Números 32 - Li Santil hu

Eb li ralal xcꞌajol laj Rubén ut eb li ralal xcꞌajol laj Gad queꞌre̱chani li naꞌajej chire li nimaꞌ Jordán

¹ Kꞌaxal nabaleb lix queto̱mkeb li ralal xcꞌajol laj Rubén ut eb li ralal xcꞌajol laj Gad. Queꞌril li naꞌajej Jazer ut Galaad ut queꞌxqꞌue retal nak cha̱bil re qꞌuiresi̱nc queto̱mk.

² Joꞌcan nak queꞌco̱eb riqꞌuineb laj Moisés, laj Eleazar laj tij ut eb li nequeꞌtaklan saꞌ xbe̱neb laj Israel. Ut queꞌxye reheb:

³ —Qꞌuehomak retal chanru eb li naꞌajej Atarot, Dibón, Jazer, Nimra, Hesbón, Eleale, Sebam, Nebo ut Beón.

⁴ Li Ka̱cuaꞌ quinumta saꞌ xbe̱neb li cuanqueb aran. Li naꞌajej aꞌan cha̱bil re qꞌuiresi̱nc queto̱mk. Ut la̱o nacuulac chiku qꞌuiresi̱nc queto̱mk.

⁵ Cui nequeraj xba̱nunquil usilal ke, qꞌuehomak ke li naꞌajej aꞌan chokꞌ kaherencia. Ut moe̱takla toj jun pacꞌal li nimaꞌ Jordán, chanqueb.

⁶ Ut laj Moisés quixye reheb: —¿Ma te̱raj texcana̱k arin ut eb le̱ rech tenamitil teꞌxic jun pacꞌal li nimaꞌ Jordán chi pletic?

⁷ ¿Cꞌaꞌut nak te̱raj ta̱chꞌina̱nk xchꞌo̱leb le̱ rech tenamitil chi xic chire̱chaninquil li naꞌajej li xqꞌue ke li Ka̱cuaꞌ?

⁸ Joꞌcan ajcuiꞌ queꞌxba̱nu le̱ xeꞌto̱nil yucuaꞌ aran Cades-barnea nak quintaklaheb chixqꞌuebal retal li naꞌajej aꞌan.

⁹ Queꞌco̱eb toj saꞌ li nimaꞌ Escol. Nak ac queꞌril li naꞌajej queꞌxqꞌue chi chꞌina̱nc xchꞌo̱leb li rech tenamitil re nak incꞌaꞌ teꞌoc saꞌ li naꞌajej li quixqꞌue li Dios reheb.

¹⁰ Quichal xjoskꞌil li Dios saꞌ xbe̱neb ut quixye riqꞌuin juramento:

¹¹ “Eb li cui̱nk li queꞌel chak Egipto li cuan junmay chihab reheb, joꞌ eb ajcuiꞌ li ac numenakeb junmay chihab, incꞌaꞌ teꞌoc saꞌ li cha̱bil naꞌajej li quinyechiꞌi riqꞌuin juramento reheb laj Abraham, laj Isaac, ut laj Jacob xban nak incꞌaꞌ queꞌxpa̱b chi anchal xchꞌo̱leb li cꞌaꞌru quinye reheb.

¹² Caꞌajeb cuiꞌ laj Caleb, li ralal laj Jefone laj cenezeo ut laj Josué li ralal laj Nun naru teꞌoc xban nak xineꞌxpa̱b chi anchal xchꞌo̱leb”, chan li Dios.

¹³ Cꞌajoꞌ nak quijoskꞌoꞌ li Dios saꞌ xbe̱neb laj Israel. Joꞌcan nak quixqꞌueheb chixbeninquil ribeb saꞌ li chaki chꞌochꞌ chiru caꞌcꞌa̱l chihab toj retal queꞌosoꞌ chixjunileb li queꞌxba̱nu li incꞌaꞌ us chiru li Ka̱cuaꞌ.

¹⁴ Ut anakcuan la̱ex li ralal xcꞌajolex li queꞌxba̱nu li incꞌaꞌ us, te̱raj cuiꞌchic xqꞌuebal xjoskꞌil li Dios saꞌ kabe̱n la̱o aj Israel.

