Números 19 - Li Santil hu

Aꞌan aꞌin li chakꞌrab chirixeb li nequeꞌxmux ribeb

¹ Li Ka̱cuaꞌ quia̱tinac riqꞌuineb laj Moisés ut laj Aarón ut quixye reheb:

² —Aꞌin jun li chakꞌrab li yo̱quin chixtenebanquil saꞌ xbe̱neb laj Israel re teꞌxba̱nu. Te̱ye reheb laj Israel chi joꞌcaꞌin. Cꞌamomak chak jun li ba̱c cak rix ut ma̱cꞌaꞌ re̱cꞌ, li ma̱ jun sut qꞌuebil yugo chirix xcux re ta̱trabajik.

³ Li ba̱c ta̱cꞌamekꞌ riqꞌuin laj Eleazar laj tij. Ut aꞌan tixcꞌam chirix lix naꞌaj lix muheba̱leb ut aran ta̱camsi̱k chiru laj Eleazar.

⁴ Ut laj Eleazar tixchap caꞌchꞌinak lix quiqꞌuel ut riqꞌuin li ruꞌuj rukꞌ tixrach li quicꞌ cuukub sut saꞌ xjayal li tabernáculo.

⁵ Ta̱cꞌatekꞌ chiru laj tij chixjunil li cuacax, joꞌ lix tzꞌu̱mal, lix tibel, lix quiqꞌuel ut lix cꞌamcꞌot.

⁶ Ut laj tij tixcut saꞌ xbe̱n li cuacax li yo̱ chi cꞌatc caꞌchꞌin li cheꞌ chacalteꞌ, jun li rukꞌ li pim hisopo ut caꞌchꞌin li caki tꞌicr lana.

⁷ Chirix aꞌan laj tij tixpuchꞌ li rakꞌ ut ta̱ati̱nk. Ut ta̱oc cuiꞌchic saꞌ li naꞌajej li cuan cuiꞌ lix muheba̱leb. Abanan muxbilak ru nak toj ta̱ecuu̱k.

⁸ Joꞌcan ajcuiꞌ ani ta̱cꞌatok re li cuacax, tento nak tixpuchꞌ li rakꞌ ut ta̱ati̱nk. Ut aꞌan muxbilak ajcuiꞌ ru toj ta̱ecuu̱k.

⁹ Ut junak li cui̱nk li incꞌaꞌ muxbil ru tixxoc lix chahil li cuacax ut tixcanab saꞌ junak li naꞌajej li incꞌaꞌ muxbil ru chirix li naꞌajej li cuanqueb cuiꞌ lix muheba̱leb. Eb laj Israel teꞌxxoc li cha re nak teꞌxyi̱b li haꞌ li ta̱cꞌanjelak re xsantobresinquileb.

¹⁰ Tento nak tixpuchꞌ li rakꞌ li cui̱nk li ta̱xocok re lix chahil li cuacax. Ut muxbilak ru li cui̱nk aꞌan toj ta̱oc li kꞌojyi̱n. Aꞌin jun li chakꞌrab li te̱ba̱nu chalen anakcuan ut chi junelic, la̱ex aj Israel, joꞌ eb ajcuiꞌ li jalan xtenamiteb li cuanqueb saꞌ e̱ya̱nk.

¹¹ Li ani tixchꞌeꞌ junak camenak muxbil ru ta̱cana̱k chiru cuukub cutan.

¹² Saꞌ li rox li cutan ut saꞌ li xcuuk li cutan tento nak tixsantobresi rib riqꞌuin li haꞌ re santobresi̱nc. Abanan cui incꞌaꞌ naxsantobresi rib saꞌ li rox cutan ut saꞌ li xcuuk li cutan, muxbilak ajcuiꞌ ru ta̱cana̱k.

¹³ Yalak ani li ta̱chꞌeꞌok re junak camenak ut incꞌaꞌ tixsantobresi rib, li jun aꞌan tixmux ru lix tabernáculo li Ka̱cuaꞌ. Tento nak ta̱isi̱k saꞌ xya̱nkeb laj Israel. Muxbil ru ta̱cana̱k xban nak incꞌaꞌ quirachrachi̱c li haꞌ saꞌ xbe̱n re santobresi̱c.

