Números 18 - Li Santil hu

Joꞌcaꞌin nak teꞌcꞌanjelak eb laj tij ut li jun chꞌoleb chic laj levita

¹ Li Ka̱cuaꞌ quixye re laj Aarón: —Cui junak tixmux ru li tabernáculo, li ma̱c aꞌan ta̱cana̱k saꞌ a̱be̱n la̱at ut saꞌ xbe̱neb la̱ cualal ut saꞌ xbe̱neb ajcuiꞌ laj levita. Abanan cui junak ta̱paltok nak yo̱k chixba̱nunquil lix cꞌanjel eb laj tij, li ma̱c ta̱cana̱k saꞌ a̱be̱n la̱at ut saꞌ xbe̱neb la̱ cualal.

² Qꞌueheb xcꞌanjel la̱ cuechꞌalal, li ralal xcꞌajol laj Leví, re nak textenkꞌa nak yo̱kex chi cꞌanjelac saꞌ li tabernáculo la̱at ut eb la̱ cualal.

³ Teꞌcua̱nk rubel la̱ takl. Teꞌcꞌanjelak saꞌ li tabernáculo. Abanan incꞌaꞌ naru teꞌnachꞌok riqꞌuin li cꞌaꞌak re ru li cuan saꞌ li Santil Naꞌajej chi moco teꞌnachꞌok riqꞌuin li artal. Cui teꞌxba̱nu aꞌan, teꞌca̱mk eb aꞌan ut texca̱mk ajcuiꞌ la̱ex.

⁴ Teꞌcꞌanjelak a̱cuochben ut teꞌxba̱nu li cꞌanjel saꞌ li tabernáculo. Ma̱ jun jalan naru teꞌtenkꞌa̱nk e̱re nak yo̱kex chi cꞌanjelac saꞌ li tabernáculo.

⁵ Caꞌaj cuiꞌ la̱at ut eb la̱ cualal naru te̱ba̱nu li cꞌanjel saꞌ li Santil Naꞌajej ut saꞌ li artal re nak incꞌaꞌ chic tinjoskꞌokꞌ saꞌ xbe̱neb laj Israel.

⁶ La̱in quinsicꞌoc ruheb laj levita la̱ comon saꞌ xya̱nkeb laj Israel re teꞌtenkꞌa̱nk e̱re. Eb aꞌan kꞌaxtesinbileb cue la̱in. Joꞌcan nak ta̱ru̱k teꞌcꞌanjelak chicuu saꞌ li tabernáculo.

⁷ Abanan caꞌaj cuiꞌ la̱at ut eb la̱ cualal ta̱ru̱k teꞌcꞌanjelak chokꞌ aj tij chiru li artal ut saꞌ li Lokꞌlaj Santil Naꞌajej. La̱in quinxakaban e̱re la̱ex chi cꞌanjelac chokꞌ aj tij. Cui junak jalan ta̱oc chixba̱nunquil li cꞌanjel qꞌuebil e̱re saꞌ li Santil Naꞌajej, li jun aꞌan ta̱camsi̱k.

⁸ Ut li Ka̱cuaꞌ quixye re laj Aarón: —La̱in xinteneb ajcuiꞌ saꞌ e̱be̱n rilbal li mayej li naqꞌueheꞌ cue. Chixjunil li santil mayej li nequeꞌxqꞌue eb laj Israel la̱in tinqꞌue e̱re ut reheb la̱ cualal. Li ma̱tan aꞌan e̱rehak anakcuan ut chi junelic kꞌe cutan.

⁹ Ut tinqꞌue ajcuiꞌ e̱re li santil mayej li incꞌaꞌ nacꞌatman. Textzꞌak ajcuiꞌ li mayej re li xbe̱n ru li acui̱mk, li mayej re xtojbal rix li ma̱c, ut re xtzꞌa̱manquil xcuybal li ma̱c nak junak naxkꞌet junak li chakꞌrab. Chixjunil li ta̱qꞌuehekꞌ cue chokꞌ mayej, a̱cuehak la̱at ut rehakeb la̱ cualal.

