Proverbios 12 - Li Santil hu

¹ Li ani naxqꞌue saꞌ xchꞌo̱l li xtijbal, aꞌan cuan xnaꞌleb. Ut li ani naxtzꞌekta̱na lix kꞌusbal, aꞌan ma̱cꞌaꞌ xnaꞌleb.

² Li ani cha̱bil xnaꞌleb na-uxta̱na̱c ru xban li Dios. Ut li ani se̱b xchꞌo̱l chixba̱nunquil li incꞌaꞌ us ta̱qꞌuehekꞌ chixtojbal xma̱c xban li Dios.

³ Ma̱ ani naru naxcꞌojob xchꞌo̱l saꞌ xbe̱n li ma̱usilal. Abanan li ti̱queb xchꞌo̱l cꞌojcꞌo̱queb xchꞌo̱l saꞌ xbe̱n li ti̱quilal.

⁴ Junak li be̱lomej naqꞌueheꞌ xlokꞌal xban nak cha̱bil xnaꞌleb li rixakil. Abanan li ixakilbej li incꞌaꞌ us xnaꞌleb naxsach xcuanquil lix be̱lom.

⁵ Eb li ti̱queb xchꞌo̱l junes li us nequeꞌxcꞌoxla. Abanan li incꞌaꞌ useb xnaꞌleb junes balakꞌic nequeꞌxcꞌoxla.

⁶ Li a̱tin li nequeꞌxye li incꞌaꞌ useb xnaꞌleb, aꞌan chanchan jun li raꞌal re camsi̱nc. Abanan li a̱tin li nequeꞌxye li ti̱queb xchꞌo̱l, aꞌan nacoloc.

⁷ Eb li incꞌaꞌ useb xnaꞌleb teꞌsachekꞌ ruheb ut teꞌosokꞌ chi junaj cua. Abanan eb li ti̱queb xchꞌo̱l cua̱nkeb chi junelic, joꞌ eb ajcuiꞌ li ralal xcꞌajol.

⁸ Li ani cuan xnaꞌleb naqꞌueheꞌ xlokꞌal. Abanan li incꞌaꞌ useb xnaꞌleb nequeꞌtzꞌekta̱na̱c.

⁹ Kꞌaxal us nak tocꞌanjelak re nak cua̱nk cꞌaꞌru ke usta totzꞌekta̱na̱k, chiru nak takanimobresi kib ut ma̱cꞌaꞌak katzacae̱mk.

¹⁰ Li ani ti̱c xchꞌo̱l naxnau xra̱baleb lix xul. Abanan eb li incꞌaꞌ useb xnaꞌleb ma̱cꞌaꞌ nequeꞌril xtokꞌoba̱l ru.

¹¹ Li ani naxqꞌue xchꞌo̱l chi a̱uc ta̱cua̱nk nabal lix tzacae̱mk. Abanan li ani nequeꞌxic xchꞌo̱l chirix li ma̱cꞌaꞌ na-oc cuiꞌ ma̱cꞌaꞌeb xnaꞌleb.

¹² Li ti̱queb xchꞌo̱l cꞌojcꞌo̱queb xchꞌo̱l saꞌ xbe̱n li ti̱quilal. Abanan li incꞌaꞌ useb xnaꞌleb junes li incꞌaꞌ us nequeꞌxrahi ru xba̱nunquil.

¹³ Eb li incꞌaꞌ useb xnaꞌleb nequeꞌxbok raylal saꞌ xbe̱neb riqꞌuin li ticꞌtiꞌic nequeꞌxba̱nu. Abanan eb li ti̱queb xchꞌo̱l nequeꞌxnau xcolbal ribeb chiru li raylal.

¹⁴ Li junju̱nk tixcꞌul xkꞌajca̱munquil aꞌ yal chanru lix yehom xba̱nuhom. Ut tixcꞌul lix tojbal aꞌ yal chanru lix naꞌleb.

