Proverbios 1 - Li Santil hu

Aꞌan aꞌin lix ya̱lal li a̱tin yebil xbaneb li cuanqueb xnaꞌleb

¹ Aꞌan aꞌin li a̱tin li quixye laj Salomón, li ralal laj David li quicuan chokꞌ rey saꞌ li tenamit Israel.

² Cuan xya̱lal li a̱tin li quixye re nak tixtenkꞌa jalan chic chixtaubal xnaꞌleb ut chixtaubal li us. Ut re ajcuiꞌ xtenkꞌanquileb chixtaubal ru li a̱tin junju̱nk li chꞌaꞌaj xtaubal ru.

³ Eb li a̱tin aꞌin teꞌxtenkꞌaheb li cristian chixnaubal bar cuan li us ut bar cuan li incꞌaꞌ us. Tixtenkꞌaheb chi cua̱nc saꞌ ti̱quilal ut chi cua̱nc saꞌ cha̱bilal.

⁴ Ut tixtenkꞌaheb ajcuiꞌ chi cua̱nc xcꞌaꞌuxeb li incꞌaꞌ nequeꞌxnau cꞌoxlac. Ut naxqꞌue xnaꞌlebeb li toj sa̱jeb re nak teꞌxcꞌoxla chi us cꞌaꞌru teꞌxba̱nu.

⁵ Li ani cuan xnaꞌleb ut se̱b xchꞌo̱l chixqꞌuehak retal li a̱tin aꞌin re nak tixtau xtzꞌakob lix naꞌleb.

⁶ Ut re ajcuiꞌ nak tixtau ru li a̱tin li nequeꞌxye li cuanqueb xnaꞌleb, li a̱tin li chꞌaꞌaj xtaubal ru.

⁷ Li ani ta̱raj ta̱cua̱nk xnaꞌleb, tento nak tixxucua ru li Ka̱cuaꞌ. Eb li ma̱cꞌaꞌeb xnaꞌleb nequeꞌxtzꞌekta̱na li cha̱bil naꞌleb ut nequeꞌxtzꞌekta̱na ajcuiꞌ lix kꞌusbaleb.

⁸ Ex cualal incꞌajol, cheqꞌuehak saꞌ e̱chꞌo̱l le̱ kꞌusbal naxqꞌue le̱ yucuaꞌ. Ut me̱tzꞌekta̱na le̱ tijbal naxqꞌue le̱ naꞌ.

⁹ Kꞌaxal lokꞌ chokꞌ e̱re nak tex-abi̱nk chiru le̱ naꞌ e̱yucuaꞌ. Chanchan nak ta̱qꞌuehekꞌ junak e̱kꞌol che̱cux ut junak corona saꞌ e̱jolom.

¹⁰ Ex cualal incꞌajol, cui eb laj ma̱c teꞌraj e̱balakꞌinquil, me̱canab e̱rib chiruheb.

¹¹ Usta teꞌxye e̱re, “Quimkex kiqꞌuin. Chex-oque̱nk saꞌ kaya̱nk. Toxic ut takaram saꞌ xbe li ma̱cꞌaꞌeb xma̱c ut takacamsiheb nak yo̱keb chi numecꞌ.

¹² Chanchan nukꞌbil takaba̱nu nak takacamsiheb. Chanchan teꞌnukꞌekꞌ xban li jul nak takacamsiheb chi ma̱cꞌaꞌ saꞌ xchꞌo̱leb.

¹³ Ut sa chic tocua̱nk. Ta̱cana̱k chokꞌ ke chixjunil li takelkꞌa chiruheb ut cua̱nk chic kabiomal.

¹⁴ Ocankex saꞌ kaya̱nk. Ma̱re us toe̱lk e̱ban la̱ex. Ut saꞌ comonil takayal xsahil li take̱chani,” ma̱re chaꞌkeb e̱re.

¹⁵ Abanan la̱ex, ex cualal incꞌajol, mexxic saꞌ xya̱nkeb aꞌan ut me̱ba̱nu li incꞌaꞌ us li nequeꞌxba̱nu eb aꞌan.

¹⁶ Eb aꞌan teꞌraj ru xba̱nunquil li incꞌaꞌ us ut teꞌraj ru camsi̱nc.

¹⁷ ¿Cꞌaꞌru aj e nak teꞌxram saꞌ xbeheb li cristian, cui li cristian nequeꞌxnau nak yo̱keb xrambal?