¹⁰ La̱ex aj tij saꞌ li tabernáculo te̱tzaca li mayej aꞌin. Ut la̱ex li textzaca̱nk re, te̱qꞌue retal nak santo li tzacae̱mk aꞌin.

¹¹ Ut tinqꞌue ajcuiꞌ a̱cue li mayej li nequeꞌxqꞌue cue eb laj Israel li nequetaksi saꞌ e̱rukꞌ chicuu chiru li artal. La̱in ninqꞌue a̱cue ut reheb la̱ cualal a̱cꞌajol. Teꞌxtzacaheb li mayej aꞌin chixjunileb li cuanqueb saꞌ la̱ cuochoch li incꞌaꞌ muxbil ruheb. Aꞌin jun li chakꞌrab li ta̱cua̱nk chi junelic.

¹² La̱in tinqꞌue e̱re chixjunil li xbe̱n ru li acui̱mk, ut li cha̱bil aceite ut li cha̱bil vino li nequeꞌxqꞌue eb laj Israel chokꞌ xmayejeb.

¹³ Chixjunil li xbe̱n ru li acui̱mk li nequeꞌxqꞌue cue chokꞌ xmayejeb la̱in tinqꞌue e̱re. Chixjunileb li cuanqueb saꞌ le̱ rochoch, li incꞌaꞌ muxbileb ru, naru teꞌxtzaca li mayej aꞌin.

¹⁴ Chixjunileb li mayej li nequeꞌxyechiꞌi cue eb laj Israel, la̱in tinqꞌue e̱re.

¹⁵ Chixjunileb li xbe̱n alalbej li nequeꞌkꞌaxtesi cue, la̱in tinqꞌue e̱re. Ut tinqꞌue e̱re li xbe̱n ral li xul. Abanan tento nak te̱cꞌul xtzꞌak li xbe̱n alalbej li ani ta̱raj tixtoj rix. Ut te̱cꞌul ajcuiꞌ xtzꞌak li xbe̱n ral li xul li te̱lom li incꞌaꞌ naru te̱tzaca xtibel.

¹⁶ Nak ac xba̱nu jun po tento teꞌxtoj rix. Lix tzꞌak, aꞌan o̱b chi tumin plata, joꞌ nequeꞌbisoc saꞌ li tabernáculo.

¹⁷ Abanan, incꞌaꞌ naru xtojbal rix li xbe̱n ral li cuacax, li carner ut li chiba̱t. Aꞌan cueheb la̱in. Tento nak teꞌmayeja̱k chicuu. Ta̱rachrachi lix quiqꞌuel chiru li artal ut ta̱cꞌat lix xe̱bul. Ut aꞌanak jun li sununquil cꞌatbil mayej ta̱cuulak chicuu la̱in li Ka̱cuaꞌ.

¹⁸ Lix tibel li xul aꞌan tinqꞌue a̱cue, ut a̱cue ajcuiꞌ li re xchꞌo̱l ut li rukꞌ li cuan saꞌ xnim, li nequetaksi saꞌ e̱rukꞌ chicuu la̱in li Ka̱cuaꞌ.

¹⁹ Chalen anakcuan ut chi junelic la̱in ninye nak a̱cue ut reheb la̱ cualal a̱cꞌajol li mayej li teꞌxqꞌue cue eb laj Israel. Aꞌin jun li contrato incꞌaꞌ najala li xinba̱nu a̱cuiqꞌuin ut riqꞌuineb la̱ cualal a̱cꞌajol chi junelic.—

²⁰ Li Ka̱cuaꞌ quixye re laj Aarón: —Incꞌaꞌ textzꞌak chꞌochꞌ saꞌ xya̱nkeb laj Israel. Ma̱cꞌaꞌ te̱re̱chani saꞌ li naꞌajej li tinqꞌue reheb laj Israel. Caꞌaj cuiꞌ la̱in tine̱re̱chani. Caꞌaj cuiꞌ la̱in tinqꞌuehok e̱re li cꞌaꞌru nequeraj.

