Oseas 5 - Li Santil hu

Li Dios quixtzꞌekta̱naheb laj Israel xban li ma̱c queꞌxba̱nu

¹ La̱ex laj tij, cherabihak li oc cue chixyebal. La̱ex laj Israel, cheqꞌuehak retal li tinye. Ex ralal xcꞌajol li rey, abihomak li tinye anakcuan. Xexrakoc raj a̱tin saꞌ xbe̱neb li tenamit saꞌ ti̱quilal. Abanan incꞌaꞌ xeba̱nu. Joꞌcan nak ta̱rakekꞌ a̱tin saꞌ e̱be̱n la̱ex ut texinqꞌue chixtojbal rix le̱ ma̱c. Xeqꞌue e̱rib joꞌ jun raꞌal reheb laj Mizpa joꞌ ajcuiꞌ reheb laj Tabor.

² Chanchan nak xebec jun li jul kꞌaxal cham chokꞌ re li raꞌal xban lix qꞌuial li ma̱usilal nequeba̱nu. Joꞌcan nak texinqꞌue chixtojbal rix le̱ ma̱usilal che̱junilex la̱ex.

³ La̱in ninnau chanru le̱ naꞌleb la̱ex ralal xcꞌajol laj Efraín. Incꞌaꞌ naru te̱muk e̱rib chicuu ex aj Israel. Li ralal xcꞌajol laj Efraín xineꞌxtzꞌekta̱na ut yo̱queb chixlokꞌoninquil li jalanil dios. Ut lix ma̱usilaleb aꞌan xbon rib saꞌ e̱ya̱nk che̱junilex la̱ex aj Israel.

⁴ Xban le̱ ma̱usilal incꞌaꞌ chic nequecꞌoxla sukꞌi̱c cuiqꞌuin la̱in le̱ Dios. Nequeqꞌue ban e̱chꞌo̱l chixlokꞌoninquil li yi̱banquil dios. Joꞌcan nak incꞌaꞌ naru te̱nau cuu nak la̱in li Ka̱cuaꞌ.

⁵ Xban lix kꞌetkꞌetileb laj Israel nacꞌutun nak cuanqueb xma̱c. Ut xban lix kꞌetkꞌetileb, eb li ralal xcꞌajol laj Israel ut eb li ralal xcꞌajol laj Efraín teꞌosokꞌ saꞌ li ma̱c. Ut teꞌosokꞌ ajcuiꞌ saꞌ lix ma̱queb li ralal xcꞌajol laj Judá.

⁶ Eb laj Israel nequeꞌxcꞌam li cuacax joꞌ ajcuiꞌ lix carner re nak teꞌxmayeja chicuu. Abanan ma̱cꞌaꞌ rajbal nak nequeꞌmayejac chicuu xban nak la̱in xintzꞌekta̱naheb.

⁷ Nequeꞌxba̱nu rib nak niquineꞌxlokꞌoni, abanan ma̱cuaꞌ la̱in nequeꞌxlokꞌoni cuu. Aꞌ ban chic li jalanil dios nequeꞌxlokꞌoni. Eb li ralal xcꞌajol ma̱cuaꞌeb chic intenamit. Joꞌcan nak chi se̱b tebinsach ut tinsach ajcuiꞌ lix naꞌajeb.

⁸ Cheya̱basihak li trompeta aran Gabaa. Cheya̱basihak aran Ramá. Cheyehak resil aran Bet-avén xban nak ticla̱c re li ple̱t. Cheqꞌuehak retal ut texxucuak la̱ex li ralal xcꞌajol laj Benjamín.

⁹ Eb li ralal xcꞌajol laj Efraín teꞌcana̱k chi ma̱cꞌaꞌ cuan reheb saꞌ xkꞌehil li rakba a̱tin. Eb li ralal xcꞌajol laj Israel teꞌxnau nak relic chi ya̱l joꞌcaꞌin ta̱cꞌulma̱nk.

¹⁰ Li Ka̱cuaꞌ quixye: —Yo̱ injoskꞌil xban nak eb laj cꞌamol be saꞌ xya̱nkeb laj Judá queꞌcuulac e̱riqꞌuin la̱ex aj Israel ut queꞌxmakꞌ che̱ru le̱ naꞌaj. Chanchan osoꞌqueb re saꞌ li cacuil hab nak tinqꞌueheb chixtojbal xma̱queb.

¹¹ Eb li ralal xcꞌajol laj Efraín nequeꞌrahobtesi̱c xban nak nequeꞌxtzꞌekta̱na li ti̱quilal ut nequeꞌxqꞌue xchꞌo̱l chixlokꞌoninquileb li yi̱banbil dios.

¹² Joꞌcan nak la̱in tebinqꞌue chi sachecꞌ li ralal xcꞌajol laj Efraín. Ut teꞌosokꞌ ajcuiꞌ eb li ralal xcꞌajol laj Judá. Chanchanakeb chic li cꞌaꞌak re ru li namaxen ut li nacꞌuxeꞌ xban li cꞌa̱ms teꞌcana̱k.

¹³ Eb li ralal xcꞌajol laj Efraín teꞌxqꞌue retal nak kꞌaxal ra cuanqueb cuiꞌ. Eb li ralal xcꞌajol laj Judá teꞌxqꞌue retal nak cuanqueb saꞌ chꞌaꞌajquilal. Joꞌcan nak teꞌxic riqꞌuin li rey Jareb aran Asiria chixtzꞌa̱manquil xtenkꞌanquileb. Abanan aꞌan incꞌaꞌ ta̱ru̱k tixtenkꞌaheb.

¹⁴ La̱in tincꞌut lin joskꞌil chiruheb li ralal xcꞌajol laj Efraín. Chanchanakin li cakcoj nak tinrahobtesiheb. Chanchanakin li ral li cakcoj nak tinrahobtesiheb li ralal xcꞌajol laj Judá. Joꞌ nak naxchap lix tib li cakcoj, joꞌcan ajcuiꞌ tinba̱nu la̱in riqꞌuineb. La̱in tinqꞌueheb saꞌ raylal ut tincanabeb xjuneseb ut ma̱ ani ta̱ru̱k ta̱colok reheb saꞌ cuukꞌ.

¹⁵ Tintzꞌekta̱naheb ut tincanabeb xjuneseb toj teꞌxqꞌue retal lix ma̱queb ut teꞌoc chinsicꞌbal. Toj cuanqueb saꞌ raylal, tojoꞌnak teꞌxqꞌue retal lix ma̱usilaleb ut teꞌsukꞌi̱k cuiqꞌuin, chan li Ka̱cuaꞌ.