Oseas 9 - Li Santil hu

Ta̱qꞌuehekꞌ raylal saꞌ xbe̱neb laj Israel xban nak yo̱queb chixba̱nunquil ma̱usilal

¹ Quixye laj Oseas: —Anakcuan incꞌaꞌ chic ta̱sahokꞌ saꞌ e̱chꞌo̱l la̱ex aj Israel joꞌ nak nasahoꞌ saꞌ xchꞌo̱leb li tenamit li incꞌaꞌ nequeꞌpa̱ban. Xesicꞌ jalan le̱ dios chiru li Ka̱cuaꞌ. La̱ex xecꞌoxla nak le̱ dios li xesicꞌ, aꞌan xqꞌuehoc re chi u̱chi̱nc le̱ racui̱mk.

² Abanan ta̱cuulak xkꞌehil nak incꞌaꞌ chic ta̱u̱chi̱nk li trigo chi moco li uvas. Ma̱cꞌaꞌak chic e̱cua e̱rucꞌa.

³ La̱ex incꞌaꞌ texcana̱k arin saꞌ li naꞌajej li qꞌuebil e̱re xban li Dios. La̱ex ralal xcꞌajol laj Efraín, texcana̱k rubel xtakl laj Asiria. Chanchan nak quexcuan chak Egipto. Ut te̱tzaca li tzacae̱mk li yebil e̱re nak incꞌaꞌ us te̱tzaca.

⁴ Nak cua̱nkex saꞌ li tenamit aꞌan incꞌaꞌ chic ta̱ru̱k texmayejak chiru li Dios. Chi moco li vino chi moco li xul te̱mayeja chiru. Ut nak texcuaꞌak chanchan nak yo̱kex chixyoꞌlenquil junak li camenak ut muxbil chic ru le̱ pa̱ba̱l ta̱cana̱k. Incꞌaꞌ chic ta̱ru̱k texmayejak chiru li Dios. Li tzacae̱mk aꞌan caꞌaj cuiꞌ re te̱tzaca la̱ex.

⁵ ¿Ut cꞌaꞌru te̱ba̱nu nak teꞌcuulak xkꞌehil eb li ninkꞌe re xqꞌuebal xlokꞌal li Ka̱cuaꞌ?

⁶ Tex-e̱lk saꞌ le̱ tenamit xban li raylal yo̱kex chixcꞌulbal. Laj Asiria teꞌnumta̱k saꞌ e̱be̱n. Chanchan nak chapcho̱quex cuiꞌchic xbaneb laj Egipto. Ut nak tex-osokꞌ, chanchan nak texmukekꞌ aran Menfis. Ta̱chamokꞌ li qꞌuix ut li pim saꞌ le̱ naꞌaj quexcuan cuiꞌ, ut ta̱osokꞌ le̱ biomal.

⁷ Cuulac re xkꞌehil li rakba a̱tin saꞌ e̱be̱n. Cuulac re xkꞌehil nak te̱toj rix le̱ ma̱c. Nak ta̱cuulak li cutan aꞌan, la̱ex aj Israel te̱qꞌue retal. Che̱ru la̱ex li profeta ma̱cꞌaꞌ chic xnaꞌleb. Laj yehol ra̱tin li Dios xlo̱coꞌ ru, chanquex. Xban xqꞌuial le̱ ma̱usilal xicꞌ chic niquine̱ril.

⁸ La̱in taklanbilin chak xban li Dios chokꞌ aj ilol e̱re la̱ex li ralal xcꞌajol laj Efraín. Abanan yalak bar ninxic chixyebal resil li raylal cha̱lel saꞌ e̱be̱n, xicꞌ niquine̱ril. Che̱ru la̱ex, chanchanin laj yo li naraj chapoc e̱re. Ut saꞌ li rochoch li Dios li bar raj xine̱cꞌul saꞌ xya̱lal, xicꞌ chic xine̱ril.

