Números 22 - Li Santil hu

Laj Balac quixtakla xbokbal laj Balaam re tixtzꞌa̱ma ma̱usilal saꞌ xbe̱neb laj Israel

¹ Ut queꞌel saꞌ li naꞌajej aꞌan eb laj Israel ut queꞌco̱eb. Queꞌcuulac saꞌ li ru takꞌa re Moab ut queꞌxyi̱b lix muheba̱leb nachꞌ riqꞌuin li nimaꞌ Jordán saꞌ xcaꞌyaba̱l li tenamit Jericó.

² Laj Balac li ralal laj Zipor, aꞌan lix reyeb laj Moab. Quirabi resil nak eb laj Israel queꞌnumta saꞌ xbe̱neb laj amorreo.

³ Laj Balac joꞌqueb ajcuiꞌ chixjunileb laj Moab qui-oc xxiuheb xbaneb laj Israel xban nak kꞌaxal nabaleb.

⁴ Eb laj Moab queꞌa̱tinac riqꞌuineb li nequeꞌcꞌamoc be saꞌ xya̱nkeb laj Madián ut queꞌxye reheb: —Eb li tenamit aꞌan teꞌnumta̱k saꞌ kabe̱n ut teꞌxsach ku chi junaj cua joꞌ nak li cuacax nequeꞌxcuaꞌ chixjunil li pachꞌayaꞌ, chanqueb.

⁵ Ut li rey Balac, li ralal laj Zipor, quixtaklaheb lix takl riqꞌuin laj Balaam li ralal laj Beor. Queꞌco̱eb saꞌ li naꞌajej Petor li cuan nachꞌ riqꞌuin li nimaꞌ Éufrates saꞌ lix naꞌajeb laj Amav. Quixye reheb nak teꞌcuulak riqꞌuin laj Balaam teꞌxye re: —Nabaleb li cristian queꞌchal chak Egipto. Nachꞌ cuanqueb riqꞌuin li kanaꞌaj ut teꞌraj re̱chaninquil.

⁶ La̱in nacuaj nak tatcha̱lk arin re ta̱tzꞌa̱ma ma̱usilal saꞌ xbe̱neb li cristian aꞌan xban nak kꞌaxal nabaleb ut cauheb rib chiku la̱o. Cui ta̱ba̱nu chi joꞌcan, ma̱re ta̱ru̱k takisiheb saꞌ li kanaꞌaj. La̱in ninnau nak li ani nacatzꞌa̱ma rosobtesinquil, osobtesinbil chic nacana. Ut li ani nacatzꞌa̱ma ma̱usilal saꞌ xbe̱n, ma̱usilanbil chic nacana, chan lix reyeb laj Moab.

⁷ Joꞌcan nak eb li nequeꞌcꞌamoc be saꞌ xya̱nkeb laj Moab, rochbeneb li nequeꞌcꞌamoc be saꞌ xya̱nkeb laj Madián queꞌco̱eb riqꞌuin laj Balaam chixtzꞌa̱manquil chiru nak tixtzꞌa̱ma ma̱usilal saꞌ xbe̱neb laj Israel ut queꞌxcꞌam xtumin re xtojbal li cꞌaꞌru tixba̱nu. Queꞌxye re cꞌaꞌru quixye laj Balac.

⁸ Laj Balaam quixye reheb: —Texcana̱k ut cuulaj tinye e̱re cꞌaꞌru tixye cue li Ka̱cuaꞌ, chan. Joꞌcan nak queꞌxnumsi li kꞌojyi̱n riqꞌuin laj Balaam.

⁹ Ut li Dios quixcꞌutbesi rib chiru laj Balaam ut quixye re: —¿Aniheb li cui̱nk li cuanqueb a̱cuiqꞌuin? chan.

¹⁰ Ut laj Balaam quixye re: —Eb aꞌan taklanbileb chak cuiqꞌuin xban laj Balac lix reyeb laj Moab.

¹¹ Xtaklaheb chak chixyebal cue nak eb li cristian li queꞌel Egipto yo̱queb chi oc saꞌ lix naꞌajeb re teꞌre̱chani. Numtajenak xqꞌuialeb. Laj Balac ta̱raj nak tinxic ut tintzꞌa̱ma ma̱usilal saꞌ xbe̱neb re nak ta̱numta̱k saꞌ xbe̱neb ut ta̱risiheb saꞌ lix naꞌaj, chan laj Balaam.

