Números 21 - Li Santil hu

Eb laj Israel queꞌnumta saꞌ xbe̱neb li tenamit li quilajeꞌnumeꞌ cuiꞌ

¹ Lix reyeb laj Canaán li cuan saꞌ li tenamit Arad li cuan saꞌ xcue̱nt Neguev quirabi resil nak eb laj Israel yo̱queb chi numecꞌ saꞌ li be li naxic Atarim. Eb laj Canaán li cuanqueb Arad queꞌco̱eb chi pletic riqꞌuineb. Ut cuanqueb laj Israel queꞌcꞌameꞌ chi pre̱xil xbaneb.

² Joꞌcan nak eb laj Israel riqꞌuin juramento queꞌxye re li Dios: —Cui ta̱kꞌaxtesiheb saꞌ kukꞌ li tenamit aꞌin, la̱o takasach chi junaj cua lix tenamiteb, chanqueb.

³ Ut li Ka̱cuaꞌ quirabi li cꞌaꞌru queꞌxtzꞌa̱ma chiru. Ut quixcanabeb laj Israel chi numta̱c saꞌ xbe̱neb. Ut eb laj Israel queꞌxsach ruheb li cristian ut queꞌxsach ajcuiꞌ ruheb lix tenamiteb. Joꞌcan nak queꞌxqꞌue Horma chokꞌ xcꞌabaꞌ li naꞌajej aꞌan.

⁴ Eb laj Israel queꞌel saꞌ li tzu̱l Hor ut queꞌco̱eb saꞌ xjayal li Caki Palau re nak teꞌnumekꞌ chire li naꞌajej Edom. Abanan incꞌaꞌ chic queꞌxcuy laj Israel nak yo̱queb chi xic.

⁵ Queꞌxcuechꞌi rix li Dios ut queꞌxcuechꞌi ajcuiꞌ laj Moisés ut queꞌxye: —¿Cꞌaꞌut nak xoa̱cuisi chak Egipto? ¿Ma xoa̱cꞌam chak saꞌ li chaki chꞌochꞌ re toca̱mk? Arin ma̱cꞌaꞌ haꞌ re takucꞌ ut ma̱cꞌaꞌ cua. Xotitzꞌ riqꞌuin li tzacae̱mk aꞌin. Incꞌaꞌ sa, chanqueb.

⁶ Ut li Ka̱cuaꞌ quixtaklaheb li cꞌantiꞌ li nequeꞌcamsin saꞌ xya̱nkeb ut nabaleb li tenamit queꞌtiꞌeꞌ ut queꞌcam.

⁷ Eb li cristian queꞌcuulac riqꞌuin laj Moisés ut queꞌxye re: —La̱o xoma̱cob nak xkacuechꞌi rix li Dios ut xoma̱cob ajcuiꞌ nak xatkacuechꞌi la̱at. Chatzꞌa̱ma chiru li Dios nak ta̱risiheb saꞌ kaya̱nk li cꞌantiꞌ aꞌin, chanqueb. Ut laj Moisés quitijoc chirixeb li tenamit.

⁸ Ut li Ka̱cuaꞌ quixye re laj Moisés: —Ta̱yi̱b junak li cꞌantiꞌ chꞌi̱chꞌ ut ta̱taksi saꞌ ruꞌuj junak cheꞌ. Ut chixjunileb li teꞌtiꞌekꞌ naru teꞌril li cꞌantiꞌ li ta̱yi̱b re nak incꞌaꞌ teꞌca̱mk, chan li Dios.

⁹ Ut laj Moisés quixyi̱b jun li cꞌantiꞌ riqꞌuin li chꞌi̱chꞌ bronce ut quixtaksi saꞌ ruꞌuj jun li cheꞌ. Nak queꞌtiꞌeꞌ xban cꞌantiꞌ, li cristian li queꞌril li cꞌantiꞌ bronce incꞌaꞌ queꞌcam.

¹⁰ Eb laj Israel queꞌco̱eb cuiꞌchic. Queꞌcuulac saꞌ li naꞌajej Obot ut aran queꞌxyi̱b lix muheba̱leb.

