Números 14 - Li Santil hu

Eb laj Israel nequeꞌxkꞌetkꞌeti ribeb chiru li Ka̱cuaꞌ

¹ Chiru li kꞌojyi̱n aꞌan chixjunileb laj Israel japjo̱queb re chi ya̱bac.

² Ut queꞌxcuechꞌi rix laj Moisés ut laj Aarón ut chixjunileb yo̱queb chixyebal: —Kꞌaxal us raj nak saꞌ li tenamit Egipto ta xocam chak malaj ut us raj toca̱mk arin saꞌ li chaki chꞌochꞌ.

³ ¿Cꞌaꞌut nak xoxcꞌam chak li Ka̱cuaꞌ saꞌ li naꞌajej aꞌin yal re nak tocamsi̱k? Ut, ¿cꞌaꞌut nak tixcanabeb chi chapecꞌ li kixakil ut eb li kacocꞌal? ¿Ma incꞌaꞌ raj us nak tosukꞌi̱k cuiꞌchic Egipto? chanqueb.

⁴ Ut queꞌoc chixcꞌu̱banquil chi ribileb rib nak teꞌxsicꞌ ru junak li ta̱cꞌamok be chiruheb re teꞌsukꞌi̱k cuiꞌchic Egipto.

⁵ Ut laj Moisés ut laj Aarón queꞌxcut rib chiru chꞌochꞌ chiruheb chixjunileb laj Israel xban xrahil xchꞌo̱leb.

⁶ Ut laj Josué li ralal laj Nun ut laj Caleb li ralal laj Jefone queꞌxpeji li rakꞌeb xban xrahil xchꞌo̱leb. Aꞌaneb xcomoneb li queꞌcuulac chak chixqꞌuebal retal li naꞌajej.

⁷ Ut queꞌxye reheb chixjunileb laj Israel: —Li chꞌochꞌ li xocuulac chak chirilbal, aꞌan kꞌaxal cha̱bil.

⁸ Cui li Dios sahak saꞌ xchꞌo̱l kiqꞌuin, aꞌan ta̱tenkꞌa̱nk ke chi oc saꞌ li naꞌajej aꞌan. Aꞌan ta̱kꞌaxtesi̱nk re saꞌ kukꞌ li cha̱bil naꞌajej aꞌan, li na-el cuiꞌ nabal li sahil echej.

⁹ Joꞌcan nak me̱kꞌetkꞌeti e̱rib chiru li Ka̱cuaꞌ ut mexxucuac chiruheb li tenamit li cuanqueb saꞌ li naꞌajej aꞌan xban nak la̱o tonumta̱k saꞌ xbe̱neb ut take̱chaniheb. Eb aꞌan ma̱ ani natenkꞌan reheb, abanan la̱o cuan li Ka̱cuaꞌ li nimajcual Dios kiqꞌuin chikatenkꞌanquil. Joꞌcan nak mexxucuac, chanqueb laj Josué ut laj Caleb.

¹⁰ Abanan eb laj Israel queꞌoc raj chixcutbaleb chi pec. Aꞌut li nimajcual Dios quixcꞌutbesi lix lokꞌal chiruheb saꞌ li tabernáculo.

¹¹ Ut li Ka̱cuaꞌ quixye re laj Moisés: —¿Joꞌ najtil chic tincuy nak yo̱keb chincuechꞌinquil li tenamit aꞌin? Ut, ¿joꞌ najtil chic yo̱keb chintzꞌekta̱nanquil ut incꞌaꞌ tineꞌxpa̱b, usta nabal li sachba chꞌo̱lej xincꞌut chiruheb?

¹² La̱in tinqꞌue junak caki yajel saꞌ xbe̱neb re nak teꞌca̱mk. Tinsach ruheb. Abanan la̱ cualal a̱cꞌajol la̱at tinqꞌueheb chokꞌ junak tenamit kꞌaxal nim ut kꞌaxal cauhakeb rib chiruheb aꞌan, chan li Dios.

¹³ Ut laj Moisés quixye re li Ka̱cuaꞌ: —La̱at xat-isin chak reheb saꞌ li tenamit Egipto riqꞌuin xnimal la̱ cuanquil. Cui ta̱camsiheb laj Israel, eb laj Egipto teꞌrabi resil cꞌaꞌru ta̱ba̱nu.

¹⁴ Ut teꞌxye resil reheb li cuanqueb Canaán. Eb aꞌan ac xeꞌrabi a̱cuesil. Ac nequeꞌxnau nak cuancat kiqꞌuin ut xcuil a̱cuu. Nequeꞌxnau nak la̱at catcꞌamoc be chiku riqꞌuin li chok chi cutan ut riqꞌuin li xam chiru kꞌojyi̱n.

