Números 31 - Li Santil hu

¹ Li Ka̱cuaꞌ quia̱tinac riqꞌuin laj Moisés ut quixye re:

² —Qꞌue re̱kaj reheb laj Madián li ma̱usilal li queꞌxba̱nu reheb laj Israel. Nak acak xaqꞌueheb chixtojbal lix ma̱queb, la̱at tatca̱mk ut toxa̱tauheb la̱ xeꞌto̱nil yucuaꞌ, chan li Dios.

³ Joꞌcan nak laj Moisés quia̱tinac riqꞌuineb laj Israel ut quixye reheb: —Cauresihomakeb li teꞌxic chi pletic riqꞌuineb laj Madián saꞌ xcꞌabaꞌ li Dios re nak teꞌxqꞌue re̱kaj reheb li ma̱usilal li queꞌxba̱nu e̱re.

⁴ Ju̱nk mil chi cui̱nk teꞌe̱lk saꞌ li junju̱nk xte̱paleb laj Israel re teꞌxic chi pletic riqꞌuineb, chan.

⁵ Joꞌcan nak ju̱nk mil chi cui̱nk queꞌisi̱c saꞌ li junju̱nk te̱p. Cablaju mil (12,000) chixjunileb li queꞌco̱eb chi pletic.

⁶ Laj Moisés quixtaklaheb chi pletic jun mil reheb li junju̱nk xte̱paleb laj Israel. Ut quixtakla ajcuiꞌ laj Finees li ralal laj Eleazar laj tij. Laj Finees quixcꞌam li cꞌaꞌak re ru li queꞌrisi saꞌ li Lokꞌlaj Naꞌajej ut quixcꞌameb ajcuiꞌ li trompeta li teꞌxya̱basi nak teꞌoc chi pletic.

⁷ Queꞌpletic riqꞌuineb laj Madián joꞌ quixye li Dios re laj Moisés ut queꞌxcamsiheb chixjunileb li cui̱nk aj Madián.

⁸ Queꞌxcamsiheb li o̱b chi rey aj Madián. Aꞌaneb laj Evi, laj Requem, laj Zur, laj Hur, ut laj Reba. Ut queꞌxcamsi ajcuiꞌ chi chꞌi̱chꞌ laj Balaam li ralal laj Beor.

⁹ Eb laj Israel queꞌxcꞌam chi pre̱xil li ixk aj Madián joꞌ eb ajcuiꞌ lix cocꞌaleb. Queꞌxcꞌam ajcuiꞌ lix queto̱mk, eb lix carner ut chixjunil li cꞌaꞌru cuan reheb.

¹⁰ Chirix aꞌan queꞌxcꞌat lix tenamit rech xiquic lix muheba̱leb. Ut queꞌxcꞌat ajcuiꞌ li cocꞌ tenamit li cuanqueb chi xjun sutam.

¹¹ Queꞌxcꞌam chirixeb chixjunil li cꞌaꞌru queꞌxxoc. Queꞌxcꞌam li cristian joꞌ eb ajcuiꞌ lix queto̱mkeb.

¹² Queꞌxcꞌam chixjunil riqꞌuineb laj Moisés ut laj Eleazar laj tij ut riqꞌuineb laj Israel li cuanqueb saꞌ li ru takꞌa Moab li cuan chire li nimaꞌ Jordán. Li naꞌajej aꞌan nacana saꞌ xcaꞌyaba̱l li tenamit Jericó.

¹³ Laj Moisés ut laj Eleazar laj tij rochbeneb li nequeꞌjolomin reheb laj Israel queꞌco̱eb chixcꞌulbaleb li soldado nak queꞌsukꞌi chak saꞌ li ple̱t.

¹⁴ Cꞌajoꞌ nak quijoskꞌoꞌ laj Moisés riqꞌuineb li nequeꞌtaklan saꞌ xbe̱neb li jun mil chi soldado. Ut quijoskꞌoꞌ ajcuiꞌ riqꞌuineb li nequeꞌtaklan saꞌ xbe̱neb li jun ciento chi soldado.

¹⁵ Laj Moisés quixye reheb: —¿Cꞌaꞌut nak incꞌaꞌ xecamsiheb li ixk?

¹⁶ Aꞌaneb li ixk li queꞌtacchiꞌi̱c xban laj Balaam. Ut aꞌan eb li queꞌqꞌuehoc reheb laj Israel chi ma̱cobc chiru li Ka̱cuaꞌ ut queꞌxlokꞌoni laj Baal-peor. Xbaneb aꞌan nak li Dios xtakla li raylal saꞌ xbe̱n li tenamit Israel.

¹⁷ Anakcuan tento nak te̱camsiheb chixjunileb li cocꞌ te̱lom ut te̱camsiheb ajcuiꞌ li ixk li ac cuanjenakeb riqꞌuin cui̱nk.

