Números 29 - Li Santil hu

Li ninkꞌe nak nequeꞌxya̱basi li trompeta

¹ Saꞌ li xbe̱n cutan re li xcuuk po teꞌxchꞌutub ribeb re xqꞌuebal inlokꞌal la̱in li Ka̱cuaꞌ. Ut ma̱ jun li cꞌanjel teꞌxba̱nu. Saꞌ li cutan aꞌan teꞌxya̱basiheb li trompeta.

² Chokꞌ re lix cꞌatbil mayejeb teꞌxqꞌue jun li toro toj sa̱j, jun li te̱lom carner, ut cuukub li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue. Ut aꞌanak jun li sununquil cꞌatbil mayej ta̱cuulak chicuu la̱in li Ka̱cuaꞌ.

³ Rochbeneb li junju̱nk chi xul teꞌxqꞌue li cha̱bil cꞌaj yokꞌinbil riqꞌuin aceite. Teꞌxmayeja numenak oxlaju libra li cha̱bil cꞌaj rochben li toro, ut caꞌchꞌin ma̱ bele̱b libra li cha̱bil cꞌaj rochben li te̱lom carner.

⁴ Ut rochben li junju̱nk chi carner toj sa̱j teꞌxqꞌue numenak ca̱hib libra li cha̱bil cꞌaj yokꞌinbil riqꞌuin aceite.

⁵ Ut teꞌxqꞌue chokꞌ xmayejeb jun li te̱lom chiba̱t re xtzꞌa̱manquil xcuybal xma̱queb.

⁶ Teꞌxqꞌue li mayej aꞌin ut teꞌxqꞌue ajcuiꞌ li mayej li teꞌxcꞌat rajlal po ut rajlal cutan rochbeneb li mayej cꞌaj ut li mayej vino. Aꞌanak li sununquil cꞌatbil mayej ta̱cuulak chicuu la̱in li Ka̱cuaꞌ.

Li mayej re xtojbal rix lix ma̱queb

⁷ Saꞌ li laje̱b xbe li xcuuk po teꞌxchꞌutub ribeb chixqꞌuebal inlokꞌal la̱in li Ka̱cuaꞌ. Teꞌxba̱nu lix ayu̱n ut ma̱ jun li cꞌanjel teꞌxba̱nu.

⁸ Chokꞌ re lix cꞌatbil mayejeb teꞌxqꞌue jun li toro toj sa̱j, jun li te̱lom carner, ut cuukub li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue. Ut aꞌanak jun li sununquil cꞌatbil mayej ta̱cuulak chicuu la̱in li Ka̱cuaꞌ.

⁹ Rochbeneb li junju̱nk chi xul teꞌxqꞌue li cha̱bil cꞌaj yokꞌinbil riqꞌuin li aceite. Teꞌxmayeja numenak oxlaju libra li cha̱bil cꞌaj rochben li toro, ut caꞌchꞌin ma̱ bele̱b libra li cha̱bil cꞌaj rochben li te̱lom carner.

¹⁰ Ut rochben li junju̱nk chi carner toj sa̱j teꞌxqꞌue numenak ca̱hib libra li cha̱bil cꞌaj yokꞌinbil riqꞌuin aceite.

¹¹ Teꞌxqꞌue ajcuiꞌ chokꞌ xcꞌatbil mayejeb jun li te̱lom chiba̱t re xtojbal rix lix ma̱queb. Teꞌxqꞌue ajcuiꞌ li mayej re xtzꞌa̱manquil xcuybal li ma̱c ut li cꞌatbil mayej li teꞌxqꞌue rajlal rochben lix mayej cꞌaj ut lix mayej vino.

Li ninkꞌe nak nequeꞌxyi̱b li cocꞌ muheba̱l riqꞌuin rukꞌ cheꞌ

¹² Saꞌ li oꞌlaju xbe lix cuuk po teꞌxchꞌutub cuiꞌchic ribeb re xqꞌuebal inlokꞌal la̱in li Ka̱cuaꞌ. Ut ma̱ jun li cꞌanjel teꞌxba̱nu. Chiru cuukub cutan yo̱keb chi ninkꞌei̱k.

