Números 24 - Li Santil hu

¹ Ut laj Balaam naxnau nak li Ka̱cuaꞌ ta̱raj ta̱rosobtesiheb laj Israel. Joꞌcan nak incꞌaꞌ chic co̱ chi kꞌehi̱nc joꞌ quixba̱nu xcaꞌ sut. Quixsukꞌisi ban rib ut qui-iloc saꞌ li chaki chꞌochꞌ.

² Ut quiril lix muheba̱leb laj Israel chi te̱p chꞌutchꞌu̱queb. Ut lix musikꞌ li Ka̱cuaꞌ quichal riqꞌuin laj Balaam.

³ Ut laj Balaam quixye resil li cꞌaꞌru ta̱cꞌulma̱nk. Quixye: —La̱in laj Balaam, li ralal laj Beor. Aꞌan aꞌin li cꞌaꞌru quicꞌutbesi̱c chicuu xban li Dios.—

⁴ Laj Balaam quixye resil li cꞌaꞌru ta̱cꞌulma̱nk. Quixye: —La̱in laj Balaam li quin-abin re li cꞌaꞌru quixye li Ka̱cuaꞌ. La̱in quin-iloc re li visión li quixcꞌutbesi li nimajcual Dios. La̱in quincubsi cuib chiru li Ka̱cuaꞌ, ut aꞌan quixcꞌut lix ya̱lal chicuu.

⁵ Cꞌajoꞌ xchꞌinaꞌusal le̱ muheba̱l la̱ex aj Israel. Kꞌaxal chꞌinaꞌus li naꞌajej li nequexcuan cuiꞌ, la̱ex li ralal xcꞌajol laj Jacob.

⁶ Kꞌaxal nabal le̱ muheba̱l. Chanchaneb li rok haꞌ ut chanchaneb li xnaꞌaj li acui̱mk chire li nimaꞌ. Chanchaneb li áloe aubil xban li Ka̱cuaꞌ. Chanchaneb li cheꞌ chacalteꞌ li cuanqueb chire li nimaꞌ.

⁷ Cua̱nk tzꞌakal lix haꞌeb. Tzꞌakalak lix haꞌeb re teꞌrucꞌ ut re teꞌxtꞌakresi li racui̱mkeb. Ut nima̱k xcuanquil lix reyeb chiru lix cuanquil li rey Agag. Qꞌuebilak xlokꞌal lix cuanquil.

⁸ Li Ka̱cuaꞌ qui-isin reheb saꞌ li naꞌajej Egipto. Kꞌaxal cau xmetzꞌe̱uheb. Chanchan xmetzꞌe̱u li bo̱yx li cuan saꞌ qꞌuicheꞌ. Teꞌnumta̱k saꞌ xbe̱neb li xicꞌ nequeꞌiloc reheb. Teꞌxtoki lix bakeleb ut teꞌxcuteb riqꞌuin lix tzimajeb.

⁹ Eb laj Israel chanchaneb li cakcoj. Nak nequeꞌoc chi hila̱nc, ma̱ ani naru na-ajsin reheb. Osobtesinbilakeb li teꞌxtzꞌa̱ma rosobtesinquileb laj Israel. Ut tzꞌekta̱nanbilakeb li teꞌxtzꞌa̱ma ma̱usilal saꞌ xbe̱neb, chan laj Balaam.

¹⁰ Cꞌajoꞌ nak quijoskꞌoꞌ laj Balac nak quirabi li quixye laj Balaam. Quixpokle li rukꞌ ut quixye re laj Balaam: —Xatinbok re nak ta̱tzꞌa̱ma ma̱usilal saꞌ xbe̱neb li xicꞌ nequeꞌiloc cue. Abanan la̱at xatzꞌa̱ma rosobtesinquileb oxib sut.

¹¹ Elen arin saꞌ junpa̱t. Sukꞌin saꞌ la̱ cuochoch. La̱in xinye nak tinqꞌue a̱lokꞌal. Abanan li Ka̱cuaꞌ incꞌaꞌ xraj nak ta̱cꞌul a̱lokꞌal, chan.

¹² Laj Balaam quixye re: —¿Ma incꞌaꞌ ta biꞌ xinye chi tzꞌakal reheb la̱ takl nak xeꞌcuulac cuiqꞌuin?

