Números 28 - Li Santil hu

Li mayej li nequeꞌxqꞌue rajlal cutan

¹ Li Ka̱cuaꞌ quia̱tinac riqꞌuin laj Moisés ut quixye re:

² —Ta̱ye reheb laj Israel nak junelic teꞌxqꞌue li cꞌatbil mayej ut li mayej caxlan cua saꞌ xkꞌehil. Aꞌan li sununquil cꞌatbil mayej li nacuulac chicuu la̱in li Ka̱cuaꞌ.

³ Aꞌan aꞌin li cꞌatbil mayej li teꞌxqꞌue cue la̱in li Ka̱cuaꞌ. Rajlal cutan teꞌxmayeja saꞌ li artal cuib li carner te̱lom jun chihab cua̱nk reheb ut ma̱cꞌaꞌak re̱qꞌueb.

⁴ Jun li carner teꞌxmayeja ekꞌela ut li jun chic teꞌxmayeja ecuu.

⁵ Teꞌxmayeja rochben li carner numenak cuakxakib libra li cha̱bil cꞌaj yokꞌinbil riqꞌuin jun litro li aceite olivo.

⁶ Aꞌan aꞌin li mayej li ta̱cꞌatma̱nk junelic joꞌ quinye chak saꞌ li tzu̱l Sinaí. Aꞌan li sununquil cꞌatbil mayej nacuulac chicuu la̱in li Ka̱cuaꞌ.

⁷ Teꞌxmayeja jun litro li vino rochben li junju̱nk chi carner. Teꞌxhoy li vino saꞌ li artal li cuan saꞌ li tabernáculo re xqꞌuebal lin lokꞌal.

⁸ Ut li carner li teꞌxmayeja ecuu, teꞌxmayeja rochben li cꞌaj ut li vino joꞌ teꞌxba̱nu re li mayej ekꞌela. Aꞌanak jun sununquil cꞌatbil mayej ta̱cuulak chicuu la̱in li Ka̱cuaꞌ.

Li mayej re li hiloba̱l cutan

⁹ Ut li mayej li teꞌxqꞌue saꞌ li hiloba̱l cutan, aꞌan cuib li carner jun chihab cua̱nk reheb ut ma̱cꞌaꞌak re̱qꞌueb. Teꞌxqꞌue ajcuiꞌ caꞌchꞌin ma̱ bele̱b libra li cꞌaj yokꞌinbil riqꞌuin aceite. Ut teꞌxqꞌue ajcuiꞌ li vino rochben.

¹⁰ Aꞌanak jun li cꞌatbil mayej ta̱qꞌuema̱nk saꞌ li hiloba̱l cutan. Ut teꞌxqꞌue ajcuiꞌ li mayej li teꞌxqꞌue rajlal cutan rochben li mayej vino.

Li mayej li naqꞌueman saꞌ li xbe̱n cutan re li po

¹¹ Saꞌ li xbe̱n cutan re li po teꞌxqꞌue li cꞌatbil mayej. Teꞌxqꞌue cuib li toro toj sa̱jeb, jun li te̱lom carner, ut cuukub li te̱lom carner jun chihab cua̱nk reheb ut ma̱cꞌaꞌak re̱qꞌueb chixjunileb.

¹² Rochbeneb li junju̱nk chi toro teꞌxqꞌue numenak oxlaju libra li cha̱bil cꞌaj yokꞌinbil riqꞌuin aceite. Rochbeneb li junju̱nk chi carner teꞌxqꞌue caꞌchꞌin ma̱ bele̱b libra li cha̱bil cꞌaj yokꞌinbil riqꞌuin aceite.

¹³ Ut rochbeneb li junju̱nk chi carner toj sa̱j teꞌxqꞌue numenak ca̱hib libra li cha̱bil cꞌaj yokꞌinbil riqꞌuin aceite. Aꞌanak jun li sununquil cꞌatbil mayej li teꞌxcꞌat chicuu.

¹⁴ Rochben li junju̱nk chi toro teꞌxqꞌue cuib litro li vino re li mayej vino. Teꞌxqꞌue jun litro riqꞌuin mero litro li vino rochben li junju̱nk chi carner ut teꞌxqꞌue jun litro rochben li junju̱nk chi carner toj sa̱j. Aꞌaneb aꞌin li cꞌatbil mayej li teꞌxqꞌue rajlal po chiru li jun chihab.

¹⁵ Ut teꞌxqꞌue ajcuiꞌ jun li chiba̱t rochben li cꞌatbil mayej li nequeꞌxqꞌue rajlal cutan. Li chiba̱t aꞌan ta̱cꞌatma̱nk re xtzꞌa̱manquil xcuybal li ma̱c.

