Oseas 13 - Li Santil hu

Li Dios tixsach ruheb laj Israel

¹ Nak nequeꞌa̱tinac li ralal xcꞌajol laj Efraín chixjunileb nequeꞌxucuac xbaneb. Qꞌuebil xcuanquileb saꞌ xya̱nkeb laj Israel. Abanan queꞌma̱cob nak queꞌxlokꞌoni laj Baal. Joꞌcan nak teꞌca̱mk.

² Ut chalen ajcuiꞌ anakcuan kꞌaxal cuiꞌchic yo̱queb chi ma̱cobc. Nequeꞌxyi̱b lix dioseb riqꞌuin plata re teꞌxlokꞌoni. Riqꞌuin rukꞌeb nequeꞌxyi̱b xdioseb chi chꞌinaꞌus aꞌ yal chanru nequeꞌxnau xba̱nunquil. Ut nequeꞌxye chi ribileb rib: —Chomayejak chiruheb li kadios. Takutzꞌ ru li kadios cuacax, chanqueb.

³ Ut xban lix ma̱usilal teꞌosokꞌ li tenamit aꞌin. Chanchanakeb li chok li yal nanumeꞌ ekꞌela. Ut chanchanakeb li xchuꞌque li yal natꞌaneꞌ ut na-osoꞌ saꞌ junpa̱t. Chanchanakeb lix mokoj li trigo li nacꞌameꞌ xban cacuil ikꞌ ut aran na-osoꞌ. Ut chanchanakeb ajcuiꞌ li sib li na-el saꞌ releba̱l sib ut yal na-osoꞌ.

⁴ Li Ka̱cuaꞌ quixye: —La̱in li Ka̱cuaꞌ le̱ Dios li quin-isin chak e̱re Egipto. Ma̱cꞌaꞌ chic junak Dios chicuu la̱in chi moco cuan chic junak aj Colol e̱re. Caꞌaj cuiꞌ la̱in.

⁵ La̱in xintenkꞌan chak e̱re nak cuanquex chak saꞌ li tikcual chꞌochꞌ bar incꞌaꞌ natꞌaneꞌ cuiꞌ li hab.

⁶ Abanan nak xexcuulac saꞌ li cha̱bil chꞌochꞌ, cuan chic cꞌaꞌru e̱re ut xextzacan chi us. Xban nak tzꞌakal chic li cꞌaꞌru e̱re cuan, xenimobresi e̱rib ut incꞌaꞌ chic xine̱cꞌoxla.

⁷ La̱in chanchanakin li cakcoj nak texinsach. Chanchanakin li hix na-oybenin chire be re xchapbal li ani nanumeꞌ.

⁸ La̱in tinjoskꞌokꞌ joꞌ nak najoskꞌoꞌ li ixki oso li na-elkꞌa̱c ral chiru. Tinba̱nu joꞌ naxba̱nu li oso nak naxchap ut naxtꞌupi li namakꞌoc re li ral chiru toj retal tixcamsi. Chanchanakin li cakcoj nak tinsacheb. Ut tinba̱nu joꞌ naxba̱nu li joskꞌ aj xul saꞌ qꞌuicheꞌ nak naxtꞌupi lix tib.

⁹ Anakcuan xex-osoꞌ, la̱ex aj Israel. La̱in raj tintenkꞌa̱nk e̱re, abanan la̱ex xine̱tzꞌekta̱na.

¹⁰ ¿Bar cuan le̱ rey anakcuan re texcol la̱ex ut le̱ tenamit? Ut, ¿bar cuanqueb laj rakol a̱tin li xetzꞌekta̱na nak queye nak queraj junak le̱ rey joꞌ ajcuiꞌ eb li teꞌtenkꞌa̱nk re chi takla̱nc saꞌ e̱be̱n?

¹¹ Usta yo̱ injoskꞌil, abanan xinqꞌue le̱ rey li xetzꞌa̱ma. Ut anakcuan xban injoskꞌil, tincuisi cuiꞌchic le̱ rey che̱ru.

¹² Chixjunil li ma̱usilal queꞌxba̱nu li ralal xcꞌajol laj Efraín cuan saꞌ inchꞌo̱l. Ut ma̱ jokꞌe ta̱e̱lk saꞌ inchꞌo̱l lix ma̱queb li queꞌxba̱nu.

¹³ Li raylal li teꞌxcꞌul chanchan li raylal naxcꞌul li ixk nak ac qꞌuira̱c re. Chanchaneb jun li cꞌulaꞌal xcuulac xkꞌehil xyoꞌlajic abanan incꞌaꞌ nayoꞌla saꞌ xya̱lal. Eb laj Efraín teꞌcolekꞌ raj, abanan xban xma̱cꞌaꞌileb xnaꞌleb, incꞌaꞌ nequeꞌraj xcanabanquil li ma̱usilal.

¹⁴ ¿Ma tebincol ta biꞌ chiru li ca̱mc saꞌ e̱chꞌo̱l? ¿Ma ta̱ru̱k ta biꞌ tebincol chiru xcuanquil li ca̱mc cui incꞌaꞌ nequeꞌraj eb aꞌan? Lix cuanquil li ca̱mc tenebanbil saꞌ xbe̱neb. La̱in tinqꞌuehok li ca̱mc saꞌ xbe̱neb. Incꞌaꞌ chic teꞌcuil xtokꞌoba̱l ruheb.

¹⁵ Usta kꞌaxal nabal cꞌaꞌru reheb li ralal xcꞌajol laj Efraín chiruheb laj Israel li rech tenamitil, aban la̱in tincuisi chiruheb chixjunil li cꞌaꞌru cuan reheb. Nak nachal li ikꞌ saꞌ releb sakꞌe cuan cuiꞌ li chaki chꞌochꞌ, nachakic li yuꞌam haꞌ xban li ikꞌ ut nachakic ajcuiꞌ li acui̱mk. Joꞌcan ajcuiꞌ tinba̱nu la̱in riqꞌuineb. Tinsach chixjunil li cꞌaꞌru cuan reheb.

¹⁶ La̱in tebinqꞌue chixtojbal rix lix ma̱queb laj Samaria xban nak xineꞌxtzꞌekta̱na. Ta̱cha̱lk li ple̱t saꞌ xbe̱neb ut telajeꞌcamsi̱k riqꞌuin chꞌi̱chꞌ. Tenbileb chiru pec li cocꞌal nak teꞌcamsi̱k. Ut eb li yaj aj ixk jachbileb chi chꞌi̱chꞌ nak teꞌcamsi̱k.