¹³ Xinye reheb: Usta tixqꞌue cue li rochoch laj Balac nujenak riqꞌuin plata ut oro, abanan ma̱cꞌaꞌ tinba̱nu injunes usta cha̱bil usta incꞌaꞌ. Incꞌaꞌ tinkꞌet li ra̱tin li Dios. Caꞌaj cuiꞌ li cꞌaꞌru tixcꞌut chicuu li Ka̱cuaꞌ tinye.

¹⁴ Anakcuan xic cue saꞌ lin tenamit. Abanan xbe̱n cua tinye a̱cue cꞌaꞌru teꞌxba̱nu e̱re eb laj Israel saꞌ eb li cutan chalen, chan laj Balaam.

¹⁵ Ut laj Balaam quixye resil li cꞌaꞌru ta̱cꞌulma̱nk. Quixye: —La̱in laj Balaam, li ralal laj Beor. La̱in nacuil chi tzꞌakal li cꞌaꞌru ta̱cꞌulma̱nk.

¹⁶ La̱in quin-abin re li cꞌaꞌru quixye li Ka̱cuaꞌ. La̱in li ninnaꞌoc re xcꞌaꞌux li nimajcual Dios. La̱in li quin-iloc re li visión li quixcꞌutbesi li nimajcual Dios. La̱in quincubsi cuib chiru li Ka̱cuaꞌ ut aꞌan quixcꞌut lix ya̱lal chicuu.

¹⁷ La̱in quicuil saꞌ visión li cꞌaꞌru ta̱cꞌulma̱nk saꞌ xya̱nkeb laj Israel saꞌ eb li cutan teꞌcha̱lk. Ta̱cua̱nk jun li rey saꞌ xya̱nkeb li ralal xcꞌajol laj Jacob. Chanchanak jun li chahim. Ta̱numta̱k saꞌ xbe̱neb li ralal xcꞌajol laj Moab ut tixsach ruheb li ralal xcꞌajol laj Set.

¹⁸ Eb laj Israel teꞌnumta̱k saꞌ xbe̱neb laj Edom. Teꞌnumta̱k saꞌ xbe̱neb laj Seir li xicꞌ nequeꞌiloc reheb. Ut ta̱nima̱nk xcuanquileb laj Israel.

¹⁹ Jun li kꞌaxal nim xcuanquil ta̱cua̱nk saꞌ xya̱nkeb li ralal xcꞌajol laj Jacob. Ut aꞌan ta̱numta̱k saꞌ xbe̱neb li xicꞌ nequeꞌiloc re ut aꞌan ta̱sachok reheb li tenamit li joꞌ qꞌuial teꞌcana̱k.

²⁰ Ut laj Balaam qui-iloc saꞌ xjayal lix tenamit laj Amalec ut quixye li cꞌaꞌru teꞌxcꞌul. Quixye: —Laj Amalec, aꞌan li kꞌaxal nim xcuanquil saꞌ xya̱nkeb li xni̱nkal ru tenamit. Abanan ta̱sachekꞌ ru chi junaj cua.—

²¹ Ut nak qui-iloc saꞌ xjayal lix tenamiteb laj Ceneo laj Balaam quixye li cꞌaꞌru teꞌxcꞌul eb aꞌan. Quixye: —La̱ex aj Ceneo, quecauresi chi us le̱ naꞌaj ut saꞌ xbe̱n ni̱nki pec cuan.

²² Abanan eb laj Asiria teꞌnumta̱k saꞌ e̱be̱n la̱ex aj Ceneo ut texcꞌam chi pre̱xil, chan.

²³ Ut quixye ajcuiꞌ laj Balaam: —¿Ani ta biꞌ ta̱ru̱k ta̱colekꞌ nak li Dios tixba̱nu li cꞌaꞌak re ru aꞌin?

²⁴ Teꞌcha̱lk chak Quitim saꞌ eb li jucub ut teꞌxrahobtesiheb laj Asiria ut teꞌxrahobtesiheb ajcuiꞌ li ralal xcꞌajol laj Heber. Abanan eb laj Quitim teꞌsachekꞌ ajcuiꞌ ruheb, chan.

²⁵ Ut chirix aꞌan laj Balaam quisukꞌi saꞌ xtenamit. Joꞌcan ajcuiꞌ laj Balac quisukꞌi saꞌ li rochoch.