Proverbios 11 - Li Santil hu

¹ Li Ka̱cuaꞌ sa xchꞌo̱l riqꞌuin li ani nabisoc chi tzꞌakal. Abanan xicꞌ narileb li ani incꞌaꞌ nequeꞌbisoc chi tzꞌakal.

² Li ani naxnimobresi rib ta̱cꞌutekꞌ xxuta̱n. Abanan li ani naxcubsi rib, aꞌan cuan xnaꞌleb.

³ Li ani cha̱bil xnaꞌleb, naxba̱nu li us xban xti̱quilal xchꞌo̱l. Abanan eb li nequeꞌxba̱nu li incꞌaꞌ us, aꞌan ajcuiꞌ lix ma̱queb nasachoc reheb.

⁴ Li biomal incꞌaꞌ naru nacoloc saꞌ xkꞌehil li rakba a̱tin. Abanan li ti̱quilal nacoloc chiru li ca̱mc.

⁵ Li ani cha̱bil nacoleꞌ xban xti̱quilal xchꞌo̱l. Abanan li nequeꞌxba̱nu ma̱usilal aꞌ ajcuiꞌ li ma̱usilal nequeꞌxba̱nu naqꞌuehoc reheb chi sachc.

⁶ Li ti̱quilal nacoloc re li ani ti̱c xchꞌo̱l. Abanan eb laj ma̱c nachal raylal saꞌ xbe̱neb xban li ma̱c nequeꞌxba̱nu.

⁷ Nak nequeꞌcam li nequeꞌxba̱nu ma̱usilal, na-osoꞌ ajcuiꞌ li cꞌaꞌru nequeꞌxcꞌoxla xba̱nunquil. Ut li cꞌaꞌru xcꞌoxla raj xba̱nunquil incꞌaꞌ chic tixba̱nu.

⁸ Li ti̱c xchꞌo̱l nacoleꞌ chiru li chꞌaꞌajquilal. Aꞌ eb chic li incꞌaꞌ useb xnaꞌleb nequeꞌcꞌuluc re li chꞌaꞌajquilal.

⁹ Eb laj caꞌ pacꞌal u nequeꞌxba̱nu raylal reheb li ras ri̱tzꞌin riqꞌuin li a̱tin nequeꞌxye. Abanan li ti̱c xchꞌo̱l naxcoleb li ras ri̱tzꞌin xban nak cuan xnaꞌleb.

¹⁰ Nak eb li ti̱queb xchꞌo̱l us nequeꞌel, eb li tenamit nequeꞌsahoꞌ saꞌ xchꞌo̱leb. Ut nak nequeꞌcam li incꞌaꞌ useb xnaꞌleb, li tenamit kꞌaxal cuiꞌchic nequeꞌsahoꞌ saꞌ xchꞌo̱leb.

¹¹ Nak eb li ti̱queb xchꞌo̱l nequeꞌosobtesi̱c, na-osobtesi̱c ajcuiꞌ li tenamit. Abanan eb li incꞌaꞌ useb xnaꞌleb naru nequeꞌxpoꞌ li tenamit riqꞌuin li cꞌaꞌru nequeꞌxye.

¹² Li ani ma̱cꞌaꞌ xnaꞌleb naxhob li ras ri̱tzꞌin. Ut li ani cuan xnaꞌleb incꞌaꞌ naxhob li ras ri̱tzꞌin.

¹³ Li ani nacuulac chiru moloc a̱tin naxserakꞌi chixjunil li cꞌaꞌru mukmu. Abanan li ani cuan xnaꞌleb incꞌaꞌ naa̱tinac chirix li cꞌaꞌru narabi.

¹⁴ Cui ma̱ ani naqꞌuehoc xnaꞌleb li cuanqueb saꞌ xcuanquil, li tenamit incꞌaꞌ us na-el. Li tenamit naru na-el chi us cui li cuanqueb saꞌ xcuanquil cuan nabal li nequeꞌqꞌuehoc xnaꞌlebeb.

¹⁵ Li ani naxsume xtojbal xcꞌas junak incꞌaꞌ naxnau ru, incꞌaꞌ us na-el. Aꞌut li incꞌaꞌ naxsume tojoc cꞌas, aꞌan naru nacuan chi ma̱cꞌaꞌ xcꞌaꞌux.

¹⁶ Junak ixk cha̱bil xnaꞌleb naqꞌueheꞌ xlokꞌal. Ut junak cui̱nk se̱b xchꞌo̱l nabiomoꞌ.

