Números 20 - Li Santil hu

Li haꞌ qui-el saꞌ li sako̱nac

¹ Saꞌ li xbe̱n po re li chihab, eb laj Israel queꞌcuulac saꞌ li chaki chꞌochꞌ Zin ut queꞌcana saꞌ li tenamit Cades. Aran quicam lix María ut aran ajcuiꞌ quimukeꞌ.

² Saꞌ li naꞌajej aꞌan ma̱cꞌaꞌ haꞌ re teꞌrucꞌ. Joꞌcan nak li tenamit queꞌjoskꞌoꞌ riqꞌuin laj Moisés ut riqꞌuin laj Aarón.

³ Ut queꞌoc chixcuechꞌinquil laj Moisés ut queꞌxye: —Us raj nak cocam rochbeneb li jun chꞌol chic laj Israel li queꞌqꞌueheꞌ chi ca̱mc xban li Ka̱cuaꞌ.

⁴ ¿Cꞌaꞌut nak coa̱cuisi chak Egipto? ¿Cꞌaꞌut nak coa̱cꞌam chak arin saꞌ li chaki chꞌochꞌ aꞌin la̱o lix tenamit li Dios? ¿Ma coa̱cꞌam chak arin re toca̱mk kochbeneb li kaqueto̱mk?

⁵ ¿Cꞌaꞌut nak coa̱cuisi chak Egipto ut coa̱cꞌam chak saꞌ li naꞌajej aꞌin li kꞌaxal yibru? Arin incꞌaꞌ naru a̱uc. Ma̱cꞌaꞌ li cheꞌ higo chi moco li uvas, chi moco granadas. Ut ma̱cꞌaꞌ ajcuiꞌ haꞌ re takucꞌ, chanqueb.

⁶ Laj Moisés ut laj Aarón queꞌel saꞌ xya̱nkeb li tenamit ut queꞌco̱eb chiru li tabernáculo. Queꞌxhupub ribeb chiru chꞌochꞌ. Ut li Ka̱cuaꞌ quixcꞌut lix lokꞌal chiruheb.

⁷ Li Ka̱cuaꞌ quixye re laj Moisés:

⁸ —Chap la̱ xukꞌ. La̱at ut laj Aarón te̱chꞌutub ruheb li tenamit. Ut chiruheb chixjunileb ta̱ye re li sako̱nac nak tixqꞌue li haꞌ re teꞌrucꞌ. Ut ta̱cuisi li haꞌ saꞌ li pec ut ta̱qꞌueheb li tenamit chi ucꞌac. Ut teꞌucꞌak ajcuiꞌ lix queto̱mkeb, chan li Ka̱cuaꞌ.

⁹ Ut laj Moisés quixcꞌam li xukꞌ li cuan saꞌ li tabernáculo joꞌ quiyeheꞌ re xban li Ka̱cuaꞌ.

¹⁰ Laj Moisés ut laj Aarón queꞌxchꞌutubeb li tenamit chiru li sako̱nac ut laj Moisés quixye reheb: —Abihomak la̱ex li nequexkꞌetoc re ra̱tin li Dios. ¿Ma tento nak la̱o takisi li haꞌ saꞌ li sako̱nac aꞌin re te̱rucꞌ? chan.

¹¹ Quixtaksi li xukꞌ ut quixsacꞌ li pec caꞌ sut ut nabal li haꞌ qui-el saꞌ li sako̱nac. Chixjunileb li tenamit queꞌucꞌac joꞌqueb ajcuiꞌ li queto̱mk.

¹² Ut li Ka̱cuaꞌ quixye re laj Moisés rochben laj Aarón: —La̱ex incꞌaꞌ xex-abin chicuu. Incꞌaꞌ xeba̱nu joꞌ xinye e̱re ut incꞌaꞌ xeqꞌue inlokꞌal chiruheb li tenamit. Joꞌcan nak la̱ex incꞌaꞌ chic texcꞌamok be chiruheb li tenamit nak teꞌoc saꞌ li naꞌajej li quinyechiꞌi reheb, chan li Dios.

¹³ Aꞌin quicꞌulman saꞌ li naꞌajej Meriba li queꞌxcuechꞌi cuiꞌ li Ka̱cuaꞌ eb laj Israel. Ut li Ka̱cuaꞌ quixcꞌut chiruheb nak aꞌan santo.

Eb laj Edom incꞌaꞌ queꞌxcanabeb laj Israel chi numecꞌ saꞌ lix naꞌajeb

¹⁴ Nak cuanqueb Cades laj Moisés quixtaklaheb lix takl chi a̱tinac riqꞌuin lix reyeb laj Edom. Nak queꞌcuulac queꞌxye re: —La̱o aj Israel kechꞌalal kib e̱riqꞌuin la̱ex. Xotakla̱c chak chixyebal a̱cue chi joꞌcaꞌin. La̱at nacanau chixjunil li raylal li yo̱co chixcꞌulbal.

