Números 15 - Li Santil hu

Li chakꞌrab chirix li mayejac

¹ Ut li Ka̱cuaꞌ quia̱tinac riqꞌuin laj Moisés ut quixye re:

² —Ta̱ye reheb laj Israel chi joꞌcaꞌin: —Nak tex-oc saꞌ li naꞌajej li tinqꞌue e̱re re texcua̱nk, texmayejak chicuu.

³ Te̱qꞌue li cꞌatbil mayej chicuu la̱in li Ka̱cuaꞌ. Te̱sicꞌ ru jun li toro malaj ut junak carner ut te̱cꞌat re xqꞌuebal inlokꞌal ut lix bo̱c ta̱cuulak chicuu joꞌ jun sununquil mayej. Te̱ba̱nu chi joꞌcan re nak ta̱tzꞌaklok ru li xeyechiꞌi cue, malaj ut chokꞌ re le̱ mayej li na-ala saꞌ e̱chꞌo̱l xqꞌuebal, malaj ut chokꞌ re le̱ ninkꞌe re inlokꞌoninquil, chan li Ka̱cuaꞌ.

⁴ Li ani tixcꞌam lix mayej tixqꞌue ajcuiꞌ rochben lix mayej numenak ca̱hib libra li cha̱bil cꞌaj junajinbil riqꞌuin numenak jun litro li aceite.

⁵ Ut tixqꞌue ajcuiꞌ chokꞌ xmayej jun litro li vino rochben li junju̱nk chi carner li tixqꞌue chokꞌ xcꞌatbil mayej.

⁶ Rochbeneb li junju̱nk chi te̱lom carner te̱qꞌue chokꞌ e̱mayej caꞌchꞌin ma̱ bele̱b libra li cha̱bil cꞌaj junajinbil riqꞌuin numenak jun litro li aceite.

⁷ Ut chokꞌ re li mayej vino te̱qꞌue numenak jun litro li vino. Aꞌanak jun sununquil mayej ta̱cuulak chicuu.

⁸ Nak te̱qꞌue jun li toro toj sa̱j chokꞌ re e̱cꞌatbil mayej, malaj ut re li mayej re xba̱nunquil li cꞌaꞌru xeyechiꞌi, malaj ut re xcꞌambal e̱rib saꞌ usilal riqꞌuin li Ka̱cuaꞌ,

⁹ te̱cꞌam rochben li toro jun li mayej cꞌaj. Te̱cꞌam numenak oxlaju libra li cha̱bil cꞌaj junajinbil riqꞌuin cuib litro li aceite.

¹⁰ Ut te̱cꞌam ajcuiꞌ cuib litro li vino. Aꞌanak jun li sununquil cꞌatbil mayej ta̱cuulak chicuu.

¹¹ Aꞌan aꞌin li ta̱qꞌuehekꞌ rochben li junju̱nk chi toro malaj ut li carner te̱lom malaj ut li carner toj sa̱j malaj ut li junju̱nk chi chiba̱t toj sa̱j.

¹² Joꞌcan te̱qꞌue le̱ mayej aꞌ yal jarub li xul li te̱mayeja. Te̱ba̱nu chi joꞌcan riqꞌuin li junju̱nk chi mayej xul.

¹³ Chixjunileb laj Israel teꞌxba̱nu chi joꞌcan nak teꞌxqꞌue lix cꞌatbil mayej. Ut aꞌanak jun li sununquil cꞌatbil mayej ta̱cuulak chiru li Ka̱cuaꞌ.

¹⁴ Joꞌcan ajcuiꞌ eb li jalaneb xtenamit li cuanqueb saꞌ e̱ya̱nk, joꞌ ajcuiꞌ li yal numecꞌ reheb. Teꞌxba̱nu joꞌ nequeba̱nu la̱ex nak teꞌxqꞌue lix cꞌatbil mayej. Ut aꞌanak jun sununquil cꞌatbil mayej ta̱cuulak chicuu. Teꞌxba̱nu chi joꞌcan anakcuan joꞌ eb ajcuiꞌ li ralal xcꞌajol li teꞌcua̱nk mokon.