¹³ Teꞌxqꞌue chokꞌ xcꞌatbil mayej oxlaju li toro toj sa̱jeb, cuib li te̱lom carner, ut ca̱laju li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue. Ut aꞌanak jun li sununquil cꞌatbil mayej ta̱cuulak chicuu la̱in li Ka̱cuaꞌ.

¹⁴ Rochbeneb li junju̱nk chi toro li toj sa̱jeb teꞌxqꞌue cuakib libra li mayej cꞌaj yokꞌinbil riqꞌuin aceite. Ut rochben li te̱lom carner teꞌxqꞌue ca̱hib libra li cꞌaj yokꞌinbil riqꞌuin aceite.

¹⁵ Ut teꞌxqꞌue cuib libra li cꞌaj rochbeneb li junju̱nk chi te̱lom carner li toj sa̱jeb.

¹⁶ Teꞌxqꞌue chokꞌ mayej jun li te̱lom chiba̱t re xtzꞌa̱manquil xcuybal li ma̱c. Ut teꞌxqꞌue ajcuiꞌ li cꞌatbil mayej li nequeꞌxqꞌue rajlal rochben li mayej cꞌaj ut li mayej vino.

¹⁷ Saꞌ li xcab li cutan teꞌxqꞌue chokꞌ mayej cablaju li toro toj sa̱jeb, cuib li te̱lom carner ut ca̱laju li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue.

¹⁸ Rochbeneb li toro, li te̱lom carner ut li te̱lom carner li ju̱nk chihab cua̱nk reheb, teꞌxqꞌue ajcuiꞌ li mayej cꞌaj ut li mayej vino aꞌ yal jarubeb li xul li teꞌxmayeja joꞌ naxye saꞌ li chakꞌrab.

¹⁹ Teꞌxqꞌue chokꞌ mayej jun li te̱lom chiba̱t re xtzꞌa̱manquil xcuybal li ma̱c. Ut teꞌxqꞌue ajcuiꞌ li cꞌatbil mayej li nequeꞌxqꞌue rajlal rochben li mayej cꞌaj ut li mayej vino.

²⁰ Saꞌ li rox li cutan teꞌxqꞌue chokꞌ cꞌatbil mayej junlaju li toro, cuib li te̱lom carner ut ca̱laju li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue.

²¹ Rochbeneb li toro, li te̱lom carner ut li carner ju̱nk chihab cuan reheb, teꞌxqꞌue li mayej cꞌaj ut li mayej vino aꞌ yal jarubeb li xul li teꞌxmayeja joꞌ naxye saꞌ li chakꞌrab.

²² Teꞌxqꞌue ajcuiꞌ chokꞌ mayej jun li te̱lom chiba̱t re xtzꞌa̱manquil xcuybal li ma̱c. Teꞌxqꞌue ajcuiꞌ li cꞌatbil mayej li nequeꞌxqꞌue rajlal rochben li mayej cꞌaj ut li mayej vino.

²³ Saꞌ li xca̱ li cutan teꞌxqꞌue chokꞌ cꞌatbil mayej laje̱b li toro, cuib li te̱lom chiba̱t, ut ca̱laju li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue.

²⁴ Rochbeneb li toro, li te̱lom carner ut li te̱lom carner li ju̱nk chihab cua̱nk reheb, teꞌxqꞌue li mayej cꞌaj ut li mayej vino aꞌ yal jarub li xul li teꞌxmayeja joꞌ naxye saꞌ li chakꞌrab.

²⁵ Teꞌxqꞌue ajcuiꞌ chokꞌ mayej jun li te̱lom chiba̱t re xtzꞌa̱manquil xcuybal li ma̱c. Teꞌxqꞌue ajcuiꞌ li cꞌatbil mayej li nequeꞌxqꞌue rajlal rochben li mayej cꞌaj ut li mayej vino.

²⁶ Saꞌ li roꞌ li cutan teꞌxqꞌue chokꞌ cꞌatbil mayej bele̱b li toro, cuib li te̱lom carner ut ca̱laju li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue.

²⁷ Rochbeneb li toro, li te̱lom carner ut li te̱lom carner ju̱nk chihab cua̱nk reheb, teꞌxqꞌue li mayej cꞌaj ut li mayej vino aꞌ yal jarub li xul li teꞌxmayeja joꞌ naxye saꞌ li chakꞌrab.