Li mayej li nequeꞌxqꞌue saꞌ li Pascua

¹⁶ Saꞌ li ca̱laju xbe li xbe̱n po teꞌxninkꞌei li Pascua re xlokꞌoninquil li Ka̱cuaꞌ.

¹⁷ Saꞌ li oꞌlaju xbe li po aꞌin teꞌxba̱nu jun chic li ninkꞌe. Chiru cuukub cutan teꞌxcuaꞌ li caxlan cua li ma̱cꞌaꞌ xchꞌamal.

¹⁸ Saꞌ li xbe̱n li cutan teꞌxchꞌutub ribeb re teꞌlokꞌoni̱nk ut ma̱ jun li cꞌanjel teꞌxba̱nu.

¹⁹ Teꞌxqꞌue chokꞌ xmayejeb chicuu la̱in li Ka̱cuaꞌ cuib li toro toj sa̱jeb, jun li te̱lom carner, ut cuukub li te̱lom carner jun chihab cua̱nk reheb. Ut ma̱cꞌaꞌak re̱qꞌueb.

²⁰ Rochben li mayej toro teꞌxmayeja numenak oxlaju libra li cꞌaj yokꞌinbil riqꞌuin aceite. Ut rochben li carner teꞌxmayeja caꞌchꞌin ma̱ bele̱b libra li cꞌaj yokꞌinbil riqꞌuin aceite.

²¹ Ut rochbeneb li junju̱nk chi carner toj sa̱j teꞌxmayeja numenak ca̱hib libra li cꞌaj yokꞌinbil riqꞌuin aceite.

²² Ut teꞌxqꞌue ajcuiꞌ chokꞌ xmayejeb jun li te̱lom chiba̱t re xtojbal rix li ma̱c.

²³ Teꞌxqꞌue eb li cꞌatbil mayej aꞌin ut teꞌxqꞌue ajcuiꞌ li cꞌatbil mayej li teꞌxqꞌue rajlal cutan.

²⁴ Chiru cuukub cutan teꞌxqꞌue li mayej aꞌin ut aꞌanak jun li sununquil cꞌatbil mayej ta̱cuulak chicuu la̱in li Ka̱cuaꞌ. Ut teꞌxqꞌue ajcuiꞌ li cꞌatbil mayej li teꞌxqꞌue rajlal ut li mayej vino.

²⁵ Saꞌ li xcuuk li cutan teꞌxchꞌutub ribeb re xqꞌuebal inlokꞌal la̱in li Ka̱cuaꞌ ut ma̱ jun li cꞌanjel teꞌxba̱nu.

Li mayej re li xbe̱n ru li racui̱mkeb

²⁶ Ut saꞌ li cutan nak teꞌxmayeja li xbe̱n ru li racui̱mkeb chicuu teꞌxchꞌutub ribeb re xqꞌuebal inlokꞌal la̱in li Ka̱cuaꞌ ut ma̱ jun li cꞌanjel teꞌxba̱nu.

²⁷ Teꞌxqꞌue chokꞌ xcꞌatbil mayejeb cuib li toro toj sa̱jeb, jun li te̱lom carner ut cuukub li te̱lom carner jun chihab cua̱nk reheb. Ut nak teꞌxcꞌat, aꞌanak jun li sununquil cꞌatbil mayej ta̱cuulak chicuu la̱in li Ka̱cuaꞌ.

²⁸ Rochben li junju̱nk chi toro teꞌxqꞌue chokꞌ xmayejeb numenak oxlaju libras li cꞌaj yokꞌinbil riqꞌuin aceite. Rochben li te̱lom carner teꞌxqꞌue caꞌchꞌin ma̱ bele̱b libra li cꞌaj yokꞌinbil riqꞌuin aceite.

²⁹ Ut rochbeneb li junju̱nk chi carner toj sa̱jeb teꞌxqꞌue numenak ca̱hib libra li cha̱bil cꞌaj yokꞌinbil riqꞌuin aceite.

³⁰ Ut teꞌxqꞌue ajcuiꞌ jun li te̱lom chiba̱t re lix cꞌatbil mayejeb re xtojbal rix lix ma̱queb.

³¹ Teꞌxqꞌueheb li mayej aꞌin ut teꞌxqꞌue ajcuiꞌ li mayej vino joꞌ eb ajcuiꞌ li cꞌatbil mayej li teꞌxqꞌue rajlal. Ma̱cꞌaꞌak re̱qꞌueb li xul li teꞌxmayeja.