¹⁵ Li chakꞌrab aꞌin qꞌuebil e̱re la̱ex ut qꞌuebil ajcuiꞌ reheb li jalaneb xtenamit li cuanqueb saꞌ e̱ya̱nk. Aꞌin jun li chakꞌrab te̱ba̱nu chi junelic la̱ex joꞌ eb ajcuiꞌ li jalaneb xtenamit li cuanqueb saꞌ e̱ya̱nk.

¹⁶ Li chakꞌrab li te̱ba̱nu la̱ex, aꞌan ajcuiꞌ li teꞌxba̱nu li jalaneb xtenamit li cuanqueb saꞌ e̱ya̱nk.

¹⁷ Li Ka̱cuaꞌ quia̱tinac riqꞌuin laj Moisés ut quixye re:

¹⁸ —Ta̱ye reheb laj Israel chi joꞌcaꞌin. Nak tex-oc saꞌ li naꞌajej li yo̱quin cuiꞌ che̱cꞌambal,

¹⁹ ut nak te̱tiquib xtzacanquil li ru li acui̱mk li na-el saꞌ le̱ chꞌochꞌ, te̱qꞌue le̱ mayej chicuu.

²⁰ Te̱qꞌue chokꞌ e̱mayej jun li caxlan cua te̱yi̱b riqꞌuin li xbe̱n ru li trigo. Te̱ba̱nu joꞌ nequeba̱nu nak nequeqꞌue li mayej re li xbe̱n ru li trigo nak nequerisi saꞌ rix.

²¹ Li mayej caxlan cua aꞌin junelic te̱mayeja chicuu la̱ex joꞌ eb ajcuiꞌ le̱ ralal e̱cꞌajol li teꞌcua̱nk mokon.

²² Ma̱re la̱ex te̱kꞌet eb li chakꞌrab aꞌin li quinqꞌue re laj Moisés chi incꞌaꞌ yal naraj e̱chꞌo̱l.

²³ Ma̱re chalen nak quinqꞌue li chakꞌrab aꞌin re laj Moisés toj anakcuan la̱ex incꞌaꞌ te̱ba̱nu chixjunil li cꞌaꞌak re ru aꞌin.

²⁴ Cui xexpaltoꞌ chi incꞌaꞌ yal naraj e̱chꞌo̱l, tento nak che̱junilex te̱qꞌue chokꞌ e̱cꞌatbil mayej jun li toro toj sa̱j chokꞌ sununquil mayej li ta̱cuulak chicuu. Ut te̱qꞌue rochben li mayej cꞌaj ut li mayej vino. Ut te̱qꞌue ajcuiꞌ jun li te̱lom chiba̱t re xtzꞌa̱manquil xcuybal li ma̱c.

²⁵ Laj tij ta̱mayejak re xtojbal rix le̱ ma̱c che̱junilex la̱ex aj Israel ut la̱in tincuy le̱ ma̱c xban nak xekꞌet li chakꞌrab chi incꞌaꞌ yal xraj e̱chꞌo̱l, ut xban nak te̱qꞌue le̱ cꞌatbil mayej chicuu ut te̱qꞌue ajcuiꞌ le̱ mayej re xtzꞌa̱manquil xcuybal le̱ ma̱c.

²⁶ Ut ta̱cuyekꞌ e̱ma̱c che̱junilex la̱ex laj Israel joꞌ eb ajcuiꞌ li jalaneb xtenamit li cuanqueb saꞌ e̱ya̱nk, xban nak che̱junilex la̱ex cuan e̱ma̱c nak xekꞌet li chakꞌrab.

²⁷ Abanan cui jun ajcuiꞌ naxkꞌet li chakꞌrab chi incꞌaꞌ yal xraj xchꞌo̱l, li jun aꞌan tixcꞌam jun li ixki chiba̱t jun chihab cuan re, re xtzꞌa̱manquil xcuybal lix ma̱c.

