Números 6 - Li Santil hu

Li chakꞌrab reheb laj Nazareo

¹ Li Ka̱cuaꞌ quia̱tinac riqꞌuin laj Moisés ut quixye re:

² —Tat-a̱tinak riqꞌuineb laj Israel ut ta̱ye reheb chi joꞌcaꞌin. Cui junak cui̱nk malaj ut junak ixk tixkꞌaxtesi rib chi cꞌanjelac chiru li Ka̱cuaꞌ chokꞌ aj nazareo,

³ li jun aꞌan incꞌaꞌ naru ta̱rucꞌ li vino chi moco li haꞌ li nacaltesin, chi moco li vinagre. Incꞌaꞌ naru ta̱rucꞌ xyaꞌal li uvas. Ut incꞌaꞌ naru tixtzaca li uvas chi moco li chaki.

⁴ Joꞌ najtil ta̱cua̱nk chokꞌ aj nazareo incꞌaꞌ naru tixtzaca li cꞌaꞌak re ru yi̱banbil riqꞌuin uva, chi moco li rix li uva, chi moco lix nakꞌ.

⁵ Joꞌ najtil ta̱cua̱nk chokꞌ aj nazareo incꞌaꞌ naru tixbes li rismal xjolom. Tixcanab ban chi chamocꞌ li rismal toj ta̱rakekꞌ li cutan nak qui-oc chokꞌ aj nazareo chiru li Ka̱cuaꞌ.

⁶ Ut incꞌaꞌ naru nanachꞌoc riqꞌuineb li camenak joꞌ najtil ta̱cua̱nk chokꞌ aj nazareo.

⁷ Usta lix naꞌ, usta lix yucuaꞌ li ta̱ca̱mk, usta li ras malaj ut li ri̱tzꞌin, malaj ut li ranab, incꞌaꞌ naru tixmux rib riqꞌuin xchꞌeꞌbaleb xban nak ac xkꞌaxtesi rib re li Ka̱cuaꞌ ut cuan saꞌ xbe̱n xba̱nunquil li quixye.

⁸ Joꞌ najtil ta̱cua̱nk chokꞌ aj nazareo, kꞌaxtesinbilak re li Ka̱cuaꞌ.

⁹ Muxbilak chic ru li rismal xjolom junak aj nazareo cui nacam junak chi nachꞌ riqꞌuin chi ma̱cꞌaꞌ saꞌ xchꞌo̱l. Tento nak saꞌ xcuuk li cutan tixsantobresi rib ut tixjo rismal xjolom.

¹⁰ Saꞌ xcuakxak li cutan tixcꞌam cuib li paloma malaj ut cuib li mucuy ut tixqꞌue re laj tij saꞌ li oqueba̱l re li tabernáculo.

¹¹ Laj tij tixmayeja li jun re xtzꞌa̱manquil xcuybal xma̱c li cui̱nk ut li jun chic tixcꞌat re xtojbal rix lix ma̱c xban nak quicuan li camenak chi nachꞌ riqꞌuin. Chi joꞌcaꞌin tixsantobresi cuiꞌchic li rismal xjolom.

¹² Tixkꞌaxtesi cuiꞌchic rib re li Ka̱cuaꞌ joꞌ quixba̱nu junxil chokꞌ nazareo. Incꞌaꞌ ta̱qꞌuehekꞌ saꞌ ajl eb li cutan nak quicuan chokꞌ nazareo xban nak quixmux rib riqꞌuin li camenak. Ut tixqꞌue jun li te̱lom carner aj jun chihab re xtojbal rix lix ma̱c.

¹³ Aꞌan aꞌin li chakꞌrab li tixba̱nu laj nazareo nak ac xrakeꞌ li cutan nak ta̱cua̱nk chokꞌ aj nazareo. Ta̱xic saꞌ li oqueba̱l re li tabernáculo.

