Números 3 - Li Santil hu

Li cꞌanjel tento teꞌxba̱nu eb laj levita

¹ Aꞌaneb aꞌin li ralal xcꞌajol laj Aarón ut laj Moisés saꞌ eb li cutan nak li Ka̱cuaꞌ quia̱tinac riqꞌuin laj Moisés saꞌ li tzu̱l Sinaí.

² Aꞌaneb aꞌin lix cꞌabaꞌeb li ralal xcꞌajol laj Aarón: laj Nadab li asbej, laj Abiú, laj Eleazar ut laj Itamar.

³ Aꞌaneb aꞌin lix cꞌabaꞌeb li ralal laj Aarón, li sicꞌbil ruheb chi cꞌanjelac chokꞌ aj tij. Quiqꞌueheꞌ li aceite saꞌ xjolomeb nak queꞌxakaba̱c chi cꞌanjelac chokꞌ aj tij.

⁴ Laj Nadab ut laj Abiú queꞌcam nak yo̱queb chi mayejac chiru li Ka̱cuaꞌ saꞌ li chaki chꞌochꞌ Sinaí. Queꞌcam xban nak incꞌaꞌ queꞌxba̱nu joꞌ quixye li Ka̱cuaꞌ. Ma̱cꞌaꞌeb ralal. Joꞌcan nak xjuneseb chic laj Eleazar ut laj Itamar queꞌcꞌanjelac chokꞌ aj tij nak toj yoꞌyo laj Aarón lix yucuaꞌeb.

⁵ Quia̱tinac li Ka̱cuaꞌ riqꞌuin laj Moisés ut quixye re:

⁶ —Cꞌameb chak laj levita ut ta̱xakabeb chixtenkꞌanquil laj Aarón.

⁷ Teꞌxba̱nu li cꞌaꞌru naxye laj Aarón ut teꞌcꞌanjelak chiruheb laj Israel nak teꞌxba̱nu li cꞌanjel saꞌ li tabernáculo.

⁸ Aꞌaneb li teꞌxocok reheb li cꞌaꞌak re ru li nacꞌanjelac saꞌ li tabernáculo. Teꞌcꞌanjelak chiruheb laj Israel nak teꞌxba̱nu li cꞌanjel li uxc naraj saꞌ li tabernáculo.

⁹ Ta̱kꞌaxtesiheb laj levita chi cꞌanjelac chiruheb laj Aarón ut eb li ralal xban nak aꞌaneb li sicꞌbil ruheb saꞌ xya̱nkeb laj Israel chi cꞌanjelac chiru saꞌ li tabernáculo.

¹⁰ Ta̱xakabeb laj Aarón ut eb li ralal chi cꞌanjelac chokꞌ aj tij. Ut li jalan teꞌnachꞌok riqꞌuin li tabernáculo teꞌca̱mk.—

¹¹ Ut quixye ajcuiꞌ li Ka̱cuaꞌ re laj Moisés:

¹² —La̱in xinsiqꞌueb ru laj levitas saꞌ xya̱nkeb laj Israel chokꞌ ru̱chil li xbe̱n ralaleb xban nak chixjunileb li xbe̱n alalbej cueheb la̱in.

¹³ Joꞌcan nak eb laj levitas cueheb la̱in, xban nak li xbe̱n li nayoꞌla cue la̱in chalen najter nak xinqꞌueheb chi camsi̱c li xbe̱n alalbej aran Egipto. Xinsiqꞌueb ru li xbe̱n alalbej ut cueheb la̱in. Usta cui̱nk, usta xul, cuehakeb la̱in li Ka̱cuaꞌ.—

¹⁴ Li Ka̱cuaꞌ quia̱tinac riqꞌuin laj Moisés saꞌ li chaki chꞌochꞌ Sinaí ut quixye re:

¹⁵ —Ta̱cuajlaheb li ralal xcꞌajol laj Leví chi chꞌu̱tal, aꞌ yal chanru xqꞌuial saꞌ li junju̱nk cabal. Ta̱cuajla chixjunileb li cuanqueb jun po re joꞌ eb ajcuiꞌ li numenakeb jun po.—

¹⁶ Ut laj Moisés quirajlaheb joꞌ quiyeheꞌ re xban li Ka̱cuaꞌ.

¹⁷ Aꞌaneb aꞌin li ralal laj Leví: laj Gersón, laj Coat, ut laj Merari.

¹⁸ Eb li ralal laj Gersón, aꞌaneb laj Libni ut laj Simei.

