Números 26 - Li Santil hu

Eb laj Israel queꞌajla̱c xcaꞌ sut

¹ Nak ac xeꞌcam nabaleb laj Israel xban li caki yajel, li Ka̱cuaꞌ Dios quixye reheb laj Moisés ut laj Eleazar li ralal laj Aarón laj tij:

² —Te̱rajlaheb chixjunileb li ralal xcꞌajol laj Israel saꞌ li junju̱nk cabal li ac xeꞌxba̱nu junmay chihab, joꞌ eb ajcuiꞌ li ac numenak junmay chihab, li ta̱ru̱k teꞌoc chokꞌ soldado, chan.

³ Laj Moisés ut laj Eleazar laj tij queꞌa̱tinac riqꞌuineb laj Israel saꞌ li cꞌaleba̱l re Moab, li cuan nachꞌ riqꞌuin li nimaꞌ Jordán. Li naꞌajej aꞌan cuan saꞌ xcaꞌyaba̱l li tenamit Jericó. Ut queꞌxye reheb:

⁴ —Te̱rajlaheb chixjunileb li cui̱nk li ac xeꞌxba̱nu junmay chihab, joꞌ eb ajcuiꞌ li numenak junmay chihab joꞌ quixye li Dios re laj Moisés, chanqueb. Li teꞌajla̱k, aꞌaneb li queꞌisi̱c chak Egipto.

⁵ Aꞌaneb aꞌin li ralal xcꞌajol laj Rubén, li xbe̱n ralal laj Israel: eb li ralal xcꞌajol laj Enoc; eb li ralal xcꞌajol laj Falú;

⁶ eb li ralal xcꞌajol laj Hezrón; ut eb li ralal xcꞌajol laj Carmi.

⁷ Aꞌaneb aꞌin li ralal xcꞌajol laj Rubén. Oxib roxcꞌa̱l mil riqꞌuin cuukub ciento riqꞌuin laje̱b xcaꞌcꞌa̱l (43,730) chixjunileb.

⁸ Li ralal laj Falú, aꞌan laj Eliab.

⁹ Eb li ralal laj Eliab, aꞌaneb laj Nemuel, laj Datán, ut laj Abiram. Laj Datán ut laj Abiram, aꞌaneb li queꞌqꞌuehoc xnaꞌlebeb laj Israel. Queꞌxkꞌetkꞌeti ribeb chiruheb laj Moisés ut laj Aarón rochbeneb laj Coré ut eb li queꞌoquen chirix nak queꞌxcuechꞌi rix li Ka̱cuaꞌ.

¹⁰ Li chꞌochꞌ quijacheꞌ ut queꞌtꞌaneꞌ chi saꞌ laj Coré ut eb li queꞌoquen chirix. Cuib ciento riqꞌuin laje̱b roxcꞌa̱l queꞌsacheꞌ ru saꞌ li xam. Li cꞌaꞌru queꞌxcꞌul eb aꞌan, aꞌan quicꞌanjelac re teꞌoc xcꞌaꞌuxeb laj Israel.

¹¹ Abanan incꞌaꞌ queꞌosoꞌ chi junaj cua eb li ralal xcꞌajol laj Coré.

¹² Aꞌaneb aꞌin li ralal xcꞌajol laj Simeón: eb li ralal xcꞌajol laj Nemuel; eb li ralal xcꞌajol laj Jamín; eb li ralal xcꞌajol laj Jaquín;

¹³ eb li ralal xcꞌajol laj Zera; ut eb li ralal xcꞌajol laj Saúl.

¹⁴ Aꞌaneb aꞌin li ralal xcꞌajol laj Simeón. Cuib xcaꞌcꞌa̱l mil riqꞌuin cuib ciento (22,200) chixjunileb.

¹⁵ Aꞌaneb aꞌin li ralal xcꞌajol laj Gad: eb li ralal xcꞌajol laj Zefón; eb li ralal xcꞌajol laj Hagui; eb li ralal xcꞌajol laj Suni;

¹⁶ eb li ralal xcꞌajol laj Ozni; eb li ralal xcꞌajol laj Eri;

¹⁷ eb li ralal xcꞌajol laj Arod; ut eb li ralal xcꞌajol laj Areli.

¹⁸ Aꞌaneb aꞌin li ralal xcꞌajol laj Gad. Caꞌcꞌa̱l mil riqꞌuin o̱b ciento (40,500) chixjunileb.

¹⁹ Laj Er ut laj Onán, aꞌaneb li ralal xcꞌajol laj Judá li queꞌcam saꞌ li naꞌajej Canaán.

²⁰ Eb li ralal xcꞌajol laj Judá, aꞌaneb aꞌin: eb li ralal xcꞌajol laj Sela; eb li ralal xcꞌajol laj Fares; ut eb li ralal xcꞌajol laj Zera.

²¹ Aꞌaneb aꞌin li ralal xcꞌajol laj Fares: eb li ralal xcꞌajol laj Hezrón ut eb li ralal xcꞌajol laj Hamul.