¹⁴ Ut tixqꞌue chokꞌ xcꞌatbil mayej chiru li Ka̱cuaꞌ jun li te̱lom carner jun chihab cuan re. Ut tixqꞌue jun li ixki carner jun chihab cuan re, re xtojbal rix lix ma̱c. Ut tixqꞌue jun li te̱lom carner re tixcꞌam rib saꞌ usilal riqꞌuin li Dios. Ma̱cꞌaꞌak re̱qꞌueb li xul li tixqꞌue chokꞌ xmayej.

¹⁵ Tixcꞌam ajcuiꞌ li mayej cꞌaj ut li mayej vino ut jun chacach li caxlan cua li ma̱cꞌaꞌ xchꞌamal ut yi̱banbilak riqꞌuin li cha̱bil cꞌaj ut junajinbilak riqꞌuin aceite. Ut yulbilak li aceite chiruheb li caxlan cua.

¹⁶ Laj tij tixqꞌue li cꞌatbil mayej chiru li Ka̱cuaꞌ. Ut tixqꞌue ajcuiꞌ li mayej re xtojbal rix li ma̱c.

¹⁷ Ut tixmayeja li carner re nak li cui̱nk tixcꞌam rib saꞌ usilal riqꞌuin li Ka̱cuaꞌ. Tixmayeja li caxlan cua li ma̱cꞌaꞌ xchꞌamal ut tixmayeja ajcuiꞌ li mayej cꞌaj ut li vino.

¹⁸ Laj nazareo tixjo li rismal xjolom saꞌ li oqueba̱l re li tabernáculo. Tixcꞌam li rismal li ac kꞌaxtesinbil re li Ka̱cuaꞌ ut tixqꞌue saꞌ li xam li yo̱ cuiꞌ chi cꞌatc li mayej re xcꞌambal rib saꞌ usilal riqꞌuin li Ka̱cuaꞌ.

¹⁹ Nak laj nazareo ac xjo li rismal xjolom, laj tij tixqꞌue saꞌ rukꞌ laj nazareo li rukꞌ li carner chi ac chikbil. Ut tixqꞌue ajcuiꞌ jun li caxlan cua li pim ut jun li jay li cuan saꞌ chacach, li ma̱cꞌaꞌ xchꞌamal.

²⁰ Chirix aꞌan laj tij tixchap cuiꞌchic li mayej ut tixtaksiheb saꞌ rukꞌ chiru li Ka̱cuaꞌ. Aꞌan jun li mayej santo ut re laj tij rochben li re xchꞌo̱l ut li rukꞌ jun chic. Chirix aꞌan laj nazareo ta̱ru̱k ta̱rucꞌ cuiꞌchic li vino.

²¹ Aꞌan aꞌin li chakꞌrab li tixba̱nu nak tixyechiꞌi lix mayej chiru li Ka̱cuaꞌ chokꞌ aj nazareo. Ut tixqꞌue ajcuiꞌ jun chic li mayej li joꞌ qꞌuial naru xqꞌuebal chiru. Tento nak tixba̱nu li cꞌaꞌru quixyechiꞌi joꞌ naxye saꞌ li chakꞌrab li qꞌuebil reheb laj nazareo.

²² Li Ka̱cuaꞌ quia̱tinac riqꞌuin laj Moisés ut quixye re:

²³ —Ta̱ye re laj Aarón ut reheb li ralal nak joꞌcaꞌin teꞌxye nak teꞌxtzꞌa̱ma li rosobtesinquileb laj Israel.

²⁴ Aꞌ taxak li Ka̱cuaꞌ chi-osobtesi̱nk e̱re ut aꞌan taxak ta̱ilok e̱re.

²⁵ Chisahokꞌ taxak xchꞌo̱l li Dios e̱riqꞌuin ut chiruxta̱na taxak e̱ru.

²⁶ Aꞌ taxak li Ka̱cuaꞌ chi-ilok e̱re riqꞌuin lix rahom ut chixqꞌue taxak li tuktu̱quil usilal e̱re.

²⁷ Joꞌcaꞌin nak teꞌxya̱ba lin cꞌabaꞌ saꞌ xbe̱neb laj Israel. Ut la̱in tincuosobtesiheb, chan li Dios.