¹⁸ Eb li cui̱nk aꞌan nequeꞌxyi̱b li raꞌal re ta̱tꞌanekꞌ jalan. Abanan aꞌaneb ajcuiꞌ nequeꞌtꞌaneꞌ chi saꞌ. Incꞌaꞌ nequeꞌxqꞌue retal nak nequeꞌxqꞌue rib saꞌ chꞌaꞌajquilal.

¹⁹ Joꞌcaꞌin nak nequeꞌosoꞌ eb li cui̱nk li nequeꞌxrahi ru li jalan aj e. Nequeꞌxsach lix yuꞌameb xban li cꞌaꞌru nequeꞌxrahi ru.

Li Ka̱cuaꞌ yo̱ chixyechiꞌinquil li naꞌleb reheb li ma̱cꞌaꞌeb xnaꞌleb

²⁰ Li naꞌleb aꞌin yo̱ chi abi̱c resilal yalak bar saꞌ eb li be joꞌ ajcuiꞌ saꞌ eb li cꞌayil.

²¹ Yo̱queb chi cuulac resil saꞌ eb li naꞌajej bar nequeꞌchꞌu̱tla cuiꞌ nabal li cristian. Ut yo̱ ajcuiꞌ chi abi̱c saꞌ eb li oqueba̱l re li tenamit.

²² La̱ex, li ma̱cꞌaꞌ e̱naꞌleb, ¿jokꞌe te̱canab xba̱nunquil li to̱ntil naꞌleb li ma̱cꞌaꞌ na-oc cuiꞌ? Ut la̱ex li nequekꞌetkꞌeti e̱rib, ¿jokꞌe te̱canab xtzꞌekta̱nanquil li cha̱bil naꞌleb?

²³ Quixye li Ka̱cuaꞌ: —Cheqꞌuehak retal le̱ kꞌusbal li ninqꞌue ut la̱in tinqꞌuehok e̱naꞌleb ut texintenkꞌa chixtaubal ru lix ya̱lal.

²⁴ La̱in xexinbok ut xinye e̱re nak texcha̱lk cuiqꞌuin. Abanan la̱ex incꞌaꞌ queꞌraj rabinquil li cꞌaꞌru quinye e̱re.

²⁵ Quetzꞌekta̱na ban le̱ naꞌleb li quinqꞌue. Incꞌaꞌ queraj xcꞌulbal le̱ kꞌusbal.

²⁶ Cuulac re xkꞌehil nak la̱in texinseꞌe xban li raylal ta̱cha̱lk saꞌ e̱be̱n. Texinseꞌe nak ca̱mkak e̱re xban e̱xiu.

²⁷ Nak ta̱cha̱lk saꞌ e̱be̱n li xiu ut li chꞌaꞌajquilal, incꞌaꞌ chic te̱tau cꞌaꞌru te̱ba̱nu xban li raylal li yo̱kex chixcꞌulbal. Chanchan nak nachal li ikꞌ li naxsuti rib nak ta̱cha̱lk li raylal saꞌ e̱be̱n ut tixsach e̱ru.

²⁸ Saꞌ li cutan aꞌan tine̱ya̱ba raj chic. Abanan la̱in incꞌaꞌ texinsume. Tine̱sicꞌ raj chic, abanan incꞌaꞌ tine̱tau,

²⁹ xban nak xetzꞌekta̱na le̱ naꞌleb xinqꞌue e̱re ut incꞌaꞌ xeraj xqꞌuebal inlokꞌal la̱in li Ka̱cuaꞌ.

³⁰ Incꞌaꞌ xeraj xcꞌulbal le̱ naꞌleb xinqꞌue e̱re. Xetzꞌekta̱na ban le̱ kꞌusbal li xinqꞌue.

³¹ Joꞌcan nak anakcuan cꞌulumak chixjunil li raylal xchal saꞌ e̱be̱n xban li ma̱usilal xeba̱nu toj retal textitzꞌk riqꞌuin li cꞌaꞌak re ru incꞌaꞌ us xeba̱nu.

³² Eb li ma̱cꞌaꞌeb xnaꞌleb nequeꞌcam xban nak incꞌaꞌ nequeꞌraj xcꞌulbal lix naꞌlebeb. Joꞌcaneb ajcuiꞌ li jip xchꞌo̱leb. Nequeꞌcam xban nak nequeꞌxtzꞌekta̱na li naꞌleb naqꞌueheꞌ reheb.

³³ Abanan li ani naxqꞌue xchꞌo̱l chirabinquil li ninye la̱in, aꞌan ta̱cua̱nk saꞌ tuktu̱quil usilal ut incꞌaꞌ ta̱xucuak xban li raylal.