¹⁴ Aꞌin li chakꞌrab tinqꞌue chirixeb li cuanqueb saꞌ li muheba̱l bar cuiꞌ nacam junak: muxbilakeb ru li cuanqueb saꞌ li muheba̱l ut muxbilakeb ru li ani teꞌoc saꞌ li muheba̱l aꞌan. Muxbilak ruheb chiru cuukub cutan.

¹⁵ Ut chixjunil li cuc, malaj ut li ucꞌal li ma̱cꞌaꞌ xtzꞌapbal re ut li incꞌaꞌ tzꞌaptzꞌo chi us muxbileb ru.

¹⁶ Ut muxbilak ajcuiꞌ ru li ani ta̱chꞌeꞌok re junak camenak saꞌ cꞌaleba̱l, usta quicamsi̱c chi chꞌi̱chꞌ, malaj ut yal nacam chi joꞌcan. Ut muxbilak ru li ani ta̱chꞌeꞌok re xbakel li camenak malaj ut junak li mukleba̱l. Muxbil ru ta̱cana̱k chiru cuukub cutan.

¹⁷ Joꞌcaꞌin nak ta̱santobresi̱k li ani tixmux rib. Ta̱qꞌuehekꞌ caꞌchꞌinak lix chahil li cuacax li cak rix li quicꞌateꞌ re xtojbal rix li ma̱c saꞌ junak ucꞌal rochben caꞌchꞌinak li haꞌ li qui-isi̱c saꞌ junak li yuꞌam haꞌ.

¹⁸ Chirix aꞌan junak li cui̱nk li incꞌaꞌ muxbil ru tixchap jun li rukꞌ cheꞌ hisopo ut tixtzꞌa saꞌ li haꞌ. Ut riqꞌuin li rukꞌ li hisopo tixrachrachi li haꞌ chiru li muheba̱l ut chiruheb chixjunil li cꞌaꞌak re ru cuan saꞌ li muheba̱l. Ut tixrachrachi ajcuiꞌ saꞌ xbe̱neb li cristian li cuanqueb aran. Tento nak ta̱rachrachi̱k li haꞌ saꞌ xbe̱neb li queꞌchꞌeꞌoc re xbakel li camenak, malaj ut li mukleba̱l, malaj ut junak li camenak li quicamsi̱c chi chꞌi̱chꞌ, malaj ut quicam yal chi joꞌcan.

¹⁹ Li cui̱nk li incꞌaꞌ muxbil ru tixrachrachi li haꞌ saꞌ xbe̱n li muxbil ru saꞌ li rox cutan ut saꞌ li xcuuk li cutan. Saꞌ li xcuuk li cutan ta̱santobresi̱k li muxbil ru. Tento nak tixpuchꞌ li rakꞌ ut ta̱ati̱nk re nak santobresinbilak chic nak ta̱oc li kꞌojyi̱n.

²⁰ Abanan cui incꞌaꞌ tixsantobresi rib junak li muxbil ru, tento nak li jun aꞌan ta̱isi̱k saꞌ xya̱nkeb laj Israel xban nak quixmux ru lix tabernáculo li Ka̱cuaꞌ. Muxbil ru ta̱cana̱k xban nak incꞌaꞌ quirachrachi̱c li haꞌ saꞌ xbe̱n re santobresi̱c.

²¹ Aꞌin jun li chakꞌrab tento te̱ba̱nu chalen anakcuan ut chi junelic. Ut li ani narachrachin li haꞌ re santobresi̱c, tento nak tixpuchꞌ li rakꞌ. Ut li ani ta̱chꞌeꞌok re li haꞌ re santobresi̱c muxbilak chic ru ta̱cana̱k toj ta̱ecuu̱k.

²² Li cꞌaꞌak re ru ta̱chꞌeꞌekꞌ xban junak cristian muxbil ru, muxbilak chic ru ta̱cana̱k toj ta̱ecuu̱k.