Oseas 11 - Li Santil hu

Li Dios naxra lix tenamit usta nequeꞌxkꞌetkꞌeti ribeb chiru

¹ Nak toj sa̱jeb chak li ralal xcꞌajol laj Israel, la̱in quinraheb. Ut nak cuanqueb chak Egipto, quinbokeb li cualal incꞌajol.

² La̱in xcuaj raj nak xeꞌchal cuiqꞌuin, abanan nak xinbokeb, kꞌaxal cuiꞌchic xineꞌxtzꞌekta̱na. Chiruheb chic laj Baal nequeꞌmayejac ut chiruheb li yi̱banbil dios nequeꞌxcꞌat lix pomeb.

³ La̱in xincꞌutuc be̱c chiruheb li ralal xcꞌajol laj Efraín. Chanchan nak xinchꞌiloheb nak xincꞌut lix ya̱lal chiruheb. Ut incꞌaꞌ xeꞌxqꞌue retal nak la̱in nin-iloc reheb.

⁴ Saꞌ kꞌunil ut riqꞌuin rahoc xebincꞌam cuiqꞌuin. Saꞌ cha̱bilal xebinberesi. La̱in xcuisi li i̱k saꞌ xbe̱neb ut xebinqꞌue chi cuaꞌac saꞌ xya̱lal.

⁵ Abanan incꞌaꞌ nequeꞌraj sukꞌi̱c cuiqꞌuin. Xban aꞌan eb laj Asiria teꞌnumta̱k saꞌ xbe̱neb ut aꞌanakeb chic lix reyeb. Chanchan nak queꞌcuan chak Egipto.

⁶ Ta̱cua̱nk li ple̱t saꞌ lix tenamiteb. Talajeꞌosokꞌ li tenamit xban li ple̱t. Eb lin tenamit teꞌosokꞌ xban nak queꞌxba̱nu li cꞌaꞌru queꞌraj xjuneseb.

⁷ Lin tenamit niquineꞌxtzꞌekta̱na. Junes kꞌetkꞌetil chic cuan saꞌ xchꞌo̱leb. Usta nequeꞌxye nak la̱in li kꞌaxal nim incuanquil, abanan ma̱ jun reheb naqꞌuehoc incuanquil.

⁸ ¿Chanru nak texincanab e̱junes, la̱ex ralal xcꞌajol laj Efraín? ¿Chanru nak texinkꞌaxtesi saꞌ rukꞌeb li xicꞌ nequeꞌiloc e̱re, la̱ex aj Israel? ¿Ma ta̱ru̱k ta biꞌ texinsach joꞌ xinba̱nu riqꞌuineb laj Adma ut riqꞌuineb laj Zeboim? La̱in cꞌajoꞌ nak nequexinra. Joꞌcan nak nayotꞌeꞌ inchꞌo̱l e̱ban.

⁹ La̱in incꞌaꞌ tinba̱nu li cꞌaꞌru quincꞌoxla xba̱nunquil e̱riqꞌuin nak quechikꞌ xxamlel injoskꞌil. La̱in incꞌaꞌ chic texinsach chi junaj cua, la̱ex aj Efraín, xban nak la̱in Diosin. Ma̱cuaꞌin yal cui̱nk. La̱in li Dios Santo li cuanquin saꞌ e̱ya̱nk. Incꞌaꞌ tin-oc saꞌ le̱ tenamit che̱sachbal.

¹⁰ Chanchanakin li cakcoj nak tinjap cue chiruheb li xicꞌ nequeꞌiloc reheb li cualal incꞌajol. Sicsotkeb xbaneb xxiu li cualal incꞌajol nak teꞌcha̱lk cuiqꞌuin saꞌ li oeste li na-oc cuiꞌ li sakꞌe.

¹¹ Chanchanakeb laj xicꞌanel xul nak teꞌcha̱lk cuiqꞌuin saꞌ junpa̱t joꞌ nak queꞌel chak Egipto. Ut chanchanakeb li mucuy nak teꞌe̱lk chak Asiria. Ut la̱in tebinqꞌue cuiꞌchic chi cua̱nc saꞌ lix naꞌajeb, chan li Ka̱cuaꞌ.

Li ma̱usilal li queꞌxba̱nu eb laj Israel ut eb laj Judá

¹² —Eb li ralal xcꞌajol laj Efraín junes ticꞌtiꞌic nequeꞌxba̱nu chicuu. Ut eb laj Israel junes balakꞌic nequeꞌxba̱nu. Ut eb laj Judá queꞌxkꞌetkꞌeti ribeb chicuu la̱in li tzꞌakal Dios ut yo̱queb chixqꞌuebal xlokꞌal li yi̱banbil dios.