Números 33 - Li Santil hu

Resil chanru nak eb laj Israel queꞌco̱eb Canaán

¹ Joꞌcaꞌin nak queꞌel chak laj Israel aran Egipto. Chi chꞌu̱tal queꞌxqꞌue rib nak yo̱queb chi xic joꞌ nequeꞌxba̱nu li soldados. Ut laj Moisés ut laj Aarón, aꞌaneb li queꞌcꞌamoc be chiruheb.

² Ut laj Moisés yo̱ chixtzꞌi̱banquil lix cꞌabaꞌeb li naꞌajej li queꞌnumeꞌ cuiꞌ joꞌ quiyeheꞌ re xban li Ka̱cuaꞌ. Aꞌan aꞌin li retalil li reliqueb.

³ Eb laj Israel queꞌel Ramesés saꞌ li oꞌlaju xbe li xbe̱n po. Ecue̱rak li ninkꞌe Pascua. Cauheb xchꞌo̱l nak queꞌel chiruheb chixjunileb laj Egipto.

⁴ Nak yo̱queb chixmukbaleb li xbe̱n ralaleb laj Egipto li quixcamsi li Ka̱cuaꞌ, eb laj Israel queꞌco̱eb. Li Ka̱cuaꞌ quixcamsiheb li ralaleb laj Egipto re xrakbal a̱tin saꞌ xbe̱n lix dioseb.

⁵ Nak queꞌel Ramesés eb laj Israel queꞌco̱eb toj Sucot ut aran queꞌxyi̱b lix muheba̱leb.

⁶ Nak queꞌel Sucot, queꞌco̱eb toj Etam li cuan nachꞌ riqꞌuin li nuba̱l re li chaki chꞌochꞌ ut aran queꞌxyi̱b lix muheba̱leb.

⁷ Nak queꞌel Etam, queꞌco̱eb toj Pi-hahirot li cuan saꞌ xcaꞌyaba̱l li naꞌajej Baal-zefón ut queꞌxyi̱b lix muheba̱leb nachꞌ riqꞌuin li tenamit Migdol.

⁸ Nak queꞌel Pi-hahirot queꞌnumeꞌ saꞌ xyi li palau ut queꞌco̱eb saꞌ li chaki chꞌochꞌ. Nak ac xeꞌbe̱c oxib cutan saꞌ li chaki chꞌochꞌ Etam, queꞌxyi̱b lix muheba̱leb aran Mara.

⁹ Nak queꞌel Mara, queꞌco̱eb Elim. Saꞌ li naꞌajej aꞌan cuan cablaju li yuꞌam haꞌ ut laje̱b xca̱cꞌa̱l li cheꞌ palma. Ut aran queꞌxyi̱b lix muheba̱leb.

¹⁰ Nak queꞌel Elim, queꞌco̱eb toj chire li Caki Palau ut aran queꞌxyi̱b lix muheba̱leb.

¹¹ Nak queꞌel chire li Caki Palau, queꞌco̱eb toj saꞌ li chaki chꞌochꞌ Sin ut aran queꞌxyi̱b lix muheba̱leb.

¹² Nak queꞌel Sin, queꞌco̱eb toj Dofca ut aran queꞌxyi̱b lix muheba̱leb.

¹³ Nak queꞌel Dofca, queꞌco̱eb toj Alús ut aran queꞌxyi̱b lix muheba̱leb.

¹⁴ Nak queꞌel Alús, queꞌco̱eb Refidim. Saꞌ li naꞌajej aꞌan ma̱cꞌaꞌ li haꞌ re teꞌrucꞌ li tenamit.

¹⁵ Nak queꞌel Refidim, queꞌco̱eb toj saꞌ li chaki chꞌochꞌ Sinaí ut aran queꞌxyi̱b lix muheba̱leb.

¹⁶ Nak queꞌel Sinaí, queꞌco̱eb toj Kibrot-hataava ut aran queꞌxyi̱b lix muheba̱leb.

¹⁷ Nak queꞌel Kibrot-hataava, queꞌco̱eb toj Hazerot ut aran queꞌxyi̱b lix muheba̱leb.

¹⁸ Nak queꞌel Hazerot, queꞌco̱eb toj Ritma ut aran queꞌxyi̱b lix muheba̱leb.

