Números 25 - Li Santil hu

Eb laj Israel queꞌoc chixlokꞌoninquil li yi̱banbil dios Baal-peor, lix dioseb laj Madián

¹ Eb laj Israel queꞌcana chi cua̱nc aran Sitim. Nak cuanqueb aran eb li cui̱nk queꞌxtiquib ma̱cobc riqꞌuineb li ixk aj Moab.

² Eb li ixk aꞌan nequeꞌxbok li cui̱nk aj Israel saꞌ lix ninkꞌeheb nak nequeꞌmayejac chiru lix dioseb. Ut eb laj Israel queꞌxlokꞌoni li jalanil dios Baal-peor ut queꞌxcuaꞌ li tzacae̱mk li mayejanbil chiruheb li yi̱banbil dios.

³ Joꞌcan nak eb laj Israel queꞌoc chixlokꞌoninquil li yi̱banbil dios Baal-peor. Ut cꞌajoꞌ nak quichal xjoskꞌil li Ka̱cuaꞌ saꞌ xbe̱neb laj Israel.

⁴ Ut li Ka̱cuaꞌ quixye re laj Moisés: —Ta̱chꞌutubeb chixjunileb li cui̱nk li nequeꞌcꞌamoc be saꞌ xya̱nkeb laj Israel. Ut ta̱yatzꞌeb chiruheb chixjunileb li tenamit re nak ta̱e̱lk lin joskꞌil saꞌ xbe̱neb laj Israel, chan li Dios.

⁵ Joꞌcan nak laj Moisés quixye reheb li nequeꞌrakoc a̱tin: —La̱ex te̱chꞌutubeb chixjunileb saꞌ le̱ te̱pal li queꞌxlokꞌoni li yi̱banbil dios Baal-peor ut te̱camsiheb, chan.

⁶ Ut jun li cui̱nk aj Israel quixcꞌam riqꞌuin jun li ixk aj Madián ut quirocsi saꞌ lix muheba̱l re ta̱cua̱nk riqꞌuin. Quixba̱nu aꞌan chiru laj Moisés ut chiruheb chixjunileb laj Israel nak yo̱queb chi ya̱bac chiru li oqueba̱l re li tabernáculo.

⁷ Ut laj Finees li ralal laj Eleazar quiril li quixba̱nu. Laj Finees, aꞌan li ri laj Aarón laj tij. Qui-el saꞌ xya̱nkeb laj Israel. Quixcꞌam jun li la̱ns saꞌ rukꞌ nak co̱.

⁸ Co̱ saꞌ lix muheba̱l li cui̱nk li quicꞌamoc re li ixk aj Madián. Qui-oc saꞌ li muheba̱l ut quixnumsi lix la̱ns saꞌ xsaꞌeb li cui̱nk ut li ixk. Quixcamsiheb chixcabichaleb. Ut riqꞌuin aꞌan quichꞌana li caki yajel li yo̱ chi camsi̱nc reheb li cui̱nk aj Israel.

⁹ Abanan ac xeꞌcam ca̱hib xcaꞌcꞌa̱l (24,000) mil laj Israel xban li caki yajel.

¹⁰ Ut li Ka̱cuaꞌ quixye re laj Moisés:

¹¹ —Xban li cꞌaꞌru xba̱nu laj Finees li ralal laj Eleazar, xcube injoskꞌil saꞌ xbe̱neb laj Israel. Laj Finees incꞌaꞌ quixcanabeb chixlokꞌoninquileb li jalanil dios. Incꞌaꞌ quiraj nak teꞌrisi inlokꞌal la̱in. Xban aꞌan nak la̱in incꞌaꞌ quinsach ruheb chixjunileb nak yo̱ injoskꞌil saꞌ xbe̱neb.

¹² Joꞌcan nak ta̱ye re laj Finees nak la̱in tinba̱nu jun li contrato riqꞌuin re tixcꞌam rib saꞌ usilal cuiqꞌuin.

¹³ Xakabanbileb chi cꞌanjelac chokꞌ aj tij laj Finees joꞌ eb ajcuiꞌ li ralal xcꞌajol chalen anakcuan ut chi junelic xban nak laj Finees incꞌaꞌ quiraj nak teꞌxqꞌue xlokꞌal li yi̱banbil dios. Quiraj ban nak caꞌaj cuiꞌ la̱in tineꞌxlokꞌoni. Riqꞌuin li cꞌaꞌru quixba̱nu quixtoj rix lix ma̱queb li tenamit, chan li Dios.

¹⁴ Li cui̱nk aj Israel li quicamsi̱c rochben li ixk aj Madián, aꞌan laj Zimri li ralal laj Salu, li quitaklan saꞌ xbe̱neb li ralal xcꞌajol laj Simeón.

¹⁵ Ut li ixk li quicamsi̱c, aꞌan lix Cozbi lix rabin laj Zur, li nataklan saꞌ xbe̱neb jun chꞌu̱tal laj Madián.

¹⁶ Li Ka̱cuaꞌ quia̱tinac riqꞌuin laj Moisés ut quixye re:

¹⁷ —Ayukex chi pletic riqꞌuineb laj Madián ut ta̱sach ruheb,

¹⁸ xban nak aꞌan eb xeꞌqꞌuehoc reheb laj Israel chixlokꞌoninquil li yi̱banbil dios Baal-peor. Ut yo̱queb chi cꞌamoc be chiruheb chixba̱nunquil li ma̱usilal li quixba̱nu lix Cozbi lix rabin li cui̱nk aj Madián li cuan xcuanquil. Li ixk aꞌan quicamsi̱c saꞌ li cutan nak queꞌcam nabaleb xban nak queꞌxlokꞌoni laj Baal-peor, chan li Dios.