Oseas 7 - Li Santil hu

¹ Nak xcuaj raj xcolbaleb laj Israel, xjulticoꞌ cue lix ma̱queb li ralal xcꞌajol laj Efraín joꞌ ajcuiꞌ lix ma̱queb laj Samaria. Nequeꞌbalakꞌin, nequeꞌelkꞌac saꞌ rochocheb li ras ri̱tzꞌin, ut nequeꞌelkꞌac ajcuiꞌ saꞌ eb li be.

² Incꞌaꞌ nequeꞌxcꞌoxla nak la̱in yo̱quin chixqꞌuebal retal lix ma̱usilaleb. La̱in nacuil nak li ma̱c yo̱ chi numta̱c saꞌ xbe̱neb.

³ Nasahoꞌ saꞌ xchꞌo̱l li rey joꞌqueb ajcuiꞌ li nequeꞌcꞌanjelac chiru riqꞌuin li ma̱usilal ut li balakꞌi̱nc nequeꞌxba̱nu li tenamit.

⁴ Ut chixjunileb nequeꞌyumbe̱tac nequeꞌcoꞌbe̱tac. Chanchaneb jun li horno li quiqꞌueheꞌ xxam chi saꞌ, abanan incꞌaꞌ quiqꞌueheꞌ xxamlel chi us toj nak ac xyokꞌi̱c ut ac xsi̱poꞌ lix kꞌemal li caxlan cua.

⁵ Saꞌ lix ninkꞌe, li rey quicaltesi̱c xbaneb li nequeꞌcꞌanjelac chiru. Ut li rey qui-oc chixba̱nunquil li yibru naꞌleb saꞌ xya̱nkeb li incꞌaꞌ useb xnaꞌleb.

⁶ Li ra̱meb chanchan jun li horno li yo̱ xxamlel. Laj yi̱bom caxlan cua quixqꞌue li xam chi saꞌ ut quicuar chiru li kꞌojyi̱n. Ut ekꞌela chic quixqꞌue chi us lix xamlel li horno. Joꞌcan ajcuiꞌ li ra̱meb xbaneb lix ma̱usilaleb. Chanchan xxamlel li horno lix ma̱usilaleb nak yo̱queb chixcꞌu̱banquil chanru teꞌxba̱nu.

⁷ Xban nak numtajenak lix ma̱usilaleb, quilajeꞌxcamsiheb li nequeꞌtaklan saꞌ xbe̱neb. Ut ma̱ jun li rey quicuan saꞌ xya̱lal xbaneb. Quilajeꞌisi̱c saꞌ xcuanquileb. Ut ma̱ jun saꞌ xya̱nkeb quitzꞌa̱man chicuu nak tintenkꞌaheb, chan li Ka̱cuaꞌ.

⁸ Eb li ralal xcꞌajol laj Efraín queꞌxjunaji ribeb riqꞌuineb li jalaneb xtenamit li incꞌaꞌ useb xnaꞌleb. Chanchaneb li cua li incꞌaꞌ sukꞌisinbil. Chakꞌ jun pacꞌal ut kꞌem ru jun pacꞌal.

⁹ Yo̱ xsachbal xcuanquileb xbaneb li jalaneb xtenamit ut eb aꞌan incꞌaꞌ nequeꞌxqꞌue retal. Chanchan li yo̱ chi sakocꞌ xjolomeb nak yo̱queb chi osocꞌ xbaneb li jalaneb xtenamit ut incꞌaꞌ nequeꞌxqꞌue retal.

¹⁰ Eb laj Israel yo̱queb chi cꞌuluc raylal abanan xban lix kꞌetkꞌetileb incꞌaꞌ nequeꞌraj sukꞌi̱c cuiqꞌuin la̱in li Ka̱cuaꞌ lix Dioseb. Usta ra yo̱queb chixcꞌulbal, abanan incꞌaꞌ chic nequeꞌraj insicꞌbal.

¹¹ Eb li ralal xcꞌajol laj Efraín chanchaneb li mucuy ma̱cꞌaꞌ xnaꞌleb. Incꞌaꞌ naxnau cꞌoxlac. Xbe̱n cua nequeꞌxpatzꞌ xtenkꞌanquil riqꞌuineb laj Egipto ut nequeꞌxpatzꞌ ajcuiꞌ riqꞌuineb laj Asiria.

¹² Nak yo̱queb chi xic yalak bar, la̱in tebinchap joꞌ nak nequeꞌchapeꞌ li xul li nequeꞌxicꞌan chiru choxa. La̱in tebinqꞌue chixtojbal rix lix ma̱queb joꞌ yebil reheb.

¹³ Tokꞌob xak ruheb xban nak xineꞌxtzꞌekta̱na la̱in. Raylal ta̱cha̱lk saꞌ xbe̱neb xban nak xeꞌxkꞌetkꞌeti ribeb chicuu ut yal xcab rix xchꞌo̱leb nak xineꞌxlokꞌoni. La̱in xcuaj raj xcolbaleb, abanan eb aꞌan incꞌaꞌ xeꞌraj.

¹⁴ Incꞌaꞌ xeꞌtzꞌa̱man chicuu chi anchaleb xchꞌo̱l nak japjo̱queb re saꞌ lix cuariba̱l. Nak xeꞌxchꞌutub ribeb chixtzꞌa̱manquil lix cua rucꞌaheb, xeꞌxkꞌetkꞌeti ribeb chicuu.

¹⁵ Usta la̱in xincꞌutuc lix ya̱lal chiruheb ut xinqꞌue xcacuilal xchꞌo̱leb, abanan eb aꞌan aꞌ chic li incꞌaꞌ us xeꞌxcꞌoxla chicuix.

¹⁶ Niquineꞌxtzꞌekta̱na ut nequeꞌxic riqꞌuin li jalanil dios. Chanchaneb li yocos aj tzimaj ma̱cꞌaꞌ na-oc cuiꞌ. Joꞌcan nak teꞌcamsi̱k riqꞌuin chꞌi̱chꞌ li nequeꞌcꞌamoc be saꞌ xya̱nkeb yal xban nak nequeꞌxnimobresi ribeb riqꞌuin li cꞌaꞌru nequeꞌxye. Ut xban aꞌan teꞌseꞌe̱k xbaneb laj Egipto.