¹⁵ Li ani ma̱cꞌaꞌ xnaꞌleb naxcꞌoxla nak us yo̱ chixba̱nunquil. Abanan li cuan xnaꞌleb naxqꞌue saꞌ xchꞌo̱l li naꞌleb naqꞌueheꞌ re.

¹⁶ Li ani ma̱cꞌaꞌ xnaꞌleb saꞌ junpa̱t najoskꞌoꞌ. Abanan li ani cuan xnaꞌleb ma̱cꞌaꞌ naraj re usta nahobeꞌ.

¹⁷ Li ani ti̱c xchꞌo̱l naxye li ya̱l nak naxic chi a̱tinac chirix li ras ri̱tzꞌin. Abanan eb li incꞌaꞌ ti̱queb xchꞌo̱l incꞌaꞌ nequeꞌxye li ya̱l nak nequeꞌxic chi a̱tinac chirixeb li ras ri̱tzꞌin.

¹⁸ Cuanqueb li nequeꞌa̱tinac chi incꞌaꞌ nequeꞌxcꞌoxla li cꞌaꞌru nequeꞌxye. Ut li a̱tin li nequeꞌxye ra nanak cuiꞌ. Abanan li a̱tin li nequeꞌxye li cuanqueb xnaꞌleb, aꞌan naxcꞌojob xchꞌo̱l li ani ra saꞌ xchꞌo̱l.

¹⁹ Li ani naxye li ya̱l ta̱cua̱nk chi junelic. Abanan li ani naticꞌtiꞌic incꞌaꞌ najt ta̱cua̱nk.

²⁰ Eb li incꞌaꞌ useb xnaꞌleb, junes balakꞌic nequeꞌxcꞌoxla. Abanan li cha̱bileb xnaꞌleb junelic saheb saꞌ xchꞌo̱l chixtenkꞌanquil li ras ri̱tzꞌin chi cua̱nc saꞌ usilal.

²¹ Ma̱ jun chꞌaꞌajquilal teꞌxcꞌul li ti̱queb xchꞌo̱l. Abanan li incꞌaꞌ useb xnaꞌleb ta̱cha̱lk chixjunil li chꞌaꞌajquilal saꞌ xbe̱neb.

²² Li Ka̱cuaꞌ xicꞌ narileb li nequeꞌticꞌtiꞌic. Abanan nasahoꞌ riqꞌuineb li nequeꞌxye li ya̱l.

²³ Li ani cuan xnaꞌleb incꞌaꞌ naxnimobresi rib xban nak cuan xnaꞌleb: Abanan li ma̱cꞌaꞌeb xnaꞌleb nequeꞌxcꞌutbesi nak ma̱cꞌaꞌ xnaꞌleb.

²⁴ Li ani nacuulac chiru trabajic, aꞌan chic ta̱takla̱nk. Abanan li ani incꞌaꞌ nacuulac chiru trabajic, aꞌan ta̱cana̱k rubel xcuanquil li ani nataklan.

²⁵ Li rahil chꞌo̱lej natacuasin, abanan li cha̱bil a̱tin naxqꞌue sahil chꞌo̱lej.

²⁶ Li ani ti̱c xchꞌo̱l naxtenkꞌa li ras ri̱tzꞌin chixtaubal li us. Abanan eb li incꞌaꞌ useb xnaꞌleb nequeꞌxqꞌue li ras ri̱tzꞌin chi tꞌanecꞌ.

²⁷ Li ani nacuulac chiru cꞌanjelac ta̱cua̱nk cꞌaꞌru re. Ut li ani incꞌaꞌ nacuulac chiru cꞌanjelac incꞌaꞌ ta̱cua̱nk cꞌaꞌru re.

²⁸ Li ani nacuan saꞌ ti̱quilal ta̱cua̱nk xyuꞌam. Ut li ani incꞌaꞌ us xnaꞌleb, aꞌan ta̱ca̱mk.