²² Aꞌaneb li ralal xcꞌajol laj Judá. Cuaklaju xca̱cꞌa̱l mil riqꞌuin o̱b ciento (76,500) chixjunileb.

²³ Aꞌaneb aꞌin li ralal xcꞌajol laj Isacar: eb li ralal xcꞌajol laj Tola; eb li ralal xcꞌajol laj Fúa;

²⁴ eb li ralal xcꞌajol laj Jasub; ut eb li ralal xcꞌajol laj Simrón.

²⁵ Aꞌaneb aꞌin li ralal xcꞌajol laj Isacar. Ca̱hib xca̱cꞌa̱l mil riqꞌuin oxib ciento (64,300) chixjunileb.

²⁶ Aꞌaneb aꞌin li ralal xcꞌajol laj Zabulón: eb li ralal xcꞌajol laj Sered; eb li ralal xcꞌajol laj Elón; ut eb li ralal xcꞌajol laj Jahleel.

²⁷ Aꞌaneb aꞌin li ralal xcꞌajol laj Zabulón. Oxcꞌa̱l mil riqꞌuin o̱b ciento (60,500) chixjunileb.

²⁸ Eb li ralal xcꞌajol laj José, aꞌaneb laj Manasés ut laj Efraín.

²⁹ Aꞌaneb aꞌin li ralal xcꞌajol laj Manasés: eb li ralal xcꞌajol laj Maquir; ut eb li ralal xcꞌajol laj Galaad.

³⁰ Aꞌaneb aꞌin li ralal xcꞌajol laj Galaad: eb li ralal xcꞌajol laj Jezer; eb li ralal xcꞌajol laj Helec;

³¹ eb li ralal xcꞌajol laj Asriel; eb li ralal xcꞌajol laj Siquem;

³² eb li ralal xcꞌajol laj Semida; ut eb li ralal xcꞌajol laj Hefer.

³³ Incꞌaꞌ queꞌcuan ralal laj Zelofehad li ralal laj Hefer. Caꞌaj cuiꞌ xrabin queꞌcuan. Aꞌaneb aꞌin lix cꞌabaꞌeb: lix Maala, lix Noa, lix Hogla, lix Milca, ut lix Tirsa.

³⁴ Aꞌaneb aꞌin li ralal xcꞌajol laj Manasés. Cablaju roxcꞌa̱l mil riqꞌuin cuukub ciento (52,700) chixjunileb.

³⁵ Aꞌaneb aꞌin li ralal xcꞌajol laj Efraín: eb li ralal xcꞌajol laj Sutela; eb li ralal xcꞌajol laj Bequer; ut eb li ralal xcꞌajol laj Tahán.

³⁶ Aꞌaneb aꞌin li ralal xcꞌajol laj Sutela: eb li ralal xcꞌajol laj Erán.

³⁷ Aꞌaneb aꞌin li ralal xcꞌajol laj Efraín. Cablaju xcaꞌcꞌa̱l mil riqꞌuin o̱b ciento (32,500) chixjunileb. Aꞌaneb aꞌin li ralal xcꞌajol laj José, aꞌ yal chanru xqꞌuialeb saꞌ li junju̱nk cabal.

³⁸ Aꞌaneb aꞌin li ralal xcꞌajol laj Benjamín: eb li ralal xcꞌajol laj Bela; eb li ralal xcꞌajol laj Asbel; eb li ralal xcꞌajol laj Ahiram;

³⁹ eb li ralal xcꞌajol laj Sufam; ut eb li ralal xcꞌajol laj Hufam.

⁴⁰ Eb li ralal xcꞌajol laj Bela, aꞌaneb laj Ard ut laj Naamán, ut eb li ralal xcꞌajol eb aꞌan.

⁴¹ Aꞌaneb aꞌin li ralal xcꞌajol laj Benjamín. Oꞌlaju roxcꞌa̱l mil riqꞌuin cuakib ciento (45,600) chixjunileb.

⁴² Aꞌaneb aꞌin li ralal xcꞌajol laj Dan: eb li ralal xcꞌajol laj Súham. Aꞌaneb li ralal xcꞌajol laj Dan.

⁴³ Eb li ralal xcꞌajol laj Dan li queꞌcuan riqꞌuin laj Súham, aꞌan ca̱hib xca̱cꞌa̱l mil riqꞌuin ca̱hib ciento (64,400) chixjunileb.

⁴⁴ Aꞌaneb aꞌin li ralal xcꞌajol laj Aser: eb li ralal xcꞌajol laj Imna; eb li ralal xcꞌajol laj Isúi; ut eb li ralal xcꞌajol laj Bería.

⁴⁵ Eb li ralal xcꞌajol laj Bería, aꞌaneb li ralal xcꞌajol laj Heber ut eb li ralal xcꞌajol laj Malquiel.

⁴⁶ Laj Aser quicuan jun lix rabin xSera xcꞌabaꞌ.

⁴⁷ Aꞌaneb aꞌin li ralal xcꞌajol laj Aser. Oxlaju roxcꞌa̱l mil riqꞌuin ca̱hib ciento (53,400) chixjunileb.

