Números 2 - Li Santil hu

Li Dios quixye reheb nak teꞌcua̱nk chi junju̱nk chꞌu̱tal eb laj Israel

¹ Li Ka̱cuaꞌ quia̱tinac riqꞌuin laj Moisés ut laj Aarón ut quixye reheb:

² —Eb laj Israel teꞌxyi̱b lix muheba̱leb chi xjun sutam li tabernáculo ut najt caꞌchꞌin riqꞌuin. Chi junju̱nk chꞌu̱tal teꞌxyi̱b lix muheba̱leb ut teꞌxxakab lix bandereb chokꞌ retalil lix te̱paleb lix yucuaꞌeb.

³ Eb li ralal xcꞌajol laj Judá teꞌxyi̱b lix muheba̱leb saꞌ li este ut teꞌxxakab lix bandereb chokꞌ retalileb. Ut laj Naasón, li ralal laj Aminadab, aꞌan li ta̱cꞌamok be chiruheb.

⁴ Ca̱laju xca̱cꞌa̱l mil riqꞌuin cuakib ciento (74,600) li soldado teꞌcana̱k rubel xtakl laj Naasón.

⁵ Ut chixcꞌatk lix muheba̱leb li ralal xcꞌajol laj Judá teꞌxyi̱b lix muheba̱leb li ralal xcꞌajol laj Isacar. Ut laj Natanael li ralal laj Zuar, aꞌan li ta̱cꞌamok be chiruheb.

⁶ Ca̱laju roxcꞌa̱l mil riqꞌuin ca̱hib ciento (54,400) li soldado li teꞌcana̱k rubel xtakl laj Natanael.

⁷ Ut chixcꞌatk lix naꞌajeb laj Isacar teꞌxyi̱b lix muheba̱leb li ralal xcꞌajol laj Zabulón. Ut laj Eliab li ralal laj Helón, aꞌan li ta̱cꞌamok be chiruheb.

⁸ Ut eb li soldado li teꞌcana̱k rubel xtakl laj Eliab cuanqueb cuuklaju roxcꞌa̱l mil riqꞌuin ca̱hib ciento (57,400).

⁹ Jun ciento mil riqꞌuin cuakib roꞌcꞌa̱l mil ut ca̱hib ciento (186,400) chixjunileb li soldado li teꞌoque̱nk saꞌ xya̱nkeb laj Judá. Aꞌaneb li teꞌxic chi ubej nak teꞌxic saꞌ jalan naꞌajej.

¹⁰ Eb li ralal xcꞌajol laj Rubén teꞌxyi̱b lix muheba̱leb saꞌ li sur ut teꞌxxakab lix bandereb chokꞌ retalileb. Laj Elisur li ralal laj Sedeur, aꞌan li ta̱cꞌamok be chiruheb.

¹¹ Cuakib roxcꞌa̱l mil riqꞌuin o̱b ciento (46,500) li soldado li teꞌcana̱k rubel xtakl laj Elisur.

¹² Chixcꞌatk lix naꞌajeb laj Rubén teꞌxyi̱b lix muheba̱leb li ralal xcꞌajol laj Simeón. Ut laj Selumiel li ralal laj Zurisadai, aꞌan li ta̱cꞌamok be chiruheb.

¹³ Bele̱laju roxcꞌa̱l mil riqꞌuin oxib ciento (59,300) li soldado li teꞌcana̱k rubel xtakl laj Selumiel.

¹⁴ Chixcꞌatk lix naꞌajeb laj Simeón teꞌxyi̱b lix muheba̱leb li ralal xcꞌajol laj Gad. Ut laj Eliasaf li ralal laj Reuel, aꞌan li ta̱cꞌamok be chiruheb.

¹⁵ O̱b roxcꞌa̱l mil riqꞌuin cuakib ciento riqꞌuin laje̱b roxcꞌa̱l (45,650) li soldado li teꞌcana̱k rubel xtakl laj Eliasaf.

¹⁶ Jun ciento riqꞌuin junlaju roxcꞌa̱l mil riqꞌuin ca̱hib ciento riqꞌuin laje̱b roxcꞌa̱l (151,450) chixjunileb li teꞌoque̱nk saꞌ xya̱nkeb laj Rubén. Aꞌaneb li teꞌxic saꞌ li xcab tasal nak teꞌxjal lix naꞌajeb.

¹⁷ Eb laj levita teꞌxic chirixeb li ralal xcꞌajol laj Gad. Teꞌxic saꞌ xyiheb laj Israel ut teꞌxcꞌam li tabernáculo. Teꞌxic chi chꞌu̱tal joꞌ nak queꞌxyi̱b lix muheba̱leb chi chꞌu̱tal. Ac re reheb lix bandereb li teꞌxcꞌam chokꞌ retalileb.