²¹ Eb li ralal xcꞌajol laj Leví teꞌxcꞌul li junju̱nk saꞌ xlaje̱tkil li cꞌaꞌru cuan reheb laj Israel re xtojbal rix li cꞌanjel li teꞌxba̱nu saꞌ li tabernáculo.

²² Eb li ma̱cuaꞌeb aj levita incꞌaꞌ naru teꞌnachꞌok riqꞌuin li tabernáculo. Cui teꞌxba̱nu aꞌan, teꞌma̱cobk chicuu ut teꞌca̱mk.

²³ Eb laj levita, aꞌaneb li teꞌba̱nu̱nk li cꞌanjel saꞌ li tabernáculo. Cui junak tixmux ru li tabernáculo, ta̱cana̱k saꞌ xbe̱neb aꞌan li ma̱c. Aꞌin jun li chakꞌrab teꞌxba̱nu eb aꞌan ut teꞌxba̱nu ajcuiꞌ li ralal xcꞌajol li teꞌcua̱nk mokon. Incꞌaꞌ teꞌxcꞌul xchꞌochꞌeb laj levita saꞌ xya̱nkeb laj Israel.

²⁴ Tinqꞌue ban e̱re la̱ex li junju̱nk saꞌ xlaje̱tkil li teꞌxqꞌue eb laj Israel chokꞌ xmayej chicuu la̱in li Ka̱cuaꞌ. Xban aꞌan nak xinye nak ma̱cꞌaꞌ teꞌre̱chani eb li ralal xcꞌajol laj Leví saꞌ lix naꞌajeb laj Israel.—

²⁵ Ut li Ka̱cuaꞌ quia̱tinac riqꞌuin laj Moisés ut quixye re:

²⁶ —Ta̱ye reheb li ralal xcꞌajol laj Leví chi joꞌcaꞌin: Tento nak te̱toj li junju̱nk saꞌ xlaje̱tkil li joꞌ qꞌuial li te̱cꞌul riqꞌuineb laj Israel nak nequeꞌxqꞌue li junju̱nk saꞌ xlaje̱tkil cue la̱in li Ka̱cuaꞌ.

²⁷ Nak te̱toj li junju̱nk saꞌ xlaje̱tkil, la̱in tincꞌul joꞌ nak nincꞌul li mayej li nequeꞌxqꞌue laj Israel nak nequeꞌxqꞌue li xbe̱n ru li racui̱mkeb trigo malaj li xyaꞌal li uvas.

²⁸ Joꞌcaꞌin nak te̱qꞌue le̱ mayej re li Ka̱cuaꞌ nak te̱cꞌul li junju̱nk saꞌ xlaje̱tkil li teꞌxqꞌue re li Ka̱cuaꞌ eb laj Israel. La̱ex laj levita te̱qꞌue re laj Aarón laj tij li junju̱nk saꞌ xlaje̱tkil li nequecꞌul.

²⁹ Nak te̱qꞌue li junju̱nk saꞌ xlaje̱tkil chicuu la̱in li Ka̱cuaꞌ, te̱sicꞌ ru li kꞌaxal cha̱bil xban nak santo li kꞌaxtesinbil chicuu.

³⁰ Ta̱ye ajcuiꞌ reheb nak te̱toj li junju̱nk saꞌ xlaje̱tkil, la̱in tincꞌul joꞌ nak nincꞌul li mayej li nequeꞌxqꞌue laj Israel nak nequeꞌxqꞌue li xbe̱n ru li racui̱mkeb trigo ut li xyaꞌal li uva.

³¹ La̱ex joꞌ eb ajcuiꞌ li cuanqueb saꞌ le̱ rochoch naru te̱tzaca yalak bar li na-elaꞌan xban nak aꞌan xtojbal li cꞌanjel li nequeba̱nu saꞌ li tabernáculo.

³² Cui te̱qꞌue re li Ka̱cuaꞌ li kꞌaxal cha̱bil, ma̱cꞌaꞌak le̱ ma̱c. Incꞌaꞌ te̱mux ru lix santil mayejeb laj Israel re nak incꞌaꞌ texca̱mk, chan li Dios.