¹¹ Nak queꞌel Obot queꞌco̱eb Ije-abarim, li cuan saꞌ li este saꞌ li chaki chꞌochꞌ saꞌ xcaꞌyaba̱l lix naꞌajeb laj Moab.

¹² Nak queꞌel Ije-abarim queꞌco̱eb saꞌ li ru takꞌa re Zered ut aran queꞌxyi̱b cuiꞌchic lix muheba̱leb.

¹³ Nak queꞌel saꞌ li ru takꞌa re Zered, queꞌco̱eb jun pacꞌal li nimaꞌ Arnón saꞌ li naꞌajej li cuan saꞌ li chaki chꞌochꞌ nachꞌ riqꞌuin lix naꞌajeb laj Moab. Li nimaꞌ Arnón, aꞌan li nuba̱l re lix naꞌajeb laj Moab ut eb laj amorreo.

¹⁴ Xban aꞌan nak naxye chi joꞌcaꞌin saꞌ li hu li tzꞌi̱banbil cuiꞌ retalileb li pletic li quixba̱nu li Ka̱cuaꞌ: Li Ka̱cuaꞌ quixcꞌutbesi lix cuanquil chiku nak conumeꞌ saꞌ li Caki Palau ut saꞌ eb li nimaꞌ li cuan Arnón.

¹⁵ Quixcꞌut ajcuiꞌ chiku lix cuanquil nak yo̱co chi numecꞌ chire li nimaꞌ li naxic Ar li cuan saꞌ li nuba̱l re lix naꞌajeb laj Moab.

¹⁶ Nak queꞌel chire li nimaꞌ Arnón, queꞌco̱eb cuan cuiꞌ li becbil haꞌ Beer. Nak cuanqueb cuan cuiꞌ li becbil haꞌ aꞌin li Ka̱cuaꞌ quixye re laj Moisés nak tixchꞌutubeb laj Israel ut tixqꞌue lix haꞌeb, chan.

¹⁷ Ut eb laj Israel queꞌxbicha li bich aꞌin: —At becbil haꞌ, qꞌue chak li kahaꞌ ut la̱o takabicha a̱lokꞌal.

¹⁸ Eb li cuanqueb xcuanquil ut eb li nequeꞌcꞌamoc be queꞌxbec li jul haꞌ. Queꞌxbec riqꞌuin lix xukꞌ, chanqueb saꞌ lix bich. Ut chirix aꞌan queꞌel saꞌ li chaki chꞌochꞌ ut queꞌco̱eb Matana.

¹⁹ Nak queꞌel Matana queꞌco̱eb Nahaliel. Ut nak queꞌel Nahaliel, queꞌco̱eb Bamot.

²⁰ Nak queꞌel Bamot, queꞌco̱eb saꞌ li ru takꞌa re Moab. Ut queꞌco̱eb toj saꞌ li tzu̱l Pisga, li cuan saꞌ xcaꞌyaba̱l li chaki chꞌochꞌ.

²¹ Laj Israel queꞌxtaklaheb lix takl riqꞌuin laj Sehón lix reyeb laj amorreo ut queꞌxye re:

²² —At rey, nakatzꞌa̱ma cha̱cuu nak toa̱canab chi numecꞌ saꞌ la̱ naꞌaj. Incꞌaꞌ tonumekꞌ saꞌ lix naꞌajeb le̱ racui̱mk, chi moco tonumekꞌ saꞌ xnaꞌaj le̱ uvas, chi moco takucꞌ li haꞌ li cuan saꞌ le̱ becbil haꞌ. Ti̱c tonumekꞌ saꞌ li nim be toj retal tonumekꞌ saꞌ le̱ naꞌaj, chanqueb.

²³ Abanan li rey Sehón incꞌaꞌ quixcanabeb laj Israel chi numecꞌ saꞌ lix naꞌaj. Quixchꞌutubeb ban chixjunileb lix soldado ut queꞌco̱eb chixcꞌulbaleb laj Israel saꞌ li chaki chꞌochꞌ. Nak queꞌcuulac Jahaza queꞌxtiquib pletic riqꞌuineb.

