Oseas 12 - Li Santil hu

¹ Chanchan yal ikꞌ nataklan reheb laj Efraín xban nak ma̱cꞌaꞌ na-oc cuiꞌ li nequeꞌxba̱nu. Chanchan li ikꞌ nachal saꞌ releb sakꞌe bar cuanqueb cuiꞌ laj Asiria. Nanumta li ticꞌtiꞌ ut li ma̱usilal li nequeꞌxba̱nu. Nequeꞌxba̱nu li contrato riqꞌuineb laj Asiria ut nequeꞌxtakla lix aceite aran Egipto.

² Li Ka̱cuaꞌ yo̱ xjoskꞌil saꞌ xbe̱neb li ralal xcꞌajol laj Judá ut tixqꞌueheb chixtojbal xma̱queb li ralal xcꞌajol laj Jacob aꞌ yal chanru xyehom xba̱nuhomeb. Tixqꞌueheb chixtojbal xma̱queb joꞌ xcꞌulubeb.

³ Toj ma̱jiꞌ ajcuiꞌ nequeꞌyoꞌla laj Jacob li kaxeꞌto̱nil yucuaꞌ ut laj Esaú, ac yo̱queb chixpletinquil ribeb. Chapcho lix cux rok laj Esaú xban laj Jacob nak queꞌyoꞌla. Ut mokon nak nim chic, laj Jacob quipletic riqꞌuin lix ángel li Ka̱cuaꞌ.

⁴ Saꞌ li naꞌajej Bet-el quipletic riqꞌuin li ángel ut quinumta saꞌ xbe̱n. Laj Jacob quiya̱bac ut quixtzꞌa̱ma li rosobtesinquil toj retal nak li Dios quia̱tinac riqꞌuin ut quirosobtesi ut co-osobtesi̱c ajcuiꞌ la̱o.

⁵ Li Ka̱cuaꞌ lix Dioseb li qꞌuila okꞌob chi ángel, aꞌan li qui-osobtesin re laj Jacob. Ka̱cuaꞌ Dios xcꞌabaꞌ.

⁶ Joꞌcan nak la̱ex ralal xcꞌajol laj Jacob, chexsukꞌi̱k riqꞌuin li Ka̱cuaꞌ. Chexcua̱nk saꞌ ti̱quilal ut chex-uxta̱na̱nk u. Ut cauhak taxak e̱chꞌo̱l riqꞌuin li Dios.

⁷ Eb li ralal xcꞌajol laj Efraín chanchaneb laj cꞌay incꞌaꞌ tzꞌakal nequeꞌbisoc. Junes balakꞌic nacuulac chiruheb.

⁸ Eb li ralal xcꞌajol laj Efraín nequeꞌxye: —Chi ya̱l nak xobiomoꞌ. Xkatau kabiomal chokꞌ ke. Ma̱ ani ta̱yehok ke nak incꞌaꞌ us xkaba̱nu. Ma̱ ani ta̱yehok ke nak ma̱c xkaba̱nu riqꞌuin li kacꞌanjel, chanqueb.

⁹ Ut li Dios quixye reheb: —La̱in li Ka̱cuaꞌ le̱ Dios, li qui-isin chak e̱re saꞌ li naꞌajej Egipto. La̱in toj texinqꞌue cuiꞌchic chi cua̱nc saꞌ eb li muheba̱l li yi̱banbil riqꞌuin tꞌicr joꞌ nequeba̱nu nak nequexninkꞌei̱c.

¹⁰ La̱in xebintakla li profeta e̱riqꞌuin ut qꞌuila sut xincꞌut che̱ru lix ya̱lal. La̱in xina̱tinac riqꞌuineb li profeta riqꞌuin jaljo̱quil ru a̱tin ut eb li profeta queꞌxcꞌut che̱ru lix ya̱lal, chan li Ka̱cuaꞌ.

¹¹ —¿Ma incꞌaꞌ ta biꞌ numtajenak li ma̱c aran Galaad? Relic chi ya̱l nak numtajenak li ma̱c. Aran Gilgal nequeꞌxmayeja li cuacax. Abanan ta̱cuulak xkꞌehil nak ma̱cꞌaꞌ chic teꞌoc cuiꞌ lix artaleb. Chanchan li pec yal tu̱btu teꞌcana̱k saꞌ lix naꞌajeb.

¹² Laj Jacob le̱ xeꞌto̱nil yucuaꞌ quie̱lelic ut co̱ saꞌ lix chꞌochꞌeb laj Aram. Aran quitrabajic re nak ta̱qꞌuehekꞌ li rixakil. Xban nak rixakil quiraj, quicꞌanjelac chokꞌ aj ilol xul.

¹³ Li Ka̱cuaꞌ riqꞌuin profeta quirisiheb chak laj Israel aran Egipto. Ut riqꞌuin profeta, quixberesiheb.

¹⁴ Cꞌajoꞌ lix joskꞌil li Ka̱cuaꞌ queꞌxchikꞌ chak eb li ralal xcꞌajol laj Efraín. Li ma̱usilal ut li camsi̱nc queꞌxba̱nu ta̱sukꞌi̱k cuiꞌchic saꞌ xbe̱neb. Li Ka̱cuaꞌ tixqꞌueheb chixtojbal rix li ma̱usilal li queꞌxba̱nu.