Números 35 - Li Santil hu

Eb li tenamit li queꞌqꞌueheꞌ reheb laj levita

¹ Li Ka̱cuaꞌ quia̱tinac riqꞌuin laj Moisés saꞌ li ru takꞌa re Moab chire li nimaꞌ Jordán saꞌ xcaꞌyaba̱l li tenamit Jericó. Quixye re:

² —Ta̱ye reheb laj Israel nak teꞌxqꞌue xtenamiteb laj levita re teꞌcua̱nk cuiꞌ saꞌ li naꞌajej li teꞌxcꞌul. Ut teꞌxqꞌue ajcuiꞌ xnaꞌajeb lix queto̱mk chi xjun sutam lix tenamiteb.

³ Tento nak ta̱cua̱nk lix tenamiteb li teꞌcua̱nk cuiꞌ ut ta̱cua̱nk ajcuiꞌ lix naꞌajeb lix cuacax, lix carner ut chixjunil lix queto̱mkeb.

⁴ Li cꞌaleba̱l li te̱qꞌue reheb laj levita, aꞌan ca̱hib ciento riqꞌuin laje̱b roxcꞌa̱l metro chirix li tzꞌac li sutsu̱queb cuiꞌ lix tenamiteb.

⁵ Ca̱ xucu̱t li naꞌajej aꞌan. Bele̱b ciento (900) metro saꞌ li junju̱nk pacꞌal. Juntakꞌe̱tak xbisbal saꞌ xca̱ pacꞌalil. Li tenamit ta̱cana̱k saꞌ xyi li naꞌajej ut lix naꞌajeb li queto̱mk ta̱cua̱nk chi xjun sutam.

⁶ Te̱qꞌue cuakib li tenamit reheb laj levita re teꞌxcol cuiꞌ ribeb laj Israel cui xeꞌxcamsi ras ri̱tzꞌin chi incꞌaꞌ yal xraj xchꞌo̱l. Ut te̱qꞌue ajcuiꞌ cuib roxcꞌa̱l (42) chic li tenamit reheb.

Eb li tenamit li ta̱ru̱k teꞌxcol cuiꞌ ribeb laj Israel

⁷ Cuakxakib roxcꞌa̱l (48) chixjunileb li tenamit li teꞌqꞌuehekꞌ reheb laj levita rochbeneb lix naꞌajeb lix queto̱mk.

⁸ Li tenamit li teꞌqꞌuehekꞌ reheb laj levita aꞌ yal joꞌ qꞌuial li chꞌochꞌ li xeꞌxcꞌul li junju̱nk xte̱paleb laj Israel. Cui jun xte̱paleb laj Israel nabal li chꞌochꞌ xeꞌxcꞌul, nabal ajcuiꞌ li teꞌxqꞌue reheb laj levita. Cui incꞌaꞌ qꞌui, incꞌaꞌ ajcuiꞌ qꞌui li teꞌxqꞌue reheb laj levita.—

⁹ Li Ka̱cuaꞌ quia̱tinac riqꞌuin laj Moisés ut quixye re:

¹⁰ —Tat-a̱tinak riqꞌuineb laj Israel ut ta̱ye reheb chi joꞌcaꞌin: nak ac xexnumeꞌ jun pacꞌal li nimaꞌ Jordán nak tex-oc saꞌ li naꞌajej Canaán,

¹¹ te̱sicꞌ ruheb li tenamit li teꞌxcol cuiꞌ ribeb li ani naxcamsi ras ri̱tzꞌin chi incꞌaꞌ yal naraj xchꞌo̱l.

¹² Saꞌ li tenamit aꞌan naru teꞌxcol ribeb li teꞌcamsi̱nk chiruheb li rechꞌalal li camenak toj ta̱rakekꞌ a̱tin saꞌ xbe̱neb xbaneb laj Israel.

¹³ Saꞌ xya̱nkeb li tenamit ta̱qꞌuehekꞌ reheb laj levita ta̱cua̱nk cuakib li tenamit li teꞌxcol cuiꞌ ribeb laj Israel.

¹⁴ Oxib li tenamit aꞌan ta̱cua̱nk jun pacꞌal li nimaꞌ Jordán saꞌ li naꞌajej Canaán. Li oxib chic teꞌcua̱nk saꞌ li pacꞌal aꞌin. Eb li tenamit aꞌin, aꞌaneb li tenamit bar ta̱ru̱k teꞌxcol cuiꞌ ribeb laj Israel li teꞌcamsi̱nk chi incꞌaꞌ yal teꞌraj xchꞌo̱l.

¹⁵ Eb li cuakib chi tenamit aꞌin, aꞌaneb li tenamit bar ta̱ru̱k teꞌxcol cuiꞌ ribeb laj Israel joꞌ eb ajcuiꞌ li jalaneb xtenamit li nequeꞌxcamsi ras ri̱tzꞌin chi incꞌaꞌ yal naraj xchꞌo̱l.

¹⁶ Cui junak tixsacꞌ li ras ri̱tzꞌin riqꞌuin chꞌi̱chꞌ ut li jun aꞌan ta̱ca̱mk xban, li quisacꞌoc re, aꞌanak aj camsinel ut ta̱teneba̱k ca̱mc saꞌ xbe̱n.