²⁴ Ut laj Israel queꞌnumta saꞌ xbe̱neb. Queꞌxchap lix naꞌaj laj Sehón, li naticla Arnón ut nacuulac toj Jaboc. Queꞌcuulac saꞌ li nuba̱l re lix naꞌajeb li ralal xcꞌajol laj Amón. Li nuba̱l aꞌan yi̱banbil chi us re nak eb laj Amón teꞌxcol ribeb.

²⁵ Eb laj Israel queꞌxcꞌam chokꞌ reheb lix tenamiteb laj amorreo. Queꞌre̱chani li tenamit Hesbón ut eb li cocꞌ naꞌajej li cuanqueb chixjun sutam. Ut saꞌ eb li tenamit aꞌan queꞌcuan.

²⁶ Hesbón, aꞌan lix tenamit laj Sehón lix reyeb laj amorreo. Aꞌaneb li queꞌpletic riqꞌuineb laj Moab junxil ut queꞌre̱chani lix naꞌaj nacuulac cuan cuiꞌ li nimaꞌ Arnón.

²⁷ Joꞌcan nak naxye saꞌ jun li bich: —Quimkex Hesbón ut yi̱bomak cuiꞌchic lix tenamit li rey Sehón.

²⁸ Quiloch li xam aran Hesbón saꞌ lix tenamit li rey Sehón. Quicꞌateꞌ li naꞌajej Ar li cuan saꞌ xcue̱nt Moab. Queꞌsacheꞌ ruheb li cuanqueb saꞌ li ni̱nki tzu̱l li cuan cuiꞌ li nimaꞌ Arnón.

²⁹ Raylal xchal saꞌ e̱be̱n la̱ex aj Moab. Xsacheꞌ e̱ru la̱ex lix tenamit li yi̱banbil dios Quemos. Quichapeꞌ le̱ tenamit. Eb le̱ ralal queꞌe̱lelic ut eb le̱ rabin queꞌcꞌameꞌ chi pre̱xil xban laj Sehón lix reyeb laj amorreo.

³⁰ Anakcuan la̱o aj Israel xkasach ruheb le̱ ralal e̱cꞌajol. Xkasach ruheb chixjunil naticla Hesbón nacuulac toj Dibón. Queꞌsacheꞌ ruheb li cuanqueb Nofa ut li cuanqueb Medeba.—

³¹ Joꞌcan nak eb laj Israel queꞌcana chi cua̱nc saꞌ lix naꞌajeb laj amorreo.

³² Laj Moisés quixtaklaheb laj qꞌuehol etal saꞌ li tenamit Jazer. Ut eb laj Israel queꞌre̱chani li tenamit Jazer ut eb li cocꞌ cꞌaleba̱l li cuanqueb chixjun sutam. Queꞌrisiheb laj amorreo saꞌ li naꞌajej aꞌan.

³³ Chirix aꞌan eb laj Israel queꞌco̱eb saꞌ li be li naxic Basán. Ut laj Og lix reyeb laj Basán rochbeneb lix soldado queꞌco̱eb chi pletic riqꞌuineb saꞌ li naꞌajej Edrei.

³⁴ Li Ka̱cuaꞌ quixye re laj Moisés: —Matxucuac xbaneb. La̱in ac xinkꞌaxtesiheb saꞌ a̱cuukꞌ. Xinqꞌue a̱cue chixjunileb lix soldado ut lix naꞌajeb. Ta̱ba̱nu riqꞌuin aꞌan joꞌ xaba̱nu re laj Sehón lix reyeb laj amorreo li quicuan Hesbón, chan.

³⁵ Joꞌcan nak eb laj Israel queꞌxcamsi laj Og ut eb li ralal. Ut queꞌxcamsiheb ajcuiꞌ lix soldado. Ma̱ jun quicana chi yoꞌyo. Eb laj Israel queꞌre̱chani chixjunil li naꞌajej.