Números 30 - Li Santil hu

¹ Laj Moisés quia̱tinac riqꞌuineb li nequeꞌjolomin reheb lix te̱paleb laj Israel ut quixye reheb: —Joꞌcaꞌin quixye li Ka̱cuaꞌ Dios.

² Cui ani naxyechiꞌi re li Dios nak tixba̱nu li cꞌaꞌak re ru, malaj ut naxba̱nu li juramento, tento nak tixba̱nu li cꞌaꞌru quixyechiꞌi xba̱nunquil.

³ Cui junak tukꞌ ixk toj sa̱j, li toj cuan saꞌ rochoch lix naꞌ xyucuaꞌ, naxyechiꞌi re li Dios cꞌaꞌak re ru,

⁴ tento nak tixba̱nu li cꞌaꞌru quixye cui lix yucuaꞌ naxnau ut ma̱cꞌaꞌ tixye re.

⁵ Abanan cui li yucuaꞌbej naxnau ut naxye re lix rabin nak incꞌaꞌ naru tixba̱nu li cꞌaꞌru quixyechiꞌi re li Dios, incꞌaꞌ tento nak tixba̱nu. Li Dios tixcuy xma̱c cui incꞌaꞌ naxba̱nu.

⁶ Cui li ixk aꞌan nasumla nak ac xba̱nu li juramento chiru li Dios,

⁷ tento nak tixba̱nu li cꞌaꞌru quixye cui lix be̱lom ma̱cꞌaꞌ naxye re nak ta̱rabi li cꞌaꞌru quixyechiꞌi re li Dios. Xakxo xcuanquil li ra̱tin li quixye.

⁸ Abanan cui li be̱lomej tixnau ut tixye re li rixakil nak incꞌaꞌ naru tixba̱nu li cꞌaꞌru quixyechiꞌi re li Dios, incꞌaꞌ tento nak tixba̱nu. Li Dios tixcuy xma̱c li ixk cuiꞌ incꞌaꞌ naxba̱nu.

⁹ Cui junak li xma̱lcaꞌan malaj ut junak li ixk xjachom rib tixyechiꞌi cꞌaꞌak re ru re li Dios, tento nak tixba̱nu li cꞌaꞌru quixyechiꞌi.

¹⁰ Cui junak li ixk cuan xbe̱lom tixyechiꞌi cꞌaꞌak re ru re li Dios riqꞌuin juramento,

¹¹ tento nak tixba̱nu li cꞌaꞌru quixye cui lix be̱lom ma̱cꞌaꞌ tixye usta ta̱rabi resil li cꞌaꞌru quixyechiꞌi re li Dios riqꞌuin juramento.

¹² Abanan cui li be̱lomej ta̱rabi resil ut tixye re li rixakil nak incꞌaꞌ naru tixba̱nu li cꞌaꞌru quixyechiꞌi re li Dios, incꞌaꞌ tento nak tixba̱nu. Li Dios tixcuy xma̱c li ixk cui incꞌaꞌ tixba̱nu xban nak li be̱lomej quixye nak incꞌaꞌ tixba̱nu.

¹³ Li be̱lomej tixye ma ta̱ru̱k tixba̱nu li cꞌaꞌru quixyechiꞌi re li Dios li ixakilbej malaj ut incꞌaꞌ naru tixba̱nu.

¹⁴ Abanan cui li be̱lomej ta̱rabi resil li cꞌaꞌru quixyechiꞌi xba̱nunquil li rixakil ut ma̱cꞌaꞌ tixye, tento nak li ixk tixba̱nu li cꞌaꞌru quixyechiꞌi. Tento xba̱nunquil xban nak ma̱cꞌaꞌ quixye lix be̱lom nak quirabi resil.

¹⁵ Abanan cui ac xrabi li be̱lomej cꞌaꞌru quixyechiꞌi li rixakil ut mokon tixye nak incꞌaꞌ tixba̱nu li cꞌaꞌru quixyechiꞌi, saꞌ xbe̱n li be̱lomej ta̱cana̱k li ma̱c cui li rixakil incꞌaꞌ tixba̱nu li cꞌaꞌru quixyechiꞌi re li Dios.—

¹⁶ Aꞌaneb aꞌin li chakꞌrab li quixqꞌue li Dios re laj Moisés ut reheb li be̱lomej ut li ixakilbej ut reheb ajcuiꞌ li yucuaꞌbej ut lix rabin li toj cuan saꞌ rochoch li yucuaꞌbej.