Números 36 - Li Santil hu

Aꞌin li chakꞌrab chirix li teꞌre̱chani li ixk

¹ Eb li nequeꞌcꞌamoc be saꞌ xya̱nkeb laj Galaad queꞌco̱eb chi a̱tinac riqꞌuin laj Moisés. Laj Galaad, aꞌan li ralal laj Maquir. Laj Maquir, aꞌan li ralal laj Manasés ut laj Manasés, aꞌan li ralal laj José.

² Eb li nequeꞌcꞌamoc be saꞌ xya̱nkeb laj Galaad queꞌxye re laj Moisés: —Li Ka̱cuaꞌ quixye a̱cue nak riqꞌuin bu̱lic ta̱jeqꞌui li chꞌochꞌ reheb laj Israel. Ut quixye ajcuiꞌ nak ta̱qꞌue reheb lix rabin laj Zelofehad li kechꞌalal li joꞌ qꞌuial li chꞌochꞌ li quitzꞌak raj aꞌan.

³ Abanan cui eb li ixk aꞌan teꞌsumla̱k riqꞌuin cui̱nk aj Israel jalan xte̱paleb, lix chꞌochꞌeb li ixk aꞌan ta̱cana̱k reheb li jalan xte̱paleb. Ut li kachꞌochꞌ la̱o yo̱k chi cꞌosc chi joꞌcan.

⁴ Ut saꞌ li chihab re sahil chꞌo̱lejil, nak ta̱qꞌuehekꞌ cuiꞌchic li chꞌochꞌ re li tzꞌakal aj e̱chal re, lix chꞌochꞌeb lix rabin laj Zelofehad ta̱kꞌaxo̱nk chi junaj cua saꞌ xcue̱nteb li jalan xte̱paleb li queꞌsumla cuiꞌ li ixk. Ut la̱o incꞌaꞌ chic ta̱ru̱k take̱chani li kachꞌochꞌ, chanqueb.

⁵ Ut laj Moisés quixye reheb li cꞌaꞌru quiyeheꞌ re xban li Ka̱cuaꞌ. Quixye: —Yal li cꞌaꞌru yo̱queb chixyebal eb li ralal xcꞌajol laj José.

⁶ Li Ka̱cuaꞌ xye nak eb lix rabin laj Zelofehad naru teꞌsumla̱k riqꞌuin li ani teꞌcuulak chiru, abanan tento nak li teꞌsumla̱k cuiꞌ xcomoneb lix te̱paleb lix yucuaꞌ.

⁷ Li chꞌochꞌ li teꞌxcꞌul eb laj Israel incꞌaꞌ ta̱kꞌaxo̱nk saꞌ jalan xte̱paleb laj Israel. Tento ta̱cana̱k chokꞌ reheb lix te̱paleb li queꞌe̱chanin re.

⁸ Li junju̱nk chi ixk li nare̱chani lix chꞌochꞌ, tento nak ta̱sumla̱k riqꞌuin jun cui̱nk xcomoneb lix te̱paleb lix yucuaꞌ. Joꞌcan nak li junju̱nk te̱p chi aj Israel teꞌre̱chani li chꞌochꞌ li quire̱chani lix yucuaꞌeb.

⁹ Li chꞌochꞌ incꞌaꞌ naru ta̱kꞌaxo̱nk saꞌ xcue̱nt jalan xte̱paleb laj Israel. Tento nak ta̱cana̱k saꞌ lix te̱pal laj Israel li x-e̱chanin re, chan.

¹⁰ Ut eb lix rabin laj Zelofehad queꞌxba̱nu joꞌ quixye li Dios re laj Moisés.

¹¹ Lix Maala, lix Tirsa, lix Hogla, lix Milca ut lix Noa, eb lix rabin laj Zelofehad, queꞌsumla riqꞌuineb li ralal li ras lix yucuaꞌeb.

¹² Queꞌsumla riqꞌuineb li ralal xcꞌajol laj Manasés li ralal laj José. Ut li chꞌochꞌ li queꞌre̱chani quicana saꞌ xcue̱nt lix te̱pal lix yucuaꞌ.

¹³ Aꞌaneb aꞌin lix taklanquileb laj Israel ut li chakꞌrab li quixqꞌue li Dios re laj Moisés saꞌ li ru takꞌa re Moab, li cuan chire li nimaꞌ Jordán saꞌ xcaꞌyaba̱l li tenamit Jericó.