Números 17 - Li Santil hu

Nak qui-atzꞌumac lix xukꞌ laj Aarón

¹ Li Ka̱cuaꞌ quia̱tinac riqꞌuin laj Moisés ut quixye re:

² —Ta̱ye reheb li cablaju li nequeꞌjolomin reheb li junju̱nk xte̱paleb laj Israel nak teꞌxcꞌam junju̱nk li xukꞌ a̱cuiqꞌuin. Ut la̱at ta̱tzꞌi̱ba xcꞌabaꞌ li junju̱nk chiru lix xukꞌ.

³ Saꞌ lix xukꞌ laj Leví ta̱tzꞌi̱ba lix cꞌabaꞌ laj Aarón. Tento nak cua̱nk jun xxukꞌeb li nequeꞌjolomin reheb li cablaju xte̱paleb laj Israel.

⁴ Ta̱qꞌueheb li xukꞌ saꞌ li tabernáculo chiru li Lokꞌlaj Ca̱x li cuan cuiꞌ li contrato li ninhilan cuiꞌ la̱in.

⁵ Lix xukꞌ li cui̱nk li tinsicꞌ ru la̱in ta̱atzꞌumak. Riqꞌuin aꞌin teꞌxcanab cuechꞌi̱nc eb laj Israel che̱rix la̱ex, chan li Dios.

⁶ Joꞌcan nak laj Moisés quia̱tinac riqꞌuineb laj Israel. Ut eb li cablaju li nequeꞌjolomin reheb lix te̱paleb laj Israel queꞌxqꞌue junju̱nk li xukꞌ saꞌ xcꞌabaꞌeb lix xeꞌto̱nil yucuaꞌeb. Ut lix xukꞌ laj Aarón cuan saꞌ xya̱nkeb.

⁷ Ut laj Moisés quixqꞌueheb li xukꞌ chiru li Ka̱cuaꞌ saꞌ li tabernáculo.

⁸ Cuulajak chic laj Moisés qui-oc saꞌ li tabernáculo ut quiril nak lix xukꞌ li queꞌxqꞌue saꞌ xcꞌabaꞌ laj Leví ac x-el xtux. Ut qui-atzꞌumac ut quiru̱chin li almendra.

⁹ Laj Moisés quirisiheb li xukꞌ saꞌ li tabernáculo chiru li Ka̱cuaꞌ. Ut quixcꞌut chiruheb laj Israel. Queꞌril ut li junju̱nk queꞌxchap lix xukꞌ.

¹⁰ Ut li Ka̱cuaꞌ quixye re laj Moisés: —Ta̱xoc lix xukꞌ laj Aarón ut ta̱qꞌue chiru li Lokꞌlaj Ca̱x chokꞌ retalil chiruheb li nequeꞌcuechꞌin. Riqꞌuin aꞌin teꞌxcanab li cuechꞌi̱nc chicuix re nak incꞌaꞌ teꞌca̱mk, chan.

¹¹ Ut laj Moisés quixba̱nu joꞌ quixye li Ka̱cuaꞌ re.

¹² Abanan eb laj Israel queꞌxye re laj Moisés: —La̱o toca̱mk. Osocꞌ ke. Ta̱sachekꞌ ku.

¹³ Yalak ani ta̱nachꞌok riqꞌuin lix tabernáculo li Ka̱cuaꞌ ta̱ca̱mk. Chikajunilo la̱o to-osokꞌ, chanqueb.