⁴⁸ Aꞌaneb aꞌin li ralal xcꞌajol laj Neftalí: eb li ralal xcꞌajol laj Jahzeel; eb li ralal xcꞌajol laj Guni;

⁴⁹ eb li ralal xcꞌajol laj Jezer; ut eb li ralal xcꞌajol laj Silem.

⁵⁰ Aꞌaneb aꞌin li ralal xcꞌajol laj Neftalí. O̱b roxcꞌa̱l mil riqꞌuin ca̱hib ciento (45,400) chixjunileb.

⁵¹ Cuakib ciento mil riqꞌuin jun mil riqꞌuin cuukub ciento riqꞌuin laje̱b xcaꞌcꞌa̱l (601,730) chixjunileb li cui̱nk aj Israel li ac queꞌxba̱nu junmay chihab.

⁵² Li Ka̱cuaꞌ quia̱tinac riqꞌuin laj Moisés ut quixye re:

⁵³ —Aꞌaneb li teꞌjeqꞌui̱k xchꞌochꞌeb aꞌ yal joꞌ qꞌuialeb li tzꞌi̱banbil xcꞌabaꞌeb.

⁵⁴ Cui nabaleb, nim li naꞌajej li ta̱qꞌuehekꞌ reheb. Cui ut incꞌaꞌ nabaleb, incꞌaꞌ ajcuiꞌ nabal li chꞌochꞌ teꞌxcꞌul. Ta̱jeqꞌui li chꞌochꞌ aꞌ yal joꞌ qꞌuialeb saꞌ li junju̱nk chꞌu̱tal.

⁵⁵ Nak te̱jeqꞌui li chꞌochꞌ aꞌin saꞌ xya̱nk li junju̱nk chꞌu̱tal, te̱jeqꞌui riqꞌuin bu̱lic ut aꞌ yal chanru tzꞌi̱banbil xcꞌabaꞌeb li junju̱nk te̱p.

⁵⁶ Te̱jeqꞌui li chꞌochꞌ aꞌin riqꞌuin bu̱lic. Li nabaleb, nabal te̱qꞌue reheb. Ut li incꞌaꞌ qꞌuiheb, incꞌaꞌ ajcuiꞌ qꞌui te̱qꞌue reheb.

⁵⁷ Aꞌaneb aꞌin li ralal xcꞌajol laj Leví li queꞌajla̱c: eb li ralal xcꞌajol laj Gersón; eb li ralal xcꞌajol laj Coat; ut eb li ralal xcꞌajol laj Merari.

⁵⁸ Aꞌaneb aꞌin li jun chꞌol chic li ralal xcꞌajol laj Leví: eb li ralal xcꞌajol laj Libni, eb li ralal xcꞌajol laj Hebrón, eb li ralal xcꞌajol laj Mahli, eb li ralal xcꞌajol laj Musi, ut eb li ralal xcꞌajol laj Coré. Laj Coat, aꞌan lix yucuaꞌ laj Amram.

⁵⁹ Laj Amram quisumla riqꞌuin lix Jocabed, jun ixk xcomoneb li ralal xcꞌajol laj Leví. Quiyoꞌla nak cuanqueb aran Egipto. Lix cocꞌal laj Amram li queꞌcuan riqꞌuin lix Jocabed, aꞌaneb laj Aarón, laj Moisés ut lix María.

⁶⁰ Ut eb li ralal laj Aarón, aꞌaneb laj Nadab, laj Abiú, laj Eleazar ut laj Itamar.

⁶¹ Laj Nadab ut laj Abiú queꞌcam nak queꞌxqꞌue li xam saꞌ li sansar li incꞌaꞌ xye li Dios.

⁶² Nak queꞌajla̱c chixjunileb li cui̱nk aj Leví quiticla riqꞌuineb li cuan jun po reheb. Ut queꞌajla̱c ajcuiꞌ li ni̱nkeb. Jalan nak quitzꞌi̱ba̱c xcꞌabaꞌeb xban nak incꞌaꞌ queꞌqꞌueheꞌ xchꞌochꞌeb. Oxib xcaꞌcꞌa̱l mil (23,000) chixjunileb li cui̱nk aj levita.

⁶³ Aꞌaneb chixjunileb li queꞌajla̱c xban laj Moisés ut laj Eleazar laj tij nak queꞌajla̱c chixjunileb laj Israel saꞌ li ru takꞌa re Moab li cuan chire li nimaꞌ Jordán. Li naꞌajej aꞌan cuan saꞌ xcaꞌyaba̱l li tenamit Jericó.

⁶⁴ Ma̱ jun saꞌ xya̱nkeb aꞌin li queꞌajla̱c xban laj Moisés ut laj Aarón nak cuanqueb chak saꞌ li chaki chꞌochꞌ Sinaí.

⁶⁵ Ma̱ jun li queꞌajla̱c junxil cuan saꞌ xya̱nkeb xban nak li Ka̱cuaꞌ quixye nak teꞌca̱mk saꞌ li chaki chꞌochꞌ. Caꞌaj cuiꞌ laj Caleb li ralal laj Jefone, ut laj Josué li ralal laj Nun queꞌcana chi yoꞌyo.