¹² Ut li Dios quixye re: —Matxic chirixeb chi moco ta̱tzꞌa̱ma ma̱usilal saꞌ xbe̱neb li tenamit aꞌan xban nak osobtesinbileb inban, chan li Ka̱cuaꞌ.

¹³ Cuulajak chic laj Balaam quicuacli ekꞌela ut co̱ riqꞌuineb li nequeꞌtenkꞌan re laj Balac. Quixye reheb: —Sukꞌinkex saꞌ le̱ tenamit. Li Ka̱cuaꞌ incꞌaꞌ naraj nak tinxic che̱rix, chan.

¹⁴ Joꞌcan nak queꞌsukꞌi riqꞌuin laj Balac ut queꞌxye re: —Laj Balaam incꞌaꞌ xraj cha̱lc chikix, chanqueb.

¹⁵ Ut laj Balac quixtaklaheb jalan lix takl. Kꞌaxal nabaleb ut ni̱nkeb xcuanquil chiruheb li queꞌco̱eb xbe̱n cua.

¹⁶ Queꞌcuulac riqꞌuin laj Balaam ut queꞌxye re: —Laj Balac li ralal laj Zipor xtakla xyebal a̱cue nak ta̱ba̱nu usilal, ma̱kꞌetkꞌeti a̱cuib chi xic riqꞌuin, chanqueb.

¹⁷ Cui tatxic tixqꞌue nabal la̱ ma̱tan ut tixba̱nu li cꞌaꞌru ta̱ye. Joꞌcan ut tatxic anakcuan ut ta̱tzꞌa̱ma ma̱usilal saꞌ xbe̱neb li tenamit aꞌan, chanqueb.

¹⁸ Abanan laj Balaam quixye reheb: —Usta laj Balac tixqꞌue cue li rochoch nujenak riqꞌuin plata ut oro, abanan la̱in incꞌaꞌ tinkꞌet ra̱tin li Ka̱cuaꞌ lin Dios. Incꞌaꞌ tinkꞌet li ra̱tin riqꞌuin xba̱nunquil li us, chi moco riqꞌuin xba̱nunquil li incꞌaꞌ us.

¹⁹ Nintzꞌa̱ma che̱ru nak texcana̱k chixnumsinquil li kꞌojyi̱n cuiqꞌuin. La̱in tinpatzꞌ re li Ka̱cuaꞌ cꞌaꞌru us tinba̱nu, chan.

²⁰ Ut li Dios quixcꞌutbesi rib chiru laj Balaam chiru li kꞌojyi̱n ut quixye re: —Cui eb li cui̱nk aꞌin xeꞌchal cha̱cꞌambal, ayu chirixeb. Abanan ma̱cꞌaꞌ ta̱ba̱nu toj tinye a̱cue la̱in, chan.

²¹ Cuulajak chic laj Balaam quicuacli ut quixyi̱b rix lix bu̱r ut co̱ chirixeb li cui̱nk aj Moab.

²² Quijoskꞌoꞌ li Ka̱cuaꞌ xban nak laj Balaam co̱ chirixeb li cui̱nk. Nak yo̱ chi xic laj Balaam chirix lix bu̱r rochben li cuib chi mo̱s, jun lix ángel li Ka̱cuaꞌ quixxakab rib saꞌ be re nak incꞌaꞌ naru ta̱numekꞌ.

²³ Quixqꞌue retal li bu̱r nak lix ángel li Ka̱cuaꞌ xakxo saꞌ be ut cuan xchꞌi̱chꞌ saꞌ rukꞌ. Joꞌcan nak qui-el saꞌ li be ut quixjal lix be. Qui-oc chixsacꞌbal li bu̱r laj Balaam re nak ta̱xic cuiꞌchic saꞌ li be.

²⁴ Ut lix ángel li Ka̱cuaꞌ quixxakab rib saꞌ li be saꞌ xyi cuib si̱ril li uvas sutsu saꞌ tzꞌac saꞌ xcaꞌ pacꞌalil li be.

²⁵ Li bu̱r quiril lix ángel li Ka̱cuaꞌ ut quixqꞌue rib chiru li tzꞌac ut quixpitzꞌ li rok laj Balaam. Ut laj Balaam quixsacꞌ cuiꞌchic lix bu̱r.

²⁶ Ut lix ángel li Ka̱cuaꞌ co̱ chi ubej ut quixxakab rib saꞌ jun li latzꞌ re nak li bu̱r incꞌaꞌ ta̱ru̱k ta̱xic saꞌ lix nim chi moco saꞌ li tzꞌe. Incꞌaꞌ quiru chi numecꞌ.

