞌak ut xicꞌ takil kib.

¹⁸ Li ani chꞌinpoꞌ naxnimobresi ru li chꞌaꞌajquilal. Abanan li ani incꞌaꞌ najoskꞌoꞌ saꞌ junpa̱t, aꞌan naxyi̱b ru li chꞌaꞌajquilal saꞌ usilal.

¹⁹ Chixjunil chꞌaꞌaj xba̱nunquil chiru li ani incꞌaꞌ nacuulac chiru cꞌanjelac. Abanan chiru li ani nacuulac chiru cꞌanjelac, ma̱cꞌaꞌ chꞌaꞌaj xba̱nunquil.

²⁰ Li alalbej cuan xnaꞌleb naxqꞌue xsahil xchꞌo̱l lix naꞌ xyucuaꞌ. Abanan li alalbej incꞌaꞌ naxtau xnaꞌleb naxtzꞌekta̱na lix naꞌ xyucuaꞌ.

²¹ Li ani ma̱cꞌaꞌ xnaꞌlebeb saheb saꞌ xchꞌo̱l nak ma̱cꞌaꞌeb xnaꞌleb. Abanan li se̱b xchꞌo̱leb nequeꞌxqꞌue retal chi us li cꞌaꞌru nequeꞌxba̱nu.

²² Li ani incꞌaꞌ naxpatzꞌ xnaꞌleb incꞌaꞌ us na-el riqꞌuin li cꞌaꞌru naxba̱nu. Abanan na-el chi us cui ta̱qꞌuehekꞌ xnaꞌleb xbaneb nabal.

²³ Li ani naxnau xsumenquil junak li patzꞌoc nasahoꞌ saꞌ xchꞌo̱l. Ut kꞌaxal cuiꞌchic us nak teꞌxye junak a̱tin nak ta̱ajekꞌ ru.

²⁴ Li ani naxnau cꞌoxlac ta̱xic saꞌ choxa xban nak cuan saꞌ ti̱quilal. Ut tixcol rib chiru lix naꞌajeb li camenak.

²⁵ Li Ka̱cuaꞌ naxsach ru lix jun cablaleb li nequeꞌxkꞌetkꞌeti ribeb. Ut naxcol rix li cꞌaꞌru cuan reheb li xma̱lcaꞌan.

²⁶ Li Ka̱cuaꞌ xicꞌ naril li cꞌaꞌru nequeꞌxcꞌoxla li incꞌaꞌ useb xnaꞌleb. Abanan nacuulac chiru li cꞌaꞌru nequeꞌxcꞌoxla li ti̱queb xchꞌo̱l.

²⁷ Li ani naxrahi ru chixjunil naxqꞌue saꞌ raylal lix jun cablal. Abanan li ani incꞌaꞌ naxcꞌu̱luban nak ta̱tumina̱k ru, aꞌan sa ta̱cua̱nk.

²⁸ Li ani ti̱c xchꞌo̱l toj naxcꞌoxla chi us cꞌaꞌru ta̱sume̱nk cuiꞌ. Abanan li incꞌaꞌ useb xnaꞌleb yibru nequeꞌsumen cuiꞌ xban nak incꞌaꞌ nequeꞌxcꞌoxla cꞌaꞌru nequeꞌxye.

²⁹ Li Ka̱cuaꞌ incꞌaꞌ narabi lix tijeb li incꞌaꞌ useb xnaꞌleb. Abanan eb li ti̱queb xchꞌo̱l, li Ka̱cuaꞌ narabi lix tijeb.

³⁰ Li ani seꞌse na-iloc naxqꞌue sahil chꞌo̱lej. Ut li cha̱bil esilal naqꞌuehoc cacuilal.

³¹ Li ani narabi lix kꞌusbal cha̱bil ta̱cua̱nk. Ut ta̱cua̱nk xnaꞌaj saꞌ xya̱nkeb li cuanqueb xnaꞌleb.

³² Li ani incꞌaꞌ naxqꞌue saꞌ xchꞌo̱l lix kꞌusbal, aꞌan xjunes naxtzꞌekta̱na rib. Abanan li ani naxqꞌue saꞌ xchꞌo̱l lix kꞌusbal naxtau xnaꞌleb.

³³ Li ani naxxucua ru li Ka̱cuaꞌ naxtau xnaꞌleb. Ut li ani ta̱raj ta̱qꞌuehekꞌ xlokꞌal tento tixcubsi rib.