⁹ Kꞌaxal xnumta le̱ ma̱usilal joꞌ queꞌxba̱nu aran Gabaa. Anakcuan ta̱julticokꞌ re li Dios le̱ ma̱usilal ut aꞌan ta̱qꞌuehok e̱re chixtojbal rix le̱ ma̱c, chan laj Oseas.

¹⁰ Joꞌcaꞌin quixye li Ka̱cuaꞌ: —Junxil kꞌaxal xsahoꞌ inchꞌo̱l riqꞌuineb laj Israel. Quisahoꞌ inchꞌo̱l riqꞌuineb joꞌ nak nasahoꞌ xchꞌo̱l junak chirilbal li cha̱bil uvas saꞌ tikcual chꞌochꞌ. Chanchan rilbal li xbe̱n ru li cha̱bil higos saꞌ xkꞌehil nak nau̱chin lix cheꞌel. Abanan nak queꞌco̱eb Baal-peor, queꞌxjal xnaꞌlebeb ut queꞌrisi ribeb cuiqꞌuin ut queꞌxtiquib xba̱nunquil li xuta̱nalil naꞌleb. Ut lix yibal ru lix naꞌlebeb, chanchan lix yibal ru li jalanil dios li queꞌxlokꞌoni.

¹¹ Joꞌ nak naxicꞌan li xul chiru choxa, joꞌcan nak ta̱sachekꞌ lix lokꞌaleb li ralal xcꞌajol laj Efraín. Incꞌaꞌ chic teꞌcua̱nk ralal xcꞌajol. Eb li rixakil incꞌaꞌ chic teꞌqꞌuiresi̱nk chi moco teꞌcana̱k chic chi yaj aj ixk.

¹² Ut cui ta teꞌni̱nka̱nk li ralal xcꞌajol, la̱in tebinmakꞌ chiruheb. Tokꞌobak ruheb nak tebincanab la̱in, chan li Ka̱cuaꞌ.

¹³ Laj Oseas quixye re li Ka̱cuaꞌ: —Cꞌajoꞌ raj xchꞌinaꞌusal lix naꞌajeb li ralal xcꞌajol laj Efraín. Chanchan li naꞌajej Tiro. Abanan li ralal xcꞌajol laj Efraín tenebanbil ca̱mc saꞌ xbe̱neb.

¹⁴ Ba̱nu reheb li cꞌaꞌru xacꞌoxla xba̱nunquil, at Ka̱cuaꞌ. Canabeb li ixk chi incꞌaꞌ chic teꞌqꞌuiresi̱nk. Ut cui ta teꞌcua̱nk xcocꞌaleb, ma̱cꞌaꞌak ta xtuꞌeb re nak incꞌaꞌ teꞌqꞌui̱k, chan laj Oseas.

¹⁵ Ut li Ka̱cuaꞌ quixye: —Chixjunil lix ma̱usilal queꞌxtiquib xba̱nunquil aran Gilgal. Aran ajcuiꞌ quichal injoskꞌil saꞌ xbe̱neb. Xban li ma̱usilal nequeꞌxba̱nu, tincuisiheb saꞌ li cuochoch ut incꞌaꞌ chic tinraheb. Chixjunileb laj cꞌamol be chiruheb xeꞌxkꞌetkꞌeti ribeb chicuu.

¹⁶ Eb li ralal xcꞌajol laj Efraín ra teꞌxcꞌul. Chanchanakeb li cheꞌ li yo̱ chi chakic xxeꞌ. Incꞌaꞌ chic teꞌcua̱nk xcocꞌaleb. Ut cui ta teꞌcua̱nk, la̱in tinmakꞌeb chiruheb, usta kꞌaxal raro xbaneb, chan li Dios.

¹⁷ Laj Oseas quixye: —Lin Dios tixtzꞌekta̱naheb xban nak incꞌaꞌ queꞌxba̱nu li cꞌaꞌru quixye aꞌan. Joꞌcan nak teꞌxbeni ribeb yalak bar saꞌ ruchichꞌochꞌ.