Oseas 8 - Li Santil hu

Quirakeꞌ a̱tin saꞌ xbe̱neb laj Israel xban nak queꞌxlokꞌoni li jalanil dios

¹ Ya̱basi li trompeta xban nak yo̱queb chi cha̱lc chi pletic li xicꞌ nequeꞌiloc reheb lin tenamit. Chanchaneb li cꞌuch nak yo̱queb chi cha̱lc. Xban nak lin tenamit xeꞌxtzꞌekta̱na li contrato quinba̱nu riqꞌuineb, joꞌcan nak teꞌxcꞌul li raylal. Xeꞌxtzꞌekta̱na li chakꞌrab xinqꞌue reheb.

² Nequeꞌxye: —At Ka̱cuaꞌ, nakanau a̱cuu, la̱o aj Israel, chanqueb cue.

³ Abanan eb laj Israel xeꞌxtzꞌekta̱na li us. Joꞌcan nak eb li xicꞌ nequeꞌiloc reheb teꞌnumta̱k saꞌ xbe̱neb.

⁴ Queꞌxxakab lix reyeb, abanan ma̱cuaꞌ la̱in xinsicꞌoc reheb. Queꞌxxakab li nequeꞌtaklan saꞌ xbe̱neb, abanan yal xjuneseb queꞌxba̱nu xban nak incꞌaꞌ queꞌxpatzꞌ cue ani teꞌxxakab. Queꞌxyi̱b lix dioseb riqꞌuin oro ut plata ut aꞌan ajcuiꞌ ta̱qꞌuehok reheb chi sachecꞌ.

⁵ La̱in xicꞌ nacuil li cuacax oro li nequeꞌxlokꞌoniheb laj Samaria. Cꞌajoꞌ lin joskꞌil yo̱ saꞌ xbe̱neb. ¿Ma ma̱ jokꞌe teꞌxcanab xba̱nunquil li ma̱usilal?

⁶ Aꞌan moco dios ta. Yal yi̱banbil xban jun laj tenol chꞌi̱chꞌ re Israel. Li cuacax oro li nequeꞌxlokꞌoni aran Samaria ta̱puqꞌui̱k.

⁷ Li cꞌaꞌru yo̱queb chixba̱nunquil ma̱cꞌaꞌ na-oc cuiꞌ. Ut li cꞌaꞌru teꞌxcꞌul, aꞌan li osocꞌ. Chanchan nak xeꞌrau li ikꞌ ut aꞌ chic li ca̱k-sut-ikꞌ li xeꞌxkꞌol. Li trigo teꞌrau incꞌaꞌ ta̱atzꞌumak chi moco tixqꞌue ru. Ut cui ta tixqꞌue, jalan chic teꞌtzaca̱nk re.

⁸ Eb laj Israel teꞌsachekꞌ xcuanquil. Ma̱cꞌaꞌ chic teꞌoc cuiꞌ chiruheb li jalan tenamit. Chanchanakeb aj chic jun li secꞌ ma̱cꞌaꞌ chic xcꞌanjel. Yal re tzꞌekecꞌ aj chic.

⁹ Li ralal xcꞌajol laj Efraín chanchaneb li bu̱r xban nak nequeꞌxba̱nu xjuneseb li cꞌaꞌru nequeꞌraj. Xeꞌco̱eb xpatzꞌbal xtenkꞌanquileb riqꞌuineb laj Asiria ut queꞌxtoj re nak teꞌcolekꞌ. Ut incꞌaꞌ xeꞌxcꞌoxla nak la̱in raj xincoloc reheb.

¹⁰ Lin tenamit teꞌxtumina ruheb laj Asiria. Ut la̱in tebinchꞌutub ru ut tebinqꞌue chixcꞌulbal li raylal saꞌ rukꞌeb lix reyeb laj Asiria joꞌqueb ajcuiꞌ li nequeꞌcꞌanjelac chiru.

¹¹ Eb li ralal xcꞌajol laj Efraín queꞌxyi̱b nabal li artal ut caꞌaj cuiꞌ re ma̱cobc quicꞌanjelac cuiꞌ reheb.

¹² Quintzꞌi̱ba chokꞌ reheb lix nimal xcuanquil lin chakꞌrab, abanan ma̱cꞌaꞌ qui-oc cuiꞌ chiruheb.

¹³ Nequeꞌxmayeja li xul chicuu ut eb aꞌan ajcuiꞌ li nequeꞌtzacan re. La̱in incꞌaꞌ nacuulac chicuu lix mayejeb xban nak najulticoꞌ cue li ma̱usilal nequeꞌxba̱nu. Joꞌcan nak re xtojbal rixeb lix ma̱c, ta̱cha̱lk li raylal saꞌ xbe̱neb. Chanchan li raylal li queꞌxcꞌul nak cuanqueb chak Egipto.

¹⁴ Xsach saꞌ xchꞌo̱leb laj Israel nak la̱in quiyoꞌobtesin reheb. Yo̱queb chixyi̱banquil lix ni̱nkal ru cab xnaꞌajeb lix dioseb. Ut eb laj Judá queꞌxyi̱b lix ni̱nkal ru tenamit ut queꞌxcauresi re nak cauhakeb rib. Abanan la̱in tintakla chak xam saꞌ xbe̱neb ut ta̱cꞌatekꞌ lix naꞌaj lix dioseb ut teꞌcꞌatekꞌ ajcuiꞌ lix ni̱nkal ru tenamit li xeꞌxyi̱b, chan li Dios.