¹⁵ Cui la̱ex te̱raj xkꞌetkꞌetinquil e̱rib chiru li Dios, li Dios toxcanab chi cua̱nc saꞌ li chaki chꞌochꞌ joꞌ quixba̱nu junxil. Ut saꞌ e̱ma̱c la̱ex nak ta̱sachekꞌ ru li katenamit Israel, chan laj Moisés.

¹⁶ Queꞌnachꞌoc ut riqꞌuin laj Moisés eb laj Rubén ut eb laj Gad ut queꞌxye re: —Tento takayi̱b li kanaꞌaj reheb li kaqueto̱mk. Ut takayi̱b ajcuiꞌ li tenamit re teꞌcua̱nk cuiꞌ li kixakil ut eb li kacocꞌal.

¹⁷ Abanan la̱o takacauresi kib ut toxic chi ubej chi pletic toj retal take̱chani li naꞌajej li teꞌcua̱nk cuiꞌ li jun chꞌol chic laj Israel. Li kixakil ut eb li kacocꞌal teꞌcana̱k arin saꞌ eb li tenamit li ac cauresinbileb re teꞌxcol cuiꞌ ribeb chiruheb li cuanqueb saꞌ li naꞌajej aꞌin.

¹⁸ La̱o incꞌaꞌ tosukꞌi̱k saꞌ li naꞌajej aꞌin toj nak ac xeꞌre̱chani lix naꞌajeb chixjunileb laj Israel.

¹⁹ Ut la̱o ma̱cꞌaꞌ take̱chani jun pacꞌal li nimaꞌ Jordán xban nak acak xke̱chani li kanaꞌaj arin chire li nimaꞌ Jordán saꞌ li este, chanqueb.

²⁰ Ut laj Moisés quixye reheb: —Cui ya̱l nak yo̱quex chi a̱tinac, cauresihomak e̱rib chi pletic joꞌ quixye li Ka̱cuaꞌ.

²¹ Texxic jun pacꞌal li nimaꞌ Jordán joꞌ tixye e̱re li Ka̱cuaꞌ. Ut texpletik riqꞌuineb li xicꞌ nequeꞌiloc ke toj texnumta̱k saꞌ xbe̱neb.

²² Nak acak xere̱chani li naꞌajej, la̱ex naru texsukꞌi̱k saꞌ li naꞌajej aꞌin xban nak ac xeba̱nu li cꞌaꞌru xeyechiꞌi xba̱nunquil re li Dios ut reheb le̱ rech tenamitil. Ut li naꞌajej aꞌin e̱rehak chic chiru li Ka̱cuaꞌ.

²³ Abanan cui incꞌaꞌ te̱ba̱nu li cꞌaꞌru xeyechiꞌi re li Ka̱cuaꞌ, qꞌuehomak retal nak texma̱cobk chiru li Ka̱cuaꞌ. Ut la̱ex te̱cꞌul xtojbal le̱ ma̱c.

²⁴ La̱ex naru nequeyi̱b lix tenamiteb le̱ rixakil ut eb le̱ cocꞌal ut naru nequeyi̱b xnaꞌajeb le̱ queto̱mk. Abanan te̱ba̱nu chixjunil li cꞌaꞌru xeye, chan laj Moisés.

²⁵ Ut eb li ralal xcꞌajol laj Gad ut eb li ralal xcꞌajol laj Rubén queꞌxye re laj Moisés: —La̱o laj cꞌanjel cha̱cuu. La̱o takaba̱nu li cꞌaꞌru xaye ke.

²⁶ Eb li kacocꞌal, ut eb li kixakil joꞌ eb ajcuiꞌ li kaqueto̱mk teꞌcana̱k arin saꞌ eb li tenamit li cuan saꞌ xcue̱nt Galaad.

²⁷ Abanan la̱o tocꞌanjelak cha̱cuu. Takacauresi kib ut toxic chi pletic jun pacꞌal li nimaꞌ Jordán. Takaba̱nu li kataklanquil xban li Ka̱cuaꞌ joꞌ xaye ke, chanqueb.