¹⁷ Li ani naxba̱nu usilal re li ras ri̱tzꞌin, chokꞌ re ajcuiꞌ aꞌan naxba̱nu li us. Ut li ani incꞌaꞌ naxba̱nu usilal, chokꞌ re ajcuiꞌ aꞌan naxsicꞌ li incꞌaꞌ us.

¹⁸ Li ma̱tan li nequeꞌxcꞌul li incꞌaꞌ useb xnaꞌleb nalaj na-osoꞌ. Abanan li ma̱tan li nequeꞌxcꞌul li cuanqueb saꞌ ti̱quilal, aꞌan ma̱cꞌaꞌ rosoꞌjic.

¹⁹ Li ani cuan saꞌ ti̱quilal cuan xyuꞌam chi junelic. Aꞌut eb li nequeꞌxba̱nu li ma̱usilal yo̱queb chixbokbal li ca̱mc saꞌ xbe̱neb.

²⁰ Li Ka̱cuaꞌ Dios xicꞌ narileb li incꞌaꞌ useb xnaꞌleb. Aꞌut li nequeꞌxba̱nu li us sa xchꞌo̱l riqꞌuineb.

²¹ Relic chi ya̱l nak eb li incꞌaꞌ useb xnaꞌleb tento nak teꞌxcꞌul lix tojbal xma̱c. Abanan eb li ti̱queb xchꞌo̱l teꞌcolekꞌ chiru li tojba ma̱c.

²² Lix chꞌinaꞌusal li ixk li ma̱cꞌaꞌ xnaꞌleb, aꞌan chanchan jun li argolla oro li qꞌuebil chi ruꞌuj junak li a̱k.

²³ Li ti̱queb xchꞌo̱l junes li us nequeꞌraj xba̱nunquil. Abanan li cꞌaꞌru nequeꞌroybeni li incꞌaꞌ useb xnaꞌleb, aꞌan lix joskꞌil li Dios.

²⁴ Cuanqueb cristian nequeꞌsihin ut kꞌaxal cuiꞌchic nabal li nequeꞌxcꞌul. Ut cuanqueb ajcuiꞌ li cristian caꞌchꞌin ajcuiꞌ nequeꞌsihin ut nequeꞌcana saꞌ nebaꞌil xban nak caꞌchꞌin ajcuiꞌ nequeꞌxsi.

²⁵ Li ani nacuulac chiru sihi̱nc, nabal chic ta̱qꞌuehekꞌ re. Li ani naxtenkꞌa li ras ri̱tzꞌin, ta̱tenkꞌa̱k ajcuiꞌ aꞌan.

²⁶ Li ani naxxoc nabal li trigo chokꞌ re namajecua̱c xbaneb li tenamit. Abanan eb li tenamit nequeꞌxtzꞌa̱ma rusilal li Dios saꞌ xbe̱neb li nequeꞌxcꞌayi li trigo.

²⁷ Li ani naxsicꞌ li us, us ajcuiꞌ naxcꞌul. Ut li ani naxsicꞌ li incꞌaꞌ us, aꞌan ajcuiꞌ tixcꞌul.

²⁸ Li ani naxcꞌojob xchꞌo̱l saꞌ xbe̱n lix biomal ta̱osokꞌ joꞌ nak na-osoꞌ li chaki kꞌe̱n. Abanan li ti̱queb xchꞌo̱l cha̱bil cua̱nkeb. Chanchanakeb jun to̱n li cheꞌ rax rax ru.

²⁹ Li ani incꞌaꞌ naril lix jun cablal ma̱cꞌaꞌ chic cuan re nacana. Ut li ma̱cꞌaꞌ xnaꞌleb nacana chokꞌ xmo̱s li cuan xnaꞌleb.

³⁰ Li ti̱quilal naqꞌuehoc yuꞌam. Li ani cuan xnaꞌleb naxchꞌolob xya̱lal re nak jalaneb chic teꞌxtau li junelic yuꞌam.

³¹ Relic chi ya̱l nak li ti̱queb xchꞌo̱l nequeꞌxcꞌul lix kꞌajca̱munquil arin saꞌ ruchichꞌochꞌ. ¿Ma tojaꞌ ta chic eb laj ma̱c ut eb li incꞌaꞌ useb xnaꞌleb incꞌaꞌ teꞌxcꞌul xtojbal lix ma̱queb?