¹⁸ Caꞌaj cuiꞌ eb li xkaꞌal li incꞌaꞌ cuanjenakeb riqꞌuin cui̱nk, aꞌan incꞌaꞌ teꞌcamsi̱k.

¹⁹ Tento nak teꞌcana̱k chirix li naꞌajej li cuanqueb cuiꞌ li muheba̱l chiru cuukub cutan chixjunileb li queꞌcamsin, joꞌ eb ajcuiꞌ li queꞌchꞌeꞌoc re li camenak. Saꞌ li rox ut saꞌ li xcuuk li cutan tento nak teꞌxsantobresi ribeb, joꞌ eb ajcuiꞌ li tukꞌ ixk queꞌcꞌameꞌ chi pre̱xil.

²⁰ Tento nak te̱santobresi ajcuiꞌ chixjunil li tꞌicr ut li cꞌaꞌak re ru yi̱banbil riqꞌuin tzꞌu̱m, ut li rix li chiba̱t joꞌ ajcuiꞌ li yi̱banbil riqꞌuin cheꞌ, chan.

²¹ Ut laj Eleazar laj tij quixye reheb li soldado li queꞌcuulac chi pletic rochben: —Aꞌan aꞌin li naxye saꞌ li chakꞌrab li quixqꞌue li Ka̱cuaꞌ re laj Moisés.

²² Tento xnumsinquil saꞌ xam chixjunil li chꞌi̱chꞌ joꞌ li oro, li plata, li bronce, li hierro ut li estaña joꞌ ajcuiꞌ li plomo.

²³ Chixjunil li chꞌi̱chꞌ ut chixjunil li cꞌa chic re ru li tixcuy cꞌatecꞌ, tento xnumsinquil saꞌ xam re xsantobresinquil. Abanan tento ajcuiꞌ xsantobresinquil riqꞌuin li haꞌ re santobresi̱nc. Ut chixjunil li incꞌaꞌ naru xnumsinquil saꞌ xam ta̱chꞌajekꞌ riqꞌuin li haꞌ re santobresi̱nc.

²⁴ Saꞌ li xcuuk li cutan te̱puchꞌ le̱ rakꞌ re nak santobresinbilakex. Ut chirix aꞌan naru tex-oc saꞌ lin naꞌajej li cuanqueb cuiꞌ li muheba̱l, chan.

²⁵ Li Ka̱cuaꞌ quixye re laj Moisés:

²⁶ —La̱at ut laj Eleazar laj tij e̱rochben chixjunileb li nequeꞌcꞌamoc be te̱rajlaheb chixjunileb li queꞌchapeꞌ ut queꞌcꞌameꞌ chi pre̱xil, joꞌ cristian joꞌ xul.

²⁷ Te̱jach li cꞌaꞌru quexoc saꞌ li ple̱t. Ut li jun jachal ta̱jeqꞌui̱k reheb li soldado li queꞌpletic. Ut li jun jachal chic ta̱jeqꞌui̱k reheb li jun chꞌol chic laj Israel.

²⁸ Eb li soldado teꞌxqꞌue chokꞌ xmayej chicuu la̱in li Ka̱cuaꞌ junju̱nk re li o̱b ciento li cꞌaꞌak re ru li teꞌxcꞌul, usta cristian, usta bo̱yx, usta bu̱r, usta carner, usta chiba̱t.

²⁹ Ut li joꞌ qꞌuial teꞌxqꞌue eb li soldado la̱at ta̱qꞌue re laj Eleazar laj tij xban nak aꞌan cue la̱in li Ka̱cuaꞌ.

³⁰ Ut li yijach chic li ta̱jeqꞌui̱k saꞌ xya̱nkeb laj Israel, ta̱cuisi junju̱nk saꞌ li laje̱b roxcꞌa̱l li cꞌaꞌak re ru li teꞌxcꞌul laj Israel ut ta̱qꞌue reheb laj levita li nequeꞌiloc re li tabernáculo, joꞌ cristian, joꞌ bo̱yx, joꞌ bu̱r, joꞌ carner, joꞌ chiba̱t, joꞌ ajcuiꞌ li jun chꞌol chic li xul, chan li Dios.

³¹ Ut laj Moisés ut laj Eleazar queꞌxba̱nu joꞌ quixye li Ka̱cuaꞌ re laj Moisés.

³² Aꞌaneb aꞌin li queꞌxxoc eb li soldado nak queꞌpletic riqꞌuineb laj Madián: cuakib ciento mil riqꞌuin oꞌlaju xca̱cꞌa̱l mil (675,000) li carner,

³³ cablaju xca̱cꞌa̱l mil (72,000) li bo̱yx,

³⁴ jun xca̱cꞌa̱l mil (61,000) li bu̱r,

³⁵ ut cablaju xcaꞌcꞌa̱l mil (32,000) li ixk li toj ma̱jiꞌ cuanjenakeb riqꞌuin cui̱nk.