¹⁵ Eb li kaxeꞌto̱nil yucuaꞌ queꞌco̱eb Egipto ut nabal chihab xeꞌcuan aran kochbeneb. La̱o ut eb li kaxeꞌto̱nil yucuaꞌ ra queꞌxba̱nu ke eb laj Egipto.

¹⁶ Nak kaya̱ba xcꞌabaꞌ li Ka̱cuaꞌ, quirabi li katij ut quixtakla jun lix ángel chikisinquil aran Egipto. Anakcuan cuanco Cades, li tenamit li cuan nachꞌ riqꞌuin lix nuba̱l la̱ naꞌaj.

¹⁷ Nakatzꞌa̱ma cha̱cuu nak toa̱canab chi numecꞌ saꞌ la̱ naꞌaj. Incꞌaꞌ tonumekꞌ saꞌ lix naꞌajeb le̱ racui̱mk, chi moco tonumekꞌ saꞌ xnaꞌaj le̱ uvas. Chi moco takucꞌ li haꞌ li cuan saꞌ le̱ becbil haꞌ. Ti̱c tonumekꞌ saꞌ li nim be toj retal tonumekꞌ saꞌ le̱ naꞌaj. Ma̱cꞌaꞌ takachꞌeꞌ e̱re, chanqueb.

¹⁸ Abanan lix reyeb laj Edom quichakꞌoc ut quixye reheb: —Incꞌaꞌ naru texnumekꞌ saꞌ li naꞌajej aꞌin. Cui tex-oc saꞌ li kanaꞌaj, la̱o toxic che̱cꞌulbal ut topletik e̱riqꞌuin, chan.

¹⁹ Eb laj Israel queꞌxye re: —Ba̱nu usilal. La̱o tonumekꞌ saꞌ li nim be. Ut cui la̱o malaj ut li kaqueto̱mk takucꞌ li haꞌ cuan saꞌ le̱ chꞌochꞌ, la̱o totojok re. Caꞌaj cuiꞌ nakaj tonumekꞌ arin chi kok, chanqueb.

²⁰ Ut lix reyeb laj Edom quixye reheb laj Israel nak incꞌaꞌ naru teꞌnumekꞌ saꞌ lix naꞌajeb. Ut eb lix soldado laj Edom, li kꞌaxal cauheb rib, queꞌco̱eb chixcꞌulbaleb laj Israel.

²¹ Xban nak eb laj Edom incꞌaꞌ queꞌxcanabeb chi numecꞌ saꞌ lix naꞌajeb, eb laj Israel queꞌco̱eb saꞌ jalan chic be.

Lix camic laj Aarón

²² Queꞌel Cades chixjunileb li tenamit Israel ut queꞌco̱eb cuan cuiꞌ li tzu̱l Hor.

²³ Li Ka̱cuaꞌ quia̱tinac riqꞌuineb laj Moisés ut laj Aarón saꞌ li tzu̱l Hor li cuan nachꞌ riqꞌuin lix nuba̱l eb laj Edom. Quixye reheb:

²⁴ —Laj Aarón ta̱ca̱mk. Incꞌaꞌ ta̱oc saꞌ li naꞌajej li tinqꞌue reheb laj Israel xban nak chixcabichalex quekꞌet lin chakꞌrab nak cuanquex chire li haꞌ li cuan Meriba li quineꞌxcuechꞌi cuiꞌ li tenamit.

²⁵ La̱at, Moisés, ta̱cꞌam laj Aarón rochben laj Eleazar li ralal ut texxic saꞌ li tzu̱l Hor.

²⁶ Aran saꞌ xbe̱n li tzu̱l ta̱cuisi li rakꞌ laj tij li cuan chirix laj Aarón ut ta̱qꞌue li rakꞌ chirix laj Eleazar li ralal xban nak aran ta̱ca̱mk laj Aarón ut toxtauheb lix xeꞌto̱nil yucuaꞌ, chan li Dios.

²⁷ Laj Moisés quixba̱nu joꞌ quiyeheꞌ re xban li Ka̱cuaꞌ. Queꞌco̱eb saꞌ li tzu̱l Hor ut chixjunileb laj Israel queꞌril nak yo̱queb chi xic.

²⁸ Ut laj Moisés quirisi li rakꞌ laj Aarón ut quixqꞌue chirix laj Eleazar li ralal. Ut laj Aarón quicam aran saꞌ xbe̱n li tzu̱l. Chirix aꞌan, laj Moisés ut laj Eleazar queꞌcube saꞌ li tzu̱l.

²⁹ Nak queꞌrabi resil lix camic laj Aarón, chixjunileb laj Israel queꞌrahoꞌ saꞌ xchꞌo̱leb. Chiruheb laje̱b xcaꞌcꞌa̱l cutan queꞌrahoꞌ xchꞌo̱leb xban nak quicam laj Aarón.