²⁸ Tojoꞌnak laj Moisés quia̱tinac riqꞌuin laj Eleazar laj tij ut laj Josué li ralal laj Nun ut riqꞌuineb ajcuiꞌ li nequeꞌtaklan saꞌ xbe̱neb lix te̱paleb laj Israel ut quixye reheb li cꞌaꞌru teꞌxba̱nu.

²⁹ Quixye reheb: —Cui eb li cui̱nk xcomoneb li ralal xcꞌajol laj Gad ut eb li ralal xcꞌajol laj Rubén teꞌxic jun pacꞌal li nimaꞌ chi pletic, la̱ex te̱qꞌue reheb li naꞌajej Galaad nak ac xere̱chani li chꞌochꞌ.

³⁰ Abanan cui incꞌaꞌ nequeꞌxic chi pletic e̱rochben, tento nak teꞌxcꞌul lix naꞌajeb aran Canaán e̱rochben la̱ex, chan.

³¹ Ut eb li ralal xcꞌajol laj Gad ut eb li ralal xcꞌajol laj Rubén queꞌxye: —La̱o laj cꞌanjel cha̱cuu. La̱o takaba̱nu joꞌ xye ke li Ka̱cuaꞌ.

³² La̱o toxic chi pletic jun pacꞌal li nimaꞌ Jordán aran Canaán joꞌ naxye ke li Ka̱cuaꞌ. Abanan li naꞌajej li tocua̱nk cuiꞌ, aꞌan li cuan saꞌ li pacꞌal aꞌin, saꞌ li oriente, chanqueb.

³³ Joꞌcan nak laj Moisés quixqꞌue lix naꞌaj laj Sehón lix reyeb laj amorreo ut lix naꞌaj laj Og lix reyeb laj Basán reheb li ralal xcꞌajol laj Gad, ut reheb li ralal xcꞌajol laj Rubén ut reheb ajcuiꞌ yijach li ralal xcꞌajol laj Manasés li ralal laj José. Quixqꞌue ajcuiꞌ reheb li tenamit ut eb li cocꞌ cꞌaleba̱l li cuanqueb chi xjun sutam.

³⁴ Ut eb li ralal xcꞌajol laj Gad queꞌxyi̱b eb li tenamit Dibón, Atarot, Aroer,

³⁵ Atarot-sofán, Jazer, Jogbeha,

³⁶ Bet-nimra ut Bet-arán. Queꞌxcauresiheb li tenamit aꞌin ut queꞌxyi̱b ajcuiꞌ lix naꞌaj lix queto̱mkeb.

³⁷ Ut eb li ralal xcꞌajol laj Rubén queꞌxyi̱b cuiꞌchic li tenamit Hesbón, Eleale, Quiriataim,

³⁸ ut Nebo ut Baal-meón, li cuib chi tenamit li queꞌxjal xcꞌabaꞌeb mokon. Ut queꞌxyi̱b ajcuiꞌ li tenamit Sibma. Ut queꞌxqꞌue jalan xcꞌabaꞌeb li tenamit li queꞌxyi̱b.

³⁹ Eb li ralal xcꞌajol laj Maquir, li ralal laj Manasés, queꞌco̱eb Galaad ut queꞌnumta saꞌ xbe̱neb laj amorreo toj retal nak queꞌrisiheb.

⁴⁰ Joꞌcan nak laj Moisés quixqꞌue li naꞌajej Galaad reheb li ralal xcꞌajol laj Maquir li ralal laj Manasés. Ut eb aꞌan queꞌcana chi cua̱nc aran.

⁴¹ Ut co̱ ajcuiꞌ laj Jair, xcomoneb li ralal xcꞌajol laj Manasés. Quinumta saꞌ xbe̱neb cuib oxib chic lix naꞌajeb laj amorreo ut queꞌxqꞌue Havot-jair chokꞌ xcꞌabaꞌ li naꞌajej aꞌan.

⁴² Ut co̱ ajcuiꞌ laj Noba ut quire̱chani li naꞌajej Kenat rochbeneb li cocꞌ cꞌaleba̱l li cuanqueb chi xjun sutam. Ut quixqꞌue Noba chokꞌ xcꞌabaꞌ xban nak aꞌan lix cꞌabaꞌ li cui̱nk aꞌan.