¹⁹ Nak queꞌel Ritma, queꞌco̱eb toj Rimón-peres ut aran queꞌxyi̱b lix muheba̱leb.

²⁰ Nak queꞌel Rimón-peres, queꞌco̱eb toj Libna ut aran queꞌxyi̱b lix muheba̱leb.

²¹ Nak queꞌel Libna, queꞌco̱eb toj Rissa ut aran queꞌxyi̱b lix muheba̱leb.

²² Nak queꞌel Rissa, queꞌco̱eb toj Ceelata ut aran queꞌxyi̱b lix muheba̱leb.

²³ Nak queꞌel Ceelata, queꞌco̱eb cuan cuiꞌ li tzu̱l Sefer ut aran queꞌxyi̱b lix muheba̱leb.

²⁴ Nak queꞌel cuan cuiꞌ li tzu̱l Sefer, queꞌco̱eb toj Harada ut aran queꞌxyi̱b lix muheba̱leb.

²⁵ Nak queꞌel Harada, queꞌco̱eb toj Macelot ut aran queꞌxyi̱b lix muheba̱leb.

²⁶ Nak queꞌel Macelot, queꞌco̱eb toj Tahat ut aran queꞌxyi̱b lix muheba̱leb.

²⁷ Nak queꞌel Tahat, queꞌco̱eb toj Tara ut aran queꞌxyi̱b lix muheba̱leb.

²⁸ Nak queꞌel Tara, queꞌco̱eb toj Mitca ut aran queꞌxyi̱b lix muheba̱leb.

²⁹ Nak queꞌel Mitca, queꞌco̱eb toj Hasmona ut aran queꞌxyi̱b lix muheba̱leb.

³⁰ Nak queꞌel Hasmona, queꞌco̱eb toj Moserot ut aran queꞌxyi̱b lix muheba̱leb.

³¹ Nak queꞌel Moserot, queꞌco̱eb toj Bene-jaacán ut aran queꞌxyi̱b lix muheba̱leb.

³² Nak queꞌel Bene-jaacán, queꞌco̱eb cuan cuiꞌ li tzu̱l Gidgad ut aran queꞌxyi̱b lix muheba̱leb.

³³ Nak queꞌel cuan cuiꞌ li tzu̱l Gidgad, queꞌco̱eb toj Jotbata ut aran queꞌxyi̱b lix muheba̱leb.

³⁴ Nak queꞌel Jotbata, queꞌco̱eb toj Abrona ut aran queꞌxyi̱b lix muheba̱leb.

³⁵ Nak queꞌel Abrona, queꞌco̱eb toj Ezión-geber ut aran queꞌxyi̱b lix muheba̱leb.

³⁶ Nak queꞌel Ezión-geber, queꞌco̱eb toj saꞌ li chaki chꞌochꞌ Zin, ut aran Cades queꞌxyi̱b lix muheba̱leb.

³⁷ Nak queꞌel Cades, queꞌco̱eb cuan cuiꞌ li tzu̱l Hor li cuan saꞌ li nuba̱l re li naꞌajej Edom. Ut aran queꞌxyi̱b lix muheba̱leb.

³⁸ Nak cuanqueb aran laj Aarón laj tij quitakeꞌ saꞌ li tzu̱l Hor joꞌ quiyeheꞌ re xban li Dios. Ut aran quicam laj Aarón saꞌ li xbe̱n cutan re li roꞌ po nak ac cuan chic caꞌcꞌa̱l chihab reliqueb laj Israel saꞌ li naꞌajej Egipto.

³⁹ Jun ciento riqꞌuin oxib xcaꞌcꞌa̱l (123) chihab cuan re laj Aarón nak quicam saꞌ li tzu̱l Hor.

⁴⁰ Lix reyeb laj Arad li quicuan Neguev saꞌ li naꞌajej Canaán quirabi resil lix cuulajiqueb laj Israel.

⁴¹ Eb laj Israel queꞌel cuan cuiꞌ li tzu̱l Hor ut queꞌco̱eb toj Zalmona. Ut aran queꞌxyi̱b lix muheba̱leb.

⁴² Nak queꞌel Zalmona, queꞌco̱eb toj Punón ut aran queꞌxyi̱b lix muheba̱leb.