¹⁹ Eb li ralal laj Coat, aꞌaneb laj Amram, laj Izhar, laj Hebrón ut laj Uziel.

²⁰ Eb li ralal laj Merari, aꞌaneb laj Mahli ut laj Musi. Aꞌaneb li ralal xcꞌajol laj Leví aꞌ yal chanru xqꞌuial lix te̱paleb.

²¹ Laj Gersón, aꞌan lix xeꞌto̱nil yucuaꞌ li ralal xcꞌajol laj Libni ut eb li ralal xcꞌajol laj Simei.

²² Cuukub mil riqꞌuin o̱b ciento (7,500) chixjunileb li te̱lom li ac cuan jun po reheb, joꞌ eb ajcuiꞌ li numenakeb jun po.

²³ Eb li ralal xcꞌajol laj Gersón, aꞌaneb li teꞌxyi̱b lix muheba̱leb chirix li tabernáculo saꞌ li oeste.

²⁴ Laj Eliasaf, li ralal laj Lael, aꞌan li ta̱cꞌamok be chiruheb li ralal xcꞌajol laj Gersón.

²⁵ Eb li ralal xcꞌajol laj Gersón, aꞌaneb li teꞌilok re li tabernáculo ut li tzꞌu̱m li natzꞌapoc re, joꞌ ajcuiꞌ li tꞌicr li cuan saꞌ li oqueba̱l.

²⁶ Aꞌaneb ajcuiꞌ li teꞌilok re li tꞌicr li cuan saꞌ li neba̱l li cuan chi xjun sutam li tabernáculo ut teꞌilok re li artal, joꞌ ajcuiꞌ li tꞌicr li cuan saꞌ li oqueba̱l re li neba̱l, joꞌ eb ajcuiꞌ li cꞌa̱m ut chixjunil li cꞌaꞌak re ru li ta̱cꞌanjelak saꞌ li cꞌanjel aꞌan.

²⁷ Laj Coat, aꞌan lix xeꞌto̱nil yucuaꞌeb li ralal xcꞌajol laj Amram, laj Izhar, laj Hebrón ut laj Uziel.

²⁸ Cuakxakib mil riqꞌuin cuakib ciento (8,600) chixjunileb li cui̱nk. Cuanqueb saꞌ ajl chixjunileb li te̱lom usta tojaꞌ jun po cuan reheb.

²⁹ Eb li ralal xcꞌajol laj Coat, aꞌaneb li teꞌxyi̱b lix muheba̱leb chixcꞌatk li tabernáculo saꞌ li sur.

³⁰ Laj Elizafán, li ralal laj Uziel, aꞌan li ta̱takla̱nk saꞌ xbe̱neb li ralal xcꞌajol laj Coat.

³¹ Saꞌ xcue̱nteb aꞌan kꞌaxtesinbil li Lokꞌlaj Ca̱x, li me̱x, lix naꞌaj li candil, eb li artal, ut li cꞌaꞌak re ru li nacꞌanjelac saꞌ li tabernáculo, joꞌ ajcuiꞌ li nimla tꞌicr li naramoc re li Lokꞌlaj Santil Naꞌajej, ut chixjunil li nacꞌanjelac saꞌ li Santil Naꞌajej.

³² Laj Eleazar li ralal laj Aarón laj tij, aꞌan li najolomin reheb laj levitas li nequeꞌcꞌanjelac saꞌ li Santil Naꞌajej.

³³ Ut eb li ralal xcꞌajol laj Merari, aꞌaneb laj Mahlita ut laj Musita.

³⁴ Cuakib mil riqꞌuin cuib ciento (6,200) chixjunileb li cui̱nk. Cuanqueb saꞌ ajl chixjunileb li te̱lom usta tojaꞌ jun po cuan reheb.

³⁵ Eb li ralal xcꞌajol laj Merari, aꞌaneb li teꞌxyi̱b lix muheba̱leb chixcꞌatk li tabernáculo saꞌ li norte. Laj Zuriel li ralal laj Abihail, aꞌan li ta̱takla̱nk saꞌ xbe̱neb.

³⁶ Eb li ralal xcꞌajol laj Merari, aꞌaneb li teꞌilok reheb lix cheꞌel li tabernáculo, li okech, li cꞌochleba̱l ut chixjunil li cꞌaꞌak chic re ru li nacꞌanjelac re li tabernáculo.

