Números 27 - Li Santil hu

¹ Saꞌ xya̱nkeb lix te̱pal li ralal xcꞌajol laj Manasés cuanqueb o̱b li ixk ri̱tzꞌineb rib. Eb li o̱b chi ixk aꞌin, aꞌaneb lix rabin laj Zelofehad. Aꞌaneb aꞌin lix cꞌabaꞌeb: lix Maala, lix Noa, lix Hogla, lix Milca ut lix Tirsa. Laj Zelofehad, aꞌan li ralal laj Hefer. Ut laj Hefer, aꞌan li ralal laj Galaad. Ut laj Galaad, aꞌan li ralal laj Maquir. Laj Maquir, aꞌan li ralal laj Manasés. Ut laj Manasés, aꞌan li ralal laj José.

² Eb li o̱b chi ixk, li ri̱tzꞌineb rib, queꞌcuulac chiru li oqueba̱l re li tabernáculo ut queꞌxakli chiru laj Moisés, laj Eleazar laj tij, ut chiruheb li nequeꞌcꞌamoc be ut chiruheb ajcuiꞌ li chꞌutchꞌu̱queb aran ut queꞌxye reheb:

³ —Li kayucuaꞌ quicam saꞌ li chaki chꞌochꞌ. Aꞌan ma̱cuaꞌ jun saꞌ xya̱nkeb li queꞌoquen chirix laj Coré li queꞌxkꞌetkꞌeti ribeb chiru li Ka̱cuaꞌ. Li kayucuaꞌ quicam ban xban li ma̱c li quixba̱nu aꞌan. Ma̱ jun li ralal.

⁴ ¿Cꞌaꞌut nak ta̱sachekꞌ xcꞌabaꞌ li kayucuaꞌ yal xban nak ma̱ jun li ralal quicuan? Ta̱qꞌue li kachꞌochꞌ saꞌ xya̱nkeb li rechꞌalal li kayucuaꞌ, chanqueb.

⁵ Ut laj Moisés quixpatzꞌ re li Dios cꞌaꞌru tixba̱nu.

⁶ Li Ka̱cuaꞌ quixsume laj Moisés ut quixye re:

⁷ —Ya̱l li yo̱queb chixyebal lix rabin laj Zelofehad. Ta̱qꞌue lix chꞌochꞌeb saꞌ xya̱nkeb li rechꞌalal lix yucuaꞌ. Qꞌue li chꞌochꞌ reheb li xcꞌul raj lix yucuaꞌeb.

⁸ Ut ta̱ye ajcuiꞌ reheb laj Israel nak cui junak cui̱nk ta̱ca̱mk ut ma̱ jun li ralal cuan, li chꞌochꞌ li quixcꞌul ta̱cana̱k chokꞌ re lix rabin.

⁹ Ut cui ma̱ jun lix rabin cuan, li chꞌochꞌ aꞌan ta̱cana̱k chokꞌ reheb li ras ut li ri̱tzꞌin.

¹⁰ Cui ma̱ jun li ras malaj ut li ri̱tzꞌin, li chꞌochꞌ aꞌan ta̱cana̱k chokꞌ reheb li ras ut li ri̱tzꞌin li yucuaꞌbej.

¹¹ Ut cui ma̱ jun li ras ut ma̱ jun li ri̱tzꞌin lix yucuaꞌ, li chꞌochꞌ aꞌan ta̱cana̱k chokꞌ re li rechꞌalal. Aꞌin jun li chakꞌrab tento teꞌxba̱nu junelic eb laj Israel joꞌ quinye re laj Moisés. La̱in li Ka̱cuaꞌ, chan.

Laj Josué quixakaba̱c chi cꞌanjelac chokꞌ re̱kaj laj Moisés

¹² Ut li Ka̱cuaꞌ quixye re laj Moisés: —Tattakekꞌ saꞌ xbe̱n li tzu̱l Abarim ut ta̱cuil li naꞌajej li xinqꞌue reheb li ralal xcꞌajol laj Israel.

¹³ Nak acak xacuil li naꞌajej la̱at tatca̱mk ut toxa̱tauheb la̱ xeꞌto̱nil yucuaꞌ, joꞌ nak quicam laj Aarón la̱ cuas.

¹⁴ Tatca̱mk xban nak saꞌ cuibal quekꞌet lin chakꞌrab saꞌ li chaki chꞌochꞌ Zin nak eb laj Israel quineꞌxcuechꞌi. La̱at incꞌaꞌ xaqꞌue inlokꞌal chiruheb li tenamit nak xinqꞌue li haꞌ reheb, chan. (Aꞌan quicꞌulman nak li haꞌ qui-el saꞌ li sako̱nac saꞌ li naꞌajej Cades li cuan saꞌ li chaki chꞌochꞌ Zin.)

¹⁵ Laj Moisés quixye re li Ka̱cuaꞌ:

¹⁶ —At Ka̱cuaꞌ, la̱at li nacatqꞌuehoc ke li kayuꞌam. Nintzꞌa̱ma cha̱cuu nak ta̱xakab junak li cui̱nk chi cꞌamoc be chiruheb li tenamit aꞌin.

¹⁷ Li cui̱nk aꞌan ta̱xic chi ubej chi cꞌamoc be chiruheb nak teꞌxic yalak bar. Incꞌaꞌ taxak teꞌcana̱k la̱ tenamit joꞌ eb li carner li ma̱cꞌaꞌ aj ilol reheb, chan laj Moisés.

¹⁸ Ut li Ka̱cuaꞌ quixye re laj Moisés: —Laj Josué li ralal laj Nun, aꞌan cuan lin musikꞌ riqꞌuin. Ta̱qꞌue la̱ cuukꞌ saꞌ xjolom ut ta̱xakab chi cꞌamoc be chiruheb li tenamit.

¹⁹ Ta̱cꞌam riqꞌuin laj Eleazar laj tij, ut ta̱xakab chiru ut chiruheb ajcuiꞌ chixjunileb laj Israel. Ut la̱at ta̱qꞌue li cꞌanjel saꞌ xbe̱n.

²⁰ La̱at ta̱qꞌue xcuanquil chiruheb li tenamit re nak eb aꞌan teꞌxba̱nu li cꞌaꞌru tixye.

²¹ Laj Josué ta̱xic riqꞌuin laj Eleazar laj tij ut tixpatzꞌ re cꞌaꞌru tixba̱nu. Ut laj Eleazar tixsicꞌ li cꞌaꞌru nacuaj riqꞌuin li Urim. Laj Josué, aꞌan li ta̱takla̱nk saꞌ xbe̱neb laj Israel riqꞌuin chixjunil li cꞌaꞌru teꞌxba̱nu, chan li Ka̱cuaꞌ.

²² Laj Moisés quixba̱nu li cꞌaꞌru quixye li Ka̱cuaꞌ. Quixcꞌam laj Josué ut quixxakab chiru laj Eleazar ut chiruheb chixjunileb laj Israel.

²³ Quixqꞌue li rukꞌ saꞌ xjolom laj Josué ut quixxakab saꞌ xcꞌanjel joꞌ quiyeheꞌ re xban li Ka̱cuaꞌ.