⁴³ Nak queꞌel Punón, queꞌco̱eb toj Obot ut aran queꞌxyi̱b lix muheba̱leb.

⁴⁴ Nak queꞌel Obot, queꞌco̱eb toj Ije-abarim li cuan saꞌ li nuba̱l re Moab. Ut aran queꞌxyi̱b lix muheba̱leb.

⁴⁵ Nak queꞌel Ije-abarim, queꞌco̱eb toj Dibón-gad ut aran queꞌxyi̱b lix muheba̱leb.

⁴⁶ Nak queꞌel Dibón-gad, queꞌco̱eb toj Almón-diblataim ut aran queꞌxyi̱b lix muheba̱leb.

⁴⁷ Nak queꞌel Almón-diblataim, queꞌco̱eb toj saꞌ eb li tzu̱l re Abarim, li cuanqueb saꞌ xcaꞌyaba̱l li tzu̱l Nebo ut aran queꞌxyi̱b lix muheba̱leb.

⁴⁸ Nak queꞌel saꞌ eb li tzu̱l re Abarim, queꞌco̱eb toj saꞌ eb li cꞌaleba̱l cuanqueb xcue̱nt Moab li cuanqueb chire li nimaꞌ Jordán saꞌ xcaꞌyaba̱l li tenamit Jericó.

⁴⁹ Aran chire li nimaꞌ Jordán queꞌxyi̱b lix muheba̱leb saꞌ eb li naꞌajej naticla Bet-jesimot nacuulac toj Abel-sitim saꞌ li cꞌaleba̱l cuan xcue̱nt Moab.

⁵⁰ Ut li Ka̱cuaꞌ quia̱tinac riqꞌuin laj Moisés saꞌ li ru takꞌa cuan Moab chire li nimaꞌ Jordán li cuan saꞌ xcaꞌyaba̱l li tenamit Jericó.

⁵¹ Ut quixye re: —Tat-a̱tinak riqꞌuineb laj Israel ut ta̱ye reheb chi joꞌcaꞌin. Nak texnumekꞌ jun pacꞌal li nimaꞌ Jordán ut tex-oc saꞌ li naꞌajej Canaán,

⁵² te̱risiheb chixjunileb li cuanqueb saꞌ li naꞌajej aꞌan. Te̱sach ruheb chixjunileb lix dioseb li queꞌxyi̱b riqꞌuin pec ut riqꞌuin chꞌi̱chꞌ. Te̱tꞌan chixjunileb li naꞌajej li najt xteram li nequeꞌlokꞌonin cuiꞌ.

⁵³ Te̱risiheb chixjunileb li cristian li cuanqueb saꞌ li naꞌajej aꞌan ut texcana̱k chi cua̱nc aran xban nak la̱in xinqꞌuehoc e̱re li naꞌajej aꞌan.

⁵⁴ Ta̱bu̱li rix li chꞌochꞌ nak ta̱jeqꞌui reheb laj Israel, aꞌ yal jarubeb cuanqueb saꞌ li junju̱nk xte̱pal. Cui nabaleb, nabal ajcuiꞌ li chꞌochꞌ ta̱qꞌue reheb. Ut cui incꞌaꞌ qꞌuiheb, incꞌaꞌ ajcuiꞌ qꞌui li chꞌochꞌ ta̱qꞌue. Aꞌ yal joꞌ qꞌuial ta̱tzꞌak li junju̱nk, aꞌan li ta̱qꞌue reheb. Ta̱jeqꞌui li chꞌochꞌ aꞌ yal ani lix xeꞌto̱nil yucuaꞌeb.

⁵⁵ Abanan cui incꞌaꞌ te̱risiheb saꞌ li naꞌajej li cuanqueb cuiꞌ anakcuan, raylal te̱cꞌul mokon xbaneb. Chanchanakeb lix cꞌaj li cheꞌ x-oc saꞌ xnakꞌ e̱ru, malaj ut chanchanakeb li qꞌuix saꞌ le̱ tibel. Ra te̱cꞌul xbaneb nak ac cua̱nkex chic saꞌ li naꞌajej aꞌan.

⁵⁶ Ut la̱in tinba̱nu e̱re joꞌ quincꞌoxla xba̱nunquil reheb aꞌan, chan li Ka̱cuaꞌ.