¹⁵ Cui la̱at ta̱sach ruheb la̱ tenamit chi junaj cua, eb aꞌan teꞌa̱tinak cha̱cuix ut teꞌxye:

¹⁶ —Li Ka̱cuaꞌ incꞌaꞌ quiru rocsinquileb lix tenamit saꞌ li naꞌajej aꞌin usta quixyechiꞌi reheb riqꞌuin juramento. Joꞌcan nak quixcamsiheb saꞌ li chaki chꞌochꞌ, chaꞌkeb.

¹⁷ Joꞌcan nak la̱in tintzꞌa̱ma cha̱cuu, at Ka̱cuaꞌ, nak ta̱cꞌut chiku lix nimal la̱ cuanquil. Chaba̱nu li cꞌaꞌru cayechiꞌi ke nak caye ke chi joꞌcaꞌin:

¹⁸ La̱in li Ka̱cuaꞌ li nimajcual Dios. La̱in nin-uxta̱nan u ut nincuy li ma̱usilal nequeꞌxba̱nu li tenamit usta nequeꞌxkꞌetkꞌeti rib chicuu. La̱in incꞌaꞌ ninjoskꞌoꞌ chi junpa̱t. Numtajenak lin rahom. Incꞌaꞌ nincanabeb yal chi joꞌcan li cuanqueb xma̱c. Ut ninrahobtesiheb li alal cꞌajolbej riqꞌuin lix ma̱queb lix naꞌ xyucuaꞌeb toj saꞌ li rox saꞌ xca̱ xtasalil li ralal xcꞌajoleb, chancat.

¹⁹ Xban xnimal la̱ cuuxta̱n chacuy taxak xma̱queb li tenamit aꞌin joꞌ nak xacuy xma̱queb chalen nak xeꞌel chak Egipto toj chalen anakcuan, chan laj Moisés.

²⁰ Li Ka̱cuaꞌ quixye re laj Moisés: —La̱in tincuyeb xma̱c joꞌ xatzꞌa̱ma chicuu.

²¹ Relic chi ya̱l tinye a̱cue nak la̱in yoꞌyo̱quin ut saꞌ xcꞌabaꞌ lin lokꞌal li naqꞌueheꞌ saꞌ ruchichꞌochꞌ,

²² tinye a̱cue nak ma̱ jun reheb li cui̱nk aꞌin li xeꞌcuechꞌin cue teꞌoc saꞌ li naꞌajej li quinyechiꞌi reheb. Eb aꞌan queꞌril lin lokꞌal ut queꞌril ajcuiꞌ li sachba chꞌo̱lej li quinba̱nu aran Egipto joꞌqueb ajcuiꞌ li sachba chꞌo̱lej li quinba̱nu saꞌ li chaki chꞌochꞌ. Abanan nabal sut queꞌxyal cuix ut incꞌaꞌ queꞌxba̱nu li cꞌaꞌru quinye reheb.

²³ Joꞌcan nak incꞌaꞌ teꞌril li cha̱bil naꞌajej li quinyechiꞌi reheb lix xeꞌto̱nil yucuaꞌeb. Ma̱ jun reheb li xeꞌqꞌuehoc injoskꞌil teꞌoc saꞌ li cha̱bil naꞌajej li quinyechiꞌi reheb.

²⁴ Abanan laj Caleb li naxqꞌue xchꞌo̱l chi cꞌanjelac chicuu, aꞌan jalan xnaꞌleb chiruheb li jun chꞌol. Aꞌan tinqꞌue chi oc saꞌ li naꞌajej li quicuulac chak rilbal. Ut eb li ralal xcꞌajol teꞌe̱chani̱nk re li naꞌajej aꞌan.

²⁵ Eb laj Amalec ut eb laj Canaán cuanqueb saꞌ li ru takꞌa aꞌan. Joꞌcan nak la̱ex texsukꞌi̱k cuulaj saꞌ li chaki chꞌochꞌ ut texxic cuan cuiꞌ li Caki Palau, chan li Dios.

²⁶ Ut li Ka̱cuaꞌ quia̱tinac cuiꞌchic riqꞌuin laj Moisés ut laj Aarón ut quixye reheb:

²⁷ —¿Joꞌ najtil chic tincuy nak yo̱keb chincuechꞌinquil eb laj Israel, li incꞌaꞌ useb xnaꞌleb? La̱in nacuabi nak nequeꞌxcuechꞌi cuix.

²⁸ Ta̱ye reheb chi joꞌcaꞌin: —Relic chi ya̱l yoꞌyo̱quin la̱in li Ka̱cuaꞌ. La̱in tinba̱nu nak te̱cꞌul li cꞌaꞌru yo̱quex chixyebal.

²⁹ Relic chi ya̱l ninye e̱re nak saꞌ li chaki chꞌochꞌ aꞌin texca̱mk che̱junilex la̱ex li quex-ajla̱c, li ac cuan junmay chihab e̱re, xban nak xecuechꞌi cuix.

