Proverbios 13 - Li Santil hu

¹ Li alalbej li cuan xnaꞌleb naxqꞌue saꞌ xchꞌo̱l lix kꞌusbal naqꞌueheꞌ xban lix yucuaꞌ. Abanan li alalbej li incꞌaꞌ naraj kꞌusecꞌ incꞌaꞌ naxqꞌue saꞌ xchꞌo̱l lix kꞌusbal.

² Eb li cha̱bileb xnaꞌleb usilal teꞌxcꞌul xban li us nequeꞌxye. Abanan eb li incꞌaꞌ useb xnaꞌleb teꞌraj ru xba̱nunquil li ma̱usilal.

³ Li ani naxba̱nu cue̱nt riqꞌuin li a̱tinac yo̱ chixcolbal rix lix yuꞌam. Ut li ani nacuulac chiru a̱tinac xjunes naxsach rib.

⁴ Li incꞌaꞌ nacuulac chiru trabajic yal naxrahi ru li cꞌaꞌak re ru ut incꞌaꞌ naxtau. Abanan li ani natrabajic nacuan cꞌaꞌru re.

⁵ Li ani ti̱c xchꞌo̱l xicꞌ naril li ticꞌtiꞌ. Ut eb li incꞌaꞌ useb xnaꞌleb xicꞌ chic nequeꞌileꞌ ut xuta̱nal nequeꞌel.

⁶ Li cha̱bileb xnaꞌleb nequeꞌcoleꞌ xban nak ti̱queb xchꞌo̱l. Abanan eb li incꞌaꞌ useb xnaꞌleb, aꞌ ajcuiꞌ li ma̱c li nequeꞌxba̱nu, aꞌan ta̱sachok reheb.

⁷ Cuanqueb li cristian nacꞌutun nak biomeb, usta ma̱cꞌaꞌ cuan reheb. Ut cuanqueb ajcuiꞌ li cristian nacꞌutun nak nebaꞌeb usta biomeb.

⁸ Cuanqueb li cristian naru nequeꞌxcol rix lix yuꞌameb riqꞌuin lix biomal. Abanan eb li nebaꞌ ma̱cꞌaꞌ nachꞌiꞌchꞌiꞌin reheb.

⁹ Li ti̱queb xchꞌo̱l cuanqueb xyuꞌam chi junelic. Chanchan li saken. Abanan eb li incꞌaꞌ useb xnaꞌleb incꞌaꞌ teꞌcua̱nk xyuꞌam. Teꞌsachekꞌ ban. Chanchan nak nachup lix xameb.

¹⁰ Eb li nequeꞌxnimobresi rib junes chꞌaꞌajquilal nachal saꞌ xbe̱neb. Abanan eb li cuanqueb xnaꞌleb nequeꞌrabi li naꞌleb li naqꞌueheꞌ reheb.

¹¹ Li ani cuan xbiomal chi incꞌaꞌ xcꞌanjelac saꞌ junpa̱t ta̱osokꞌ chiru. Abanan li ani cau nacꞌanjelac naxchꞌutub chi caꞌchꞌinkil lix tumin toj retal nabiomoꞌ.

¹² Li ani incꞌaꞌ naxcꞌul li cꞌaꞌru naroybeni narahoꞌ xchꞌo̱l. Abanan eb li nequeꞌxcꞌul li cꞌaꞌru nequeꞌroybeni nasahoꞌ saꞌ xchꞌo̱leb.

¹³ Li ani naxtzꞌekta̱na li chakꞌrab ta̱sachk. Abanan li ani naxqꞌue xcuanquil li chakꞌrab, aꞌan tixcꞌul xkꞌajca̱munquil.

¹⁴ Li ani cuan xnaꞌleb naxqꞌue cha̱bil naꞌleb ut li a̱tin li naxye naxqꞌue xyuꞌam li ani naqꞌueheꞌ xnaꞌleb. Ut li ani naqꞌueheꞌ xnaꞌleb nacoleꞌ chiru lix cuanquil li ca̱mc.

¹⁵ Li ani naxnau cꞌoxlac ta̱qꞌuehekꞌ xlokꞌal. Ut eb li nequeꞌxba̱nu li ma̱usilal incꞌaꞌ us nequeꞌel.

¹⁶ Li ani cuan xnaꞌleb toj naxcꞌoxla chi us li cꞌaꞌru naxba̱nu. Abanan li ma̱cꞌaꞌ xnaꞌleb naxba̱nu li cꞌaꞌru naraj xjunes ut naxcꞌut nak incꞌaꞌ naxnau cꞌoxlac.

¹⁷ Junak aj yehol esil incꞌaꞌ us xnaꞌleb naxqꞌue chꞌaꞌajquilal. Abanan junak aj yehol esil cha̱bil xnaꞌleb naxqꞌue usilal.

¹⁸ Li ani incꞌaꞌ naxqꞌue saꞌ xchꞌo̱l lix kꞌusbal tixcꞌut xxuta̱n ut ta̱cana̱k saꞌ nebaꞌil. Abanan li ani tixqꞌue saꞌ xchꞌo̱l lix kꞌusbal, ta̱qꞌuehekꞌ xlokꞌal.

¹⁹ Eb li us nequeꞌel riqꞌuin li cꞌaꞌru nequeꞌxcꞌoxla xba̱nunquil nasahoꞌ saꞌ xchꞌo̱leb. Abanan eb li ma̱cꞌaꞌeb xnaꞌleb incꞌaꞌ nequeꞌxcuy cua̱nc chi incꞌaꞌ teꞌxba̱nu li ma̱usilal.

²⁰ Li ani naxcꞌam rib riqꞌuineb li cuanqueb xnaꞌleb ta̱cua̱nk xnaꞌleb. Ut li ani tixcꞌam rib riqꞌuineb li ma̱cꞌaꞌeb xnaꞌleb ta̱sachk.

²¹ Eb laj ma̱c ta̱cha̱lk raylal saꞌ xbe̱neb. Abanan eb li ti̱queb xchꞌo̱l teꞌkꞌajca̱mu̱k riqꞌuin usilal.

²² Li ani cha̱bil xnaꞌleb naxcanab li cꞌaꞌru re chokꞌ reheb li ralal xcꞌajol. Abanan laj ma̱c, aꞌaneb chic li ti̱queb xchꞌo̱l teꞌe̱chani̱nk re li cꞌaꞌru re.

²³ Junak li nebaꞌ naru nacuan nabal cꞌaꞌru re cui tixcꞌanjela lix chꞌochꞌ. Abanan naru ta̱makꞌekꞌ chiru xbaneb li incꞌaꞌ nequeꞌxba̱nu li ti̱quilal.

²⁴ Li ani incꞌaꞌ naxtij li ralal xcꞌajol incꞌaꞌ naxraheb. Aꞌut li ani naxra li ralal xcꞌajol naxtijeb chalen saꞌ xcaꞌchꞌinal.

²⁵ Eb li ti̱queb xchꞌo̱l nequeꞌcuaꞌac toj nequeꞌcꞌojla xchꞌo̱leb. Abanan eb li incꞌaꞌ useb xnaꞌleb toj teꞌtzꞌoca̱k ajcuiꞌ nequeꞌcana.