¹⁷ Ut cui junak naxsacꞌ li ras ri̱tzꞌin riqꞌuin pec ut aꞌan ta̱ca̱mk xban, li ani xsacꞌoc re, aꞌanak aj camsinel ut ta̱teneba̱k ca̱mc saꞌ xbe̱n.

¹⁸ Ut cui junak naxsacꞌ riqꞌuin cheꞌ li ras ri̱tzꞌin ut aꞌan ta̱ca̱mk xban, li ani xsacꞌoc re, aꞌanak aj camsinel ut ta̱teneba̱k ca̱mc saꞌ xbe̱n.

¹⁹ Li rechꞌalal li quicamsi̱c, aꞌan li ta̱camsi̱nk re laj camsinel aꞌ yal bar tixcꞌul.

²⁰ Cui junak xicꞌ naril li ras ri̱tzꞌin ut naxtꞌan, malaj ut naxsacꞌ riqꞌuin cꞌaꞌak re ru,

²¹ malaj ut naxsacꞌ riqꞌuin rukꞌ toj retal nacam, li jun aꞌan aj camsinel. Ut li rechꞌalal li quicamsi̱c, aꞌan li ta̱camsi̱nk re laj camsinel nak tixcꞌul.

²² Abanan cui junak naxcamsi li ras ri̱tzꞌin chi incꞌaꞌ yal xraj xchꞌo̱l, usta naxtꞌan, malaj ut naxsacꞌ riqꞌuin li cꞌaꞌak re ru,

²³ malaj ut naxcut chi pec chi incꞌaꞌ xril li ras ri̱tzꞌin, ut li jun aꞌan nacam xban li cꞌaꞌru quixcꞌul,

²⁴ tento nak eb li tenamit teꞌrakok a̱tin saꞌ xbe̱n li xcamsin ras ri̱tzꞌin joꞌ ajcuiꞌ saꞌ xbe̱n li rechꞌalal li camenak, xban nak moco yal xraj ta xchꞌo̱l nak xcamsi li ras ri̱tzꞌin.

²⁵ Tento nak eb li tenamit teꞌxcol rix li xcamsi ras ri̱tzꞌin chiru li rechꞌalal li camenak. Ut teꞌxsukꞌisi cuiꞌchic saꞌ li tenamit li quixcol cuiꞌ rib. Ut aran ta̱cana̱k toj nak ta̱ca̱mk lix yucuaꞌileb laj tij, li quiqꞌueheꞌ aceite saꞌ xjolom.

²⁶ Abanan cui li ani xcamsi ras ri̱tzꞌin ta̱e̱lk saꞌ li tenamit aꞌan li ta̱ru̱k tixcol cuiꞌ rib,

²⁷ ut cui natauheꞌ xban li rechꞌalal li quicamsi̱c ut ta̱camsi̱k xban, li rechꞌalal li camenak ma̱cꞌaꞌ xma̱c nak tixcamsi xban nak li jun x-el saꞌ li tenamit li tixcol cuiꞌ rib.

²⁸ Tento nak li ani xcamsi ras ri̱tzꞌin ta̱cana̱k saꞌ li tenamit li tixcol cuiꞌ rib toj ta̱ca̱mk lix yucuaꞌil eb laj tij. Nak acak xcam lix yucuaꞌileb laj tij, naru ta̱sukꞌi̱k saꞌ li rochoch.

²⁹ Eb li chakꞌrab aꞌin e̱re la̱ex ut reheb le̱ ralal e̱cꞌajol yalak bar cua̱nkex.

³⁰ Ta̱teneba̱k ca̱mc saꞌ xbe̱n li ani xcamsi ras ri̱tzꞌin cui cuanqueb cuib oxib li teꞌyehok re. Abanan incꞌaꞌ naru ta̱teneba̱k ca̱mc saꞌ xbe̱n cui jun ajcuiꞌ li ta̱jitok re.

³¹ Li ani naxcamsi ras ri̱tzꞌin xban nak yal xraj xchꞌo̱l nak xcamsi incꞌaꞌ naru xtojbal rix lix ma̱c riqꞌuin tumin. Tento ban nak ta̱camsi̱k xban nak tenebanbil ca̱mc saꞌ xbe̱n.

³² Cui junak li xcamsi ras ri̱tzꞌin xco̱ saꞌ li tenamit li naxcol cuiꞌ rib, li jun aꞌan incꞌaꞌ naru ta̱tojok re ta̱sukꞌi̱k saꞌ li rochoch. Tento nak ta̱cana̱k aran toj nak ta̱ca̱mk lix yucuaꞌileb laj tij.

³³ Me̱mux ru li naꞌajej li texcua̱nk cuiꞌ. Li camsi̱nc naxmux ru li chꞌochꞌ. Caꞌaj cuiꞌ ta̱ru̱k xtojbal rix li ma̱c nak ta̱camsi̱k li xcamsin. Ut li chꞌochꞌ ta̱cana̱k chi incꞌaꞌ chic muxbil ru.

³⁴ Me̱mux ru li naꞌajej li texcua̱nk cuiꞌ xban nak la̱in li Ka̱cuaꞌ tincua̱nk aran. La̱in tincua̱nk e̱riqꞌuin la̱ex aj Israel, chan li Dios.