³⁰ Relic chi ya̱l nak ma̱ jun e̱re la̱ex tex-oc saꞌ li naꞌajej quinyechiꞌi e̱re riqꞌuin juramento. Caꞌaj cuiꞌ eb laj Caleb li ralal laj Jefone ut laj Josué li ralal laj Nun naru teꞌoc.

³¹ Abanan le̱ ralal e̱cꞌajol li queye nak teꞌchapekꞌ xbaneb li xicꞌ nequeꞌiloc e̱re, aꞌan eb li tebinqꞌue chi cua̱nc aran saꞌ li naꞌajej li xetzꞌekta̱na.

³² Aꞌut la̱ex texca̱mk saꞌ li chaki chꞌochꞌ li yo̱quex cuiꞌ chi numecꞌ.

³³ Eb le̱ ralal e̱cꞌajol teꞌcua̱nk saꞌ li chaki chꞌochꞌ. Chiru caꞌcꞌa̱l chihab teꞌxbeni ribeb. Teꞌxcꞌul chi joꞌcan toj ta̱cuulak xkꞌehil nak texca̱mk che̱junilex saꞌ li chaki chꞌochꞌ xban nak xekꞌetkꞌeti e̱rib.

³⁴ Chiru caꞌcꞌa̱l chihab yo̱kex chi be̱c saꞌ li chaki chꞌochꞌ re xtojbal rix le̱ ma̱c. Jun chihab te̱toj cuiꞌ rix li ju̱nk cutan nak quexcuulac chak xqꞌuebal retal li naꞌajej. La̱ex te̱qꞌue retal nak li ani nakꞌetoc re li cua̱tin, tento nak tixtoj rix lix ma̱c.

³⁵ Relic chi ya̱l nak tinba̱nu e̱re joꞌ xinye xban nak junaj e̱chꞌo̱l nak xekꞌetkꞌeti e̱rib chicuu. Saꞌ li chaki chꞌochꞌ aꞌin tex-osokꞌ. Arin texca̱mk, chan li Ka̱cuaꞌ.

³⁶ Eb li tenamit queꞌoc chi cuechꞌi̱nc xma̱queb li cui̱nk li queꞌtakla̱c xban laj Moisés chixqꞌuebal retal li naꞌajej Canaán xban nak moco ya̱l ta li coleꞌxye chirix li naꞌajej.

³⁷ Eb li cui̱nk aꞌan queꞌcam xban nak li Dios quixtakla chak jun li caki yajel saꞌ xbe̱neb xban nak incꞌaꞌ us queꞌxye chirix li naꞌajej.

³⁸ Saꞌ xya̱nkeb li cablaju chi cui̱nk li queꞌco̱eb chirilbal li naꞌajej, caꞌaj chic eb laj Josué li ralal laj Nun ut laj Caleb li ralal laj Jefone queꞌcana chi yoꞌyo.

³⁹ Nak laj Moisés quixye resil reheb li cꞌaꞌru quixye li Ka̱cuaꞌ chixjunileb laj Israel queꞌrahoꞌ saꞌ xchꞌo̱leb.

⁴⁰ Joꞌ cuulajak chic nak toj ekꞌela chi us queꞌco̱eb saꞌ xbe̱n jun li tzu̱l ut queꞌxye: —Ya̱l nak xoma̱cob, abanan anakcuan toxic saꞌ li naꞌajej li quixyechiꞌi ke li Ka̱cuaꞌ, chanqueb.

⁴¹ Ut laj Moisés quixye reheb: —¿Cꞌaꞌut nak yo̱quex chixkꞌetbal li cꞌaꞌru xye li Dios? Cui tex-oc saꞌ li naꞌajej aꞌan, incꞌaꞌ us tex-e̱lk.

⁴² Mexxic xban nak li Ka̱cuaꞌ moco cuan ta chic e̱riqꞌuin. Eb li xicꞌ nequeꞌiloc e̱re teꞌnumta̱k saꞌ e̱be̱n.

⁴³ Cui texpletik riqꞌuineb laj Amalec ut riqꞌuineb laj Canaán texcamsi̱k xbaneb. Li Dios incꞌaꞌ textenkꞌa xban nak xekꞌet li cꞌaꞌru quixye, chan laj Moisés reheb.

⁴⁴ Abanan incꞌaꞌ queꞌabin chiru laj Moisés. Queꞌco̱eb ban saꞌ li naꞌajej li tzu̱l ru. Laj Moisés ut li Lokꞌlaj Ca̱x incꞌaꞌ queꞌel saꞌ li naꞌajej li cuanqueb cuiꞌ lix muheba̱leb.

⁴⁵ Ut eb laj Amalec ut eb laj Canaán li cuanqueb saꞌ li naꞌajej li tzu̱l ru, queꞌcube chi pletic riqꞌuineb ut queꞌnumta saꞌ xbe̱neb. Queꞌra̱linaheb toj saꞌ li naꞌajej Horma.