²⁸ Ut laj tij tixmayeja li chiba̱t chiru li Ka̱cuaꞌ re xtojbal rix lix ma̱c li ani ta̱ma̱cobk chi incꞌaꞌ yal xraj xchꞌo̱l. Ut ta̱cuyekꞌ xma̱c nak tixqꞌue lix mayej xul.

²⁹ Li chakꞌrab aꞌin e̱re la̱ex aj Israel ut reheb li jalaneb xtenamit li cuanqueb saꞌ e̱ya̱nk. Jun ajcuiꞌ li chakꞌrab li tento te̱ba̱nu nak nequexma̱cob chi incꞌaꞌ yal naraj e̱chꞌo̱l.

³⁰ Abanan li ani naxkꞌet junak li chakꞌrab chi yal naraj xchꞌo̱l, li jun aꞌan ta̱camsi̱k usta aj Israel usta jalan xtenamit. Ta̱camsi̱k xban nak quinixtzꞌekta̱na la̱in li Ka̱cuaꞌ.

³¹ Xban nak quixkꞌet li cꞌaꞌru quinye la̱in li Ka̱cuaꞌ ut quixtzꞌekta̱na lin chakꞌrab, li jun aꞌan cuan xma̱c nak ta̱camsi̱k.

³² Saꞌ jun li cutan nak toj cuanqueb saꞌ li chaki chꞌochꞌ eb laj Israel, jun li cui̱nk co̱ chixsicꞌbal xsiꞌ saꞌ li hiloba̱l cutan.

³³ Eb li queꞌtaꞌoc re chixsicꞌbal lix siꞌ queꞌxcꞌam li cui̱nk riqꞌuin laj Moisés ut laj Aarón chiruheb chixjunileb li tenamit.

³⁴ Ut queꞌxqꞌue saꞌ tzꞌalam xban nak incꞌaꞌ queꞌxnau cꞌaꞌru teꞌxba̱nu riqꞌuin.

³⁵ Li Ka̱cuaꞌ quixye re laj Moisés: —Ma̱cꞌaꞌ xjalenquil. Tento nak ta̱camsi̱k li cui̱nk aꞌan. Chixjunileb li tenamit teꞌxcuti chi pec chirix li naꞌajej li cuanqueb cuiꞌ lix muheba̱leb, chan.

³⁶ Joꞌcan nak eb li tenamit queꞌxcꞌam chirix li naꞌajej li cuanqueb cuiꞌ lix muheba̱leb ut queꞌxcuti chi pec toj retal quicam joꞌ quixye li Ka̱cuaꞌ re laj Moisés.

³⁷ Li Ka̱cuaꞌ quia̱tinac riqꞌuin laj Moisés ut quixye re:

³⁸ —Ta̱ye reheb laj Israel chi joꞌcaꞌin. Chalen anakcuan ut chi junelic la̱ex ut eb le̱ ralal e̱cꞌajol li teꞌcua̱nk mokon te̱yi̱b xtzuc le̱ rakꞌ chire ut saꞌ xya̱nk lix tzuc te̱qꞌue li nokꞌ azul.

³⁹ Nak te̱ril lix sahob ru le̱ rakꞌ ta̱julticokꞌ e̱re chixjunil li chakꞌrab li quinqꞌue e̱re re te̱ba̱nu. Ut incꞌaꞌ te̱mux e̱rib riqꞌuin xba̱nunquil li nequeraj e̱junes joꞌ nequeꞌxba̱nu eb li ixk li nequeꞌxcꞌayi ribeb.

⁴⁰ La̱ex te̱ba̱nu chixjunil li chakꞌrab li xinqꞌue e̱re ut santobresinbilakex chicuu la̱in le̱ Dios.

⁴¹ La̱in li Ka̱cuaꞌ le̱ Dios li quin-isin chak e̱re saꞌ li naꞌajej Egipto re nak la̱inak le̱ Dios. La̱in li Ka̱cuaꞌ le̱ Dios.