Oseas 3 - Li Santil hu

Li Dios tixcuy xma̱queb lix tenamit joꞌ nak laj Oseas quixcuy xma̱c li rixakil

¹ Ut li Ka̱cuaꞌ quia̱tinac cuiꞌchic cuiqꞌuin ut quixye cue: —Chara cuiꞌchic li ixk aꞌan, usta yo̱ chixmuxbal ru lix sumlajic. Ra aꞌan joꞌ nak ninraheb lin tenamit Israel la̱in, usta yo̱queb chixlokꞌoninquil li yi̱banbil dios ut nacuulac chiruheb xcuaꞌbal li caxlan cua yi̱banbil riqꞌuin chaki uvas, li mayejanbil chiruheb lix dioseb, chan li Ka̱cuaꞌ.

² Joꞌcan nak la̱in xintojoc chirix li cuixakil. Oꞌlaju chi tumin plata ut cuukub ni̱nki chacach li cebada xinqꞌue ut quincꞌam cuiꞌchic li cuixakil.

³ Xinye re: —Najt tatcua̱nk saꞌ cuochoch ut incꞌaꞌ chic ta̱mux ru la̱ sumlajic, chi moco ta̱sicꞌ jalan chic cui̱nk, chi moco la̱in tincua̱nk a̱cuiqꞌuin, chanquin re.

⁴ Joꞌcaꞌin xinba̱nu riqꞌuin re xcꞌutbal chiruheb laj Israel nak najt teꞌcua̱nk chi ma̱cꞌaꞌ lix reyeb, chi moco teꞌcua̱nk aj cꞌamol be chiruheb. Incꞌaꞌ chic teꞌmayejak chiruheb lix dioseb, chi moco ta̱cua̱nk lix dioseb pec, chi moco ta̱cua̱nk li cꞌaꞌak re ru re acuasi̱nc, chi moco teꞌcua̱nk lix yi̱banbil dios re ta̱colok reheb.

⁵ Abanan ta̱cuulak xkꞌehil nak eb laj Israel teꞌsukꞌi̱k cuiꞌchic riqꞌuin li Ka̱cuaꞌ lix Dioseb ut teꞌxsicꞌ junak reheb li ralal xcꞌajol laj David chokꞌ xreyeb. Ut saꞌ rosoꞌjiqueb li cutan, teꞌxxucua ru li Ka̱cuaꞌ ut teꞌxcꞌu̱luban cuiꞌchic li usilal li tixba̱nu reheb.