Números 8 - Li Santil hu

Joꞌcaꞌin nak queꞌkꞌaxtesi̱c laj levita chi cꞌanjelac chiru li Dios

¹ Li Ka̱cuaꞌ quia̱tinac riqꞌuin laj Moisés ut quixye re:

² —Tat-a̱tinak riqꞌuin laj Aarón ut ta̱ye re nak tixloch xxamlel li cuukub chi candil, tixqꞌue li candelero re nak tixcutanobresi li naꞌajej li cuan chiru, chan.

³ Ut laj Aarón quixba̱nu joꞌ quiyeheꞌ re. Quixqꞌue li candelero re nak li candil teꞌxcutanobresi li naꞌajej li cuan chiru joꞌ quixye li Ka̱cuaꞌ re laj Moisés.

⁴ Joꞌcaꞌin xyi̱banquil li candelero. Yi̱banbil riqꞌuin oro tenbil riqꞌuin martillo naticla chak cuan cuiꞌ lix cꞌochleba̱l nacuulac cuan cuiꞌ li rutzꞌuꞌujil. Quiyi̱ba̱c chi tzꞌakal joꞌ quixye li Ka̱cuaꞌ re laj Moisés.

⁵ Li Ka̱cuaꞌ quia̱tinac cuiꞌchic riqꞌuin laj Moisés ut quixye re:

⁶ —Ta̱cuisiheb laj levitas saꞌ xya̱nkeb laj Israel re ta̱santobresiheb.

⁷ Joꞌcaꞌin ta̱ba̱nu re xsantobresinquileb. Ta̱rachrachi saꞌ xbe̱neb li haꞌ li nacꞌanjelac re santobresi̱nc ut ta̱ye reheb nak teꞌxjo li rismaleb ut teꞌxpuchꞌ li rakꞌeb re nak teꞌcana̱k chi santobresinbil.

⁸ Chirix aꞌan teꞌxqꞌue junak li toro toj sa̱j chokꞌ xcꞌatbil mayejeb rochben li cha̱bil cꞌaj yokꞌbil riqꞌuin aceite. Ut teꞌxqꞌue ajcuiꞌ jun li toro toj sa̱j re teꞌxmayeja re xtzꞌa̱manquil xcuybal li ma̱c.

⁹ Ta̱ye reheb laj levitas nak teꞌjilok chiru li tabernáculo ut ta̱chꞌutubeb ajcuiꞌ chixjunileb laj Israel aran.

¹⁰ Nak acak xachꞌutubeb laj levita chicuu, eb laj Israel teꞌxqꞌue li rukꞌeb saꞌ xjolomeb laj levita.

¹¹ Ut laj Aarón tixkꞌaxtesiheb laj levita chicuu chokꞌ xmayejeb laj Israel re teꞌcꞌanjelak chicuu.

¹² Chirix aꞌan eb laj levitas teꞌxqꞌue li rukꞌeb saꞌ xjolomeb li cuib chi toro toj sa̱jeb. Li jun teꞌxmayeja chicuu re xtzꞌa̱manquil xcuybal xma̱queb ut li jun chic teꞌxqꞌue chokꞌ cꞌatbil mayej re xtojbal rix lix ma̱queb. Joꞌcaꞌin nak queꞌxsantobresiheb laj levita.

¹³ Ta̱ye reheb laj levita nak teꞌxakli̱k chiru laj Aarón ut chiruheb li ralal. Nak xakxo̱keb aran ta̱kꞌaxtesiheb chicuu chokꞌ mayej.

¹⁴ Joꞌcaꞌin nak ta̱cuisiheb laj levita saꞌ xya̱nkeb laj Israel. Ut cuehakeb chic laj levita.

¹⁵ Nak ac xasantobresiheb laj levita ut xakꞌaxtesiheb chi cꞌanjelac chicuu, naru teꞌcha̱lk chi cꞌanjelac saꞌ li tabernáculo.

¹⁶ Eb laj levita, aꞌaneb li sicꞌbil ruheb saꞌ xya̱nkeb laj Israel re nak teꞌqꞌuehekꞌ chi junaj cua chi cꞌanjelac chicuu. La̱in xinsicꞌ ruheb chokꞌ cue chokꞌ re̱kajeb li xbe̱n ralaleb laj Israel.

¹⁷ Chixjunileb li xbe̱n ralaleb laj Israel, aꞌan cueheb la̱in. Ut cueheb ajcuiꞌ li xbe̱n raleb li xul li te̱lom. La̱in quinsiqꞌueb ru nak quinqꞌueheb chi ca̱mc li xbe̱n alalbej aran Egipto.

¹⁸ Joꞌcan nak la̱in quinsicꞌ ruheb laj levita chokꞌ re̱kajeb li xbe̱n ralaleb laj Israel.

¹⁹ La̱in quinsicꞌ ruheb laj levita saꞌ xya̱nkeb chixjunileb laj Israel ut xebinqꞌue chixtenkꞌanquileb laj Aarón ut eb li ralal saꞌ li tabernáculo. Eb aꞌan teꞌmayejak saꞌ xcꞌabaꞌeb laj Israel re nak ma̱cꞌaꞌ raylal teꞌxcꞌul nak teꞌnachꞌok riqꞌuin li tabernáculo eb laj Israel, chan li Dios.

²⁰ Laj Moisés, laj Aarón ut chixjunileb laj Israel queꞌxba̱nu reheb laj levita joꞌ quixye li Ka̱cuaꞌ re laj Moisés.

²¹ Eb laj levita queꞌxsantobresi ribeb ut queꞌxpuchꞌ li rakꞌeb. Ut laj Aarón quixkꞌaxtesiheb re li Ka̱cuaꞌ joꞌ jun mayej ut quixsantobresiheb chiru li Ka̱cuaꞌ.

²² Queꞌxba̱nu chixjunil li quixye li Ka̱cuaꞌ re laj Moisés. Ut eb laj levita queꞌco̱eb saꞌ li tabernáculo chixba̱nunquil lix cꞌanjeleb. Laj Aarón ut eb li ralal, aꞌaneb li queꞌtaklan saꞌ xbe̱neb.

²³ Li Ka̱cuaꞌ quia̱tinac cuiꞌchic riqꞌuin laj Moisés ut quixye re:

²⁴ —Teꞌcꞌanjelak saꞌ li tabernáculo li cuanqueb o̱b xcaꞌcꞌa̱l chihab reheb, joꞌ eb ajcuiꞌ li ac numenakeb o̱b xcaꞌcꞌa̱l chihab.

²⁵ Abanan nak teꞌxba̱nu laje̱b roxcꞌa̱l chihab, teꞌxcanab cꞌanjelac. Incꞌaꞌ chic teꞌcꞌanjelak saꞌ li tabernáculo.

²⁶ Naru teꞌxtenkꞌaheb li rech aj levita chixba̱nunquil lix cꞌanjel, abanan incꞌaꞌ naru teꞌcꞌanjelak xjuneseb. Joꞌcaꞌin ta̱ba̱nu riqꞌuineb laj levita, chan li Dios.