²⁷ Nak li bu̱r quiril cuiꞌchic lix ángel li Ka̱cuaꞌ, quixyocob rib saꞌ chꞌochꞌ chi toj cuan laj Balaam chirix. Cꞌajoꞌ nak quijoskꞌoꞌ laj Balaam ut qui-oc chixsacꞌbal lix bu̱r riqꞌuin cheꞌ.

²⁸ Ut li Ka̱cuaꞌ quixqꞌue chi a̱tinac li bu̱r. Ut li bu̱r quixye re laj Balaam: —¿Cꞌaꞌru yo̱quin a̱cue nak yo̱cat chinsacꞌbal? Oxib sut ac xina̱sacꞌ, chan.

²⁹ Quichakꞌoc laj Balaam ut quixye re: —Xacꞌut inxuta̱n. Cuan ta cuan inchꞌi̱chꞌ cuiqꞌuin xatincamsi raj, chan.

³⁰ Ut li bu̱r quixye re: —¿Ma ma̱cuaꞌ ta biꞌ la̱in la̱ bu̱r? ¿Ma incꞌaꞌ ta biꞌ chicuix nacatbe̱c rajlal? ¿Ma xinba̱nu ta biꞌ jun sutak a̱cue chi joꞌcaꞌin? chan. Ut laj Balaam quixye re: —Ma̱ jun sut xaba̱nu, chan.

³¹ Ut li Ka̱cuaꞌ quixcꞌutbesi lix ángel chiru laj Balaam. Quixqꞌue retal nak xakxo saꞌ be li ángel ut cuan xchꞌi̱chꞌ saꞌ rukꞌ. Ut laj Balaam quixhupub rib saꞌ chꞌochꞌ.

³² Lix ángel li Ka̱cuaꞌ quixpatzꞌ re laj Balaam: —¿Cꞌaꞌut nak xasacꞌ la̱ bu̱r oxib sut? La̱in cuanquin arin chixrambal a̱be xban nak incꞌaꞌ us li xic a̱cue chixba̱nunquil.

³³ La̱ bu̱r xinril. Joꞌcan nak xjal xbe oxib sut. Cui ta incꞌaꞌ xjal xbe, la̱in xatincamsi raj. Abanan incꞌaꞌ raj xincamsi la̱ bu̱r, chan.

³⁴ Laj Balaam quixye re lix ángel li Ka̱cuaꞌ: —La̱in xinma̱cob. La̱in incꞌaꞌ xinnau nak xakxo̱cat arin chixrambal inbe. Cui incꞌaꞌ nacacuaj nak tinxic, la̱in tinsukꞌi̱k saꞌ cuochoch, chan.

³⁵ Lix ángel li Ka̱cuaꞌ quixye re: —Ayu chirixeb li cui̱nk aꞌin. Abanan caꞌaj cuiꞌ ta̱ye li cꞌaꞌru tinye a̱cue la̱in, chan. Joꞌcan nak laj Balaam co̱ chirixeb li cui̱nk.

³⁶ Nak laj Balac quirabi resil nak yo̱queb chi cha̱lc, co̱ chixcꞌulbaleb saꞌ jun li tenamit li cuan chire li nimaꞌ Arnón saꞌ li nuba̱l re lix naꞌajeb laj Moab.

³⁷ Quixye re laj Balaam laj Balac: —¿Ma incꞌaꞌ ta biꞌ xintakla a̱bokbal? ¿Cꞌaꞌut nak incꞌaꞌ xatcꞌulun chi junpa̱t? ¿Ma incꞌaꞌ xapa̱b nak tinqꞌue a̱lokꞌal? chan.

³⁸ Quichakꞌoc laj Balaam ut quixye: —Arin cuanquin anakcuan. Abanan incꞌaꞌ naru tina̱tinak yal injunes. Tento nak tinye li cꞌaꞌru naxcꞌut chicuu li Ka̱cuaꞌ, chan.

³⁹ Ut laj Balaam co̱ chirix laj Balac toj saꞌ li tenamit Quiriat-huzot.

⁴⁰ Laj Balac quixtakla xcamsinquileb li bo̱yx ut li carner. Ut quixtakla li tib re laj Balaam ut reheb li cuanqueb rochben.

⁴¹ Cuulajak chic laj Balac quixcꞌam laj Balaam ut queꞌco̱eb toj Bamot-baal. Ut laj Balaam quiru rilbaleb laj Israel li cuanqueb chi nachꞌ.