¹⁸ Eb li ralal xcꞌajol laj Efraín teꞌxyi̱b lix muheba̱leb saꞌ li oeste. Ut teꞌxxakab lix bandereb chokꞌ retalileb. Ut laj Elisama li ralal laj Amiud, aꞌan li ta̱cꞌamok be chiruheb.

¹⁹ Caꞌcꞌa̱l mil riqꞌuin o̱b ciento (40,500) li soldado li teꞌcana̱k rubel xtakl laj Elisama.

²⁰ Ut chixcꞌatk lix naꞌajeb li ralal xcꞌajol laj Efraín teꞌxyi̱b lix muheba̱leb li ralal xcꞌajol laj Manasés. Ut laj Gamaliel li ralal laj Pedasur, aꞌan li ta̱cꞌamok be chiruheb.

²¹ Cablaju xcaꞌcꞌa̱l mil riqꞌuin cuib ciento (32,200) li soldado li teꞌcana̱k rubel xtakl laj Gamaliel.

²² Chixcꞌatk lix naꞌajeb li ralal xcꞌajol laj Manasés teꞌxyi̱b lix muheba̱leb li ralal xcꞌajol laj Benjamín. Ut laj Abidán li ralal laj Gedeoni, aꞌan li ta̱cꞌamok be chiruheb.

²³ Oꞌlaju xcaꞌcꞌa̱l mil riqꞌuin ca̱hib ciento (35,400) li soldado li teꞌcana̱k rubel xtakl laj Abidán.

²⁴ Jun ciento mil riqꞌuin cuakxakib mil riqꞌuin jun ciento (108,100) chixjunileb li teꞌoque̱nk saꞌ xya̱nkeb laj Efraín. Aꞌaneb li teꞌxic saꞌ li rox tasal nak teꞌxjal lix naꞌajeb.

²⁵ Eb li ralal xcꞌajol laj Dan teꞌxyi̱b lix muheba̱leb saꞌ li norte. Ut teꞌxxakab lix bandereb chokꞌ retalileb. Ut laj Ahiezer li ralal laj Amisadai, aꞌan li ta̱cꞌamok be chiruheb.

²⁶ Cuib xca̱cꞌa̱l mil riqꞌuin cuukub ciento (62,700) li soldado li teꞌcana̱k rubel xtakl laj Amisadai.

²⁷ Chixcꞌatk lix naꞌajeb laj Dan teꞌxyi̱b lix muheba̱leb li ralal xcꞌajol laj Aser. Ut laj Pagiel li ralal laj Ocrán, aꞌan li ta̱cꞌamok be chiruheb.

²⁸ Jun roxcꞌa̱l mil riqꞌuin o̱b ciento (41,500) li soldado li teꞌcana̱k rubel xtakl laj Pagiel.

²⁹ Chixcꞌatk lix muheba̱leb laj Aser teꞌxyi̱b lix muheba̱leb li ralal xcꞌajol laj Neftalí. Ut laj Ahira li ralal laj Enán, aꞌan li ta̱cꞌamok be chiruheb.

³⁰ Oxlaju roxcꞌa̱l mil riqꞌuin ca̱hib ciento (53,400) li soldado li teꞌcana̱k rubel xtakl laj Ahira.

³¹ Jun ciento mil riqꞌuin cuuklaju roxcꞌa̱l mil riqꞌuin cuakib ciento (157,600) chixjunileb li teꞌoque̱nk saꞌ xya̱nkeb laj Dan. Aꞌaneb li teꞌxic chi ixbej nak teꞌxjal lix naꞌajeb. Ac reheb lix bandereb li teꞌxcꞌam chokꞌ retalileb.

³² Cuakib ciento mil riqꞌuin oxib mil riqꞌuin o̱b ciento riqꞌuin laje̱b roxcꞌa̱l (603,550) chixjunileb li cui̱nk li queꞌajla̱c chi chꞌu̱tal aꞌ yal chanru xqꞌuialeb saꞌ xte̱paleb lix yucuaꞌeb.

³³ Eb laj levita incꞌaꞌ queꞌajla̱c rochbeneb li jun chꞌol chic laj Israel xban nak li Ka̱cuaꞌ quixye re laj Moisés nak incꞌaꞌ teꞌajla̱k.

³⁴ Eb laj Israel queꞌxba̱nu joꞌ quiyeheꞌ re laj Moisés xban li Ka̱cuaꞌ. Queꞌxyi̱b lix muheba̱leb ut queꞌxxakab xbande̱reb joꞌ quiyeheꞌ reheb. Ut queꞌbe̱c chi chꞌu̱tal, aꞌ yal chanru xqꞌuial li ralal xcꞌajol lix yucuaꞌeb.