³⁶ Aꞌin li yijach li queꞌxcꞌul li soldado li queꞌcuulac saꞌ li ple̱t: oxib ciento mil riqꞌuin cuuklaju xcaꞌcꞌa̱l mil riqꞌuin o̱b ciento (337,500) li carner.

³⁷ Ut queꞌxqꞌue cuakib ciento riqꞌuin oꞌlaju xca̱cꞌa̱l (675) re li Ka̱cuaꞌ.

³⁸ Queꞌxcꞌul cuaklaju xcaꞌcꞌa̱l mil (36,000) li bo̱yx ut queꞌxqꞌue cablaju xca̱cꞌa̱l (72) re li Ka̱cuaꞌ.

³⁹ Queꞌxcꞌul laje̱b xcaꞌcꞌa̱l mil riqꞌuin o̱b ciento (30,500) li bu̱r ut queꞌxqꞌue jun xca̱cꞌa̱l (61) re li Ka̱cuaꞌ.

⁴⁰ Queꞌxcꞌul cuaklaju mil (16,000) li ixk ut queꞌxqꞌue cablaju xcaꞌcꞌa̱l (32) re li Ka̱cuaꞌ.

⁴¹ Li joꞌ qꞌuial li quiqꞌueheꞌ re li Ka̱cuaꞌ laj Moisés quixqꞌue re laj Eleazar laj tij joꞌ quiyeheꞌ re xban li Ka̱cuaꞌ.

⁴² Li yijach chic li cꞌaꞌak re ru li queꞌxcꞌul eb laj Israel, aꞌaneb aꞌin:

⁴³ oxib ciento mil riqꞌuin cuuklaju xcaꞌcꞌa̱l mil riqꞌuin o̱b ciento (337,500) li carner;

⁴⁴ cuaklaju xcaꞌcꞌa̱l mil (36,000) li bo̱yx;

⁴⁵ laje̱b xcaꞌcꞌa̱l mil riqꞌuin o̱b ciento (30,500) li bu̱r;

⁴⁶ ut cuaklaju mil (16,000) li ixk.

⁴⁷ Laj Moisés quixsicꞌ ru jun reheb li junju̱nk laje̱b roxcꞌa̱l, joꞌ ixk joꞌ xul joꞌ quixye li Ka̱cuaꞌ ut quixqꞌue reheb laj levita li nequeꞌiloc re li tabernáculo.

⁴⁸ Chirix aꞌan eb li nequeꞌtaklan saꞌ xbe̱neb li ju̱nk chꞌu̱tal li soldado li cuanqueb jun mil chi soldado ut eb li nequeꞌtaklan saꞌ xbe̱neb li ju̱nk chꞌu̱tal li cuanqueb jun cien chi soldado, queꞌco̱eb riqꞌuin laj Moisés.

⁴⁹ Ut queꞌxye re: —Eb li nequeꞌcꞌanjelac cha̱cuu queꞌrajlaheb li kasolda̱d. Ut tzꞌakaleb nak queꞌsukꞌi. Ma̱ jun quisach chak.

⁵⁰ Joꞌcan nak xkacꞌam chak li cꞌaꞌak re ru aꞌin re nak takaqꞌue li kamayej re li Ka̱cuaꞌ. Xkacꞌam li cꞌaꞌru yi̱banbil riqꞌuin oro, joꞌ li nequeꞌxqꞌue saꞌ xcux rukꞌ, li matkꞌab, ut li caꞌxic, joꞌ eb ajcuiꞌ li kꞌol. Takakꞌaxtesi re li Ka̱cuaꞌ re xtojbal rix li kayuꞌam, chanqueb.

⁵¹ Ut laj Moisés ut laj Eleazar laj tij queꞌxcꞌul chiruheb chixjunil li cꞌaꞌak re ru li queꞌrocsi chokꞌ xsahob ru li yi̱banbil riqꞌuin oro.

⁵² Numenak ca̱hib ciento (400) libra chixjunil li oro li queꞌxqꞌue re li Ka̱cuaꞌ eb li nequeꞌtaklan saꞌ xbe̱neb li soldado.

⁵³ Li junju̱nk chi soldado queꞌxxoc chokꞌ reheb li cꞌaꞌak re ru li queꞌxchap saꞌ li ple̱t.

⁵⁴ Laj Moisés ut laj Eleazar laj tij queꞌxcꞌul li oro li queꞌxsi re li Ka̱cuaꞌ eb li nequeꞌtaklan saꞌ xbe̱neb li junju̱nk chꞌu̱tal li soldados, Queꞌxcꞌam saꞌ li tabernáculo ut queꞌxqꞌue re li Ka̱cuaꞌ saꞌ xcꞌabaꞌeb laj Israel.