Números 9 - Li Santil hu

Nak teꞌxninkꞌei li Pascua xjulticanquil li reliqueb chak Egipto

¹ Li Ka̱cuaꞌ Dios quia̱tinac riqꞌuin laj Moisés saꞌ li chaki chꞌochꞌ aran Sinaí saꞌ li xbe̱n po re li xcab chihab reliqueb chak laj Israel aran Egipto.

² Ut quixye re chi joꞌcaꞌin: —Tento nak eb laj Israel teꞌxninkꞌei li Pascua saꞌ xkꞌehil joꞌ xinye reheb.

³ Teꞌxba̱nu li ninkꞌe saꞌ li ca̱laju xbe li po aꞌin nak ac oc re li kꞌojyi̱n. Teꞌxba̱nu chixjunil chi tzꞌakal re ru joꞌ xinye reheb ut joꞌ tzꞌi̱banbil retalil saꞌ li chakꞌrab, chan.

⁴ Joꞌcan nak laj Moisés quixye reheb laj Israel nak teꞌxninkꞌei li Pascua re xjulticanquil li reliqueb aran Egipto.

⁵ Ut eb aꞌan queꞌxninkꞌei li Pascua saꞌ li chaki chꞌochꞌ aran Sinaí saꞌ li ca̱laju xbe li xbe̱n po nak ac oc re li kꞌojyi̱n. Queꞌxba̱nu chixjunil joꞌ quiyeheꞌ re laj Moisés xban li Ka̱cuaꞌ.

⁶ Abanan cuanqueb cuib oxib li cui̱nk li incꞌaꞌ queꞌru xninkꞌeinquil li Pascua saꞌ li cutan aꞌan xban nak queꞌxmux ribeb xban xchꞌeꞌbal li camenak. Joꞌcan nak queꞌcuulac riqꞌuin laj Moisés ut laj Aarón saꞌ li cutan aꞌan.

⁷ Ut queꞌxye re laj Moisés: —La̱o xkamux kib xban xchꞌeꞌbal li camenak. Abanan, ¿cꞌaꞌut nak incꞌaꞌ ta̱ru̱k takaqꞌue kamayej re li Ka̱cuaꞌ saꞌ xkꞌehil kochbeneb li kacomon? chanqueb.

⁸ Laj Moisés quixye reheb: —Oybenihomak cuan toj tinpatzꞌ re li Dios cꞌaꞌru tixye che̱rix, chan.

⁹ Ut li Ka̱cuaꞌ quia̱tinac riqꞌuin laj Moisés ut quixye re:

¹⁰ —Ta̱ye reheb laj Israel nak yalak ani reheb le̱ ralal e̱cꞌajol li queꞌxmux ribeb ut li cuanqueb saꞌ xvia̱j naru nequeꞌxninkꞌei li Pascua.

¹¹ Abanan teꞌxninkꞌei saꞌ li ca̱laju xbe li xcab po nak oc re li kꞌojyi̱n. Teꞌxtzaca lix tibel li carner li toj sa̱j rochben li caxlan cua li ma̱cꞌaꞌ xchꞌamal. Ut teꞌxtzaca ajcuiꞌ li cꞌahil kꞌe̱n rochben.

¹² Ma̱cꞌaꞌ naru teꞌxcanab toj cuulaj. Teꞌxchoy ban chixjunil. Ut incꞌaꞌ naru teꞌxtok xbakel li xul. Nak teꞌxninkꞌei li Pascua teꞌxba̱nu chixjunil li cꞌaꞌru quinye reheb.

¹³ Ut cui cuan junak li incꞌaꞌ tixninkꞌei li Pascua ut moco muxbil ta ru chi moco yo̱ ta chi viajic, li jun aꞌan ta̱isi̱k saꞌ xya̱nkeb laj Israel xban nak incꞌaꞌ quixqꞌue xmayej chicuu saꞌ xkꞌehil. Tento nak li jun aꞌan tixtoj rix lix ma̱c xban nak incꞌaꞌ quixninkꞌei li Pascua.

¹⁴ Nak eb li jalaneb xtenamit li cuanqueb saꞌ e̱ya̱nk teꞌxninkꞌei li Pascua, tento nak teꞌxba̱nu joꞌ xexinchakꞌrabi cuiꞌ. Juntakꞌe̱t le̱ chakꞌrabinquil la̱ex riqꞌuin lix chakꞌrabinquileb li jalaneb xtenamit, chan li Dios.

Li chok li nacuan saꞌ xbe̱n li tabernáculo

¹⁵ Saꞌ li cutan nak quixakaba̱c li tabernáculo, quitzꞌapeꞌ xban jun li chok. Chalen saꞌ li ecuu toj nasake̱u li chok cuan saꞌ xbe̱n. Ut li chok chanchan xam.

¹⁶ Joꞌcan quicꞌulman junelic. Li tabernáculo quitzꞌapeꞌ xban li chok chi cutan ut chiru kꞌojyi̱n li chok chanchan xam.

¹⁷ Nak li chok na-el saꞌ xbe̱n li tabernáculo, nequeꞌxic cuiꞌchic laj Israel. Ut nak naxakli li chok, aran nequeꞌcana laj Israel ut nequeꞌxyi̱b lix muheba̱leb.

¹⁸ Nak li Ka̱cuaꞌ naxye reheb laj Israel nak teꞌxic, eb aꞌan nequeꞌxic. Ut nak naxye reheb nak teꞌcana̱k saꞌ junak naꞌajej, aran nequeꞌcana ut nequeꞌxyi̱b lix muheba̱leb. Nequeꞌcana aran joꞌ najtil nacuan li chok saꞌ xbe̱n li tabernáculo.

¹⁹ Cui li chok nabay saꞌ xbe̱n li tabernáculo, eb laj Israel nequeꞌbay ajcuiꞌ chi cua̱nc saꞌ li naꞌajej aꞌan joꞌ quixye li Ka̱cuaꞌ reheb. Incꞌaꞌ nequeꞌxic.

²⁰ Cuan nak li chok quibay saꞌ xbe̱n li tabernáculo cuib oxib cutan. Nak naxye li Ka̱cuaꞌ nak teꞌcana̱k, aran nequeꞌcana ut nak naxye nak teꞌxic, nequeꞌxic.

²¹ Cuan nak li chok nacana jun kꞌojyi̱n ajcuiꞌ. Nak nasake̱u na-el li chok ut nequeꞌxic cuiꞌchic laj Israel. Usta cutan, usta kꞌojyi̱n, nak na-el li chok nequeꞌxic cuiꞌchic laj Israel.

²² Cui li chok cuan saꞌ xbe̱n li tabernáculo chiru cuib cutan, malaj ut chiru jun po, malaj chiru jun chihab, eb laj Israel incꞌaꞌ nequeꞌxic. Nequeꞌcana ban aran. Ut nak li chok na-el saꞌ xbe̱n li tabernáculo, eb aꞌan nequeꞌxic.

²³ Nak naxye li Ka̱cuaꞌ nak teꞌxic, eb laj Israel nequeꞌxic. Ut nak naxye nak teꞌcana̱k, nequeꞌcana. Queꞌxba̱nu chi tzꞌakal joꞌ quiyeheꞌ re laj Moisés xban li Ka̱cuaꞌ.