³⁷ Aꞌaneb ajcuiꞌ li teꞌilok reheb li cheꞌ li nacꞌanjelac chixjun sutam li neba̱l, rochbeneb lix cꞌochleba̱l, joꞌ ajcuiꞌ lix cꞌa̱mal ut li cheꞌ li nachapoc re saꞌ chꞌochꞌ.

³⁸ Laj Moisés rochbeneb laj Aarón ut eb li ralal teꞌxyi̱b lix muheba̱leb chixcꞌatk li tabernáculo saꞌ li este chiru li oqueba̱l re li tabernáculo. Aꞌaneb li teꞌilok re li Santil Naꞌajej saꞌ xcꞌabaꞌeb laj Israel. Cui junak jalan ta̱xic cuan cuiꞌ li tabernáculo, li jun aꞌan ta̱camsi̱k.

³⁹ Cuib xcaꞌcꞌa̱l mil (22,000) chixjunileb li cui̱nk li queꞌajla̱c joꞌ quixye li Ka̱cuaꞌ re laj Moisés ut laj Aarón. Cuanqueb saꞌ ajl chixjunileb li te̱lom, usta tojaꞌ jun po cuan reheb.

⁴⁰ Li Ka̱cuaꞌ quixye re laj Moisés: —Ta̱cuajlaheb chixjunileb li xbe̱n ralaleb laj Israel li cuan jun po reheb joꞌ eb ajcuiꞌ li ac numenakeb jun po ut ta̱tzꞌi̱ba lix cꞌabaꞌeb.

⁴¹ Ta̱kꞌaxtesiheb chokꞌ cue eb laj levitas chokꞌ ru̱chil li xbe̱n ralaleb laj Israel. Ut ta̱kꞌaxtesiheb ajcuiꞌ chokꞌ cue lix queto̱mkeb laj levita chokꞌ ru̱chil li xbe̱n ral lix queto̱mkeb laj Israel. La̱in li Ka̱cuaꞌ, chan.

⁴² Ut laj Moisés quirajla chixjunileb li xbe̱n ralaleb laj Israel joꞌ quiyeheꞌ re xban li Ka̱cuaꞌ.

⁴³ Cuib xcaꞌcꞌa̱l mil riqꞌuin cuib ciento riqꞌuin oxlaju xca̱cꞌa̱l (22,273) chixjunileb li te̱lom aj Israel li ac queꞌxba̱nu jun po li ac tzꞌi̱banbil xcꞌabaꞌeb.

⁴⁴ Li Ka̱cuaꞌ quixye re laj Moisés:

⁴⁵ —Ta̱kꞌaxtesiheb chokꞌ cue eb laj levita chokꞌ ru̱chileb li xbe̱n ralaleb laj Israel. Ut ta̱kꞌaxtesiheb ajcuiꞌ chokꞌ cue lix queto̱mkeb laj levita chokꞌ ru̱chil lix queto̱mkeb laj Israel. Eb laj levita cueheb la̱in li Ka̱cuaꞌ.

⁴⁶ Eb li xbe̱n ralaleb laj Israel kꞌaxal nabaleb chiruheb laj levita. Cuib ciento riqꞌuin oxlaju xca̱cꞌa̱l (273) nequeꞌxkꞌax eb laj levita. Tento nak teꞌxtoj rixeb aꞌan.

⁴⁷ Joꞌcan nak ta̱tojekꞌ o̱b chi tumin plata joꞌ li bisleb li cuan saꞌ li tabernáculo re̱kaj li junju̱nk xcomoneb li cuib ciento riqꞌuin oxlaju xca̱cꞌa̱l.

⁴⁸ Ta̱qꞌue li tumin aꞌan re laj Aarón ut reheb li ralal re xtojbal rixeb laj Israel li joꞌ qꞌuial chic xeꞌnumeꞌ saꞌ xbe̱neb laj levita, chan.

⁴⁹ Ut laj Moisés quixmol li tumin riqꞌuineb laj Israel re xtojbal rixeb li xbe̱n ralaleb laj Israel li joꞌ qꞌuial xeꞌnumeꞌ saꞌ xbe̱neb laj levita.

⁵⁰ Quixcꞌul riqꞌuineb laj Israel jun mil riqꞌuin oxib ciento riqꞌuin o̱b xca̱cꞌa̱l (1,365) chi tumin plata joꞌ li bisleb li cuan saꞌ li tabernáculo.

⁵¹ Ut laj Moisés quixqꞌue li tumin re laj Aarón ut reheb li ralal joꞌ quiyeheꞌ re xban li Ka̱cuaꞌ.