²⁸ Ut teꞌxqꞌue ajcuiꞌ chokꞌ mayej jun li te̱lom chiba̱t re xtzꞌa̱manquil xcuybal li ma̱c. Teꞌxqꞌue ajcuiꞌ li cꞌatbil mayej li nequeꞌxqꞌue rajlal rochben li mayej cꞌaj ut li mayej vino.

²⁹ Saꞌ li xcuak li cutan teꞌxqꞌue chokꞌ cꞌatbil mayej cuakxakib li toro, cuib li te̱lom carner ut ca̱laju li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue.

³⁰ Rochbeneb li toro, li te̱lom carner, ut li te̱lom carner ju̱nk chihab cua̱nk reheb teꞌxqꞌue li mayej cꞌaj ut li mayej vino, aꞌ yal jarub li xul li teꞌxmayeja joꞌ naxye saꞌ li chakꞌrab.

³¹ Teꞌxqꞌue ajcuiꞌ chokꞌ mayej jun li te̱lom chiba̱t re xtzꞌa̱manquil xcuybal li ma̱c. Ut teꞌxqꞌue ajcuiꞌ li cꞌatbil mayej li nequeꞌxqꞌue rajlal rochben li mayej cꞌaj ut li mayej vino.

³² Saꞌ li xcuuk li cutan teꞌxqꞌue chokꞌ cꞌatbil mayej cuukub li toro, cuib li te̱lom carner, ut ca̱laju li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue.

³³ Rochbeneb li toro, li te̱lom carner ut li te̱lom carner ju̱nk chihab cua̱nk reheb teꞌxqꞌue li mayej cꞌaj ut li mayej vino aꞌ yal jarub li xul li teꞌxmayeja joꞌ naxye saꞌ li chakꞌrab.

³⁴ Teꞌxqꞌue ajcuiꞌ chokꞌ mayej jun li te̱lom chiba̱t re xtzꞌa̱manquil xcuybal li ma̱c. Ut teꞌxqꞌue ajcuiꞌ li cꞌatbil mayej li nequeꞌxqꞌue rajlal rochben li mayej cꞌaj ut li mayej vino.

³⁵ Saꞌ li xcuakxak li cutan teꞌxchꞌutub cuiꞌchic ribeb re inlokꞌoninquil la̱in li Ka̱cuaꞌ. Ut ma̱ jun li cꞌanjel teꞌxba̱nu.

³⁶ Teꞌxqꞌue chokꞌ lix cꞌatbil mayej jun li toro, jun li te̱lom carner, ut cuukub li te̱lom carner ju̱nk chihab cua̱nk reheb. Ma̱cꞌaꞌak re̱qꞌueb li xul li teꞌxqꞌue. Ut aꞌanak jun li sununquil cꞌatbil mayej ta̱cuulak chicuu la̱in li Ka̱cuaꞌ.

³⁷ Rochben li toro, ut li te̱lom carner ut li cuukub chi te̱lom carner ju̱nk chihab cua̱nk reheb teꞌxqꞌue lix mayej cꞌaj ut li mayej vino, aꞌ yal jarub li xul li teꞌxmayeja joꞌ naxye saꞌ li chakꞌrab.

³⁸ Teꞌxqꞌue ajcuiꞌ chokꞌ mayej jun li te̱lom chiba̱t re xtzꞌa̱manquil xcuybal li ma̱c. Ut teꞌxqꞌue ajcuiꞌ li cꞌatbil mayej li nequeꞌxqꞌue rajlal rochben li mayej cꞌaj ut li mayej vino.

³⁹ Aꞌaneb aꞌin li mayej li teꞌxqꞌue re xlokꞌoninquil li Ka̱cuaꞌ nak teꞌninkꞌei̱k. Teꞌxqꞌue li mayej li na-ala saꞌ xchꞌo̱leb xqꞌuebal joꞌ ajcuiꞌ li mayej li nequeꞌxqꞌue nak nequeꞌxyechiꞌi li cꞌaꞌak re ru re li Ka̱cuaꞌ, ut li cꞌatbil mayej ut li mayej cꞌaj ut li mayej vino joꞌ eb ajcuiꞌ li mayej re xcꞌambal ribeb saꞌ usilal riqꞌuin li Ka̱cuaꞌ.

⁴⁰ Ut laj Moisés quixye reheb laj Israel chixjunil joꞌ quiyeheꞌ re xban li Ka̱cuaꞌ.